Eaha to roto?

Tapura tumu parau

Te oaoa: Te hoê huru maitai no ǒ mai i te Atua

Te oaoa: Te hoê huru maitai no ǒ mai i te Atua

E HINAARO te taata atoa e oaoa. Te ora nei râ tatou i te mau mahana hopea e e farerei tatou paatoa i te mau tupuraa “fifi ia faaruru.” (Tim. 2, 3:1) No te aha te taata e ere ai i to ratou oaoa? No vetahi, ua ravehia te tahi ohipa tia ore i nia ia ratou. No te tahi atu, ua roohia i te ma‘i, ua ere i te ohipa, ua pohe tei herehia aore ra te haapeapea ra ratou no te hoê tupuraa ê atu. E nehenehe atoa te mau tavini a Iehova e haaparuparu a ere mǎrû atu ai i to ratou oaoa. Mai te peu e tera to oe tupuraa, e nafea ia noaa faahou mai te oaoa?

No te pahono i tera uiraa, e tia na mua ia ite eaha mau na te oaoa e mea nafea vetahi i oaoa noa ’i i roto i te fifi. I muri a‘e, e ite mai tatou e nafea ia tamau e ia faarahi atu â i to tatou oaoa.

EAHA MAU NA TE OAOA?

E ere no te mea e ata noa te hoê taata, te oaoa ra ïa oia. A feruri na, e ata noa paha te hoê taata o tei taero i te ava. Ia pee râ to ’na taero, e faaea o ’na i te ata, e ite hoi o ’na te vai noa ra to ’na mau fifi. E taime poto noa to ’na ataraa, e ere tera te oaoa mau.—Mas. 14:13.

Te oaoa, o te tahi huru no roto roa mai i te aau ia tiai aore ra ia noaa mai te tahi mea maitai. E faaite noa tatou i tera huru maitai i te taime oaoa e te taime fifi. (Tes. 1, 1:6) E nehenehe te oaoa e itehia noa ’tu te vai ra te hoê mea e haapeapea ra ia tatou. Ei hi‘oraa, ua taparahihia te mau aposetolo i to ratou pororaa no nia ia Iesu. Ua faarue râ ratou “i te Sunederi ma te oaoa, no te mea ua tia i te Atua ia hamani-ino-hia ratou no te i‘oa o Iesu.” (Ohi. 5:41) Aita ratou i oaoa no te hamani-ino-raa, no te mea râ ua vai taiva ore ratou i te Atua.

Aita tatou i fanauhia mai e te huru maitai o te oaoa e eita atoa e noaa noa mai mai tera. No te aha? No te mea e tuhaa te oaoa no te hotu a te varua o te Atua e no “te huru taata apî.” Na te varua mo‘a ïa e tauturu mai ia faatupu i tera huru maitai. (Eph. 4:24; Gal. 5:22) Mea ohie a‘e ia faaruru i te fifi ia noaa ia tatou te oaoa.

TE MAU HI‘ORAA TA TATOU E PEE

Ua opua o Iehova ia tupu te mau mea maitai i nia i te fenua, eiaha râ te mau mea ino e itehia ra i teie mahana. Ua tamau râ o Iehova i te oaoa noa ’tu te rave ra te taata i te mau ohipa iino. Te na ô ra hoi te Bibilia e Atua oaoa o Iehova. (Tim. 1, 1:11) Hau atu â, e oaoa te aau o Iehova ia ite o ’na i te mau mea maitatai ta ta ’na mau tavini e rave ra.—Mas. 27:11.

