Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2016

Te ite ra anei oe i te faufaaraa ia faaineine ia vetahi ê?

Te ite ra anei oe i te faufaaraa ia faaineine ia vetahi ê?

“O te parau maitai hoi ta ’u e faaite atu ia outou.”—MAS. 4:2.

HIMENE: 93, 96

1, 2. No te aha mea tia ia faaineine tatou ia vetahi ê ia farii i te mau hopoia Kerisetiano?

UA HAA rahi Iesu no te poro i te Faatereraa arii. Ua faataa atoa oia e rave rahi taime no te faaineine i ta ’na mau pǐpǐ. Ua faaite oia ia ratou e nafea ia haapii e ia aupuru i te nunaa o te Atua. Ua haapii te mau pǐpǐ ia riro mai mai te mau tiai o te aupuru i ta ratou mau mamoe. (Mat. 10:5-7) Ua faaohipa atoa Philipa i to ’na taime no te poro. Ua faaineine atoa râ oia i ta ’na mau tamahine no te rave i te hoê â ohipa. (Ohi. 21:8, 9) I teie mahana, mea tia atoa ia faaineine tatou ia vetahi ê. No te aha?

2 I roto i te mau amuiraa na te ao nei, e rave rahi mero apî aita â ratou i bapetizohia ’tura. Mea tia ia faaineinehia ratou. Mea tia ia tauturu tatou ia ratou ia taa no te aha mea maitai ia rave ratou i ta ratou iho taioraa e haapiiraa Bibilia. E mea tia atoa ia faaineine tatou ia ratou no te poro e no te haapii i te parau apî oaoa. Mea tia ia faaineinehia te mau taeae o tei bapetizo-noa-hia ’tura ia nehenehe ratou e riro mai ei tavini tauturu e ei matahiapo. E nehenehe te taatoaraa o te amuiraa e tauturu i te mau mero apî.—Mas. 4:2.

 A TAUTURU I TE MAU MERO APÎ IA HAAPII I TE BIBILIA

3, 4. (a) Mea nafea Paulo i te faatuatiraa i te haapiiraa i te mau Papai e te hoê taviniraa manuïa? (b) Hou tatou a faaitoito ai i ta tatou mau piahi ia rave i ta ratou iho haapiiraa Bibilia, eaha tei titauhia ia tatou?

3 Mea tia ia taio e ia haapii te mau tavini atoa a Iehova i te Bibilia no te ite eaha to te Atua hinaaro. Ua faataa te aposetolo Paulo i te reira i to ’na mau taeae e tuahine no Kolosa a parau ai oia: “I ore atoa ’i matou i faaea ’i i te pure ia outou, . . . e te aniraa ’tu e ia faaîhia mai outou i te ite i to ’na ra hinaaro.” No te aha mea faufaa roa ’i ia taio e ia haapii ratou i te mau Papai? No te mea e noaa ia ratou te paari e e tauturu atu te reira ia taa eaha te rave “ia au to [ra]tou haerea i te Fatu [ia Iehova, New World Translation] i te mau mea atoa e mauruuru ai ra.” E nehenehe atoa te reira e tauturu atu ia rave i te “mau ohipa maitatai” atoa o ta Iehova e hinaaro ia rave ratou, te pororaa iho â râ i te parau apî oaoa. (Kol. 1:9, 10) No reira, ia haapii tatou i te hoê taata, mea tia ia tauturu tatou ia ’na ia taa e e nehenehe te taioraa tamau e te haapiiraa i te Bibilia e tauturu ia ’na ia tavini ia Iehova.

4 Eita ta tatou e nehenehe e tauturu i ta tatou mau piahi Bibilia ia taa i te faufaaraa o ta ratou iho haapiiraa Bibilia mai te peu e eita tatou e rave i ta tatou iho. Inaha, ia taio tamau tatou i te Bibilia e ia feruriruri tatou i te reira, e tauturu te reira ia tatou i roto i to tatou oraraa e ta tatou taviniraa. Ei hi‘oraa, i roto i te pororaa, ia ui mai te hoê taata i te hoê uiraa fifi, e nehenehe tatou e faaohipa i te Bibilia no te pahono atu. Ia taio atoa tatou i to Iesu, Paulo e vetahi ê taviniraa ma te tuutuu ore, e faaitoito mai te reira e e tamau tatou i te poro noa ’tu te mau haafifiraa. E ia faaite tatou ia vetahi ê i ta tatou i haapii mai i roto i ta tatou haapiiraa e e nafea te reira i te tautururaa mai, e faaitoito paha te reira ia ratou ia haapii atu â i te Bibilia ia nehenehe atoa ratou e faufaahia, mai ia tatou.

