Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2017

 AAMU

Ua ite mâua i to te Atua hamani maitai rahi i roto e rave rahi tupuraa

Ua ite mâua i to te Atua hamani maitai rahi i roto e rave rahi tupuraa

NO TO ’NA here i te Atua i to ’na apîraa, ua hinaaro to ’u papa, o Arthur to ’na i‘oa, e riro mai ei orometua Méthodiste. Ua taui râ to ’na mana‘o i to ’na taioraa i te tahi mau papai horoahia e te Feia haapii Bibilia, e i to ’na haamataraa i te amui ia ratou. I 1914, i te 17raa o to ’na matahiti, ua bapetizohia to ’u papa. I te Tama‘i rahi matamua, ua faauehia o ’na ia haere e aro. Ua patoi râ oia. Faautuahia ’tura o ’na ahuru ava‘e i te fare auri no Kingston i Ontario, Kanada. I muri a‘e i to ’na matararaa mai, ua riro mai oia ei pionie.

I 1926, ua faaipoipo to ’u papa ia Hazel Wilkinson. Ua haapii te mama o Hazel i te parau mau i 1908. Ua fanauhia vau i te 24 no Eperera 1931. E maha tamarii matou, o vau te piti. Ua haafaufaa e ua faatura to ’u papa i te Bibilia. Ua haapii mai oia ia matou ia na reira atoa. Ua riro te haamoriraa ia Iehova ei mea faufaa i roto i to matou oraraa. Pinepine vau e to ’u utuafare e haere e poro.—Ohi. 20:20.

MAI TO ’U PAPA, UA TAPEA VAU I TO ’U TIARAA AMUI ORE E UA RIRO MAI AU EI PIONIE

I 1939, ua haamata te Piti o te tama‘i rahi. I te matahiti i muri a‘e, ua opanihia te ohipa pororaa a te mau Ite no Iehova i Kanada. Ua titauhia i te mau tamarii ia faahanahana i te reva e ia himene i te pehe ai‘a i roto i ta ratou piha haapiiraa. Faatia noa na te mau orometua haapii ia haere mâua to ’u tuahine o Dorothy i rapae ia himene ratou. I te hoê râ mahana, ua tamata ta ’u orometua i te faahaama ia ’u ma te parau e e mǎta‘u hanoa vau. I muri a‘e i te haapiiraa, e rave rahi hoa haapiiraa tei tapiri mai no te hamani ino ia ’u a marua roa ’tu ai au i raro i te repo. Ua haapuai roa ’tu â râ te reira i to ’u hinaaro e faaroo i te Atua, “eiaha te taata.”—Ohi. 5:29.

I Tiurai 1942, i te 11raa o to ’u matahiti, ua bapetizohia vau i roto i te hoê vairaa pape i te hoê vahi e faaamuhia ’i te mau animara. Mea au roa na ’u e rave i te taviniraa pionie tauturu aita ana‘e e haapiiraa. I te hoê matahiti, ua tae roa vau e toru atoa taeae i te pae apatoerau o Ontario, i reira matou i te pororaa i te mau taata tapu raau.

I te 1 no Me 1949, ua rave au i te taviniraa pionie taime taatoa. Titau-manihini-hia ’tura vau i te amaa no Kanada no te tauturu i te ohipa paturaa. Ua riro roa mai au i muri a‘e ei mero o te utuafare o te Betela no Kanada. Ua ohipa vau i te vahi neneiraa, i reira vau i te haapiiraa e nafea ia faaohipa i te matini neneiraa parauhia presse cylindrique. Te haamana‘o ra vau i te ohiparaa pauroa te po e rave rahi hebedoma no te tauturu i te neneiraa i te hoê api parau no nia i te hamani-ino-raa i nia i te mau Ite no Iehova i Kanada.

