Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2016

E te mau metua, a tauturu i ta outou tamarii ia faatupu i te faaroo

E te mau metua, a tauturu i ta outou tamarii ia faatupu i te faaroo

“Te mau taata apî, . . . o te reira te haamaitai i te i‘oa o Iehova.”—SAL. 148:12, 13.

HIMENE: 88, 115

1, 2. (a) No te aha e ere i te mea ohie no te mau metua ia haapii i ta ratou tamarii ia faatupu i te faaroo ia Iehova? Eaha te ravea otahi e vai ra ia ratou? (b) Eaha na tuhaa faufaa e maha ta tatou e hi‘opoa mai?

UA PARAU na metua i Farani: “Te tiaturi nei mâua ia Iehova, e ere râ te auraa e na reira atoa ta mâua tamarii. Eita te faaroo e nehenehe e horoahia. Na ratou e faatupu mǎrû noa i to ratou iho faaroo.” Ua papai te hoê taeae i Auteralia: “Te tautururaa i ta oe tamarii ia faatupu i te faaroo i roto i to ’na aau, tera paha te mea fifi roa ’‘e ia rave. E mana‘o oe e ua pahono maitai oe i te tahi uiraa a ta oe tamarii. I muri a‘e râ, e tuu faahou mai o ’na i taua noa iho â uiraa! Peneia‘e e oaoa o ’na i te pahonoraa ta oe i horoa i teie mahana, eita râ te reira e navai no ananahi.” A paari mai ai te tamarii, e taa iho â i te mau metua e e titauhia ia faataa roa ’tu â i taua noa â mau parau. Oia atoa ia faaohipa i te mau ravea taa ê no te haapii i ta ratou tamarii ia here ia Iehova.

 2 E te mau metua, e ui paha outou i te tahi taime: E tae anei ia ’u ia haapii i ta ’u tamarii ia here ia Iehova e ia tavini noa ia ’na a paari mai ai? Aita e nehenehe e taio i nia i to tatou iho puai. (Ier. 10:23) Mea faufaa roa ia turui i nia ia Iehova no te tauturu mai. Mea rahi te aratairaa ta ’na i horoa mai. E nafea e tauturu ai i ta outou tamarii? (1) A matau maitai ia ratou. (2) A haapii atu i te mau mea no nia ia Iehova e vai ra i roto i to outou aau. (3) A faaohipa i te mau faahoho‘araa. (4) A pure no te ani i te varua mo‘a e a faaite i te faaoromai ia ratou.

A MATAU MAITAI I TA OUTOU TAMARII

3. E nafea te mau metua e pee ai i te huru haapiiraa a Iesu i nia i ta ’na mau pǐpǐ?

3 E pinepine Iesu i te ani i te mana‘o o ta ’na mau pǐpǐ. (Mat. 16:13-15) A na reira atoa na. A paraparau ai aore ra a rave ai i te ohipa e ta outou tamarii, a ani atu i to ratou mana‘o. A vaiiho ia ratou ia faaite mai i to ratou huru aau. Peneia‘e te feaa ra ratou. Ua parau te hoê taeae, 15 matahiti, i Auteralia: “Pinepine papa i te paraparau mai ia ’u no nia i to ’u faaroo e i te haaferuri mai. E ani mai o ’na: ‘Eaha ta te Bibilia e parau ra?’ ‘Te tiaturi ra anei oe i ta te reira e parau ra?’ ‘No te aha oe e tiaturi ai?’ Hinaaro o ’na ia pahono vau ma ta ’u iho mau parau, eiaha ma te faahiti noa i ta ’na aore ra ta mama mau parau. A paari mai ai, ua tia ia ’u ia faataa ’tu â i ta ’u mau pahonoraa.”

