Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2016

“Eiaha ia toaruaru to rima”

“Eiaha ia toaruaru to rima”

“Eiaha ia toaruaru to rima.”—ZEPH. 3:16.

HIMENE: 81, 32

1, 2. (a) Eaha te mau fifi ta e rave rahi e ite ra i teie mahana, e eaha te faahopearaa? (b) Eaha te tiaturiraa papu ta te Isaia 41:10, 13 e horoa mai ra?

TE PARAU ra te hoê tuahine e pionie tamau oia e o tei faaipoipohia i te hoê taeae matahiapo: “Noa ’tu e atuatu noa vau i to ’u maitai pae varua, ua faaruru vau i to ’u ahoaho e rave rahi matahiti. Aita to ’u taoto e topa, e haafifi to ’u ea e to ’u huru i nia ia vetahi ê e i te tahi mau taime, e hinaaro vau e taora i te tauera.”

2 E nehenehe anei ta oe e taa i te mau huru aau hohonu o teie tuahine? Teie râ hoi, te ora nei tatou i roto i te ao ino a Satani, te faaruru nei ïa tatou e rave rahi faaheporaa. Mai te hoê tutau tei tapea i te pahi, e nehenehe te ahoaho e faateimaha aore ra e haaparuparu ia tatou. (Mas. 12:25) No te aha e ahoaho ai oe? Peneia‘e te mauiui ra paha oe no te pohe o tei herehia aore ra te faaoromai ra oe i mua i te tahi ma‘i ino mau aore ra te faaû ra oe i te hamani-ino-raa. Aore ra mea fifi paha ia aupuru i to oe utuafare no te fifi i te pae moni. A mairi noa ’i te mahana, e nehenehe te hepohepo rahi e haaparuparu ia oe a ere ai i to oe oaoa. Tera râ, e nehenehe oe e tiaturi e ua ineine te Atua i te tauturu ia oe.—A taio i te Isaia 41:10, 13.

3, 4. (a) E nafea te Bibilia i te faaohiparaa i te ta‘o “rima”? (b) Eaha te nehenehe e turai ia oe ia taora i te tauera?

 3 E faaohipa pinepine te Bibilia i te tahi mau tuhaa o te tino no te faataa i te mau huru maitatai aore ra haaraa a te hoê taata. Ei hi‘oraa, hanere taime te faahiti-raa-hia te ta‘o “rima.” Ia parau te Bibilia e ua faaitoitohia te rima o te hoê taata, te auraa ïa e, ua faaitoitohia, ua puaihia e ua ineine oia i te ohipa. (Sam. 1, 23:16; Ezr. 1:6) Te auraa atoa ïa e e mana‘o maitai to ’na e e tiaturiraa to ’na no a muri a‘e.

4 I te tahi mau taime, ua faataa paha te Bibilia i te hoê taata o tei faatopa i to ’na rima. Mai te hoê taata ïa o tei paruparu aore ra o tei ere i to ’na tiaturiraa. (Par. 2, 15:7; Heb. 12:12) Ia ahoaho aore ra ia rohirohi oe aore ra ia mana‘o oe e ua iti mai to oe auhoaraa e o Iehova, e hinaaro paha oe e taora i te tauera. Ihea oe e ite ai i te faaitoitoraa? E nafea oe e tauturuhia e e faaitoitohia ’i ia faaoromai e ia oaoa?

“AORE TE RIMA O IEHOVA I POTO, E ORE E TIA ’I IA ’NA IA FAAORA”

5. (a) Eaha to tatou huru ia faaruru tatou i te fifi e eaha te tia ia tatou ia haamana‘o? (b) Eaha ta tatou e hi‘opoa mai?