5. A horoa i te mau mana‘o e nafea e tauturu i te mau mero apî ia rave ma te tamau i ta ratou iho haapiiraa Bibilia.

5 E ui paha oe, ‘E nafea vau e nehenehe ai e faaineine i ta ’u piahi ia haapii tamau oia i te Bibilia?’ Peneia‘e e nehenehe oe e faaite atu e nafea ia faaineine i te mau tumu parau i roto i te papai ta orua e faaohipa ra no te haapiiraa. E parau paha oe ia ’na ia taio i te mau haamaramaramaraa o te tuhaa hau o te buka Eaha ta te Bibilia e haapii mau ra? e ia hi‘o i te mau irava Bibilia faahitihia. I muri iho, e nehenehe oe  e faaite ia ’na e nafea o ’na ia faaineine no te mau putuputuraa ia nehenehe oia e horoa i te hoê pahonoraa. A faaitoito ia ’na ia taio i te mau vea atoa o Te Pare Tiairaa e A ara mai na! E nehenehe oe e faaite atu e nafea ia imi i te mau pahonoraa i te tahi mau uiraa Bibilia, ei hi‘oraa, ma te faaohipa i te Watchtower Library aore ra i te VAIRAA BUKA I NIA TE INTERNET Watchtower. Ia tamata oia i teie mau ravea taa ê no ta ’na iho haapiiraa, aita e ore e e au oia i te reira e e hinaaro e haapii hau atu â.

6. (a) E nafea oe e nehenehe ai e tauturu i ta oe piahi ia faatupu oia i te hoê here hohonu no te Bibilia? (b) E turai te here hohonu no te mau Papai i te hoê piahi ia aha?

6 Ia haapii tatou i te tahi taata, e hinaaro tatou ia taa ia ’na e mea faufaa te Bibilia, no te mea e tauturu te reira ia ’na ia ite hau atu â no nia ia Iehova. Eiaha e faahepo ia ’na, e nehenehe râ tatou e faaite atu e nafea oia e au ai i te haapii. Hau atu â oia i te haapii i te Bibilia, hau atu â oia i te mana‘o mai te papai salamo tei himene: “E mea maitai . . . ia ’u ia haafatata ’tu i te Atua: ua tiaturi au i te Fatu ra ia Iehova.” (Sal. 73:28) E tauturu iho â te varua o Iehova i te taata o te hinaaro e haafatata ’tu ia ’na.

A FAAINEINE I TE MAU MERO APÎ IA PORO E IA HAAPII I TE TAATA

7. Mea nafea Iesu i te faaineineraa i te feia poro o te parau apî oaoa? (A hi‘o i te hoho‘a matamua.)

7 E nehenehe tatou e huti mai e rave rahi haapiiraa i ta Iesu huru faaineine i ta ’na mau aposetolo. Ua haere Iesu e o ratou i roto i te pororaa, e ua hi‘o ratou ia Iesu ia haapii oia i te taata. Ua horoa atoa oia ia ratou i te mau faaueraa taa maitai e nafea ratou ia poro. (Mataio pene 10) [1] Ua haapii oioi te mau aposetolo a Iesu e nafea ia haapii te parau mau i te taata. (Mat. 11:1) E hi‘opoa mai tatou e piti mana‘o e nehenehe ai tatou e faaineine i te mau mero apî ia haere ratou i roto i te taviniraa.

8, 9. (a) Mea nafea Iesu i te haafatataraa ’tu i te taata i roto i te taviniraa? (b) E nafea tatou e nehenehe ai e tauturu i te feia poro apî ia paraparau i te taata mai ia Iesu?

