Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2016

Ia manuïa te faaipoiporaa Kerisetiano

Ia manuïa te faaipoiporaa Kerisetiano

“E aroha . . . te taata atoa i tana iho vahine, mai te aroha ia ’na ihora, e te vahine ra ia auraro oia i tana tane.”—EPH. 5:33.

HIMENE: 87, 3

1. Noa ’tu e haamata te faaipoiporaa ma te oaoa, eaha ta te feia faaipoipo e farerei i muri a‘e? (A hi‘o i te hoho‘a matamua.)

IA ITE te tane faaipoipo i ta ’na vahine haviti mau i te mahana faaipoiporaa, e oaoa roa na hoa faaipoipo. A haamatau ai raua ia raua, ua rahi roa mai to raua here te tahi i te tahi, hinaaro roa ’tura raua e faaipoipo. Euhe atura raua e vai taiva ore te tahi i te tahi. I muri a‘e i te faaipoiporaa, e titauhia ia raua ia rave i te mau tauiraa ia vai hoê noa raua. Te hinaaro ra Iehova te Tumu o te faaipoiporaa, ia oaoa e ia manuïa te oraraa ei feia faaipoipo, ua horoa ïa oia i te mau a‘oraa î i te paari i roto i ta ’na Parau, te Bibilia. (Mas. 18:22) Noa ’tu râ, te parau ra te Bibilia e e farerei te mau taata tia ore o te faaipoipo, i te mau fifi aore ra i te “ati . . . i te tino nei.” (Kor. 1, 7:28) E nafea te mau hoa faaipoipo e nehenehe ai e faaiti i teie mau fifi? E e nafea te mau Kerisetiano ia manuïa te faaipoiporaa?

2. Eaha te huru here e tia i te mau hoa faaipoipo ia faaite?

2 Te haapii mai ra te Bibilia e e huru maitai faufaa roa te here. Ua rau râ te huru here e titauhia ia faatupu te tane e te  vahine i roto i te faaipoiporaa. Ei hi‘oraa, mea titauhia ia faatupu te tahi e te tahi i te here taeae. Oia atoa râ i te here i roto i te tane e te vahine. E ia tamariihia raua, e itehia ïa te here i roto i te mau mero o te utuafare. Te vai ra râ te here o tei niuhia i nia i te mau faaueraa tumu e ite ai raua i te oaoa mau i roto i te faaipoiporaa. Te faataa ra Paulo i tera here a parau ai oia: “E aroha . . . te taata atoa i tana iho vahine, mai te aroha ia ’na ihora, e te vahine ra ia auraro oia i tana tane.”—Eph. 5:33.

TE MAU HOPOIA A TE TANE E TE VAHINE FAAIPOIPO

3. Mai te aha te puai o te here i roto i te faaipoiporaa?

3 Ua papai Paulo: “E te mau tane ra, e aroha outou i ta outou mau vahine, mai te Mesia atoa i aroha i te ekalesia, e ua horoa ia ’na iho ei taui.” (Eph. 5:25) Te pee ra te mau Kerisetiano i teie mahana i to Iesu hi‘oraa ma te here te tahi i te tahi mai ta Iesu i here i ta ’na mau pǐpǐ. (A taio i te Ioane 13:34, 35; 15:12, 13.) No te rahi o te here ta te hoê tane Kerisetiano e ta ’na vahine faaipoipo e faaite te tahi i te tahi, ua ineine ïa te tahi i te pohe no te tahi. Ia tupu râ te fifi rahi i roto i te faaipoiporaa, e mana‘o paha vetahi e e ere to ratou here i te mea puai roa. Eaha te nehenehe e tauturu ia ratou? O te here ïa niuhia i nia i te mau faaueraa tumu e “tapo‘i i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra.” E ore roa tera huru here “e mou.” (Kor. 1, 13:7, 8) Mea tia ia haamana‘o te hoê tane e ta ’na vahine faaipoipo e ua euhe raua. Ua euhe raua e here te tahi i te tahi ma te ore e taiva. E turai te haamana‘oraa i te reira i te mau hoa faaipoipo Kerisetiano ia imi i ta Iehova tauturu e ia ohipa amui no te faatitiaifaro i te mau fifi atoa.