E pee ana‘e i te hi‘oraa o Iehova ma te tamau i te oaoa noa ’tu eita te mau mea e tupu mai ta tatou i mana‘o. Eita tatou e haapeapea, e haamau râ tatou i te feruriraa i nia i te mau maitai ta tatou e fana‘o ra i  teie nei a tiai noa ’i ma te faaoromai i to a muri a‘e. *

Te faahiti ra te Bibilia i te mau taata o tei tamau i te oaoa noa ’tu ua faaruru ratou e rave rahi tupuraa fifi. Ua oaoa noa Aberahama noa ’tu ua haafifi e ua opua vetahi i te haapohe ia ’na. (Gen. 12:10-20; 14:8-16; 16:4, 5; 20:1-18; 21:8, 9) Eaha te tumu Aberahama i oaoa noa ’i? No te mea ua feruri tamau oia i te tiaturiraa e ora i roto i te ao apî i raro a‘e i te faatereraa a te Mesia. (Gen. 22:15-18; Heb. 11:10) Teie ta Iesu i parau: “Ua oaoa roa Aberahama to outou metua i te tiaturiraa e ite i to ’u mahana.” (Ioa. 8:56) E pee tatou i te hi‘oraa o Aberahama ma te tamau noa i te feruri i te oaoa ta tatou e fana‘o a muri a‘e.—Roma 8:21.

Ua faatupu atoa Paulo e Sila i te faaroo puai e te oaoa noa ’tu te mau fifi e rave rahi. “Te pure ra e te arue ra Paulo raua Sila i te Atua ma te himene” noa ’tu i tera mahana ua hamani-ino-hia e ua hurihia raua i roto i te fare tapearaa. (Ohi. 16:23-25) Na te feruriraa i te mau parau fafau a te Atua no a muri a‘e i tauturu atu ia faaruru i te mauiui. Ua oaoa raua i te mauiuiraa ei pǐpǐ na te Mesia. E pee tatou i te hi‘oraa o Paulo raua Sila ma te haamana‘o i te mau faahopearaa maitatai ia tavini i te Atua ma te taiva ore.—Phil. 1:12-14.

I teie atoa mahana, e rave rahi taeae e tuahine o te tamau i te oaoa noa ’tu te fifi. I te ava‘e no Novema 2013, ua tupu te mata‘i rorofai puai mau o Haiyan i te fenua Philipino e hau atu i te 1 000 utuafare Ite no Iehova tei ere i to ratou fare. Hoê i rotopu ia ratou o George no te oire no Tacloban, te na ô ra oia: “Te oaoa noa ra te mau taeae noa ’tu te ati i tupu. Aita ta ’u e parau no te faaite i to matou oaoa.” Ma te feruri i ta Iehova i rave no tatou e ma te tamau i te faaite i te mauruuru, e oaoa noa tatou noa ’tu te fifi rahi. Eaha ’tu â ta Iehova e horoa mai ra e oaoa ’i tatou?

TE MAU TUMU E OAOA ’I TATOU

Te tumu rahi roa ’‘e e oaoa ’i tatou, o to tatou ïa auhoaraa e o Iehova. Ua ite tatou o vai te Arii o te ao nui. O ’na to tatou Metua, Atua e Hoa!—Sal. 71:17, 18.

Te mauruuru atoa ra tatou e ua horoa mai o Iehova i te ora e te mau mea atoa no te oaoa i te oraraa nei. (Koh. 3:12, 13) Na ’na i faatae ia tatou ia ’na ra i nehenehe ai tatou e ite eaha ta ’na opuaraa e te huru oraraa maitai no tatou. (Kol. 1:9, 10) Aita râ te rahiraa o te taata e taa ra i te tumu mau o te oraraa. No reira Paulo i papai ai: “‘Aita te mata i ite e aita te tari‘a i faaroo, aita atoa râ ratou i mana‘o i roto i to ratou aau i te mau mea ta te Atua i faaineine no te feia e here ia ’na.’ Ua faaite hoi te Atua i te reira ia tatou na roto i to ’na varua.” (Kor. 1, 2:9, 10) Te oaoa nei tatou no te mea ua taa ia tatou eaha te hinaaro e te opuaraa a te Atua.

