Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2016

 AAMU

Mea nafea vau i te iteraa i te oaoa i te horoaraa ’tu

Mea nafea vau i te iteraa i te oaoa i te horoaraa ’tu

E 12 matahiti to ’u i te taaraa e e ohipa faufaa ta ’u e nehenehe e horoa. I te hoê tairururaa, ua ani mai te hoê taeae ia ’u aita anei au e hinaaro ra e haere e poro. Noa ’tu aita vau i poro na mua ’tu, ua farii au. Ua haere mâua i roto i te tuhaa fenua e ua horoa mai oia i te tahi mau buka iti no nia i ta te Atua Faatereraa arii. I muri iho, ua parau mai oia: “E haere oe e farerei te taata na tera pae o te aroâ e e haere vau na teie pae.” Ua mǎta‘u vau. Ua haamata râ vau i te poro i tera e tera fare. Ua maere vau i te pau-oioi-raa ia ’u te mau buka atoa i te operehia. Mea papu, e rave rahi taata o tei hinaaro i ta ’u e horoa ra.

Ua fanauhia vau i 1923 i Chatham, Kent, Beretane. I roto i tera mau matahiti i muri a‘e i te Tama‘i rahi matamua, ua tiaturi te taata e e riro mai te ao nei ei vahi maitai roa. Aita râ te reira i tupu, ua inoino e rave rahi, oia atoa to ’u na metua. Ua inoino atoa raua i te pǔpǔ ekalesiatiko Baptiste o te haapao noa ia raea ia ratou te hoê tiaraa teitei a‘e i roto i te ekalesia. E iva matahiti paha to ’u a haamata ’i to ’u mama i te haere i te piha a te Feia Haapii Bibilia Nunaa rau, i reira te mau Ite no Iehova e putuputu ai. Ua haapii mai hoê tuahine ia matou te mau tamarii i te tahi mau haapiiraa niuhia i nia i te Bibilia e te buka Te kinura a te Atua (Beretane). Ua au roa vau i ta ’u i haapii.

HAAPIIRAA NO Ǒ MAI I TE MAU TAEAE PAARI

Ei taurearea, mea oaoa roa na ’u e horoa i te taata te tiaturiraa no ǒ mai i te Parau a te Atua ra. E pinepine au i te poro o vau ana‘e. Ia poro râ vau e vetahi ê, mea rahi ïa ta ’u e haapii mai ia ratou ra. Ei hi‘oraa, i te hoê mahana, ua haere mâua e te hoê taeae paari i roto i te tuhaa fenua, haere a‘era te hoê ekalesiatiko. Parau atura vau: “E ra ’tu te hoê puaaniho.” Ua vaiiho te taeae i to ’na pereoo taataahi e ua ani mai ia parahi i pihaiiho ia ’na. Ua na ô oia: “Na vai i horoa ia oe te tiaraa no te haava i te taata ei puaaniho? E faaite noa ana‘e i te taata te parau apî ma te oaoa e e vaiiho ana‘e na Iehova e haava.” I tera mau mahana, ua haapii au e rave rahi mea no nia i te oaoa ia horoa ’tu.—Mat. 25:31-33; Ohi. 20:35.

Ua haapii mai te tahi atu taeae paari e no te ite i te oaoa i te horoaraa ’tu, i te tahi mau taime, mea tia ia faaoromai tamau tatou. Aita ta ’na vahine i au i te mau Ite no Iehova. I te hoê taime, ua titau manihini te taeae ia ’u i to ’na fare no te amuamu. Ua riri roa ta ’na vahine ia ’na i to ’na haereraa e poro, haamata ’tura oia i te taora i te mau puohu ti i nia ia mâua. Aita te taeae i riri atu, ua faaho‘i oia ma te hau i te mau ti i roto i te vairaa. Te tahi mau matahiti i muri a‘e, ua haamaitaihia to ’na faaoromai, inaha ua bapetizohia ta ’na vahine ei Ite no Iehova.

