Eaha to roto?

Tapura tumu parau

 TUMU PARAU HAAPIIRAA 24

A huri i raro i te mau feruriraa hape e patoi ra i te ite no nia i te Atua!

A huri i raro i te mau feruriraa hape e patoi ra i te ite no nia i te Atua!

“Te huri nei hoi matou i raro i te mau feruriraa hape e te mau mea teitei atoa o te patoi ra i te ite no nia i te Atua.”—KOR. 2, 10:5.

HIMENE 124 E taiva ore ana‘e

HAAPOTORAA *

1. Eaha te faaararaa a te aposetolo Paulo i te mau Kerisetiano faatavaihia?

TEIE te faaararaa ta te aposetolo Paulo i horoa i te mau Kerisetiano matamua: “Eiaha . . . outou ia faaau faahou i to outou haerea i to teie faanahoraa o te ao nei.” (Roma 12:2) No te aha oia i a‘o ai i te mau tane e vahine tei pûpû a‘ena ia ratou i te Atua e tei faatavaihia i te varua mo‘a?—Roma 1:7.

2-3. Eaha ta Satani mau raveraa no te faaatea ê ia tatou ia Iehova e e nafea ia tahitahi i te mau mea i a‘a roa i roto i to tatou feruriraa?

2 Ua haapeapea Paulo no te mea ua pee te tahi mau Kerisetiano i te mau feruriraa hape e haapiiraa no ǒ mai i te ao a Satani. (Eph. 4:17-19) Ua rau te raveraa a te Diabolo no te faaatea ê i te mau Kerisetiano ia Iehova. E nehenehe atoa te reira e tupu i nia ia tatou. E faaohipa Satani i to tatou hinaaro tia ore ia itehia tatou e te taata aore ra i te mau mea ta tatou i haapii tei a‘a roa i roto ia tatou.

3 E nehenehe anei e tahitahi i te mau mea atoa i a‘a roa i roto i to tatou feruriraa? (Kor. 2, 10:4) A hi‘o na i ta Paulo i pahono: “Te huri nei hoi matou i raro i te mau feruriraa hape e te mau mea teitei atoa o te patoi  ra i te ite no nia i te Atua, e te faatîtî nei matou i te mau mana‘o atoa ia auraro noa i te Mesia.” (Kor. 2, 10:5) E upootia tatou i nia i te mau feruriraa hape maoti te tauturu a Iehova. Mai te huero raau e faaore i te mauiui, e nehenehe atoa te Parau a te Atua e faaore roa i te ino ta te ao a Satani e faatupu i nia i to tatou feruriraa.

“IA TAUI RÂ OUTOU . . . I TO OUTOU FERURIRAA”

4. Eaha te mau tauiraa ta tatou i rave i to tatou haapiiraa i te Bibilia?

4 I to tatou haapiiraa i te Bibilia, ua rave tatou i te mau tauiraa i titauhia no te tavini ia Iehova. E rave rahi o tatou tei haapae i te mau peu ino. (Kor. 1, 6:9-11) Auê tatou i te mauruuru i te fana‘oraa i ta Iehova tauturu!

5. Ia au i te Roma 12:2, eaha na ohipa e piti e titauhia ia rave tatou?

5 Noa ’tu ua taui tatou hou te bapetizoraa, e titauhia ia ara ia ore tatou ia ho‘i faahou i te mau peu ino ta tatou i vaiiho. E nafea ïa? Te pahono ra Paulo: “Eiaha atoa outou ia faaau faahou i to outou haerea i to teie faanahoraa o te ao nei, ia taui râ outou a faaapî ai i to outou feruriraa.” (Roma 12:2) E piti ïa ohipa te titauhia ia rave. Na mua roa, ia faaea tatou i te “faaau faahou” i teie nei ao. A piti, ia “taui” tatou ma te faaapî i to tatou feruriraa.

6. Eaha te haapiiraa faufaa ta Iesu i horoa i roto i te Mataio 12:43-45?

6 Aita Paulo i mana‘o i te hoê tauiraa rapaeau noa, i te hoê tauiraa taatoa râ. (A hi‘o i te tumu parau “ Tauiraa  aore ra faahuaraa?”) Ia faaapî ïa te Kerisetiano i to ’na feruriraa, huru o roto e to ’na mau mana‘o turai e tia ’i. E ui ana‘e ïa ia tatou iho, ‘Ei Kerisetiano, ua taui noa anei au i to ’u huru rapaeau aore ra ua taui atoa vau i to ’u aau e feruriraa?’ A hi‘o na i ta Iesu i faataa i roto i te Mataio 12:43-45. (A taio.) Teie te haapiiraa faufaa e huti mai: Eita e navai noa ia tahitahi i te mau mana‘o ino, e titau-atoa-hia râ ia faaî i to tatou feruriraa i te mau mana‘o no ǒ mai i te Atua.