I muri a‘e, ua ohipa vau i roto i te Tuhaa taviniraa. Ua titauhia ia ’u ia uiui i te mau pionie o te haere e tavini i Quebec, i reira e itehia ’i te hamani-ino-raa u‘ana mau. O Mary Zazula hoê o na pionie, no Edmonton mai oia, i Alberta. E mau mero no te Ekalesia Kerisetiano no hitia o te râ to ’na na metua. A patoi ai Mary e to ’na taeae matahiapo i te faaea i ta raua haapiiraa Bibilia, ua tiahi to raua na metua ia raua. Ua bapetizohia Mary e to ’na taeae i Tiunu 1951, e 6 ava‘e i muri iho, ua riro mai raua ei pionie. I tera uiuiraa mana‘o, ua ite au e ua here mau â Mary ia Iehova. Te haamana‘o ra vau e ua na ô vau ia ’u iho e teie te huru vahine ta ’u e hinaaro e faaipoipo. E iva ava‘e i muri iho, ua faaipoipo mâua i te 30 no Tenuare 1954. Hoê hebedoma i muri a‘e i to mâua faaipoiporaa, ua titau-manihini-hia mâua no te faaineineraa no te tuhaa haaati. I na piti matahiti i muri  iho, ua tavini mâua i roto i te tuhaa haaati i te pae apatoerau o Ontario.

Ua maraa te ohipa pororaa na te ao nei, ua titauhia hau atu â mitionare. Ua mana‘o mâua Mary e mai te peu e e nehenehe mâua e faaruru i te tau toetoe e te naonao i te tau veavea i Kanada, e nehenehe mâua e ora i te mau vahi atoa. Ua apiti mâua i te 27raa o te Haapiiraa no Gileada e ua faatuitehia mâua i Tiurai 1956. I Novema, tei roto mâua i to mâua fare apî, i Beresilia.

MITIONARE I BERESILIA

I to mâua tapaeraa ’tu i Beresilia, ua haamata mâua i te haapii i te reo Potiti. Na mua, ua haamata mâua i te haapii i te pereota ohie no te omua i te hoê aparauraa. I muri a‘e, ua tamau aau mâua i te hoê hi‘oraa poto no te pûpû i te vea. I muri iho, ua haere mâua e poro e ua farerei i te hoê vahine o tei faaite i te anaanatae i ta mâua poroi. Ua faaoti mâua e ia anaanatae te fatu fare, e taio mâua i te hoê irava no nia i te oraraa i raro a‘e i te Faatereraa arii a te Atua. Ua taio ïa vau i te Apokalupo 21:3, 4 e matapoirihia ’tura vau! Aita vau i matau i te veavea e te haumi. E ua tamau te reira i te haafifi ia ’u.

Ua tonohia mâua ei mitionare i te oire no Campos. I teie mahana, 15 amuiraa i tera vahi! I to mâua râ tapaeraa ’tu, hoe ana‘e pǔpǔ atea i roto i tera oire e oia atoa hoê fare mitionare e maha tuahine: Esther Tracy, Ramona Bauer, Luiza Schwarz e Lorraine Brookes (i teie nei Wallen). Ta ’u ohipa i te fare mitionare, o te tautururaa ïa i te vahi papu‘araa ahu e te imiraa i te vahie no te tunu i te maa. I te Monire po i muri a‘e i ta matou haapiiraa o Te Pare Tiairaa, te tarava ra o Mary i nia i te hoê tofa a tuu ai i to ’na upoo i nia i te turua. Te paraparau ra mâua no nia i ta mâua i rave i tera mahana. A tia ’i Mary, ua nee mai te hoê ophi mai raro a‘e mai i te turua! Ua riaria roa mâua. Haapohe ihora vau i tera animara.

I muri a‘e hoê matahiti i te haapiiraa i te reo Potiti, ua haamata mâua i te tavini i roto i te tuhaa haaati. Ua tavini mâua na te mau vahi aita e uira. Ua taoto noa mâua i nia i te peue e ua ratere na nia i te pereoo hutihia e te puaahorofenua. Hoê taime, ua na nia mâua i te pereoo auahi no te haere i te hoê oire iti i nia i te mou‘a no te poro. Ua tarahu mâua hoê piha i ǒ. Ua hapono mai te amaa 800 vea no te faaohipa i roto i te pororaa. Ua titauhia ia haere i te fare rata e rave rahi taime no te tii i te mau afata vea.

