Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2017

Te hoo, te hoê ô “tia roa” no ǒ mai i te Metua ra

Te hoo, te hoê ô “tia roa” no ǒ mai i te Metua ra

“Te mau mea maitatai i ho-mai-hia mai, e te mau mea tia roa e maitai roa ’i, . . . mai nia mai ïa i te Metua.”—IAK. 1:17.

HIMENE: 148, 109

1. Eaha te mau ohipa maitatai ta te hoo e faatupu?

MAOTI te tusia taraehara o Iesu Mesia e nehenehe ai e ite e rave rahi haamaitairaa. Ei hi‘oraa, maoti te faanahoraa o te hoo e nehenehe ai te mau tamarii a Adamu o tei au i te parau-tia e riro mai ei mero o to te Atua utuafare. E nehenehe atoa tatou e ora ma te oaoa e a muri noa ’tu. Hau atu â i te reira, ua tuatihia te hoo i te tahi mau mea faufaa no te taatoaraa i te ra‘i e i te fenua nei.—Heb. 1:8, 9.

2. (a) Eaha te mau mea faufaa i te ra‘i e i te fenua ta Iesu i faahiti i roto i ta ’na pure? (A hi‘o i te hoho‘a matamua.) (b) Eaha ta tatou e hi‘opoa mai i roto i teie tumu parau?

2 Fatata piti matahiti hou Iesu a pohe ai, ua haapii oia i ta ’na mau pǐpǐ ia pure: “E to matou Metua i te ao ra, ia raa to oe i‘oa. Ia tae to oe ra basileia. Ia haapaohia to oe hinaaro i te fenua nei mai tei te ra‘i atoa na.” (Luka 11:2) E hi‘opoa mai tatou e nafea te hoo i tuatihia ’i i te haamo‘araa i to Iehova i‘oa, te aratairaa a te Faatereraa arii a te Atua e i te raveraa i to te Atua hinaaro.

 “IA RAA TO OE I‘OA”

3. (a) No te aha to Iehova i‘oa e tano ai ia ’na? (b) Mea nafea Satani i te faainoraa i to Iehova i‘oa?

3 Na mua roa, ua pure Iesu ia haamo‘ahia to Iehova i‘oa aore ra ia faarirohia ei mea mo‘a. E tano to Iehova i‘oa ia Iehova iho e to ’na huru. I roto i te ao nui, o ’na te Atua parau-tia e te puai roa ’‘e. Ua pii atoa Iesu ia ’na te “Metua Mo‘a ra.” (Ioa. 17:11) No te mea e Atua mo‘a Iehova, te mau mea atoa ta ’na e rave e te mau ture atoa ta ’na e haamau, mea mo‘a ana‘e. I roto râ i te ô i Edene, ua uiui Satani no nia i to te Atua tiaraa e haamau i te mau ture aveia na te taata. Ua haavare oia no nia ia Iehova e ua faaino i to te Atua i‘oa, aore ra roo.—Gen. 3:1-5.

4. Mea nafea Iesu i te faariroraa i to te Atua i‘oa ei mea mo‘a?

4 I te tahi a‘e pae, ua haafaufaa mau Iesu i to Iehova i‘oa e ua rave oia i te mau mea atoa no te haamo‘a i te reira. (Ioa. 17:25, 26) E nafea? Ma to ’na haerea e ta ’na haapiiraa, ua tauturu Iesu ia vetahi ê ia taa e mea tia ta Iehova mau ture aveia e te mau mea atoa ta ’na e titau mai, no to tatou iho ïa maitai. (A taio i te Salamo 40:8-10.) Noa ’tu o Satani te tumu i haamauiuihia ’i e i pohe ai Iesu, aita oia i taiva. Ua haapapu oia e e nehenehe te hoê taata tia roa e auraro maite ia Iehova.

5. E nafea tatou e faariro ai i to Iehova i‘oa ei mea mo‘a?

5 E nafea tatou e faaite ai e te haafaufaa ra tatou i to Iehova i‘oa? Ma to tatou haerea. Te titau mai ra Iehova ia mo‘a tatou. (A taio i te Petero 1, 1:15, 16.) Te auraa, o ’na ana‘e ta tatou e haamori e e auraro ma te aau atoa. Noa ’tu e hamani-ino-hia tatou, e tutava tatou i te ora mai ta Iehova i haapii ia tatou. Ma te ora ia au i te mau ture aveia a Iehova, te faahanahana ra ïa tatou i to ’na i‘oa. (Mat. 5:14-16) E haapapu tatou e mea maitai ta ’na mau ture e e parau haavare ana‘e ta Satani. Mea tia ore tatou, e hape iho â tatou. Ia hape noa ’tu râ tatou, e tatarahapa e e tutava tatou i te faaea i te rave i te mau mea o te ore e faahanahana i to Iehova i‘oa.—Sal. 79:9.

