Eaha to roto?

Tapura tumu parau

 TUMU PARAU HAAPIIRAA 22

Ia aravihi atu â i te haapii ia outou iho!

Ia aravihi atu â i te haapii ia outou iho!

“Ia taa maitai ia outou eaha te mea faufaa roa ’‘e.”—PHIL. 1:10.

HIMENE 35 Rave ana‘e i te mea faufaa roa ’‘e

HAAPOTORAA *

1. No te aha e ere i te mea ohie no vetahi ia rave i ta ratou iho haapiiraa Bibilia?

MEA fifi te oraraa i teie mau mahana hopea! No te faatamaa i to ratou utuafare, te ohipa nei te tahi mau taeae e rave rahi hora, te tere nei vetahi na nia i te pereoo i te vahi atea, area te tahi atu e ohipa rohirohi mau ïa ta ratou. Ia hope te mahana, ua rohirohi roa tera mau taeae e tuahine! E ere atura ïa i te mea ohie ia rave i ta ratou iho haapiiraa Bibilia.

2. Eaha te taime ta outou i maiti no te haapii i te Bibilia?

2 E titauhia ia faaherehere i te taime no te haapii maite i te Parau a te Atua e te mau papai Kerisetiano. Mea faufaa te reira no te vai piri noa ia Iehova e no te fana‘o i te ora mure ore. (Tim. 1, 4:15, 16) I te mau mahana atoa, e ara oioi vetahi no te haapii i te Bibilia, e taime tano no te feruri maite e aita e maniania i te fare. No te tahi atu, e rave ratou maa minuti i te hopea mahana no te haapii e no te feruriruri.

3-4. Eaha te tahi mau faanahoraa i ravehia no nia i ta tatou mau papai e no te aha?

3 E titauhia ia faaherehere i te taime, mea faufaa atoa râ ta tatou e maiti i te haapii. Te vai ra te tahi mau taeae e tuahine o te taio pauroa nei i te maa pae varua. E na ô râ paha outou, ‘Eita e pau ia taio i te mau papai atoa!’ Ua ite te Tino aratai i te reira, faaoti atura ratou i te faaiti mai i te mau papai.

 4 Ei hi‘oraa, ua faaea te faanahonahoraa i te pia i te Buka matahiti a te mau Ite no Iehova. E nehenehe râ e taio e e mataitai i te mau aamu faaitoito mau i nia i te jw.org® aore ra i te JW Haapurororaa teata. I teie nei, e toru ana‘e Pare Tiairaa e A ara mai na! te matara i te matahiti hoê. Aita tera mau faanahoraa i ravehia ia horoa tatou i te taime i roto i te tahi atu mau ohipa. Ua na reirahia râ ia haapao maite tatou “eaha te mea faufaa roa ’‘e”! (Phil. 1:10) E hi‘o ana‘e e nafea ia taa maitai eaha te tuu i te parahiraa matamua e e nafea tatou ia faufaahia i ta tatou iho haapiiraa Bibilia.

TE TITAUHIA IA HAAFAUFAA NA MUA

5-6. Eaha te mau papai te titauhia ia haafaufaa i roto i ta tatou iho haapiiraa Bibilia?

5 Eaha te titauhia ia haafaufaa na mua? O te haapiiraa ïa i te Parau a te Atua i te mau mahana atoa. Ua faaitihia mai te mau pene o te taioraa Bibilia o te putuputuraa o te hebedoma. E taime rahi atu â ïa to tatou no te feruriruri e no te rave i te mau maimiraa. Eita râ e navai noa ia taio, mea faufaa atoa ia putapû to tatou aau i te poroi Bibilia a piri roa ’tu ai tatou ia Iehova.—Sal. 19:14.

6 Eaha ’tu â te faaô i roto i ta tatou iho haapiiraa Bibilia? Mea faufaa atoa ia faaineine no te mau putuputuraa atoa mai te Haapiiraa o Te Pare Tiairaa, te Haapiiraa Bibilia a te amuiraa e te tahi atu mau tuhaa o te putuputuraa. E titau-atoa-hia ia taio i te mau Pare Tiaraa e A ara mai na! atoa.

7. E nafea ia ore e tia ia tatou ia taio i te mau mea atoa i nia i ta tatou tahua natirara jw.org e te JW Haapurororaa teata?