8 Ia paraparau i te taata. Aita noa Iesu i paraparau i te mau nahoa taata. Ua pinepine oia i te paraparau i tera e tera taata, e ua na reira oia mai te hoê hoa ra te huru. Ei hi‘oraa, e aparauraa anaanatae mau ta ’na e te hoê vahine o tei haere mai e huti i te pape i pihaiiho i te oire no Sikara. (Ioa. 4:5-30) Ua paraparau atoa Iesu ia Mataio Levi, hoê titau tute, e ua titau manihini ia riro mai ei pǐpǐ na ’na. Ua farii Mataio e i muri a‘e, ua titau manihini oia ia Iesu e vetahi ê ia tamaa i to ’na fare. I reira, ua paraparau Iesu i te mau taata e rave rahi.—Mat. 9:9; Luka 5:27-39.

Ia paraparau tatou i te taata mai te hoê hoa ra te huru e ma te mǎrû, e hinaaro atu â ratou e faaroo i ta tatou e parau atu

9 Ua paraparau atoa Iesu ia Natanaela mai te hoê hoa ra te huru, noa ’tu ua faahiti Natanaela i te mau parau tano ore no nia i te mau taata no Nazareta. No te mea ua paraparau Iesu ia Natanaela mai te hoê hoa ra te huru, ua taui oia i to ’na mana‘o no nia ia Iesu, te hoê taata no Nazareta. E  ua hinaaro oia e haapii hau atu â ia Iesu ra. (Ioa. 1:46-51) Maoti to Iesu hi‘oraa, te ite ra tatou e ia paraparau tatou i te taata mai te hoê hoa ra te huru e ma te mǎrû, e hinaaro atu â ratou e faaroo i ta tatou e parau atu. [2] Ia faaineine tatou i te mau mero apî ia paraparau mai tera, e oaoa ’tu â ratou i roto i te taviniraa.

10-12. (a) Mea nafea Iesu i te faatupuraa i te anaanatae ta vetahi ê i faaite no te parau apî oaoa? (b) E nafea tatou e nehenehe ai e tauturu i te feia poro apî ia aravihi atu â ei taata haapii i te parau mau Bibilia?

10 Ia haapii i te feia o tei ineine i te faaroo. Mea ohipa roa Iesu. Ia ineine râ te taata i te faaroo ia ’na, e faataa oia i te taime e o ratou e e haapii atu oia e rave rahi mea. Ei hi‘oraa, i te hoê mahana, ua putuputu te hoê nahoa taata i te pae tahatai no te faaroo ia Iesu. Ua haere Iesu i nia i te hoê poti e o Petero e ua haapii oia i te taata. I muri a‘e i te reira, ua hinaaro atoa Iesu e horoa i te hoê haapiiraa ia Petero. Ua faatupu Iesu i te hoê semeio ma te faahaere mai e rave rahi i‘a na Petero. Ua parau oia i muri iho ia Petero: “I teie nei, e taata ta oe e noaa.” Faaho‘i maira Petero e to ’na mau hoa i “to ratou pue pahi i tahatai, faarue ana‘e ihora ratou” i te mau mea atoa e pee atura ia Iesu.—Luka 5:1-11.

11 Ua hinaaro atoa o Nikodemo e haapii hau atu â no ǒ mai ia Iesu ra. No te mea râ e mero o Nikodemo no te Sunederi, ua mǎta‘u oia i ta vetahi ê e mana‘o ia itehia oia e paraparau ra ia Iesu. Ua haere ïa oia e farerei ia Iesu i te po. Aita Iesu i tiahi ia ’na, ua rave râ i te taime no ’na e ua faataa ’tu i te tahi mau parau mau faufaa. (Ioa. 3:1, 2) Ua ineine noa Iesu i te faaohipa i to ’na taime no te haapii te parau mau i te taata e no te haapuai i to ratou faaroo. Mea tia ia ineine atoa tatou i te haere e farerei i te taata i te hoê taime tano no ratou, e ia faataa i te taime no te tauturu ia ratou ia taa i te Bibilia.