A “FAAAPÎ I TO OUTOU HURU FERURIRAA”

7. E nafea ia taui i to tatou huru o roto?

7 E nehenehe mau anei e taui i to tatou huru o roto? Te parau ra te Bibilia: “Ia tamau noa outou i te faaapî i to outou huru feruriraa, e ia ahu mai i te huru taata apî tei poietehia ia au i te hinaaro o te Atua i te parau-tia e te haapao maitai mau ra.” (Eph. 4:23, 24) E, e nehenehe e taui, e titauhia râ te tutavaraa tamau. Eita hoi e titau-noa-hia ia patoi i te mau mana‘o e peu iino, ia taui roa râ i te “huru feruriraa,” oia hoi, te mau hinaaro o to tatou aau, to tatou haerea e mana‘o turai.

8-9. Eaha te auraa ia taui i to tatou huru o roto? A horoa i te hi‘oraa.

8 A feruri na i te hoê taeae mea ino i nia i te taata na mua ’‘e. Ua faaea oia i te inu e i te tupai i te taata, bapetizohia ’tura oia. E rave rahi o to ’na oire tei faahiahia i te mau tauiraa ta ’na i rave. I muri iti noa ’‘e râ i to ’na bapetizoraa, ua haere atu te hoê taero ava i to ’na fare no te imi peapea ia ’na. Ua faaoromai te taeae i te haamataraa. I to tera râ taata faainoraa i te i‘oa o Iehova, tupai atura te taeae i tera taata. Te ite ra outou i te fifi? Ua tauturu atu ta ’na haapiiraa Bibilia ia faaea i te tupai i te taata, aita râ te puai e ohipa ra i roto i to ’na feruriraa i taui. Te auraa, aita o ’na i taui i to ’na huru o roto!

9 Ua tamau te taeae i te rave i te mau tutavaraa. (Mas. 24:16) Ua tauturu te mau matahiapo ia ’na ia tamau i te haere i mua i te pae varua e riro maira oia ei matahiapo. I te hoê po, ua tamatahia â to ’na faaroo. I rapae mai i te Piha a te Basileia, te opua ra te hoê taero ava e tupai i te hoê matahiapo. Eaha ta to tatou taeae i rave? Ma te mǎrû e te haehaa, ua haaferuri oia i te taero ava, mǎrû maira taua taata ra e aratai atura te taeae ia ’na i to ’na fare. Te ite ra anei outou i te taa-ê-raa? I roto roa i to ’na aau, ua riro mai te taeae ei taata haehaa e te faatupu i te hau. Ua faahanahana mau te reira ia Iehova!

10. Eaha te titauhia ia rave no te taui i to tatou huru o roto?

10 Parau mau, eita to tatou huru o roto e taui taue noa mai. Eita atoa te reira e tupu no te mea mea maoro tatou “i roto i te parau mau.” E titauhia râ ia “tutava maite” i tera e tera matahiti no te taui roa i to tatou huru o roto. (Pet. 2, 1:5) Eaha te nehenehe e tauturu mai? O ta tatou ïa e hi‘opoa mai.

 E NAFEA IA TAUI I TO TATOU HURU FERURIRAA?

11. E nafea te pure e tauturu mai ai ia taui i to tatou huru feruriraa?

11 A tahi, a pure. Mea faufaa roa ia pure mai te papai salamo tei parau: “E faaau na oe i te aau mâ i roto ia ’u nei, e tau Atua. E faahou [aore ra faaapî] na hoi oe i te aau mana‘o tia i roto ia ’u nei.” (Sal. 51:10) Hou râ a ani ai i te tauturu a Iehova, mea titauhia na mua roa ia hinaaro tatou e taui i to tatou huru feruriraa. Teie ta Iehova i fafau i te mau Iseraela aau tae i te tau o Ezekiela: “E na ’u e horoa ’tu i te aau hoê no ratou, e na ’u e tuu i te varua apî i roto ia ratou . . . e na ’u e horoa ’tu i te aau mǎrû [o te farii i ta te Atua aratairaa].” (Ezk. 11:19) Ua tauturu Iehova i te mau Iseraela ia taui, e na reira atoa ïa oia no tatou.

12-13. (a) Ia au i te Salamo 119:59, ia feruri maite tatou i te aha e tia ’i? (b) Eaha te mau uiraa o te tauturu mai ia hi‘opoa ia tatou iho?

12 A piti, a feruriruri. A taio ai i te Parau a te Atua i te mau mahana atoa, e feruri maite ana‘e i te mau huru e mana‘o e titauhia ia taui. (A taio i te Salamo 119:59; Heb. 4:12; Iak. 1:25) Peneia‘e i te mau huru e mana‘o atoa no ǒ mai i teie nei ao o te ohipa ra i nia i to tatou feruriraa. Ia oti, e farii ana‘e ma te haavare ore i to tatou mau paruparu a tutava ’tu ai i te faaore i te reira.