 I Tetepa 1939, i te 16raa o to ’u matahiti, ua faatupu te fenua Beretane i te tama‘i i te fenua Heremani. I Mati 1940, ua bapetizohia mâua to ’u mama i Douvres. I Tiunu 1940, te hi‘o noa ra vau mai to matou uputa fare e tausani faehau te tere nei na nia iho i te mau pereoo faehau rarahi aore ra pereoo pani. Ua ora mai ratou i te tama‘i i Dunkerque. Ia hi‘ohia ’tu, ua mau roa te mau mea ta ratou i ite i te tama‘i i roto i to ratou feruriraa e aita e tiaturiraa to ratou. Ua hinaaro mau vau e paraparau ia ratou no nia i ta te Atua Faatereraa arii e e horoa ’tu i te hoê tiaturiraa no a muri a‘e. I muri a‘e, i tera noa â matahiti, ua haamata Heremani i te topita ia Beretane. I te mau po atoa, e rere noa te mau manureva topita Heremani na nia i to matou vahi. Ua riaria roa matou i te faaroo i te ta‘i hio ia topa te mau paura. I te poipoi a‘e, e ite matou i te mau vahi topitahia e te mau fare parari. Ua tauturu mai teie mau tupuraa ia ’u ia taa hau atu â e o te Faatereraa arii ta ’u tiaturiraa otahi roa no a muri a‘e.

HAAMATARAA I TE HOÊ ORARAA NIUHIA I NIA I TE HOROARAA ’TU

I 1941, ua rave au i te taviniraa taime taatoa. E huru oraraa teie tei faaoaoa mau ia ’u. Ua ohipa vau i te vahi hamaniraa pahi i Chatham, haapii e nafea ia hamani i te mau pahi. E ohipa teie o ta te taata e rave rahi i hinaaro, e mea rahi atoa te apî i teie ohipa. Ua ite a‘ena râ te mau tavini a Iehova e ere mea tano ia aro te mau Kerisetiano no te hoê nunaa i te tahi atu nunaa. E i 1941, ua taa atoa ia matou e eiaha roa ’tu e turu i te hamaniraa o te mau mauhaa tama‘i. (Ioa. 18:36) I reira, i hamanihia na te tahi mau pahi hopu, ua faaoti ïa vau i te faarue i ta ’u ohipa e ua rave au i te taviniraa taime taatoa. Ua tonohia vau na mua roa i Cirencester, te hoê oire nehenehe i te mau aivi no Cotswolds.

I te 18raa o to ’u matahiti, ua tapeahia vau e iva ava‘e i te fare auri no te mea ua patoi au i te apiti i te mau faehau. Ua oti roa vau i te tapiriraahia to ’u opani e a faaea noa ’i au o vau ana‘e. Aita râ i maoro, ua haamata te mau tiai e te feia mau auri i te ani mai eaha ta ’u ohipa i ǒ nei, oaoa a‘era vau i te faataaraa ’tu i to ’u faaroo.

I muri a‘e a matara mai ai au mai te fare tapearaa, ua apiti au ia Leonard Smith * e ua poro mâua i te mau oire e rave rahi no Kent, i reira matou i ora ’i. No te topita ia Lonedona, e titauhia ia rere te mau manureva a te Nazi na nia ’tu i te tuhaa no Kent. Mai te matahiti 1944, ua hau atu i te tausani topita tei parauhia doodlebugs o tei topa i Kent. E mau manureva teie mau topita, aita e pairati, e o tei faaîhia i te paura. Ua pohe ana‘e te matini o te manureva, e tiai  noa matou tau tetoni i muri a‘e e topa ’i te manureva a paaina ’tu ai te reira. Ua riaria te taata atoa. I tera taime, ua haapii mâua i te Bibilia i te hoê utuafare e pae taata. I te tahi mau taime e parahi matou i raro a‘e i te hoê airaa maa auri no te paruru ia matou ia parari noa ’tu te fare. Ua bapetizohia teie utuafare taatoa.

PORORAA I TE PARAU APÎ OAOA I TE TAHI MAU FENUA

Te mau parau faatiani no te hoê tairururaa a poro ai au i Irelane

I muri a‘e i te tama‘i, ua haere au e poro e piti matahiti i Irelane Apatoa. Ua haere mâua i tera e tera fare ma te parau atu e e mitionare mâua e ma te ani i te hoê vahi faaearaa. Ua pûpû mâua i te mau vea na te mau aroâ. Mea taa ê roa râ o Irelane ia Beretane. Ua mana‘o e rave rahi e mea maamaa mâua i te tiaturiraa e e farii mai te taata ia mâua, e mau Katolika ana‘e to reira! A haamǎta‘u ai te hoê taata ia mâua, ua haere au e faaite i te hoê mutoi. Ua parau mai râ oia: “Eaha hoi ta oe e mana‘o ra?” E mana rahi iho â to te mau perepitero i reira. E nehenehe te taata e ere i ta ratou ohipa ia farii ratou i ta mâua mau buka. Ua titauhia ia faarue mâua i te vahi i reira mâua i te oraraa.