4. No te aha mea faufaa ’i ia faaite i te faaoromai e ia pahono i te uiraa a ta outou tamarii? A faataa.

4 Ia ore ta outou tamarii e tiaturi oioi i te tahi haapiiraa Bibilia, a faaite i te faaoromai. A tauturu atu ia imi i te pahonoraa i ta ratou mau uiraa. Ua parau te hoê papa: “A haafaufaa i te uiraa a ta oe tamarii. Eiaha e ape i tera mau uiraa no te mea te huru ê nei oe.” Mea maitai ia tuu mai ratou i te uiraa, te hinaaro ra ïa ratou e maramarama ’tu â. Ua tuu atoa Iesu i te uiraa i to ’na apîraa. (A taio i te Luka 2:46.) Ua parau te hoê taata apî i Danemata: “I to ’u parauraa e te uiui nei au e tei roto anei matou i te haapaoraa mau, ua faaite noa to ’u na metua i te mǎrû noa ’tu e ua haapeapea raua no ’u. Ua pahono raua i ta ’u mau uiraa atoa ma te faaohipa i te Bibilia.”

I te mau mahana atoa a rave ai i te tahi ohipa e ta outou tamarii, a paraparau no nia ia Iehova

5. Ia aha te mau metua noa ’tu e au ra e te tiaturi ra te tamarii ia Iehova?

5 A matau maitai i ta outou tamarii. Eiaha e mana‘o e te tiaturi nei ratou ia Iehova no te mea noa e poro e e haere ratou i te putuputuraa. Eaha to ratou huru aau no Iehova? Eaha to ratou mana‘o i te Bibilia? A faaitoito i te imi e te vai ra anei te tahi mea o te haafifi ra ia ratou ia vai taiva ore ia Iehova. I te mau mahana atoa a rave ai i te tahi ohipa e ta outou tamarii, a paraparau no nia ia Iehova. A pure no ta outou tamarii, tei pihaiiho ana‘e ratou aore ra aita.

 A HAAPII ATU I TE MAU MEA NO NIA IA IEHOVA E VAI RA I ROTO I TO OUTOU AAU

6. E nafea te iteraa hau atu â no nia ia Iehova e te Bibilia e tauturu ai i te mau metua ia haapii i ta ratou tamarii?

6 Mea au na te taata ia faaroo ia Iesu no te mea ua here o ’na ia Iehova e ua ite maitai i te mau Papai. Ua ite atoa e ua here Iesu ia ratou. Ua faaroo maitai ïa ratou ia ’na. (Luka 24:32; Ioa. 7:46) Oia atoa, ia ite ta outou tamarii i to outou here ia Iehova, e tauturu te reira ia ratou ia here atoa ia ’na. (A taio i te Deuteronomi 6:5-8; Luka 6:45.) A tamau ïa i te haapii maite i te Bibilia, i te taio i ta tatou mau papai, e i te ite atu â no nia i te mau mea ta Iehova i poiete. (Mat. 6:26, 28) Hau atu â outou i te ite no nia ia Iehova, hau atu â ïa mea ta outou e nehenehe e haapii atu no nia ia ’na.—Luka 6:40.

A faaite i ta outou tamarii i ta outou i haapii mai no nia ia Iehova

7, 8. Eaha te rave ia haapii mai outou i te tahi mea no nia ia Iehova? Ua nafea te tahi mau metua?

7 A faaite i ta outou tamarii i ta outou i haapii mai no nia ia Iehova. A na reira i te mau taime atoa, eiaha noa a faaineine ai i te putuputuraa aore ra i te haamoriraa utuafare. O ta te hoê mama e te hoê papa ïa i Marite e rave nei. E paraparau raua no nia ia Iehova i ta raua tamarii a ite ai i te tahi nehenehe o te natura aore ra a amu ai i te hoê maa au mau. Ua na ô raua: “E haamana‘o atu mâua i te tamarii i te here e te haapao maitai o Iehova itehia i roto i te mau mea atoa ta ’na i horoa mai.” No na hoa faaipoipo i Afirika Apatoa, mea au na raua e paraparau no nia i te poieteraa a ohipa ’i i roto i te aua e ta raua na tamahine. Ei hi‘oraa, te riroraa mai te huero ei tumu raau. Ua parau na metua: “E faaitoito mâua i te haapii ia raua ia faaite i te faatura rahi no te ora e no te huru faahiahia o te mau mea poietehia.”