7 E na ô paha outou, ‘Mea rahi atoa te titauhia ia taio e ia mataitai i nia i ta tatou tahua natirara jw.org e te JW Haapurororaa teata!’ A feruri na i teie faahoho‘araa: Ia haere outou i te fare tamaaraa e rave rahi maa te tuuhia i nia i te airaa maa. Eita iho â te hoani e nehenehe e amu i te mau maa atoa. E maiti râ ratou i te amu tau maa rii noa. I nia i ta tatou mau reni, eita atoa e tia ia tatou ia amu i te maa pae varua atoa e pûpûhia mai. Na tatou iho ïa e hi‘o eaha te taio e te mataitai ia au i te maraa ia tatou. I teie nei, e hi‘opoa ana‘e i te tahi mau mana‘o tauturu no te haamaitai atu â i ta tatou iho haapiiraa ia faufaahia tatou i te reira.

A TUTAVA NO TE HAAPII IA OUTOU IHO!

8. Eaha te tahi mau mana‘o tauturu no te faaineine i te Haapiiraa o Te Pare Tiairaa e e nafea tatou e faufaahia ’i ia na reira?

8 Ia faufaahia tatou, eita e navai noa ia taio e ia reni i te mau pahonoraa. E titau-atoa-hia ia feruri maite i ta tatou e haapii ra. Ia faaineine outou i te Haapiiraa o Te Pare Tiairaa, a taio na mua i te haapotoraa i te omuaraa o te tumu parau. Ia oti, a feruri i te upoo parau, te mau upoo parau iti e te mau uiraa haamana‘oraa. A taio maite ai  i te haapiiraa, a feruri i te mana‘o faufaa e matara mai ra i roto i te paratarafa tataitahi. A tamata atoa i te taa e nafea te paratarafa e tuati ai i te upoo parau iti e i te mana‘o tumu o te haapiiraa. A tapaopao i te mau ta‘o matau-ore-hia e te mau mana‘o e titauhia ia rave i te maimiraa.

9. (a) No te aha e e nafea ia haapao maite i te mau irava e horoahia i roto i Te Pare Tiairaa? (b) Ia au i te Iosua 1:8, eaha te titau-atoa-hia ia rave a taio ai i te mau irava Bibilia?

9 E haapiiraa Bibilia te Haapiiraa o Te Pare Tiairaa. A haapao maite ïa i te mau irava Bibilia e horoahia, te mau irava iho â râ e taiohia i mua i te amuiraa. I roto i te mau irava atoa, a imi eaha te mau parau e turu ra i te mana‘o faufaa o te paratarafa. A feruri maite atoa e nafea ia faaohipa i ta outou i haapii mai i roto i to outou oraraa.—A taio i te Iosua 1:8.

E te mau metua, a faaite i ta outou tamarii e nafea ia haapii ia ratou iho! (A hi‘o i te paratarafa 10) *

10. Ia au i te Hebera 5:14, no te aha e titauhia ia faaite i te tamarii e nafea ia haapii ia ratou iho e ia rave i te maimiraa?

10 E hinaaro te mau metua ia oaoa ta ratou tamarii i te haamoriraa utuafare. E faaineine atea te mau metua i ta ratou e rave i tera arui, eita râ e titauhia i te hoê faanahoraa taa ê i te mau hebedoma atoa. E nehenehe hoi e mataitai i te JW Haapurororaa teata e i te tahi atu taime, e faatupu i te hoê ohipa taa maitai mai te hamaniraa i te araka o Noa. Mea faufaa atoa hoi ia faaite i te mau tamarii e nafea ia haapii ia ratou iho. E nafea ia faaineine no te mau putuputuraa aore ra ia rave i te maimiraa no te tahi tupuraa i te fare haapiiraa. (A taio i te Hebera 5:14.) Ia matau ratou i te haapii ia ratou iho i te fare, mea ohie no te tamarii ia pee maite i te mau putuputuraa e tairururaa. E titauhia ia haapao i te faito matahiti e te huru o te tamarii no te faaoti i te maoro o te haapiiraa.

11. No te aha mea faufaa ia faaite i te piahi e nafea ia haapii ia ’na iho?

11 E titau-atoa-hia ia faaite i ta tatou piahi e nafea ia haapii ia ’na iho. I te omuaraa, e mauruuru tatou ia reni noa oia i te pahonoraa no ta ’na haapiiraa  aore ra no te mau putuputuraa. Mea faufaa roa râ ia ite atoa te piahi e nafea ia rave i te maimiraa e i ta ’na iho haapiiraa Bibilia. Ia tupu noa ’tu te hoê fifi, e rave na mua oia i te maimiraa i roto i te mau papai Kerisetiano hou a ani ai i te tauturu i te mau taeae e tuahine.