Ua taa oioi ia mâua e ia tae i te hoê vahi, mea maitai a‘e ia poro i te mau vahi aita mâua i matauhia e te perepitero. No reira, ua titauhia ia haere mâua na te mau vahi atea i to mâua faaearaa no te farerei na mua roa i te taata i tera mau vahi. I muri a‘e, ua poro mâua i te mau taata na pihaiiho. I Kilkenny, ua haapii mâua e te hoê taurearea apî e toru taime i te hebedoma, noa ’tu te haamǎta‘uraa u‘ana a te nahoa taata. No to ’u oaoa rahi i te haapiiraa i te Bibilia i te taata, ua hinaaro vau e fana‘o i te faaineineraa no te mau mitionare. Faaoti atura vau e tapao ia ’u no te Haapiiraa Bibilia no Gileada.

Te pahi taie Sibia, to matou ïa fare mitionare mai 1948 e tae atu i 1953

I muri a‘e i te haapiiraa e pae ava‘e i New York, ua tonohia e maha o matou tei faatuitehia, i te mau motu iti i te miti no Caraïbes. I Novema 1948, ua faarue matou ia New York na nia i te pahi taie Sibia, e 18 metera te roa. Aita vau i haere a‘enei na nia i te pahi taie, ua oaoa roa vau. E tapena pahi aravihi o Gust Maki, hoê o tei faatuite-atoa-hia. Ua haapii mai oia i te tahi mau mea faufaa, mai te hutiraa i te ie i nia e te faaho‘iraa i raro, e nafea ia faaohipa i te aveia e e nafea ia faaû i te mata‘i. Ua faatere maite o Gust i to matou pahi e 30 mahana na roto i te mau mata‘i atâta e tapae noa ’tu ai matou i Bahamas.

“E FAAITE OUTOU I TE MAU FENUA ROA RA”

Tau ava‘e i muri a‘e i to matou pororaa i te mau motu iti i Bahamas, ua fano matou i te mau motu raromatai e te mau motu nia mata‘i. E fatata 800 kilometera e faataa ê ra taua mau motu ra, mai te mau motu Vierges e haere roa mai i te motu Trinité. Ua poro matou e pae matahiti, na mua roa i te mau motu atea roa, aita e Ite no Iehova i reira. I te tahi mau taime, aita e nehenehe e hapono aore ra e faataehia mai i te mau rata. E tiai matou e rave rahi hebedoma. Ua oaoa roa râ matou i te poro no nia ia Iehova i “te mau fenua roa ra”!—Ier. 31:10.

Te mau horopahi mitionare i nia i te Sibia (mai te pae aui e tae atu i te pae atau): Ron Parkin, Dick Ryde, Gust Maki e Stanley Carter

Ia tutau matou i te pahi i roto i te hoê ooa, e haere mai te mau taata e e putuputu mai ratou i nia i te uahu no te ite o vai matou. Aita vetahi i ite a‘enei i te hoê pahi mai to matou aore ra aita ratou i ite a‘enei i te mau taata uouo. Mea maitai roa te mau taata no reira, e mea ite maitai ratou i te Bibilia. Pinepine ratou i te horoa mai i te i‘a, te mau avota e te mau aratita. Noa ’tu mea pirihao roa to matou pahi, ua nehenehe matou e tunu i te maa, e taoto e e papu‘a i to matou mau ahu.

E pou matou no te haere e farerei i te taata i te mahana taatoa. E parau matou ia ratou e te vai ra te hoê  oreroraa parau Bibilia. E i te toparaa mahana e faata‘i matou i te ôe o te pahi. Mea faahiahia ia ite i te taata ia tae mai. E au ta ratou mau mori hinu i te mau fetia e anaana ra o te haere mai ra mai te mau aivi ra. I te tahi mau taime, e hanere taata te haere mai e e uiui noa mai ratou e maoro atu te po. Mea au roa na ratou te himene, ua patapata matou na ratou i te tahi mau himene haamoriraa ia Iehova. Ua faaitoito matou e maha i te himene. I muri iho, ua haamata te taata i te himene e o matou. Mea nehenehe to ratou reo. E mau taime oaoa mau teie!

I muri a‘e i te hoê haapiiraa Bibilia, e na muri atoa mai te tahi mau piahi ia matou i to muri iho utuafare, no te apiti atoa mai i ta ratou haapiiraa. I muri a‘e tau hebedoma i te hoê vahi, e titauhia ia faarue matou i tera vahi. E pinepine râ matou i te ani i te mau taata o te faaite mau i te anaanatae ia tamau i te haapii ia vetahi ê e tae roa i te taime e ho‘i mai ai matou. Mea oaoa roa ia ite e ua rave maite vetahi o ratou i ta ratou hopoia.