8 Ua afai te hoê papa i Auteralia i ta ’na tamaiti 10 matahiti i te fare faaiteiteraa tao‘a tahito. Ua faaohipa o ’na i tera taime no te tauturu i ta ’na tamaiti ia haapuai i to ’na faaroo e ia papu e o Iehova te Atua poiete. Ua ite raua i te mau animara tahito i ora na i roto i te miti. Ua parau tera papa: “Maere roa mâua, no te mea mai te mau animara i teie mahana, mea nehenehe e mea faahiahia atoa tera mau animara no tahito ra. Ua tauiui te mau mea ora no te riro ei mea faahiahia ’tu â. Mea faahiahia atoa hoi teie mau animara tahito. No te aha? Ua maere roa vau i te reira e ua faaite atu vau i ta ’u tamaiti.”

A FAAOHIPA I TE MAU FAAHOHO‘ARAA

9. No te aha mea maitai ai ia faaohipa i te mau faahoho‘araa? Ua nafea te hoê metua vahine?

9 I faaohipa na Iesu i te mau faahoho‘araa. E haapiiraa faufaa ta ’na i faataa ’tu ma te faatia i te hoê aamu aore ra ma te rave i te hoê hi‘oraa. (Mat. 13:34, 35) Maoti te faahoho‘araa, e faaohipa ta outou tamarii i to ratou feruriraa. E tauturu te reira ia ratou ia feruri i ta oe e haapii atu ra, ia taa maitai e ia haamana‘o i  te reira. E au atoa ratou i te haapii. A hi‘o na i teie mama i Tapone. Ua hinaaro o ’na ia haapii ta ’na na tamaroa e te faaite ra te reva mata‘i o te fenua i to Iehova hinaaro e aupuru ia tatou. E vau matahiti to te hoê tamaroa e e ahuru to te tahi atu. Ua faaohipa ïa o ’na i te hoê faahoho‘araa ta raua e taa. Ua horoa atu o ’na ia raua ra i te û, te tihota e te taofe e ua ani ia raua ia hamani i te taofe na ’na. Te faataa ra tera mama: “Ua haapao maitai raua. I to ’u aniraa ’tu no te aha raua i haapao maitai ai, ua parau mai e ua hinaaro raua e hamani i te taofe mai ta ’u e au. Ua faataa ’tu vau e ua haapao maitai atoa te Atua i te hamaniraa i te mata‘i ora, ia tano te reira no tatou.” Ua oaoa na tamaroa i tera haapiiraa e aita roa ’tu i moehia ia raua!

A faaohipa i te mau faahoho‘araa ohie ia taa no te faaite atu e e Atua poiete to tatou (A hi‘o i te paratarafa 10)

10, 11. (a) Eaha te faahoho‘araa e faaohipa no te faaite i ta outou tamarii e e Atua poiete to tatou? (A hi‘o i te hoho‘a matamua.) (b) Eaha te mau faahoho‘araa ta outou i faaohipa?

10 Eaha te faahoho‘araa e faaohipa no te faaite i ta outou tamarii e e Atua poiete to tatou? E nehenehe outou e tunu e o ’na i te hoê faraoa monamona ma te pee i te aratairaa o te hoê buka. A faataa no te aha mea faufaa ia pee maite i te reira. A horoa ’tu i te hoê apara aore ra te tahi atu maa hotu ia ’na ra e a ani: “Ua ite anei oe e e buka aratai atoa to roto i teie apara?” A tâpû i tera apara na ropu e a horoa ’tu i te hoê huero ma te faataa e tera te buka aratai o te apara. To roto te mau haamaramaramaraa no te hamani i te apara. Mea faahiahia ’tu â râ te reira i te mau haamaramaramaraa no te tunu i te hoê faraoa monamona. A ani atu: “Na te hoê taata i papai i teie buka aratai no te hamani i te faraoa monamona. Na vai ïa i papai i to te apara?” Mai te peu e mea huru paari a‘e te tamarii, e faataa ’tu ïa outou e to roto i te ADN itehia i roto i te huero te mau haamaramaramaraa no te faatupu i te hoê tumu apara e hau atu â apara. A faaite atoa ’tu i te mau hoho‘a e hi‘oraa i te api 10 tae atu i te 20 o te buka rairai E pae uiraa no nia i te tumu o te ora (Farani).