A HAAMAU I TE FA

12. Eaha te tahi mau fa ta tatou e nehenehe e haamau a rave ai i ta tatou iho haapiiraa?

12 Eiaha e haaparuparu e ere ana‘e outou i te taata o te au i te haapii. I te omuaraa a haapoto mai i te taime o ta outou haapiiraa a faaroa rii mǎrû noa ’tu ai i te reira i muri a‘e. Ua ite tatou te fa matamua o ta tatou iho haapiiraa, no te piri roa ’tu â ïa ia Iehova. Mea maitai atoa ia haamau i te tahi atu fa e naea oioi ia tatou mai te imiraa i te pahonoraa i te hoê uiraa aore ra i te hoê ravea no te faaafaro i te hoê fifi.

13. (a) A faaite e nafea te feia apî ia faataa ia vetahi ê i ta ratou e tiaturi ra. (b) E nafea ia haapao i te a‘oraa i roto i te Kolosa 4:6?

13 E te feia apî, eita e ore te faatupu ra te tahi mau hoa haapiiraa i to ratou oroa fanauraa. E hinaaro paha outou e faaohipa i te Bibilia no te faataa i te tumu e ore ai outou e apiti atu, na te taiâ râ e tapea ra ia outou. E tumu parau maitai tera no ta outou iho haapiiraa Bibilia! E nehenehe outou e haamau e piti fa: (1) Ia papu atu â ia outou mea au ore na te Atua te oroa fanauraa. (2) Ia aravihi atu â outou i te paturu i te parau mau. (Roma 1:20; Pet. 1, 3:15) E ere i te mea ohie ia faataa i ta outou e tiaturi ra, eaha ïa te tauturu atu? A feruri na mua no te aha to outou mau hoa haapiiraa e au ai i tera oroa. E ere anei no te pee noa i te rahiraa? A rave i ta outou iho maimiraa. E nehenehe te mau hoa haavare ore e mauruuru i te hoê aore ra e piti noa mana‘o.—A taio i te Kolosa 4:6.

IA RAHI MAI TO OUTOU ANAANATAE

14-16. (a) E nafea outou a hi‘opoahia ’i te hoê buka ta outou i ore i matau maitai? (b) Ia au i te mau irava faahitihia, e nafea ia taa papu atu â i te buka Amosa? (A hi‘o atoa i te tumu parau “ A haamatau atu â ia ratou!”)

14 A feruri na! I te putuputuraa i mua nei, e hi‘opoahia te hoê buka Bibilia ta outou i ore i matau maitai. E nafea outou?

15 A ui na mua ia outou, ‘Eaha ta ’u i ite no nia i te taata papai? O vai o ’na? Ihea o ’na i te faaearaa? Eaha te mau ohipa ta ’na i rave?’ E nehenehe ïa outou e taa no te aha oia i faahiti ai i te tahi parau aore ra faahoho‘araa. A taio ai i tera buka, a imi i te mau parau e tauturu ia outou ia taa i te huru o te taata papai.

16 Mea maitai atoa ia ite afea tera buka i te papairaahia. A hi‘o i te “Tapura buka Bibilia” i te hopea o te Traduction du monde nouveau. Mai te peu e buka papaihia e te hoê peropheta, e nehenehe atoa e hi‘o i te tuhaa hau A6 no nia i te mau peropheta e arii no Iseraela. A imi eaha te tupuraa  i te tau i papai ai o ’na i tera buka. Eaha te mau peu iino ta te peropheta i faahapa? O vai tei ora atoa na i te hoê â tau? E titau-atoa-hia paha ia hi‘opoa i te tahi atu mau buka Bibilia. Ei hi‘oraa, no te ite eaha tei tupu i te tau o te peropheta Amosa, e titauhia ia taio atoa i Te mau arii 2 e te Paraleipomeno 2.—Arii 2, 14:25-28; Par. 2, 26:1-15; Hos. 1:1-11; Am. 1:1.

A HAAFAUFAA I TE MAU TUHAA RII

17-18. Maoti na hi‘oraa o te paratarafa aore ra te tahi atu, a faataa na e nafea tatou e faufaahia ’i i te mau tuhaa rii o te mau irava Bibilia.