I teie mahana, e rave rahi ratere na tera mau motu. Na mua ’‘e, e ere mea taata i tera mau vahi, o te tairoto ninamu ana‘e ta oe e ite, te one tahatai e te mau tumu raau. Ua matau matou i te tere pahi i tera e tera motu i te po, na pihaiiho noa mai te ou‘a i te haere, e te mea noa e faaroohia, o to matou ïa pahi na nia i te moana. E au te marama o te ava‘e i nia i te miti i te hoê e‘a ario o te aratai i te iriatai.

I muri a‘e e pae matahiti i te pororaa i roto i te mau motu, ua fano matou i Porto Rico no te rave mai i te hoê pahi apî, e matini to ’na. I to matou tapaeraa ’tu i ǒ, ua farerei au ia Maxine Boyd, te hoê tuahine mitionare haviti mau, e ua here roa vau ia ’na. Mai to ’na apîraa mai â oia i te pororaa i te parau apî oaoa ma te itoito rahi. I muri a‘e, ua poro oia ei mitionare i Repupirita Dominicaine e tae roa i 1950, a faahepo ai te faatereraa Katolika ia ’na ia faarue tera vahi. No te mea e taata horopahi au, hoê ava‘e noa ta ’u parau faatia no te faaea i Porto Rico. I muri a‘e, e fano vau i te mau motu tau matahiti â. Ua parau ïa vau ia ’u iho, ‘Ronald, mai te peu e hinaaro oe i tera vahine, a haapeepee mai ia oe.’ I muri a‘e e toru hebedoma, ua ani au ia faaipoipo mâua. E ono hebedoma i muri a‘e, faaipoipo atura mâua. Ua tonohia mâua Maxine ei mitionare i Porto Rico, aita vau i haere na nia i te pahi apî.

I 1956, ua haamata mâua i roto i te tuhaa haaati e ua au roa mâua e haere e farerei i te mau taeae. Mea veve e rave rahi o ratou. Ei hi‘oraa, i roto i te hoê oire iti i Potala Pastillo, e piti utuafare Ite no Iehova mea rahi te tamarii e ua matau vau i te hauti i te vivo na ratou. Ua ani au i te hoê o na tamahine iti, o Hilda te i‘oa, mai te peu e e hinaaro oia e haere e poro na muri ia mâua. Ua parau oia: “E hinaaro vau, aita râ ta ’u e nehenehe. Aita to ’u e tiaa.” Ua hoo mâua te tiaa no ’na e ua haere mai oia e poro na muri ia mâua. E rave rahi matahiti i muri a‘e, i 1972, a haere ai mâua Maxine e mataitai ia Brooklyn, ua haere mai te hoê tuahine o tei faatuite-noa-hia ’tura i te Haapiiraa no Gileada, e paraparau ia mâua. Te haere ra oia e poro i Équateur e ua parau oia: “Te haamana‘o ra orua ia ’u? O vau tera tamahine no Pastillo aita to ’na e tiaa.” O Hilda! No to matou oaoa rahi ua ta‘i matou!

I 1960, ua haamata mâua i te tavini i te amaa no Porto Rico, tei roto ïa i te hoê fare iti i Santurce, San Juan. I te taime matamua, ua rave mâua Lennart Johnson i te rahiraa o te ohipa. O Lennart Johnson e ta ’na vahine te mau Ite no Iehova matamua i Repupirita Dominicaine, e i 1957, ua haere raua i Porto Rico. I muri a‘e, ua hapono Maxine i te mau vea na te mau taata tei ani ia hapono-tamau-hia ta ratou. Ua hapono oia hau atu i te tausani vea i te mau hebedoma atoa. Mea au roa na ’na i tera ohipa, no te mea ua mana‘o oia i tera rahiraa taata e haapii ra no nia ia Iehova.