4, 5. (a) Eaha te hopoia a te tane ei upoo utuafare? (b) Eaha te tia i te hoê vahine faaipoipo ia rave? (c) Eaha te mau faatanoraa ta te hoê tane e ta ’na vahine faaipoipo i titauhia ia rave?

4 Ua faataa Paulo i te mau hopoia a na hoa faaipoipo tataitahi a parau ai oia: “E te mau vahine ra, e auraro outou i ta outou ihora mau tane, mai ta tatou i auraro i te Fatu ra. O te tane hoi to te vahine ra upoo, mai te Mesia atoa ra ei upoo ïa no te ekalesia.” (Eph. 5:22, 23) E ere te auraa e mea maitai a‘e te tane i ta ’na vahine faaipoipo. Ua faahiti Iehova i te tiaraa faufaa o te hoê vahine faaipoipo a parau ai oia: “E ere ïa i te mea maitai ia parahi noa Adamu oia ana‘e ra; e hamani au i te tahi tauturu au na ’na ra.” (Gen. 2:18) E tia i te hoê vahine faaipoipo ia tauturu i ta ’na tane ia riro mai oia ei upoo utuafare maitai. E mea titauhia i te hoê tane ia pee i te here o Iesu, te upoo o te amuiraa. Ia na reira te hoê tane, e ite ta ’na vahine faaipoipo i ta ’na paruru e e riro ei mea ohie a‘e no ’na i te faatura e i te turu ia ’na.

“Ua piri atu â mâua ma te rave mai ta Iehova e hinaaro ra”

5 Te fa‘i ra o Cathy, o tei faaipoipo ia Fred: “I to ’u faaea-taa-noa-raa, i haapao noa na vau ia ’u iho, o vau ana‘e to ’u oraraa. Ua riro te faaipoiporaa ei faatanoraa no ’u, inaha ua haapii au i te tiaturi i ta ’u tane. Aita te reira i riro ei mea ohie, ua piri atu â râ mâua ma te rave mai ta Iehova e hinaaro ra.” [1] Te parau ra o Fred: “Aita roa ’tu i riro ei mea ohie no ’u ia rave i te mau faaotiraa. I roto i te faaipoiporaa, e tautooraa te feruriraa no e piti taata. Ma te imi râ i ta Iehova aratairaa na roto i te pure e ma te faaroo maite i te mana‘o o ta  ’u vahine, e ohie roa te reira i te mau mahana atoa. No ’u, ua tu to mâua mana‘o!”

6. E nafea te here e riro ai ei “tatua nehenehe roa” ia tupu te fifi i roto i te faaipoiporaa?

6 E puaihia te mau faaipoiporaa ia tamau te mau hoa faaipoipo i te “faaoromai te tahi i te tahi, e e faaore te tahi i ta te tahi hapa.” No te mea e taata tia ore raua, e hape iho â te tane e ta ’na vahine faaipoipo. Ia tupu noa ’tu te reira, e nehenehe raua e huti mai i te haapiiraa i to raua mau hape, e haapii i te faaore i ta te tahi hapa e e faaite raua i te here niuhia i nia i te mau faaueraa tumu. E “tatua nehenehe roa” teie here. (Kol. 3:13, 14) E nehenehe te mau hoa faaipoipo e faatupu i teie here ma te faaoromai, ma te faaite i te mǎrû e ma te ore “e mana‘o ino.” (Kor. 1, 13:4, 5) Ia tupu te tahi mau peapea, e tutava te tane e ta ’na vahine faaipoipo i te faaafaro oioi i te reira. (Eph. 4:26, 27) Mea titauhia te haehaa e te itoito no te parau “Te tatarahapa nei au no to ’u haamauiuiraa ia oe.” E tauturu râ te reira ia faaafaro i te mau fifi e e piri atu â na hoa faaipoipo.

TE FAUFAA O TE MǍRÛ

7, 8. (a) Eaha te a‘oraa ta te Bibilia e horoa ra no nia i te taotoraa i to ’na apiti i roto i te faaipoiporaa? (b) No te aha mea titauhia i te mau hoa faaipoipo ia faaite i te mǎrû?