5 A taio i te Zephania 3:16, 17. Eiaha tatou e mǎta‘u e e haaparuparu aore ra e faatopa i to tatou rima i roto i te fifi. Te titau manihini mai ra to tatou Atua î i te here ra o Iehova ia huri i to tatou ahoaho i nia ia ’na. (Pet. 1, 5:7) Te tapitapi mai ra Iehova ia tatou mai ta ’na i na reira i nia i te nunaa Iseraela. Ua parau oia ia ratou e aita to ’na rima “i poto, e ore e tia ’i ia ’na ia faaora.” Ua ineine noa oia i te faaora i ta ’na mau tavini taiva ore. (Isa. 59:1) I roto i teie tumu parau, e hi‘opoa mai tatou e toru hi‘oraa Bibilia faahiahia mau o te faaite ra i to Iehova hinaaro e e aravihi no te faaitoito i to ’na nunaa ia rave i to ’na hinaaro noa ’tu te mau fifi ino mau. E hi‘o mai tatou e nafea teie mau hi‘oraa e faaitoito ai ia oe.

6, 7. Eaha ta tatou e haapii mai i te upootiaraa mai Iseraela i nia i te mau ati Amaleka?

6 I muri iti a‘e i to te mau Iseraela tiamâraa mai i te faatîtîraa a to Aiphiti, ua aro atu te mau ati Amaleka ia ratou. Ua parau Mose ia Iosua, te hoê taata itoito, ia aratai ia Iseraela i te tama‘i. I muri iho, ua rave Mose ia Aarona e ia Hura na muri ia ’na no te haere i nia i te aivi i pihaiiho. I reira, e nehenehe ta ratou e ite i te tama‘i e tupu ra. Ua horo ê anei teie na taata e toru i tera tama‘i no to ratou mǎta‘u? Aita roa ’tu!

7 Ua pee Mose i te hoê faanahoraa o tei tauturu i te mau Iseraela ia upootia mai i te tama‘i e te mau ati Amaleka. Ua tapea Mose i te raau a te Atua mau i roto i to ’na rima a amo atu ai i nia. Ma te na reira, ua horoa Iehova i te puai i te mau Iseraela ia aro i te mau ati Amaleka. Tera râ, ua haamata to Mose rima i te topa no te teiaha, no reira te mau ati Amaleka i haamata ’i i te upootia. Ua haa oioi o Aarona raua Hura i te tauturu ia Mose. “Ua rave ihora raua i te hoê ofai, tuu ihora i raro a‘e ia ’na, e ua parahi ihora oia i nia iho; e ua mau a‘era Aarona raua o Hura i tana rima, hoê i te tahi pae, hoê hoi i te tahi pae; aore a‘era tana rima aueue e mairi noa ’tura te mahana.” Maoti ïa te rima puai o te Atua i upootia mai ai te mau Iseraela.—Exo. 17:8-13.

8. (a) Eaha ta Asa i rave i mua i te haafifiraa a to Kusa ia Iuda? (b) E nafea tatou e pee ai i te hi‘oraa o Asa?

 8 Ua ineine atoa Iehova i te faaohipa i to ’na rima puai no te tauturu i to ’na nunaa i te tau o te arii Asa. Te faahiti ra te Bibilia e rave rahi nuu faehau. Te nuu rahi roa ’‘e râ, na Zera ati Kusa ïa, 1 000 000 faehau aravihi. Ua tataipiti te nuu faehau Kusa i te nuu faehau a Asa. Ua haamata anei Asa i te ahoaho, i te mǎta‘u aore ra i te haaparuparu? Ua faatopa anei oia i to ’na rima? Aita! Ua ani oioi Asa i te tauturu no ǒ mai ia Iehova ra. No te mau faehau, eita paha e nehenehe e upootia mai i te tama‘i e te feia no Kusa. “E tia râ te mau mea atoa nei i te Atua.” (Mat. 19:26) Ua faaohipa te Atua i to ’na puai rahi e ua “pohe ihora to Kusa ia Iehova, i te aro o Asa,” e tei tia râ to ’na “aau ia Iehova e hope roa a‘era o ’na pue mahana.”—Par. 2, 14:8-13; Arii 1, 15:14.