6. No te aha Iehova e faariro ai ia tatou ei taata parau-tia noa ’tu to tatou huru tia ore?

6 E feia faatavaihia aore ra e “mamoe ê atu” tatou, e faaore Iehova i ta tatou mau hara ia faatupu tatou i te faaroo i te hoo. E farii oia i te mau taata o tei pûpû ia ratou iho no ’na ei feia haamori no ’na. Te faariro nei Iehova i te mau Kerisetiano faatavaihia ei feia parau-tia, a riro atu ai ratou ei tamaiti na ’na, oia atoa no te mau “mamoe ê atu” o te riro ei hoa no ’na. (Ioa. 10:16; Roma 5:1, 2; Iak. 2:21-25) No reira, i teie nei â, na roto i te hoo e nehenehe ai tatou e faatupu i te auhoaraa maitai e to tatou Metua e e haamo‘a i to ’na i‘oa.

“IA TAE TO OE RA BASILEIA”

7. Maoti te hoo, eaha te mau haamaitairaa ta te taata e ite?

7 I roto i te Pure a te Fatu, ua parau Iesu: “Ia tae to oe ra basileia.” E nafea te hoo e tuati ai i te Basileia, aore ra Faatereraa arii a te Atua? O Iesu e e 144 000 taata maitihia to roto i ta te Atua Faatereraa. Maoti te hoo e nehenehe ai teie mau taata e faatia-faahou-hia i te ra‘i. (Apo. 5:9, 10; 14:1) E riro ratou ei arii e ei tahu‘a, e e faatere ratou i te fenua i pihaiiho ia Iesu hoê tausani matahiti. I tera roaraa, e faaohipa Iehova i te Faatereraa arii ia riro te fenua ei paradaiso, e te taata ei taata tia  roa. I reira ta Iehova mau tavini i te ra‘i e i te fenua nei e riro ai ei utuafare fetii. (Apo. 5:13; 20:6) E haamou Iesu ia Satani, a faaore atu ai i te mau fifi atoa ta te Diabolo i faatupu.—Gen. 3:15.

8. (a) Mea nafea Iesu i tauturu ai i ta ’na mau pǐpǐ ia taa e mea faufaa te Faatereraa arii a te Atua? (b) E nafea tatou e turu ai i te Faatereraa arii i teie mahana?

8 Ua tauturu Iesu i ta ’na mau pǐpǐ ia taa i te faufaaraa o ta te Atua Faatereraa arii. Mea nafea? I muri noa ’‘e i to ’na bapetizoraa, ua haamata Iesu i te poro “i te parau maitai o te basileia o te Atua” i te mau vahi atoa ta ’na i haere. (Luka 4:43) Ua parau atoa oia i ta ’na mau pǐpǐ ia riro ei ite no ’na “e tae noa ’tu i te hopea o te fenua.” (Ohi. 1:6-8) I teie mahana, na roto i te pororaa o te Faatereraa arii e nehenehe ai te taata e haapii no nia i te hoo e e riro mai ei tino huiraatira no te Faatereraa arii a te Atua. E faaite tatou i te taiva ore i te Faatereraa arii ma te turu i tei faatavaihia i roto i te ohipa pororaa i te parau apî oaoa na te ao nei.—Mat. 24:14; 25:40.

“IA HAAPAOHIA TO OE HINAARO”

9. No te aha e nehenehe ai e tiaturi e e faatupu iho â Iehova i ta ’na opuaraa no te taata?

9 Eaha ta Iesu i hinaaro e parau a na ô ai oia: “Ia haapaohia to oe hinaaro”? Ia parau Iehova e e tupu te tahi ohipa, e tupu iho â te reira. (Isa. 55:11) Aita te orure hau a Satani e nehenehe e tapea ia Iehova. Eaha ta Iehova i opua na no te fenua? Ua hinaaro oia ia î te fenua i te mau tamarii tia roa a Adamu raua Eva. (Gen. 1:28) Ahani Adamu raua Eva i pohe ma te ore e fanau, eita ïa te opuaraa a te Atua e faaî te fenua e tupu. No reira ïa Iehova i vaiiho ai ia raua ia fanau mai i te tamarii. Maoti te hoo e nehenehe ai te taata o te faatupu i te faaroo e riro mai ei taata tia roa, a ora ’tu ai e a muri noa ’tu. Mea here na Iehova te mau taata e te hinaaro nei oia ia noaa ia tatou te oraraa ta ’na i opua na no tatou.