7 Te horoa ra te Bibilia i te a‘oraa maitai o te nehenehe e tauturu i te mau hoa faaipoipo ia faaite i te huru feruriraa tano no nia i te taotoraa i to ’na apiti i roto i te faaipoiporaa. (A taio i te Korinetia 1, 7:3-5.) Mea faufaa ia haapao te hoê tane e ta ’na vahine faaipoipo i to te tahi e te tahi huru aau e hinaaro. Aita ana‘e te tane e faaite i te mǎrû i ta ’na vahine, eita paha ïa o ’na e au e taoto i ta ’na tane. E tia i te mau tane ia haapao i ta ratou vahine “ma te ite.” (Pet. 1, 3:7) Eiaha te hoê hoa faaipoipo e faahepo aore ra e onoono i to ’na apiti e taoto ia ’na. E tia ia vaiiho i tera hinaaro ia haere noa mai mai tera. E pinepine a‘e te hoê tane i te hinaaro e taoto i ta ’na vahine i te vahine iho. E tia râ ia tiai i te taime au no te tane e no ta ’na vahine faaipoipo.

8 Aita te Bibilia e horoa ra i te tahi mau ture taa maitai no nia i te mau huru faaiteraa i te here a te hoê tane e ta ’na vahine faaipoipo, oia atoa no te mau taotiaraa. Te faahiti nei râ te Bibilia i te tahi mau hi‘oraa no nia i te faaiteraa i te here. (Sire 1:2; 2:6) E tia i te mau hoa faaipoipo ia faaite i te mǎrû te tahi i te tahi.

9. No te aha eita e fariihia te hinaaro e taoto i te tahi apiti e ere to tatou iho hoa faaipoipo?

9 Ia puai to tatou here no te Atua e no te taata tupu, eita roa ’tu tatou e vaiiho te tahi taata aore ra hoê noa ’‘e mea e haafifi i to tatou faaipoiporaa. Ua haaparuparu vetahi e ua tuino roa atoa i to ratou faaipoiporaa ma te mataitai-tamau-raa i te hoho‘a faufau. Mea tia ia patoi tatou i te mau mea atoa o te aratai ia tatou ia mataitai i te hoho‘a faufau aore ra ia hinaaro e taoto i te tahi apiti e ere to tatou iho hoa faaipoipo. Hau atu â, e titau-atoa-hia ia ape tatou i te mau haerea atoa o te faaite ra paha e te faahinaaro ra tatou i te tahi taata e ere i to tatou iho hoa faaipoipo. Mea ino te raveraa i tera mau peu. Ia haamana‘o tatou e ua  ite Iehova i to tatou mau mana‘o e haaraa atoa. E tauturu te reira ia tatou ia haapuai i to tatou hinaaro e faaoaoa ia ’na e e vai taiva ore i to tatou apiti.—A taio i te Mataio 5:27, 28; Hebera 4:13.

IA TUPU TE MAU FIFI I ROTO I TE FAAIPOIPORAA

10, 11. (a) Eaha te faito o te feia e faataa ra? (b) Eaha ta te Bibilia e parau no nia i te faataa-ê-raa? (c) Na te aha e tauturu i te hoê hoa faaipoipo ia ore e faataa ê oioi i to ’na apiti?

10 Aita ana‘e te mau fifi rahi e faaafarohia, e faaoti paha te tahi mau hoa faaipoipo e faataa ê aore ra e faataa roa. I te tahi mau fenua, ua hau atu i te afaraa o te mau hoa faaipoipo te faataa ra. Mea papu, e ere teie tupuraa i te mea matauhia i roto i te amuiraa Kerisetiano. Tera râ, te rahi noa ’tu ra te feia faaipoipo Kerisetiano e faaruru ra i te mau fifi rahi i roto i to ratou faaipoiporaa.