9. (a) Na te aha i tauturu ia Nehemia ia tapea i ta ’na faaotiraa e hamani faahou i te patu o Ierusalema? (b) Mea nafea te Atua i te pahonoraa i te pure a Nehemia?

9 I to Nehemia haereraa ’tu i Ierusalema, eaha ta ’na i ite? Ua ite oia i te mau enemi no te fenua ěê mai e haafifi ra i te mau ati Iuda, no reira ratou i faaea ’i i te hamani i te mau patu o Ierusalema. Aita te oire i paruruhia e ua haaparuparu te reira i te mau ati Iuda. Eaha te huru o Nehemia? Ua haaparuparu anei te reira ia ’na, a faatopa ’i oia i to ’na rima? Aita! Mai ia Mose, Asa e te tahi atu mau tavini taiva ore a Iehova, ua tiaturi noa Nehemia ia Iehova. I roto atoa i teie tupuraa, ua ani Nehemia i ta Iehova tauturu e ua pahono atu Iehova ia ’na. Ua faaohipa te Atua i to ’na “mana rahi” e “rima puai” no te faaitoito i te mau ati Iuda. (A taio i te Nehemia 1:10; 2:17-20; 6:9.) Te tiaturi ra anei oe e te faaohipa ra Iehova i to ’na “mana rahi” e “rima puai” no te faaitoito i to ’na mau nunaa i teie mahana?

E FAAITOITO IEHOVA I TO TATOU RIMA

10, 11. (a) E nafea Satani e turai ai ia tatou ia faatopa i to tatou rima? (b) Eaha ta Iehova e faaohipa no te faaitoito ia tatou e no te horoa mai i te puai? (c) E nafea tatou e fana‘o ai i ta Iehova mau haapiiraa?

10 Ua papu ia tatou e eita roa ’tu te Diabolo e faatopa i to ’na rima. E tamau râ oia i te aro ia tatou ia faaea tatou i ta tatou taviniraa Kerisetiano. E faaohipa oia i te haavare, te haafifiraa a te hau fenua, te mau aratai haapaoraa e te mau apotata. Eaha ta ’na fa? Te hinaaro ra oia e tapea i te pororaa i te parau apî oaoa a te Faatereraa arii. Te hinaaro ra Iehova e tauturu ia tatou e e nehenehe ta ’na e rave i te reira ma te horoa mai i to ’na varua mo‘a no te faaitoito ia tatou. (Par. 1, 29:12) Mea faufaa roa ia ani tatou i to te Atua varua mo‘a no te aro ia Satani e i ta ’na ao ino. (Sal. 18:39; Kor. 1, 10:13) Te haamauruuru atoa ra tatou i te tauturu ta tatou e fana‘o ra no ǒ mai i te Parau a te Atua. A feruri atoa na i te rahiraa haapiiraa i roto i ta tatou mau papai i te mau ava‘e atoa. Ua  faahitihia te mau parau o te Zekaria 8:9, 13 (A taio) a patu-faahou-hia ’i te hiero i Ierusalema, e nehenehe râ teie mau parau e tauturu ia tatou i teie mahana.

Mea faufaa roa ia ani tatou i to te Atua varua mo‘a no te aro ia Satani e i ta ’na ao ino

11 Te faaitoito atoa mai ra Iehova ia tatou maoti te mau haapiiraa ta tatou e fana‘o ra i ta tatou mau putuputuraa Kerisetiano e te mau tairururaa e oia atoa i te haapiiraa Kerisetiano. E tauturu mai teie mau haapiiraa ia tavini i te Atua ma te mau mana‘o turai maitatai, ia haamau i te mau fa e ia haapao i ta tatou mau hopoia Kerisetiano. (Sal. 119:32) Te hinaaro mau ra anei oe e fana‘o atu â i te itoito no ǒ mai i ta Iehova mau haapiiraa?