11 Mea rahi te metua e taio nei e ta ratou tamarii te anairaa tumu parau “Mea poietehia anei?” i roto i te A ara mai na! Mea nainai ana‘e te tamarii, e faaohie noa ïa te mau metua i te faataaraa. Ei hi‘oraa, ua faaau na hoa faaipoipo i Danemata i te mau manureva i te mau manu. Ua parau raua: “E au te manureva i te manu. E ofaa anei râ te manureva i te huero a haamahanahana ’tu ai i te  manureva nainai? E titauhia anei i te manu te hoê vahi tauraa taa maitai? E a faaau na i te ta‘i o te manureva e o te manu. O vai ïa te mea maramarama a‘e, tei hamani i te manureva aore ra Tei hamani i te manu?” Ia na reira outou i te haaferuri i ta outou tamarii a uiui atu ai ia ratou. E tauturu atu outou ia faaohipa i to ratou “haapao maitai,” aore ra aravihi i te feruri, e ia haapuai i to ratou faaroo ia Iehova.—Mas. 2:10-12.

12. E nafea e faaohipa ’i i te faahoho‘araa no te haapii i te tamarii e mea tano noa ta te Bibilia e parau ra?

12 E nehenehe e faaohipa i te faahoho‘araa no te haapii i te tamarii e mea tano noa ta te Bibilia e parau ra. Ei hi‘oraa, e taio atu paha outou i te Ioba 26:7. (A taio.) Eiaha e parau noa ’tu e no ǒ mai te mau parau i roto i teie irava ia Iehova ra. A tauturu râ ia ratou ia faaohipa i to ratou feruriraa. E faataa ’tu ïa oe e i te tau o Ioba, aita te rahiraa o te taata i tiaturi e tei roto te fenua i te aore. Ua ite hoi ratou eita te tahi ohipa mai te hoê popo aore ra te hoê ofai e mau i roto i te aore. I tera tau, aita e taata i haapapu atura e tei roto te fenua i te aore, aita hoi i hamanihia ’tura te hi‘o fetia aore ra te manureva o te haere na te reva teitei. Te haapiiraa? Noa ’tu e ua papaihia te Bibilia mea maoro i teie nei, mea tano noa iho â te reira. No ǒ mai hoi ia Iehova ra.—Neh. 9:6.

A HAAPII ATU NO TE AHA MEA MAITAI IA ARATAIHIA E TE BIBILIA

13, 14. E nafea te mau metua e nehenehe ai e haapii i ta ratou tamarii ia pee i ta te Bibilia e parau ra?

13 Mea faufaa atoa ia haapii atu outou e e oaoa ’tu â ratou a pee ai i ta te Bibilia e parau ra. (A taio i te Salamo 1:1-3.) Ei hi‘oraa, a ani i ta outou tamarii ia feruri e e haere ratou e ora i nia i te hoê motu. Mea tia ia maiti ratou i te tahi mau taata no te ora ia ratou ra. A ui: “O teihea huru taata ta outou e rave ia maitai noa outou paatoa?” I reira, a taio i te Galatia 5:19-23 no te hi‘o o teihea huru taata ta Iehova e hinaaro ra i roto i te ao apî.

14 E piti ïa haapiiraa ta te tamarii e apo mai. A tahi, te haapii mai ra Iehova e nafea ia fana‘o i te hoê oraraa oaoa i teie nei â e ia vai noa te hau e te tahi atu. Te piti, te haapii mai ra o ’na e nafea ia ora i roto i te ao apî. (Isa. 54:13; Ioa. 17:3) E nehenehe atoa outou e faaite atu e nafea te Bibilia i tauturu ai i to tatou mau taeae. A imi paha i te tahi faatiaraa i roto i ta tatou mau papai, peneia‘e i roto i te anairaa tumu parau “Ua taui te Bibilia i to ’u oraraa” i roto i Te Pare Tiairaa. Aore ra a ani i te tahi Kerisetiano i roto i ta outou amuiraa ia faatia mai i mua i te tamarii e nafea te Bibilia i tauturu ai ia ’na ia taui no te faaoaoa ia Iehova.—Heb. 4:12.