11 Te horoa ra te Bibilia i teie mau faaueraa: “Eiaha te vahine e faataa ê i tana tane. Ia faataa ê râ oia ra, e parahi noa oia eiaha e faaipoipo, e e faite hoi oia i tana tane; e eiaha te tane e tuu ê atu i tana vahine.” (Kor. 1, 7:10, 11) E mana‘o paha te tahi mau hoa faaipoipo e no te rahi o to ratou mau fifi, e titauhia ia ratou e faataa ê. Tera râ, ua faaite Iesu e e ere te faataa-ê-raa i te ohipa hauti a faahiti ai oia i ta te Atua i parau i te omuaraa no nia i te faaipoiporaa: “Ta te Atua i taati ra, eiaha te taata e faataa ê atu.” (Mat. 19:3-6; Gen. 2:24) Ma teie mau parau, ua hinaaro Iehova ia vai hoê te mau tane e te mau vahine faaipoipo. (Kor. 1, 7:39) Mea titauhia ia tatou pauroa ia haamana‘o e e hopoia ta tatou no ta tatou mau haaraa i mua ia Iehova. E nehenehe te reira e tauturu ia tatou ia faaafaro oioi i te mau fifi hou a rahi roa mai ai te reira.

E ite te mau hoa faaipoipo Kerisetiano i te mau ravea no te faaafaro i to ratou mau fifi no te mea e vaiiho ratou i te Atua ia aratai ia ratou

12. Na te aha paha e aratai i te hoê hoa faaipoipo ia feruri i te faataa-ê-raa?

12 No te aha te tahi feia faaipoipo e faaruru ai i te mau fifi rahi? Mea taa ê roa te tupuraa ta vetahi e farerei i ta ratou i mana‘o na a faaipoipo ai ratou, e ua inoino aore ra ua riri ratou. E pinepine te mau fifi i te tupu mai no te mau taa-ê-raa i roto i te huru haapiiraa ta te mau taata i fana‘o a paari mai ai ratou. Oia atoa no to ratou mau huru aau i mua i te tahi tupuraa. E nehenehe atoa te mau peapea e te mau metua hoovai e haafifi i na hoa faaipoipo. Oia atoa no te mau peapea no nia i te huru haamâu‘araa i te moni aore ra te aupururaa i te mau tamarii. Mea maitai râ ia ite e e rave rahi hoa faaipoipo Kerisetiano tei ite i te mau ravea no te faaafaro i to ratou mau fifi no te mea te vaiiho nei ratou i te Atua ia aratai ia ratou.

13. Eaha te mau tumu faufaa e tano ai ia faataa ê te mau hoa faaipoipo?

13 Te vai ra paha te mau tumu faufaa e faataa ê ai te mau hoa faaipoipo. Te tahi mau tumu i faaoti ai vetahi e faataa ê, no te mau tupuraa ino mau ïa, mai te oreraa e hinaaro e aupuru i te utuafare, te hamani-ino-raa  u‘ana e te haafifiraa i te oraraa pae varua o te hoê Kerisetiano. Ia tupu te mau fifi rahi, e tia i te feia faaipoipo ia ani i te tauturu a te mau matahiapo. E ite rahi to teie mau taeae e e nehenehe ratou e tauturu i te feia faaipoipo ia pee i te a‘oraa a te Atua i roto i to ratou oraraa. E ia ani te mau hoa faaipoipo ia Iehova i to ’na varua mo‘a, e nehenehe te reira e tauturu ia ratou ia pee i te mau faaueraa tumu Bibilia e ia faatupu i te mau huru maitatai Kerisetiano. (Gal. 5:22, 23) [2]

14. Eaha ta te Bibilia e parau ra no te mau hoa faaipoipo Kerisetiano e ere to ratou hoa faaipoipo i te Ite no Iehova?

14 Te faaite ra te Bibilia e te vai ra te mau tumu maitatai ia faaea noa na hoa faaipoipo, noa ’tu aita hoê o raua e haamori ra ia Iehova. (A taio i te Korinetia 1, 7:12-14.) E “mo‘a” te hoa faaipoipo e ere i te Ite no Iehova no te mea ua faaipoipo oia i te hoê tavini a te Atua. E “mo‘a” atoa te mau tamarii apî o na hoa faaipoipo, e tei raro a‘e atoa ïa ratou i ta te Atua paruru. Ua faaitoito Paulo i te mau hoa faaipoipo Kerisetiano: “Eaha hoi oe i ite ai, e tera ra vahine, e eita to tane e ora ia oe? e eaha hoi oe i ite ai, e tera tane, e eita to vahine e ora ia oe?” (Kor. 1, 7:16) E rave rahi hi‘oraa maitatai o te mau tane e vahine faaipoipo Kerisetiano tei tauturu i to ratou hoa faaipoipo ia riro mai ei tavini a Iehova.