12 Ia haere tatou e te mau mero apî i roto i te taviniraa, e nehenehe tatou e haapii ia ratou ia ho‘i e farerei i te feia tei faaite paha i te anaanatae no te aparau faahou ia ratou. E nehenehe atoa tatou e titau manihini i te mau mero apî ia haere mai na muri ia tatou no ta tatou mau farerei-faahou-raa e haapiiraa Bibilia. Ma te na reira, e ite ratou i te haapii ia vetahi ê, oia atoa te oaoa ia tauturu i tei hinaaro e haapii i te parau mau no nia ia Iehova. I muri iho, e oaoa roa teie mau mero apî i te farerei faahou i te taata e i te haapii i te Bibilia e o ratou. E nehenehe atoa ratou e haapii i te faaoromai, eiaha atoa e tuu oioi aita ana‘e ratou e ite faahou i te taata i te fare.—Gal. 5:22; a hi‘o i te tumu parau tarenihia “ Aita o ’na i tuu.”

A FAAINEINE I TE MAU MERO APÎ IA TAVINI I TO RATOU MAU TAEAE

13, 14. (a) Eaha to oe mana‘o no te mau hi‘oraa Bibilia o te feia o tei rave i te mau haapaeraa rahi no vetahi ê? (b) E nafea tatou e nehenehe ai e faaineine i te feia poro apî e te feia apî ia faaite i te here i to ratou mau taeae e tuahine?

13 Te hinaaro ra Iehova ia here ta ’na mau tavini te tahi i te tahi ei taeae e tuahine e ia tavini te tahi i te tahi. (A taio i te Luka 22:24-27; Petero 1, 1:22.) Te faataa ra te Bibilia e ua horoa Iesu i te mau mea atoa e to ’na iho ora no te tauturu ia vetahi ê. (Mat. 20:28) “E rahi” ta Doreka “ohipa maitai i rave, e te horoa hoi i te tao‘a.” (Ohi. 9:36, 39) “E ohipa rahi” ta Maria “i rave” no to ’na mau taeae e tuahine i Roma. (Roma 16:6) E nafea tatou e nehenehe ai e tauturu i te mau mero apî ia taa e mea faufaa roa ia rave i te mau mea  maitatai no to ratou mau taeae e tuahine?

E faaineine i te mau mero apî ia here e ia tavini i to ratou mau taeae (A hi‘o i te mau paratarafa 13, 14)

14 E nehenehe tatou e ani i te mau mero apî ia haere mai na muri ia tatou no te haere e farerei i te feia ruhiruhia aore ra tei ma‘ihia. Ia haere te mau metua e farerei ia ratou, e nehenehe ratou e rave i ta ratou mau tamarii. E nehenehe atoa te mau matahiapo e ani i te mau taurearea aore ra i te mau mero apî e ohipa e o ratou no te afai i te maa na te feia ruhiruhia aore ra e tataî i to ratou fare. Ia ite te mau taurearea e te mau mero apî e nafea te mau taeae e tuahine e aupuru ai te tahi i te tahi, e hinaaro ratou e na reira atoa. Ei hi‘oraa, ia poro te hoê matahiapo i te hoê mataeinaa, e haere iho â oia e farerei i te mau taeae e ora ra i reira no te ite eaha to ratou huru. Ua haapii te hoê taeae apî o tei haere pinepine na muri i taua matahiapo ra i to ’na hi‘oraa maitai, oia hoi, ia feruri i ta ’na e nehenehe e rave no te tauturu i to ’na mau taeae e tuahine.—Roma 12:10.

15. No te aha mea faufaa ’i ia haapao maitai te mau matahiapo i te faaineineraa o te mau tane i roto i te amuiraa?

15 Ua horoa Iehova i te mau tane te hopoia e haapii i te Parau a te Atua i roto i te amuiraa. No reira, mea faufaa ia ite te mau taeae e nafea ia haapii maitai ia horoa ratou i te mau oreroraa parau. Mai te peu e e matahiapo oe, peneia‘e e nehenehe oe e faaroo i te hoê tavini tauturu ia faaineine oia i te hoê oreroraa parau e e tauturu ia ’na ia aravihi atu â. (Neh. 8:8) [3]

16, 17. (a) Eaha ta Paulo i rave o te faaite ra e ua haapao maitai oia i to Timoteo faaineineraa? (b) E nafea te mau matahiapo e nehenehe ai e faaineine maitai i te mau taeae ia riro mai ratou ei tiai mamoe o te amuiraa?