10. E nafea te feia o tei pohe e faufaahia ’i i te hoo?

10 E no te mau miria taata tei pohe ma te ore e ite o vai Iehova? E hinaaro Iehova ia ora te taata. E faatia-faahou-mai ïa oia i tei pohe. Maoti te hoo e nehenehe ai ratou e ora faahou mai. I muri iho, e nehenehe ratou e haapii no nia ia Iehova e e ora e a muri noa ’tu. (Ohi. 24:15) O Iehova te Tumu o te ora. Ia horoa faahou Iehova i te ora i tei pohe, e riro oia ei Metua no ratou. (Sal. 36:9) I roto i te pure a te Fatu, ua parau Iesu o “to matou Metua” i te ra‘i o Iehova. (Mat. 6:9) Ua horoa Iehova i te hoê tuhaa faufaa mau ia Iesu no nia i te parau o te faatia-faahou-raa i tei pohe. Ua parau Iesu: “Tei ia ’u te tia-faahou-raa e te ora.”—Ioa. 6:40, 44; 11:25.

11. Eaha to Iehova hinaaro no te “feia rahi roa”?

11 Te titau manihini nei Iehova ia tatou pauroa ia riro ei mero o to ’na utuafare. Ua parau atoa Iesu: “O tei haapao . . . i te hinaaro o te Atua ra, o to ’u ïa taeae, o to ’u ïa tuahine, o to ’u . . . ïa metua vahine.” (Mar. 3:35) Tera te hinaaro o te Atua: ia riro te taata no te mau nunaa, fenua e reo atoa ei feia haamori no ’na. Te parauhia ra e “e feia rahi roa” ratou, “e ore roa e pau ia taio.” Te faatupu nei ratou i te faaroo i te hoo e te hinaaro nei ratou e auraro i te Atua. Te arue nei ratou ia ’na ma te parau: “Tei to tatou Atua te ora, tei parahi i nia iho i te terono ra, e tei te Arenio.”—Apo. 7:9, 10.

12. I roto i te pure a Iesu, eaha ta tatou e haapii mai no nia i ta Iehova opuaraa no te huitaata?

 12 Mea rahi ta tatou i haapii mai no nia ia Iehova e ta ’na opuaraa no te huitaata i roto i ta Iesu pure. A tahi, mea tia ia tutava tatou no te haamo‘a i to Iehova i‘oa e no te faahanahana ia ’na. (Isa. 8:13) Te faahanahana atoa ra to Iesu tusia taraehara, te ravea e ora ’i tatou, i te i‘oa o te Atua. Inaha, o “Iehova te faaora” te auraa o to Iesu i‘oa. Te piti, e faaohipa Iehova i ta ’na Faatereraa no te hopoi mai i te mau maitai o te hoo no te feia auraro. E te toru, ua papu ia tatou e aita e mea e nehenehe e tapea i to Iehova hinaaro ia tupu.—Sal. 135:6; Isa. 46:9, 10.

A FAAITE IA IEHOVA I TO MAURUURU NO TE HOO

13. No te aha e bapetizo ai tatou?

13 Hoê ravea faufaa no te faaite i to tatou mauruuru no te hoo, o te pûpûraa ïa i to tatou oraraa ia Iehova e i te bapetizoraa ia tatou. Ma te na reira, te faatupu ra ïa tatou i te faaroo i te hoo e te faaite atoa ra e “no Iehova tatou.” (Roma 14:8) Ia bapetizo tatou, e ani tatou ia Iehova ia horoa mai i “te aau hapa ore,” oia hoi, te mana‘o haava maitai. (Pet. 1, 3:21) Te pahono ra Iehova ma te horoaraa i te mau maitai o te hoo na tatou. E ua papu roa ia tatou e e horoa mai oia pauroa te mau mea ta ’na i fafau.—Roma 8:32.