17 Mea faufaa ia taio i te Bibilia ma te imi maite i te mau poe pae varua. A feruri na te taio ra outou i te pene 12 o te buka Zekaria tei tohu no nia i te pohe o te Mesia. (Zek. 12:10) I te irava 12, te tohuhia ra e oto “te fetii o Natana” ia pohe te Mesia. A faaea rii maa taime e a uiui, ‘E auraa fetii anei to Natana e te Mesia? E nafea ia papu?’ Haamana‘o ihora outou ua tohuhia e huaai Iesu na Davida. (Mat. 22:42) E 20 râ tamaiti ta Davida, te taa ra ïa ia outou no te aha Zekaria i faahiti maitai ai o te fetii o Natana te oto mau â i te poheraa o Iesu. *

 18 Teie te tahi atu hi‘oraa. I te pene 1 o te evanelia a Luka, teie ta te melahi Gaberiela i parau ia Maria no nia i te tamaiti i roto i to ’na opu: “E riro oia ei taata faufaa e e parauhia oia Tamaiti a te Teitei, e e horoa te Atua ra o Iehova i te terono o Davida to ’na metua no ’na, e faatere oia ei Arii i nia i te utuafare o Iakoba e a muri noa ’tu.” (Luka 1:32, 33) E faaea noa paha outou i nia i te tuhaa matamua, i te parauraahia “Tamaiti a te Teitei.” A tapao atoa râ ua tohu Gaberiela e faatere Iesu “ei Arii.” E uiraa te hiti mai i teie mau tuhaa rii: Ua mana‘o anei Maria e mono Iesu i te arii Heroda o tei faatere na ia Iseraela? Mai te peu e e, ua mana‘o paha ïa Maria e metua vahine hui arii oia e e ora to ’na utuafare i roto i te aorai! Aita râ rea parau e faaite ra ua paraparau Maria mai tera ia Gaberiela! Aita atoa Maria i titau i te hoê tiaraa faahiahia i roto i te Faatereraa arii mai na pǐpǐ e piti a Iesu. (Mat. 20:20-23) E ere anei Maria i te vahine haehaa mau?

19-20. Ia au i te Iakobo 1:22-25 e te 4:8, e tauturu mai ta tatou iho haapiiraa ia aha?

19 E tauturu mai ta tatou iho haapiiraa Bibilia e te mau papai Kerisetiano ia faafatata ’tu â ia Iehova. E faufaa-mau-hia tatou ia taparu i to Iehova varua mo‘a no te ite i to tatou “huru mau” e te mau tauiraa atoa e titauhia ia rave ia here noa mai oia ia tatou.—A taio i te Iakobo 1:22-25; 4:8.

20 Mai ta te papai Salamo e faahiti ra, ia riro ïa tatou paatoa ei taata o “tei hinaaro . . . i te ture a Iehova; e tei ta ’na ture to ’na mana‘oraa i te rui e te ao. . . . O ta ’na atoa e rave ra, te maitai ra ïa.”—Sal. 1:2, 3.

HIMENE 88 Faaite mai oe i to mau e‘a

^ par. 5 E Atua horoa noa o Iehova e e rave rahi ravea haapiiraa ta ’na. Te vai ra ta tatou e nehenehe e mataitai, e taio e e haapii. E faaite teie tumu parau haapiiraa eaha te maiti no ta tatou iho haapiiraa e e nafea tatou ia faufaahia i te reira.

^ par. 17 I roto i te Traduction du monde nouveau, e arataihia te taata taio i roto i te mau irava faahoro mai te Samuela 2, 5:13, 14 o te parau ra e tamaiti Natana na te arii Davida. E te Luka 3:23, 31, te faaite ra ïa e huaai Iesu na Natana na roto mai i to ’na metua vahine o Maria.—A hi‘o i Te Pare Tiairaa Atete 2017 api 32 paratarafa 4.

^ par. 62 FAATAARAA O TE HOHO‘A: Te tauturu ra na metua i ta raua tamarii ia faaineine i te Haapiiraa o Te Pare Tiairaa

^ par. 64 FAATAARAA O TE HOHO‘A: Te rave ra te tahi taeae i te maimiraa no nia i te peropheta Amosa. Te faaite ra te mau hoho‘a i muri mai i tei hiti mai i roto i te feruriraa o te taeae a taio ai i te aamu Bibilia.