15. Eaha te tauturu ia outou ia haapii i ta outou tamarii?

15 A faaohipa i to outou feruriraa ia oaoa e ia anaanatae ta outou tamarii i te haapii. A feruri i te mau ravea taa ê o te tauturu ia ratou ia oaoa i te haapii no nia ia Iehova e ia haafatata ’tu â ia ’na. A na reira noa e a paari roa mai ai ratou. Ua parau te hoê papa: “Eiaha e rohirohi i te tamata i te mau ravea apî no te faataa ’tu i te mau mea tahito.”

 A PURE NO TO IEHOVA VARUA MO‘A E A FAAITE I TE FAAOROMAI

16. No te aha mea faufaa roa ’i ia faaite i te faaoromai a haapii ai i te tamarii? Ua nafea te tahi mau metua?

16 Maoti te tauturu a te varua o Iehova, e nehenehe ta outou tamarii e fana‘o i te faaroo puai. (Gal. 5:22, 23) E titauhia râ te taime. A faaite ïa i te faaoromai e a tamau i te haapii ia ratou. Ua parau te hoê papa i Tapone, hoê tamaroa e hoê tamahine ta ’na: “No ta mâua tamarii, e tari‘a faaroo noa to mâua. Mai to raua nainairaa, e haapii atu vau ia raua 15 minuti i te mahana taitahi, eiaha râ i te mahana e putuputuraa ta matou. E ere i te mea fifi roa 15 minuti no matou e no raua.” Ua papai te hoê tiaau haaati: “Ei taurearea, mea rahi roa ta ’u uiraa e feaaraa ta ’u i ore i faahiti a‘enei. Ua pahonohia râ te reira i te mau putuputuraa, i ta ’u iho haapiiraa Bibilia aore ra i te haapiiraa utuafare. No reira mea faufaa ’i ia tamau noa te mau metua i te haapii i ta ratou tamarii.”

No te haapii maitai i te tahi atu, e mea tia ia haafaufaa outou i te Parau a te Atua (A hi‘o i te paratarafa 17)

17. No te aha mea faufaa ’i ia haapuai te mau metua i to ratou iho faaroo? E nafea na metua i Bermudes e tauturu ai i ta raua mau tamahine ia tiaturi ia Iehova?

17 Mea rahi ta te tamarii e haapii mai ia ite ratou e mea puai to outou faaroo ia Iehova. E hi‘o ratou i ta outou e rave. A tamau ïa i te haapuai i to outou iho faaroo. Ia ite ratou mai te aha mau na Iehova no outou. A hi‘o na i teie na metua i Bermudes. A haapeapea ’i raua no te tahi ohipa, e pure raua e ta raua mau tamahine a ani atu ai ia Iehova te aratairaa. E faaitoito atoa ’tu raua ia na reira. Te parau ra raua: “E parau atoa mâua i ta mâua matahiapo, ‘A tiaturi papu ia Iehova, a tamau noa i ta oe taviniraa e eiaha e haapeapea roa.’ Ia ite oia i te faahopearaa, e taa ia ’na e te tauturu mai ra Iehova. Puai atu â ïa to ’na faaroo i te Atua e i te Bibilia.”

18. Eaha te titauhia ia haamana‘o te mau metua?

18 E te mau metua, a haamana‘o: Eita e nehenehe e faahepo i te tamarii ia faatupu i te faaroo. Na outou e tanu e e faarari atu i te pape, na Iehova râ e faatupu mai. (Kor. 1, 3:6) A ohipa puai ïa no te haapii i ta outou tamarii here no nia ia ’na. A pure ia tauturu to ’na varua mo‘a ia ratou ia faatupu i te faaroo. E haamaitai mai iho â Iehova.—Eph. 6:4.