E nafea tatou e faaite ai i to tatou mauruuru no te hoo? (A hi‘o i te paratarafa 13, 14)

14. No te aha Iehova e faaue mai ai ia here ia vetahi ê?

14 Te mau mea atoa ta Iehova e rave, ua niuhia ïa i nia i te here. Te hinaaro ra oia ia pee te feia haamori ia ’na i to ’na hi‘oraa e ia here ratou te tahi i te tahi. (Ioa. 1, 4:8-11) Ia here tatou i te taata, te faaite papu ra ïa tatou e te hinaaro ra tatou e riro “ei tamarii na to [tatou] Metua i te ao ra,” aore ra ra‘i. (Mat. 5:43-48) Na faaueraa rahi roa ’‘e e piti, teie ïa: a tahi, ia here ia Iehova, e te piti, ia here ia vetahi ê. (Mat. 22:37-40) Te haapiiraa i te taata i te parau apî oaoa o te Faatereraa arii a te Atua, hoê ïa ravea teie no te faaite i to tatou here ia ratou. Mai te peu e auraro tatou i te faaueraa a Iehova ia here ia vetahi ê, i to tatou mau taeae iho â râ, e “maitai roa” to tatou here no ’na.—Ioa. 1, 4:12, 20.

 E HOPOI MAI TE HOO I TE MAU HAAMAITAIRAA NO Ǒ MAI IA IEHOVA

15. (a) Eaha te mau haamaitairaa a Iehova ta tatou e fana‘o nei i teie nei â? (b) Eaha te mau haamaitairaa ta tatou e fana‘o a muri a‘e?

15 Te haapapu mai ra Iehova e no te mea ua faatupu tatou i te faaroo i te hoo, ua “paraihia” ïa ta tatou mau hara. E nehenehe oia e faaore roa i ta tatou mau hara. (A taio i te Ohipa 3:19-21.) Mai ta tatou i hi‘opoa mai nei, maoti te hoo e nehenehe ai Iehova e rave i te tahi mau taata ei tamaiti na ’na i te ra‘i. O te mau Kerisetiano faatavaihia ïa. (Roma 8:15-17) Te titau manihini ra oia i te mau “mamoe ê atu” ia riro ei mero o to ’na utuafare i te fenua nei. E riro ratou ei taata tia roa e, i muri a‘e, e tamata-faahou-hia ratou. Mai te peu e vai taiva ore ratou ia Iehova, e riro atoa mai ratou ei tamarii na ’na. (Roma 8:20, 21; Apo. 20:7-9) E here noa iho â Iehova pauroa ta ’na mau tamarii. E tamau te hoo i te hopoi mai i te mau haamaitairaa e a muri noa ’tu. (Heb. 9:12) Ua horoa mai Iehova i teie ô faahiahia e eita hoê noa ’‘e taata e nehenehe e tatara i te reira.

16. E nafea te hoo e tauturu ai ia tatou ia tiamâ?

16 Ia tatarahapa tatou no ta tatou mau hara, aita e mea ta te Diabolo e nehenehe e rave no te tapea ia tatou ia riro mai ei mero o to Iehova utuafare. “Hoê roa” taime Iesu te poheraa. Ua pee te hoo i te aufauhia. (Heb. 9:24-26) Ua tutuu mai Adamu i te pohe, area te tusia o Iesu, e hopoi mai ïa i te ora mure ore. E nehenehe te hoo e faatiamâ ia tatou i te ao a Satani e i te mǎta‘u i te pohe.—Heb. 2:14, 15.

17. Eaha te auraa no oe te here o Iehova?

17 E tupu iho â te mau parau ta te Atua i fafau. Mai te mau ture ta Iehova i tuu i roto i te natura, o te ore e taui, eita roa ’tu Iehova e taui. E eita roa ’tu oia e haavare ia tatou. (Mal. 3:6) E ere noa te ora ta Iehova e horoa mai, to ’na here atoa râ. “Ua ite hoi tatou, e ua faaroo tatou, i to te Atua aroha ia tatou nei. E aroha te Atua.” (Ioa. 1, 4:16) E tupu iho â ta ’na i fafau. Fatata te fenua i te riro mai ei paradaiso nehenehe mau. E pee te mau taata atoa i to Iehova hi‘oraa e e here ratou te tahi i te tahi. I reira ïa ta ’na mau tavini i te ra‘i e i te fenua nei e parau ai: “O te arue, e te hanahana, e te paari, e te haamaitai, e te tura, e te mana, e te puai, ei to tatou Atua ïa e a muri noa ’tu. Amene.”—Apo. 7:12.