I 1962, ua haamauhia te Haapiiraa no te taviniraa o te Basileia i te tahi atu mau vahi i Beresilia. I te hoê roaraa ono ava‘e, ua tonohia vau i tera mau haapiiraa. Ua horoa vau i te faaineineraa i Manaus, Belém, Fortaleza, Recife e i te oire no Salvador. I Manaus, ua faanaho vau i te hoê tairururaa mataeinaa i te hoê fare hautiraa upaupa teata tuiroo. No te ûa rahi, aita i rahi te pape mâ no te inu, aita atoa e vahi maitai no te tamaa no te mau taeae e tuahine i te tairururaa. Ua paraparau vau i te hoê raatira faehau e faataa ’tura vau i to matou fifi. Faanaho atura oia i te pape inu na matou, ia navai no te taatoaraa o te taata tei tairuru mai. Ua tono atoa oia i te mau faehau  no te faatia e piti fare ie rarahi, ta matou ïa i faaohipa ei vahi faaineineraa maa e tamaaraa.

A ratere ai au, ua haere Mary e poro i te hoê vahi tapihooraa. I reira, aita e taata e anaanatae i te paraparau no nia i te Bibilia. No te fenua Potiti mai teie mau taata, ua haere mai no te imi i te moni. Ua toaruaru roa Mary. Parau atura o ’na i to ’na mau hoa: “Eita roa ’tu vau e hinaaro e faaea i Potiti.” Aita i maoro, tae mai nei hoê rata. O te hoê ïa titau-manihini-raa no te haere e tavini i Potiti. Ua opanihia te pororaa i reira. Ua oti roa Mary! Ua farii râ mâua i teie hopoia.

TA MÂUA TAVINIRAA I POTITI

Tae atura mâua i Lisbonne, Potiti, i Atete 1964. Ua haafifi te mau mutoi huna i to tatou mau taeae i reira. Ua faaoti ïa mâua i te omuaraa e mea maitai a‘e eiaha e faaara i te mau Ite no Iehova no reira. Ua tarahu na mua mâua i te hoê piha. I te taeraa mai ta mâua parau faatia no te faaea i Potiti, tarahu atura mâua i te hoê nohoraa. Pae ava‘e i muri a‘e i nehenehe ai mâua e tapiri atu i te mau taeae i te amaa. Oaoa roa mâua i te apiti-faahou-raa i te hoê putuputuraa!

No te mea ua opanihia ta matou ohipa, aita te mau Piha a te Basileia i faaohipa-faahou-hia. I te fare ïa o te mau taeae te mau putuputuraa i te raveraahia. Pinepine te mau mutoi i te haere paheru i ǒ ratou. Tau hanere taeae e tuahine tei afaihia i te aua mutoi no te mau uiuiraa. Ua rave ino te mau mutoi ia ratou e ua faahepo ia faaite i te i‘oa o te mau taeae amo hopoia. No te paruru te tahi i te tahi, ua faaea te mau taeae i te faaohipa i te mau pa‘eraa, e ua pii te tahi i te tahi ma te i‘oa noa.

Te haafaufaa ra mâua i ta mâua i rave i roto i te taviniraa a Iehova hau atu 60 matahiti i te maoro

Ta matou fa matamua, o te haapaoraa ïa ia tae te mau papai i te mau taeae, ia tauturu te reira ia ratou ia faaoromai noa. E patapata Mary i te mau tumu parau haapiiraa o Te Pare Tiairaa e te tahi atu mau papai i nia i te hoê matini patapata ma te faaohipa i te hoê huru papie taa ê. E faaohipahia te reira no te hamani e rave rahi atu â papai na te mau taeae.

TURU I TE PARAU APÎ OAOA I MUA I TE HAAVA

I Tiunu 1966, e haavaraa rahi tei tupu i Lisbonne. Ua parihia te taatoaraa o na 49 mero o te amuiraa no Feijó i te putuputuraa i roto i te hoê fare, aita ta ratou e parau faatia na te ture. No te faaineine ia ratou no te haavaraa, o vau te paruru o te tamata i te faahapa i te mau taeae. Mai ta matou râ i mana‘o, ua pau matou. Ua faautuahia na 49 taeae e tuahine e 45 mahana fare auri tae atu e pae ava‘e e te afa. Ua horoa râ teie haavaraa i te hoê faaiteraa rahi mau. Inaha, i te haavaraa, ua faahiti to matou taata paruru i ta Gamaliela i parau i roto i te Bibilia. (Ohi. 5:33-39) I muri a‘e, ua piahia te haavaraa na roto i te mau ravea haaparareraa parau apî. Oaoa roa matou i te haapiiraa to matou taata paruru i te Bibilia e to ’na apitiraa mai i te mau putuputuraa.