12. Eaha te tia ia tatou ia rave no te vai puai noa?

12 Ua tauturu Iehova i to ’na nunaa ia upootia mai i nia i te ati Amaleka e to Kusa, e ua horoa oia i te puai ia Nehemia e i te mau ati Iuda no te faaoti i te mau patu o Ierusalema. E horoa atoa mai te Atua i te puai no te tamau i te rave i ta tatou ohipa pororaa noa ’tu to tatou iho mau ahoaho, te mau patoiraa e te tâu‘a ore ta vetahi ê e faaite ra. (Pet. 1, 5:10) Eita Iehova e faaore i to tatou mau fifi ma te hoê semeio. Mea tia râ ia rave tatou i ta tatou tuhaa. E nafea? Mea titauhia ia taio i te Parau a te Atua i te mau mahana atoa, ia faaineine e ia haere i ta tatou mau putuputuraa i te mau hebedoma atoa, ia tamau i ta tatou iho mau haapiiraa Bibilia, te haamoriraa utuafare e ia tiaturi ia Iehova na roto i te pure. Eiaha tatou e vaiiho i te tahi noa ’‘e ohipa e haafifi i te mau mea ta Iehova i horoa mai no te haapuai e no te faaitoito ia tatou. Ia mana‘o tatou e te topa ra to tatou rima i roto hoê noa ’‘e o teie mau tuhaa, a ani i ta te Atua tauturu. A hi‘o atu e nafea te varua o te Atua e “ohipa[‘i] i roto ia outou i te hinaaro e te rave i te maitai ta ’na iho e hinaaro ra.” (Phil. 2:13) E nehenehe anei ta oe e faaitoito i te rima o vetahi ê?

A FAAITOITO I TE RIMA TEI PARUPARU

13, 14. (a) Mea nafea te hoê taeae i te faaitoito-raa-hia i muri a‘e i te poheraa ta ’na vahine? (b) E nafea tatou e faaitoito ai ia vetahi ê?

13 Ua horoa mai Iehova i te hoê huitaeae na te ao taatoa no te aupuru i te mau taeae e tuahine no te faaitoito ia tatou. Ua parau te aposetolo Paulo: “E afai na i na rima i faatautauhia i raro ra i nia, e e faaetaeta i te turi paruparu ra; e haamanina hoi i te e‘a o to outou avae.” (Heb. 12:12, 13) E rave rahi Kerisetiano o te senekele matamua o tei fana‘o i teie huru tauturu no ǒ mai i to ratou mau taeae e tuahine. Hoê â huru i teie mahana. Ei hi‘oraa, i muri a‘e i te poheraa te vahine a te hoê taeae e i te faarururaa i te tahi atu mau tupuraa mauiui mau, ua parau oia: “Ua haapii au e eita ta tatou e nehenehe e maiti i to tatou mau ati, i te taime a tupu ai e te pinepine o te reira. Ua riro te pure e ta ’u iho haapiiraa Bibilia ei ahu poito o tei tapea noa i to ’u upoo i nia ’‘e i te pape. Ua tamahanahana rahi mai te tauturu a to ’u mau taeae e tuahine pae varua ia ’u. Ua taa ia ’u i te faufaaraa ia faatupu i te hoê auhoaraa maitai e o Iehova hou a tupu mai ai te mau fifi.”

E nehenehe te taata tataitahi e faaitoito ia vetahi ê (A hi‘o i te paratarafa 14)

14 Ua tauturu Aarona raua Hura no te faaitoito i te rima o Mose ma te turu i te reira i te roaraa o te tama‘i i te mau ati Amaleka. I teie mahana, e nehenehe atoa tatou e imi i te ravea no te turu e no te tauturu ia vetahi ê. Te mauiui nei te tahi  o to tatou mau taeae no te rahi o te matahiti, te fifi o te ea, te hamani-ino-raa a to ratou utuafare, te mo‘emo‘e aore ra te pohe o tei herehia e ratou. E nehenehe atoa tatou e faaitoito i te feia apî e turaihia ia rave i te mea ino aore ra ia manuïa i roto i teie nei ao. (Tes. 1, 3:1-3; 5:11, 14) E imi ana‘e i te mau ravea no te faahoa ’tu ia vetahi ê i te Piha a te Basileia, i roto i te taviniraa, i te hoê tamaaraa amui aore ra a paraparau ai na roto i te niuniu.