Ua oaoa vau i te ohipa i te Betela, no te mea ua nehenehe au e faaohipa i to ’u puai i roto i ta Iehova taviniraa. E ere noa râ i te mea ohie. Ei hi‘oraa, i te tairururaa nunaa rau matamua i Porto Rico i 1967, ua oti roa vau, ua rahi roa te ohipa tei titauhia ia ’u ia faanaho. Ua haere mai o Nathan Knorr, tei aratai i te faanahonahoraa a te mau Ite no Iehova, i Porto Rico. Ua mana‘o oia aita vau i faanaho i te pereoo no te mau mitionare o tei haere mai e mataitai ia Porto Rico. Ua faanaho hoi au i te reira. I muri a‘e, ua a‘o mai oia ia ’u no nia i te faufaaraa ia naho maitai ta ’u ohipa e ua parau e aita oia i mauruuru ia ’u. Aita vau i hinaaro e maniania e o ’na. No ’u râ, e ere i te mea tano ta ’na i rave ia ’u, e ua riri au ia ’na tau taime. I to mâua Maxine farerei-faahou-raa i te taeae Knorr, ua titau manihini mai oia ia mâua i to ’na piha e ua tunu oia i te maa na matou.

 Ua haere mâua e farerei i to ’u fetii i te fenua Beretane e rave rahi taime. Aita to ’u papa i farii i te parau mau i te hoê â taime e o mâua mama. Ia haere mai râ te mau taeae no te Betela e mataitai i to matou vahi, e pinepine to ’u mama i te ani ia ratou ia faaea mai i to matou fare. Ua ite to ’u papa te haehaa o teie mau tiaau o te Betela. Mea taa ê roa ratou i te mau ekalesiatiko o ta ’na i inoino e rave rahi matahiti i teie nei. I 1962, ua bapetizohia oia ei Ite no Iehova.

Mâua Maxine i Porto Rico, i muri iti noa ’‘e i to mâua faaipoiporaa e i te 50raa o to mâua matahiti faaipoiporaa i 2003

Ua pohe ta ’u vahine here, o Maxine, i 2011. Te tiai ru nei au i te ite faahou ia ’na i te tia-faahou-raa. Auê ïa oaoa ia mana‘o vau i te reira! I na 58 matahiti faaipoiporaa, ua ite mâua te maraaraa o te numera o te mau Ite no Iehova i Porto Rico: fatata 650 na mua ’tu e 26 000 i teie mahana! I muri iho, i 2013, ua amui te amaa no Porto Rico i te amaa no Marite, e ua anihia vau ia tavini i Wallkill, New York. I muri a‘e e 60 matahiti i Porto Rico, ua riro roa vau mai te hoê taata no ǒ. Ua oaoa roa vau i Porto Rico. I teie nei râ, e tia ia haere i mua.

“TE HERE NEI HOI TE ATUA I TE TAATA TEI HOROA NOA MA TE OÂO”

Te oaoa noa ra vau i te tavini i te Atua i te Betela. E 90 tiahapa matahiti to ’u i teie nei e ta ’u ohipa, o te faaitoitoraa ïa i te mau mero o te utuafare o te Betela. Mai to ’u taeraa mai i Wallkill, ua farerei au hau atu 600 taeae e tuahine. E haere mai vetahi e farerei ia ’u no te paraparau no nia i to ratou iho mau fifi aore ra no te mau fifi utuafare. Area vetahi ê, e hinaaro ratou i te tahi mau mana‘o e nafea ia manuïa te taviniraa i te Betela. Te vai ra o te hinaaro i te mau a‘oraa, no te mea e ere i te mea maoro ratou i te faaipoiporaa aore ra ua tonohia ratou i roto i te taviniraa pionie. E faaroo vau i te feia atoa o te paraparau mai ia ’u e mai te peu e e tano i te tupuraa, e pinepine au i te parau ia ratou: “‘Te here nei hoi te Atua i te taata tei horoa noa ma te oâoâ.’ A oaoa ïa i ta outou ohipa. Na Iehova te ohipa ta outou e rave ra.”—Kor. 2, 9:7, Te Bibilia Mo’a V.C.J.S. (1976)

Ia hinaaro oe e oaoa i te Betela aore ra i te tahi atu mau vahi, mea tia ia feruri oe no te aha mea faufaa te ohipa ta oe e rave ra. E taviniraa mo‘a te mau ohipa atoa ta tatou e rave ra i te Betela. E tauturu te reira i te “tavini haapao maitai e te paari” ia horoa i te maa pae varua i te mau taeae na te ao atoa nei. (Mat. 24:45) I te mau vahi atoa e tavini ai tatou ia Iehova, e nehenehe tatou e arue ia ’na. E rave ana‘e i ta ’na e ani mai ra ia tatou no te mea “te here nei hoi te Atua i te taata tei horoa noa ma te oâoâ.”

^ par. 13 E itehia te aamu o Leonard Smith i roto i Te Pare Tiairaa o te 15 no Eperera 2012 (Farani).