13 Teie te tahi mau uiraa o te tauturu mai ia hi‘opoa ia tatou iho, ‘Ua pata mai anei te nounou aore ra te feii i roto i to ’u aau? (Pet. 1, 2:1) Te faateitei ra anei au no to ’u huru oraraa aore ra nunaa? (Mas. 16:5) Te hi‘o ino ra anei au i te feia veve aore ra i te tahi atu nunaa taata? (Iak. 2:2-4) Te faahinaaro ra anei au i te mau mea ta teie nei ao e pûpû nei? (Ioa. 1, 2:15-17) O te mau ohipa faufau e taparahi taata anei ta ’u faaanaanataeraa?’ (Sal. 97:10; 101:3; Am. 5:15) E mauruuru roa to tatou Metua i te ra‘i ia huri tatou i raro i “te mau mea e au i te pare.”—Sal. 19:14.

14. No te aha mea faufaa ia maiti i te hoa maitatai?

14 A toru, a maiti i te hoa maitatai. E ohipa te huru o te feia ta tatou e amuimui atu i nia i to tatou feruriraa. (Mas. 13:20) I te ohipa aore ra fare haapiiraa, ua haaatihia tatou e te feia aita e farii ra i te mana‘o o te Atua. I te mau putuputuraa râ, e ite tatou i te mau hoa maitatai o te faaitoito te tahi i te tahi ia “faaite i te here e ia rave i te mau ohipa maitai roa.”—Heb. 10:24, 25.

IA “MAU PAPU I TE FAAROO”

15-16. Mea nafea Satani ia haafariu ê i to tatou feruriraa?

15 A haamana‘o ua faaoti papu Satani i te haafariu ê i to tatou feruriraa. E faaohipa ïa oia i te mau haapiiraa e mana‘o atoa ia ore te parau mau ia ohipa i nia i to tatou feruriraa.

16 Te tamau ra te Diabolo i te haa mai ta ’na i rave i nia ia Eva. (Gen. 3:1) I roto i te ao a Satani, mea pinepine te taata i te ui, ‘Eita iho â anei te Atua e farii ia faaipoipo te tane i te tane e  te vahine i te vahine? Eita iho â anei te Atua e mauruuru ia faatupu tatou i te Noela e te oroa fanauraa? Parau mau anei ua titau te Atua ia patoi i te pâmuraa toto? Ua faaue mau anei te Atua ia faaea i te amuimui i te fetii tei tiavaruhia i te amuiraa?’

17. Eaha te titauhia ia rave i mua i te mana‘o hape? Ia au i te Kolosa 2:6, 7, eaha te haamaitairaa e noaa mai?

17 Mea faufaa roa ia papu ia tatou te mau haapiiraa Bibilia. E tupu te feaa ia vaiiho tatou i te tahi mana‘o hape ia ô mai i roto i to tatou feruriraa. E tuino te mana‘o feaa i to tatou huru feruriraa e to tatou faaroo. Eaha ïa te titauhia ia rave? Te parau ra te Bibilia ia taui i to tatou feruriraa ia papu ia tatou iho “te maitai e te au e te tia roa o te hinaaro o te Atua.” (Roma 12:2) Ma te haapii tamau i te Parau a te Atua, e papu ia tatou iho te pue parau mau Bibilia e mea tia atoa te mau ture aveia a Iehova. E mau papu ïa to tatou faaroo mai te hoê tumu raau tei a‘a maitai.—A taio i te Kolosa 2:6, 7.

18. E nafea ia ore to tatou feruriraa ia hema i te ao a Satani?

18 Na te taata tataitahi e tutava ia mau papu to ’na iho faaroo. E tamau ana‘e ïa i te taui e i te faaapî i to tatou huru feruriraa. E pure tamau ana‘e no te ani i te varua mo‘a o Iehova. E feruri maite ana‘e no te paheru aita anei e mea ino i roto i to tatou feruriraa e aau. E e imi ana‘e i te mau hoa maitatai o te tauturu mai ia taui i to tatou huru feruriraa. Eita ïa tatou e hema i te ao a Satani, e upootia râ i nia i “te mau feruriraa hape e te mau mea teitei atoa o te patoi ra i te ite no nia i te Atua.”—Kor. 2, 10:5.

HIMENE 50 Ta ’u pure pûpûraa ia ’u ia Iehova

^ par. 5 E ohipa iho â to tatou oraraa na mua ’‘e i nia i to tatou feruriraa. E ere paha i te mea ohie ia haapae i te mau huru e peu iino tei a‘a roa i roto ia tatou. E tauturu mai râ teie haapiiraa ia ite e nafea ia upootia i nia i te reira.