15, 16. (a) Eaha te a‘oraa ta te Bibilia e horoa ra na te mau vahine faaipoipo Kerisetiano e ere to ratou hoa faaipoipo i te tavini a te Atua? (b) Eaha te tiaraa o te hoê Kerisetiano ia maiti to ’na hoa faaipoipo aita i roto i te faaroo e “haere ê”?

15 Te a‘o ra te aposetolo Petero i te mau vahine Kerisetiano ia auraro i ta ratou mau tane “e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ’tu â te parau; i te hi‘oraa mai ratou i ta outou haapaoraa viivii ore i apiti-atoa-hia i te mǎta‘u.” Aita te hoê vahine e paraparau i te mau taime atoa no nia i ta ’na mau tiaturiraa, e tauturu râ  oia i ta ’na tane ia farii i te parau mau ia faaite oia i “te aau mǎrû e te mamahu, o te mea tao‘a rahi ïa i mua i te aro o te Atua.”—Pet. 1, 3:1-4.

16 E mai te peu e e maiti te hoê hoa faaipoipo aita i roto i te faaroo i te faataa ê? Te parau ra te Bibilia: “Ia haere ê . . . tei ore i faaroo ra [aore ra te hoa faaipoipo aita i roto i te faaroo], haere noa ’tu ïa, e ore te taeae e te tuahine e fifi i te reira. Ua haapaohia râ tatou e te Atua, ei hau ta tatou.” (Kor. 1, 7:15) Noa ’tu e hopoi mai te faataa-ê-raa i te tahi hau, aita e tiaraa to te hoa faaipoipo Kerisetiano no te faaipoipo faahou ia au i te Bibilia. Eita râ e titauhia ia ’na ia faahepo i to ’na apiti ia faaea mai. A mairi ai te tau, e faaoti paha te hoa faaipoipo aita i roto i te faaroo e ho‘i mai, a hinaaro ai ia maitai faahou mai to raua faaipoiporaa. E i muri a‘e, e riro roa mai paha oia ei tavini a Iehova.

EAHA TE TUU I TE PARAHIRAA MATAMUA I ROTO I TE FAAIPOIPORAA?

Ia haapao maite tatou i ta tatou haamoriraa ia Iehova, e nehenehe to tatou oaoa i roto i to tatou faaipoiporaa e rahi mai (A hi‘o i te paratarafa 17)

17. Eaha ta te mau hoa faaipoipo Kerisetiano e tuu i te parahiraa matamua?

17 No te mea te ora nei tatou i te pae hopea o te “anotau hopea,” te faaruru nei tatou i te “ati rahi.” (Tim. 2, 3:1-5) No reira, mea titauhia te paruru o te hoê auhoaraa puai e o Iehova. Ua papai Paulo: “Te poto nei te taime: e au i te feia tara vahine ra, ia riro mai te mea e, aore . . . e te feia i rave i to teie nei ao ra, mai te mea e aore i rave.” (Kor. 1, 7:29-31) Aita Paulo e parau ra e eiaha te hoa faaipoipo e haapao i to ’na apiti. No te mea râ te ora nei tatou i te anotau hopea, mea titauhia ia tuu tatou i te parahiraa matamua ta tatou haamoriraa ia Iehova.—Mat. 6:33.

18. No te aha e nehenehe ai te mau Kerisetiano e ite i te hoê faaipoiporaa oaoa e te manuïa?

18 I teie tau fifi mau, e rave rahi faaipoiporaa tei ore i manuïa. E nehenehe anei te mau Kerisetiano e ite i te hoê faaipoiporaa oaoa e te manuïa? E, ia vai piri noa tatou ia Iehova e i to ’na nunaa, ia pee tatou i te mau faaueraa tumu Bibilia e ia farii tatou i te aratairaa a te varua mo‘a o Iehova. Ia na reira tatou, e haafaufaa tatou i “ta te Atua i taati.”—Mar. 10:9.

^ [1] (paratarafa 5) Ua tauihia te mau i‘oa.

^ [2] (paratarafa 13) A hi‘o i te buka “Ia vai maite outou i roto i te here o te Atua,” i te tuhaa hau, “To te Bibilia mana‘o i te faataaraa e te faataa-ê-raa.”