Eaha to roto?

Tapura tumu parau

Ite no Iehova

Maiti te reo Tahiti

Ua riro anei Iakoba ei tupuna no te Mesia no te mea ua noaa ia ’na te tiaraa matahiapo o Esau?

Uiraa a te feia taio

Uiraa a te feia taio

Ua titauhia anei te tiaraa tamaiti matahiapo no te riro ei tupuna no te Mesia?

Tera tei mana‘ohia na na mua ’‘e no te mau parau e faahitihia ra i roto i te Hebera 12:16. Te na ôhia ra ua riro Esau ei taata o te “haafaufaa ore ra i te mau mea mo‘a” e ua horoa ia Iakoba “ta ’na tufaa matahiapo no te hoê noa maa.” Na mua ’‘e, i mana‘o na tatou ua fana‘o Iakoba i te haamaitairaa e riro ei tupuna no te Mesia i te taime a noaa ’i ia ’na te tiaraa “matahiapo.”—Mat. 1:2, 16; Luka 3:23, 34.

Ua hi‘opoa-maite-hia râ te tahi atu mau aamu Bibilia e ua faaite mai te reira aita i titauhia te tiaraa tamaiti matahiapo no te riro ei tupuna no te Mesia. E hi‘o ana‘e te tahi o tera mau aamu:

O Reubena te tamaiti matahiapo a Iakoba raua Lea, area o Iosepha na Iakoba ïa raua Rahela. I to Reubena raveraa i te peu taotoraa tia ore, ua ere oia i to ’na tiaraa matahiapo e riro ihora te reira ia Iosepha. (Gen. 29:31-35; 30:22-25; 35:22-26; 49:22-26; Par. 1, 5:1, 2) Aita râ te Mesia i haere mai na roto i te opu o Reubena e to Iosepha. Mea na roto mai râ ia Iuda, te maha o te mau tamaroa a Iakoba raua Lea.—Gen. 49:10.

I roto i te Luka 3:32, te faahitihia ra e pae tupuna o te Mesia e e au ra e tamarii matahiapo ana‘e ratou. Te tahi hi‘oraa, o Boaza te metua tane o Obeda e o Obeda te metua tane o Iese.—Ruta 4:17, 20-22; Par. 1, 2:10-12.

E va‘u tamaroa ta Iese e o Davida te hopea. Noa ’tu râ, mea na roto mai ia ’na te Mesia i te haereraa mai. (Sam. 1, 16:10, 11; 17:12; Mat. 1:5, 6) Hoê â atoa no Solomona, ua riro oia ei tupuna no te Mesia noa ’tu e ere o ’na  te tamaiti matahiapo a Davida.—Sam. 2, 3:2-5.

E ere râ te auraa mea faufaa ore te tiaraa o te tamaiti matahiapo. E fana‘o hoi te matahiapo i te haamaitairaa o te ore e horoahia i te toea o te mau tamaroa. Pinepine i muri a‘e i te metua tane, o te tamaiti matahiapo te rave i te tiaraa upoo utuafare e e horoahia e piti tufaa na ’na.—Gen. 43:33; Deut. 21:17; Ios. 17:1.

E nehenehe râ te tiaraa matahiapo e horoahia i te tahi atu tamarii tamaroa. I to Aberahama aniraa ia Isemaela ia faarue i te puhapa, ua riro te tiaraa matahiapo ia Isaaka. (Gen. 21:14-21; 22:2) E mai tei faaitehia i nia ’tu, ua riro te tiaraa matahiapo o Reubena ia Iosepha.

Eaha ïa te mana‘o ta te aposetolo Paulo i hinaaro e faaite i roto i te Hebera 12:16? Te parauhia ra: “A ara eiaha roa ei taata o te rave ra i te mau peu taotoraa tia ore i rotopu ia outou, eiaha atoa ei taata o te haafaufaa ore ra i te mau mea mo‘a, mai ia Esau o tei horoa i ta ’na tufaa matahiapo no te hoê noa maa.”

Aita Paulo i faahiti i te parau no nia i te mau tupuna o te Mesia, ua hinaaro râ oia e horoa i te hoê faaararaa i te mau Kerisetiano. Ua na ô oia: “A haamanina noa i te mau e‘a no to outou avae . . . ia ore te hoê ia ere i te hamani maitai rahi o te Atua.” Tera hoi te tupu ia rave ratou i te peu taotoraa tia ore. (Heb. 12:12-16) E mea na reira ratou e riro ai mai ia Esau o tei ‘haafaufaa ore i te mau mea mo‘a’ e ua haapao noa i to ’na mau hinaaro tia ore.

Ia au i te mau peu o tera tau, eita e ore ua pûpû Esau i te tusia na Iehova i te tahi mau taime. (Gen. 8:20, 21; 12:7, 8; Ioba 1:4, 5) Ua haafaufaa a‘e râ oia i to ’na mau hinaaro e horoa ihora i ta ’na haamaitairaa ei matahiapo no te hoê au‘a maa. Aita paha Esau i hinaaro e faaruru i te mau fifi e farereihia e te huaai o Aberahama mai ta Iehova i faaara atea. (Gen. 15:13) Ua haafaufaa ore atoa Esau i te mau mea mo‘a a faaipoipo ai oia e piti vahine no te mau nunaa o te haamori i te mau atua ěê. Ua oto roa to ’na na metua i ta ’na faaotiraa. (Gen. 26:34, 35) Mea taa ê roa Esau i to ’na taeae, ua haapao maitai hoi o Iakoba i te faaipoipo i te vahine o te haamori ra i te Atua mau!—Gen. 28:6, 7; 29:10-12, 18.

Eaha ta teie mau aamu Bibilia e haapii mai ra no nia i te mau tupuna o te Mesia? E ere pauroa o ratou i te tamarii matahiapo. Ua ite e ua farii na te mau ati Iuda i te reira. Eaha tatou e parau ai mai tera? Ua tiaturi ratou e huaai te Mesia na Davida, te tamaroa hopea a Iese.—Mat. 22:42.