15. E nafea ta tatou mau parau faaitoito e nehenehe ai e ohipa i nia i to tatou mau taeae e tuahine?

15 I muri iho i te upootiaraa faahiahia mau a Asa i nia i te nuu faehau rarahi a to Kusa, ua faaitoito te peropheta Azaria ia ’na e to ’na nunaa ma te parau: “E faaitoito râ outou, e faaetaeta, e faautuahia [aore ra haamaitaihia] hoi ta outou ohipa.” (Par. 2, 15:7) Ua turai te reira ia Asa ia rave i te mau tauiraa atoa no te faatia faahou i te haamoriraa viivii ore. Hoê â huru, e nehenehe ta tatou mau parau faaitoito e ohipa i nia ia vetahi ê e e tauturu ia ratou ia tamau i te tavini ia Iehova. (Mas. 15:23) E itoito roa to tatou mau taeae i ta tatou mau pahonoraa faaitoito mau i te mau putuputuraa.

Aita Nehemia i hi‘o noa ia vetahi ê ia ohipa. Ua tauturu atoa râ oia i roto i te hamaniraa o te mau patu o Ierusalema

16. E nafea te mau matahiapo e pee ai i to Nehemia hi‘oraa? A horoa i te mau hi‘oraa mea nafea te mau taeae e tuahine i te tautururaa ia oe.

16 Maoti te tauturu a Iehova, ua faaitoitohia te rima o Nehemia e to te mau ati  Iuda. Ua faaoti ratou i te hamani i te mau patu o Ierusalema i roto noa 52 mahana! (Neh. 2:18; 6:15, 16) Aita Nehemia i hi‘o noa ia vetahi ê ia ohipa. Ua tauturu atoa râ oia i roto i te hamaniraa o te mau patu o Ierusalema. (Neh. 5:16) Oia atoa, e rave rahi matahiapo o te pee ra i te hi‘oraa o Nehemia ma te tauturu i te mau paturaa aore ra ma te atuatu i te Piha a te Basileia. E faaitoito atoa teie mau tane here i te mau taeae e tuahine “aau taiâ,” aore ra ahoaho, ma te haere e farerei ia ratou e ma te ohipa e o ratou i roto i te taviniraa.—A taio i te Isaia 35:3, 4.

“EIAHA IA TOARUARU TO RIMA”

17, 18. Ia faaruru tatou i te mau fifi e ia ahoaho tatou, ua papu ia tatou i te aha?

17 Ia ohipa amui tatou e to tatou mau taeae e tuahine, e faaitoito te reira ia tatou ia vai hoê. E tauturu atoa mai ia tatou ia faatupu i te auhoaraa vai tamau e e rahi atu â to tatou tiaturiraa i roto i te mau haamaitairaa o te fatata mai ra i te tupu maoti ta te Atua Faatereraa arii. Ia faaitoito tatou i te rima o vetahi ê, e tauturu atu tatou ia faaoromai i te mau tupuraa fifi e ia tiaturi i te hoê a muri a‘e maitai. Hau atu â, ia tauturu tatou ia vetahi ê, e faaitoito te reira i to tatou rima e e tauturu ia tatou ia tiatonu i to a muri a‘e.

18 Ia feruri tatou mea nafea Iehova i te tautururaa e i te parururaa i to ’na mau tavini taiva ore i tahito ra, e faaitoitohia to tatou faaroo e tiaturiraa ia ’na. No reira, ia faaruru oe i te fifi e te ahoaho, “eiaha ia toaruaru to rima”! Mea papu, ia ani oe i ta Iehova tauturu, e faaitoito mai oia ia oe maoti to ’na rima puai e e aratai ia oe ia fana‘o i te mau haamaitairaa a te Faatereraa arii i a muri a‘e.—Sal. 73:23, 24.