I Titema 1966, ua riro vau ei tiaau amaa e ua faaohipa vau i te rahiraa o to ’u taime no te mau fifi i te pae o te ture. Ua tutava matou i te imi i te mau tumu e au i te ture ia nehenehe te mau Ite no Iehova e haamori ma te tiamâ i Potiti. (Phil. 1:7) I te 18 no Titema  1974, haamanahia ’tura to matou tiaraa. Ua haere roa mai taeae Nathan Knorr e Frederick Franz mai te pu rahi mai. Faatupuhia ’tura te hoê putuputuraa faahiahia mau i Oporto e i Lisbonne. E 46 870 taata tei tae mai.

Maoti Iehova, ua tae roa te ohipa pororaa na te mau motu e paraparauhia ’i te reo Potiti, mai te mau motu Açores, Cap-Vert, Madère e Sao Tomé-et-Principe. Ua rahi roa mai te numera o te mau Ite no Iehova i tera mau vahi, titauhia ’tura hoê amaa rahi a‘e. I muri a‘e i te paturaa, na taeae Milton Henschel i horoa i te oreroraa parau avariraa i te 23 no Eperera 1988. E 45 522 taeae e tuahine tei tae mai. I roto i tera numera, ua taiohia e 20 mitionare tei tavini na mua ’‘e i Potiti e ua ho‘i mai no te avariraa.

UA HAAPII MÂUA I TE MAU HI‘ORAA HAAPAO MAITAI O VETAHI Ê

I tera roaraa matahiti, ua au roa mâua Mary i te haapiiraa no nia i te mau taeae taiva ore. Ei hi‘oraa, i to ’u ohiparaa e te taeae Theodore Jaracz i roto i te hoê tere tuhaa fenua, ua huti mai au i te tahi mau haapiiraa faufaa mau. E fifi rahi to te hoê amaa ta mâua i haere e farerei, ua rave te Tomite amaa i te mau ravea atoa no te tauturu atu. Ua peapea roa ratou, aita ta ratou i nehenehe e rave hau atu â. Tamahanahana ’tura ïa taeae Jaracz ia ratou ma te parau: “A vaiiho i teie nei i te varua mo‘a ia ohipa.” Eita atoa e moe ia ’u i ta taeae Franz i parau e rave rahi matahiti i teie nei a haere ai mâua Mary i Brooklyn. Ua ani vetahi i roto i ta matou pǔpǔ i te mana‘o tauturu, ua pahono taeae Franz ia matou: “Teie ta ’u e parau atu: A faaea noa i roto i ta Iehova faanahonahoraa noa ’tu te mau haafifiraa. Teie ana‘e te faanahonahoraa te pee ra i ta Iesu i faaue i ta ’na mau pǐpǐ ia rave: te pororaa i te parau apî oaoa o te Faatereraa arii a te Atua!”

Ua oaoa roa mâua Mary i te na reiraraa. E haamana‘oraa oaoa mau ta mâua i te haereraa e farerei i te mau amaa na te ao atoa nei. Ua au roa mâua i te farereiraa i te mau tavini a Iehova o te mau faito matahiti atoa. Oia atoa, i te haapapuraa ’tu ia ratou e te haafaufaa ra Iehova i ta ratou taviniraa. Ua faaitoito noa mâua ia ratou ia tamau i te tavini ia ’na.

E rave rahi matahiti tei mairi i teie nei, ua hau atu i te 80 matahiti to mâua i teie mahana. Mea ma‘ima‘i roa Mary. (Kor. 2, 12:9) E te vai ra te tahi atu mau fifi ta mâua i farerei. Ua haapuai râ teie mau fifi i to mâua faaroo e ua puai atu â to mâua hinaaro e tapea i to mâua hapa ore ia Iehova. Ia feruri mâua i na rahiraa matahiti taviniraa ia Iehova, ua ite mâua e ua haamaitai Iehova ia mâua ma ta ’na hamani maitai rahi na roto e rave rahi tupuraa. *

^ par. 29 A faaineinehia ’i teie tumu parau no te neneiraa, ua pohe o Douglas Guest ma te taiva ore ia Iehova i te 25 no Atopa 2015.