E ere râ te reira ana‘e ta Iehova i rave. Ua horoa atoa mai oia i te ravea ia faaorehia ta tatou hara. (Ioa. 1, 2:12) Maoti o ’na e fana‘o ai tatou i te tiaturiraa e ora i roto i te ao apî o tei fatata roa mai. (Roma 12:12) I teie nei â, te tahoê ra tatou e te mau taeae e tuahine no te haamori ia ’na. (Sal. 133:1) Te paruru atoa ra Iehova ia tatou ia Satani e ta ’na mau demoni. (Sal. 91:11) Ma te tamau i te feruri i te mau mea faahiahia ta Iehova i horoa mai, e oaoa atu â tatou.—Phil. 4:4.

E NAFEA IA OAOA ROA ’TU Â?

Mai te peu te oaoa ra te hoê Kerisetiano, e nehenehe anei oia e oaoa roa ’tu â? E, ua na ô hoi Iesu: “Ua parau atu vau i teie mau mea ia outou ia oaoa outou mai ia ’u e ia oaoa roa.” (Ioa. 15:11) Ia puai atu â te auahi,  e tia ia tuu noa i te vahie. I te mea na te varua mo‘a e faatupu i te oaoa, e titauhia ia tamau i te ani ia Iehova ia horoa mai i to ’na varua mo‘a no te oaoa ’tu â. E tia atoa ia feruriruri i nia i te Bibilia o tei papaihia i raro a‘e i te aratairaa a te varua mo‘a.—Sal. 1:1, 2; Luka 11:13.

E rahi te oaoa e noaa mai ia rave noa tatou i te mau ohipa o te faaoaoa ia Iehova. (Sal. 35:27; 112:1) Eaha te tumu? Te na ô ra te Bibilia e ua poietehia tatou no te haamori i te Atua e no te haapao i ta ’na mau faaueraa. (Koh. 12:13) Ua hamanihia ïa tatou no te rave i te hinaaro o te Atua. Te auraa ia tavini tatou ia Iehova, i reira tatou e oaoa mau ai. *

TE MAU MAITAI O TE OAOA

A rahi noa ’i to tatou oaoa, e fana‘o tatou i te tahi atu mau haamaitairaa. E rahi atu â to Iehova mauruuru a ite ai e te tamau noa ra tatou i te tavini ia ’na ma te oaoa noa ’tu te fifi. (Deut. 16:15; Tes. 1, 5:16-18) Ua noaa ana‘e ia tatou te oaoa mau, eita tatou e mana‘o e mea faufaa ia haapue i te tao‘a materia. E rave râ tatou i te mau haapaeraa rahi a‘e no te Faatereraa arii a te Atua. (Mat. 13:44) E ia ite tatou i te mau faahopearaa maitatai e noaa mai, e rahi mai te oaoa e te mauruuru no ta tatou i rave e e faaoaoa atoa tatou ia vetahi ê.—Ohi. 20:35; Phil. 1:3-5.

Rahi atu â tatou i te oaoa, rahi atu â to tatou ea i te maitai. Te na ô ra te Bibilia: “E maitai to te aau rearea [aore ra oaoa] mai te raau ma‘i atoa ra.” (Mas. 17:22) Ua tu roa te mana‘o o te hoê aivanaa i te pae o te ea no te tahi fare haapiiraa teitei i Marite. Te na ô ra oia: “Ia ite oe i te oaoa e te mauruuru i teie mahana, ananahi e maitai ïa to oe ea.”

Noa ’tu e te ora nei tatou i te anotau ahoaho, e noaa mai te oaoa mau ia fana‘o tatou i te varua mo‘a ma te pure, haapii e feruriruri i te Parau a te Atua. E oaoa ’tu â tatou ma te feruri i te mau maitai ta Iehova e horoa mai ra i teie nei, ma te pee i te faaroo o te mau tavini a te Atua e ma te tutava i te rave i to ’na hinaaro. I reira tatou e ite ai i te tupuraa o te Salamo 64:10: “E oaoa te feia parau-tia ra ia Iehova, e ua tiaturi ia ’na.”

^ par. 10 E hi‘opoahia te huru maitai o te faaoromai i roto i te tahi atu tumu parau no nia i te mau huru maitatai o te hotu a te varua.

^ par. 20 A hi‘o i te tumu parau tarenihia “ Te tahi atu mau ravea no te oaoa ’tu â.”