16 Te hinaarohia ra hau atu â taeae faaineinehia no te riro mai ei tiai mamoe i roto i te amuiraa. Ua faaineine Paulo ia Timoteo e ua faaitoito ia ’na ia faaineine ia vetahi ê. Ua parau Paulo: “Ia itoito oe i te maitai e vai i roto i te Mesia ra ia Iesu. E te mau parau ta oe i faaroo ia ’u nei, i te aro o to mau ite atoa e rave rahi ra, o ta oe ïa e tuu atu i te feia parau mau, o te au ia haapii atu ia vetahi ê ra.” (Tim. 2, 2:1, 2) Ua haapii Timoteo e rave rahi mea no ǒ mai ia Paulo ra, te hoê matahiapo e aposetolo, mai te haamaitairaa ’tu â i ta ’na pororaa e te tautururaa i te mau taeae i roto i te amuiraa.—Tim. 2, 3:10-12.

17 Ua horoa rahi Paulo i to ’na taime no Timoteo no te mea ua hinaaro oia e ite e ua faaineine-maitai-hia iho â o Timoteo. (Ohi. 16:1-5) E nehenehe te mau matahiapo e pee i to Paulo hi‘oraa ma te rave i te tahi mau tavini tauturu aravihi na muri ia ratou no te haere e faaitoito i te tahi mau  taata poro. Ma te na reira, e haapii mai te mau tavini tauturu e nafea ia haapii ia vetahi ê, ia faaoromai, ia faaite i te here e ia tiaturi ia Iehova a aupuru noa ’i ratou i ta ’na nǎnǎ.—Pet. 1, 5:2.

MEA FAUFAA IA FAAINEINE

18. No te aha e tia ia haafaufaa tatou i te faaineineraa ia vetahi ê i roto i te taviniraa ia Iehova?

18 I teie anotau hopea, mea tia ia faaineinehia e rave rahi mero apî ia aravihi atu â ratou i roto i te ohipa pororaa. Te hinaaro-atoa-hia ra ia haapii te mau taeae i te haapao i te amuiraa. Te hinaaro ra Iehova ia faaineine-maitai-hia ta ’na mau tavini atoa e ua horoa mai oia i te fana‘oraa taa ê e tauturu i te mau mero apî. No reira, mea faufaa ia haa rahi no te faaineine ia vetahi ê, mai ta Iesu e Paulo i rave. Mea tia ia faaineine tatou e rave rahi mero apî no te mea mea rahi â te ohipa i roto i te pororaa hou te hopea a tae mai ai.

19. No te aha ia papu ia outou e e manuïa ta outou mau tutavaraa no te faaineine ia vetahi ê i roto i te taviniraa ia Iehova?

19 Mea titauhia te taime e te tutavaraa no te faaineine i te mau mero apî. Ia papu râ ia tatou e e tauturu mai Iehova e Iesu ia ite e nafea ia faaineine ia vetahi ê ma te ravea maitai roa ’‘e. E oaoa tatou i te ite i te feia o ta tatou i faaineine e haa rahi i roto i te amuiraa aore ra i roto i te ohipa pororaa. (Tim. 1, 4:10) Mea tia atoa ia tamau tatou i te tutava no te haere i mua i te pae varua, no te haamaitai atu â i to tatou mau huru maitatai Kerisetiano e no te haafatata ’tu â ia Iehova.

^ [1] (paratarafa 7) Ei hi‘oraa, ua parau Iesu i ta ’na mau pǐpǐ (1) ia poro i te Faatereraa arii; (2) ia tiaturi i te Atua e na ’na e horoa ’tu i te maa e te ahu hinaaro-mau-hia e ratou; (3) eiaha e imi i te peapea i te taata; (4) ia tiaturi i te Atua ia hamani ino te taata ia ratou; (5) eiaha e mǎta‘u i ta te taata e rave i nia ia ratou.

^ [2] (paratarafa 9) I roto i te buka A haafaufaa i te Haapiiraa no te taviniraa Kerisetiano (Farani), api 62-64, te vai ra te mau mana‘o maitatai no nia i te huru paraparauraa i te taata i roto i te taviniraa.

^ [3] (paratarafa 15) Te faataa ra te buka A haafaufaa i te Haapiiraa no te taviniraa Kerisetiano (Farani), api 52-61, e nafea te mau taeae e nehenehe ai e haamaitai atu â i ta ratou huru horoaraa i ta ratou oreroraa parau i roto i te amuiraa.