Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2017

Uiraa a te feia taio

Uiraa a te feia taio

Ua papai te aposetolo Paulo: “E ore oia [Iehova] e vaiiho noa ia outou ia ati, maori râ o te tia ia outou ia faaoromai.” (Kor. 1, 10:13) Te auraa ïa e ua faaoti ê na Iehova eaha ta tatou e nehenehe e faaoromai, a maiti atu ai eaha te tamataraa ta tatou e faaruru?

Mai te peu e tera iho â, a feruri na ïa i to tatou oraraa. Ei hi‘oraa, ua haapohe te tamaiti a te hoê taeae ia ’na iho. Ua oto roa te papa. Ua mana‘o noa oia e ua ite anei Iehova eaha te tupu mai a muri a‘e, a faaoti atu ai e e haere ia ’na e i ta ’na vahine ia faaoromai i teie ati. I roto i teie nei ao, e rave rahi te faaruru ra i te ati. E tia anei ïa ia tiaturi e na Iehova e aratai ra i te mau tupuraa atoa i roto i to tatou oraraa?

A hi‘opoa ’i i te Korinetia 1, 10:13, e ite mai tatou e aita te Bibilia e turu ra i te mana‘o e ua ite ê na Iehova eaha ta tatou e nehenehe e faaoromai, e i muri iho oia e faaoti ai eaha te tamataraa ta tatou e faaruru. No te aha e nehenehe ai e parau i te reira? E hi‘opoa ana‘e e maha tumu.

A tahi, ua horoa Iehova i te taata te tiamâraa e maiti. E hinaaro oia ia rave tatou i ta tatou iho mau faaotiraa. (Deut. 30:19, 20; Ios. 24:15) Ia maiti tatou e rave i te mau faaotiraa o te faaoaoa ia Iehova, e nehenehe tatou e tiaturi ia ’na no te aratairaa ia tatou. (Mas. 16:9) Ia rave râ tatou i te mau faaotiraa iino, papu ïa e e ora tatou e te mau faahopearaa o te reira. (Gal. 6:7) Ahani pai e na Iehova i maiti eaha te tamataraa ta tatou e faaruru, e nehenehe anei ïa e parau e e tiamâraa e maiti to tatou?

Te piti, eita Iehova e paruru ia tatou i te mau tupuraa mana‘o-ore-hia. (Koh. 9:12) E û paha te tahi taata i te ati peapea mau no te mea tei reira oia i te taime a tupu ai taua ati ra. Ua faahiti Iesu i te hoê ati e 18 taata tei pohe, ua topa te hoê fare rahi i nia ia ratou. Ua haapapu maitai oia e e ere na te Atua i haapohe ia ratou. (Luka 13:1-5) Mea maamaa ia mana‘o e hou te hoê ati a tupu ai, e faaoti te Atua o vai te ora aore ra te pohe.

Te toru, mea tia ia tapea tatou tataitahi i to tatou hapa ore i mua ia Iehova. Ua pari Satani i te mau tavini a Iehova e e tavini ratou i te Atua no te mau mea ta ’Na e horoa na ratou. Ua parau Satani e e taiva tatou ia Iehova ia faaruru tatou i te mau tamataraa. (Ioba 1:9-11; 2:4; Apo. 12:10) Ia paruru Iehova ia tatou i roto i te tahi mau tamataraa, mai te mea ra ïa e ua tano Satani.

Te maha, eita Iehova e maiti i te ite i te mau mea atoa o te tupu a muri mai. Papu maitai, e nehenehe ta Iehova e ite eaha te tupu a muri a‘e. (Isa. 46:10) Te faaite nei râ te Bibilia e eita o ’na e maiti i te ite i te mau mea atoa o te tupu a muri mai. (Gen. 18:20, 21; 22:12) E Atua here e te parau-tia o Iehova, eita ïa oia e faatere i to tatou tiamâraa e rave i ta tatou iho mau faaotiraa.—Deut. 32:4; Kor. 2, 3:17.

Eaha ïa ta Paulo i hinaaro e parau a na ô ai oia: “E ore oia [Iehova] e vaiiho noa ia outou ia ati, maori râ o te tia ia outou ia faaoromai”? I reira, ua faataa Paulo eaha ta Iehova e rave i roto i te mau tamataraa, eiaha na mua ’tu. * Mai te peu e tiaturi tatou ia Iehova, e tauturu mai oia i roto i te mau tamataraa atoa ta tatou e faaruru. (Sal. 55:22) E hi‘opoa mai tatou i teie nei e piti tumu e nehenehe ai Paulo e parau i te reira.

Te tumu matamua, “mai ta te taata nei” te mau tamataraa ta tatou e faaruru ra. I roto i te ao a Satani, e faaruru iho â tatou i te fifi, peneia‘e e roohia atoa tatou i te ati. Ia tiaturi râ tatou ia Iehova, e nehenehe tatou e faaoromai i teie mau tamataraa a vai taiva ore noa ’tu ai. (Pet. 1, 5:8, 9) I roto i te  Korinetia 1 pene 10, ua faahiti Paulo i te tahi mau tamataraa ta te mau Iseraela i ite i roto i te medebara. (Kor. 1, 10:6-11) Ua nehenehe te feia o tei tiaturi ia Iehova e faaruru i tera mau tamataraa. Ua faaroo ore râ te tahi mau Iseraela ia Iehova. Aita ratou i tiaturi ia ’na, aita ’tura ratou i vai taiva ore.

Te piti o te tumu, e “Atua haavare ore” Iehova. Eaha ïa te auraa? Ia hi‘o tatou mea nafea Iehova i te aupururaa i ta ’na mau tavini i te roaraa o te tau, e ite tatou e ua tauturu oia ma te taiva ore “i te feia i hinaaro ia ’na, e te haapao i ta ’na ra parau.” (Deut. 7:9) Te haapii ra tatou e e tapea iho â Iehova i ta ’na i fafau. (Ios. 23:14) Ua papu ia tatou e (1) eita Iehova e vaiiho i te tahi noa ’‘e tamataraa ia riro mai ei mea fifi roa, a ore atu ai tatou e nehenehe e faaruru i te reira, e (2) “e faatupu atoa oia i te haapuraa” no tatou.

E tamahanahana mai Iehova ia tatou i roto i to tatou mau ati atoa

E nafea Iehova “e faatupu . . . i te haapuraa,” aore ra faaoraraa, no te feia e tiaturi ia ’na? Parau mau, e nehenehe oia e faaore i te tamataraa. A haamana‘o râ, ua parau Paulo e faatupu Iehova “i te haapuraa i taua ati ra, ia tia ia outou ia faaoromai.” E pinepine ïa Iehova i te faaineine i te faaoraraa ma te haapuai ia tatou, ia nehenehe tatou e vai taiva ore. E hi‘o ana‘e te tahi mau ravea e na reira ’i oia.

  • E tamahanahana mai Iehova ia tatou i roto i to tatou mau ati atoa. (Kor. 2, 1:3, 4) E nehenehe oia e tamǎrû i to tatou feruriraa, aau e huru aau maoti te Bibilia, to ’na varua mo‘a e te tavini haapao maitai.—Mat. 24:45; Ioa. 14:16; Roma 15:4.

  • E faaohipa Iehova i to ’na varua mo‘a no te aratai ia tatou. (Ioa. 14:26) E tauturu mai te varua mo‘a ia haamana‘o i te mau aamu Bibilia e ta ’na mau faaueraa tumu, a nehenehe atu ai tatou e rave i te mau faaotiraa î i te paari.

  • E faaohipa Iehova i ta ’na mau melahi no te tauturu ia tatou.—Heb. 1:14.

  • E faaohipa Iehova i to tatou mau taeae e tuahine no te tauturu ia tatou. E nehenehe ratou e haapuai mai ma ta ratou e parau e e rave.—Kol. 4:11.

Eaha ïa ta tatou i haapii mai i te mau parau a Paulo i roto i te Korinetia 1, 10:13? Eita Iehova e maiti eaha te mau tamataraa ta tatou e faaruru. Ia papu râ ia tatou e ia tiaturi tatou ia Iehova, e nehenehe e faaruru i te mau tamataraa atoa. Ua ite tatou e e faaora iho â Iehova ia tatou, ia nehenehe tatou e vai taiva ore ia ’na.

^ par. 7 “Tamataraa,” aore ra “ati” te auraa o te ta‘o Heleni hurihia ei “faahemaraa.”