Eaha to roto?

Tapura tumu parau

 TUMU PARAU HAAPIIRAA 49

E taime to te ohipa e e taime to te faafaaearaa

E taime to te ohipa e e taime to te faafaaearaa

“Mai haere ana‘e i te hoê vahi mo‘emo‘e e faafaaea rii.”—MAR. 6:31.

HIMENE 143 Tamau i te rohi, te ara e te tiai

HAAPOTORAA *

1. Eaha te mana‘o o te taata no nia i te ohipa?

EAHA te mana‘o o te taata no nia i te ohipa i to outou fenua? I te tahi mau vahi, e rave te taata i te ohipa e rave rahi hora ma te ore e faataa i te taime no te faafaaea, no te haapao i to ratou utuafare e i to ratou auhoaraa e te Atua. (Koh. 2:23) I te tahi a‘e pae, eita vetahi e hinaaro e rave i te ohipa a imi atoa ’i e rave rau otoheraa.—Mas. 26:13, 14.

2-3. Eaha to Iehova e to Iesu mana‘o no nia i te ohipa?

2 Papu, e Atua itoito Iehova i te rave i te ohipa. No reira Iesu i haapapu ai: “Te ohipa noa nei â to ’u Metua e te ohipa noa nei au.” (Ioa. 5:17) A feruri na i te rahi o te mau mea ta Iehova i poiete i te ra‘i mai te mau melahi e tae noa ’tu i te ao nui! I te fenua nei, te ite atoa nei tatou i te faahiahia o te mau ohipa ta ’na i poiete! Ua tano roa te papai salamo i te parauraa: “Aita te huru rau o ta oe ra ohipa, e Iehova! e mau ravea paari ana‘e â ta oe! Ua î te fenua nei i ta oe ra tao‘a.”—Sal. 104:24.

3 Ua pee maite atoa Iesu i te hi‘oraa o to ’na Metua. Ua riro oia ei Rave ohipa aravihi a apiti ai e to ’na Metua no te “haamau i te mau ra‘i.” (Mas. 8:27-31) I nia i te fenua, e ohipa faahiahia atoa ta ’na i rave! Ua riro roa te reira ei maa na ’na e ua haapapu ta ’na mau ohipa na te Atua i tono mai ia ’na.—Ioa. 4:34; 5:36; 14:10.

4. Eaha ta tatou e haapii mai no nia i te taime faafaaearaa na roto i te hi‘oraa o Iehova e to Iesu?

4 Mea au na Iehova e Iesu e rave i te ohipa. Te auraa anei eiaha tatou ia faafaaea? Aita roa ’tu! Eita roa Iehova e ite i te rohirohi. Te parau ra râ te Bibilia i te otiraa Iehova i te  poiete i te mau mea atoa i te ra‘i e i te fenua, “faaea ihora oia . . . e mâha ’tura.” (Exo. 31:17) Ua faafaaea ïa Iehova e ua oaoa roa i te ohipa ta ’na i rave! A ora ’i i nia i te fenua, ua ohipa puai Iesu, ua faaherehere atoa râ oia i te taime no te faafaaea e no te tamaa e to ’na mau hoa.—Mat. 14:13; Luka 7:34.

5. Eaha te fifi ta te mau tavini o te Atua e farerei nei?

5 Te faaitoito ra te Bibilia i te mau tavini o te Atua ia riro ei feia itoito i te rave i te ohipa, eiaha râ te faatau. (Mas. 15:19) Peneia‘e, te tautoo ra outou no te faatamaa i te utuafare e no te apiti i te ohipa pororaa i te parau apî oaoa. E hinaaro atoa râ outou i te taime no te faafaaea. E ere i te mea ohie no vetahi ia faataa i te taime no te ohipa, no te taviniraa e no te faafaaearaa. E nafea ia vaiiho i te ohipa e i te taime faafaaearaa i te parahiraa e au?

TE MANA‘O TANO NO NIA I TE OHIPA

6. E nafea te Mareko 6:30-34 e haapapu ai e mana‘o tano to Iesu no nia i te ohipa e te taime faafaaearaa?

6 E titauhia ia faatupu i te mana‘o tano no nia i te ohipa. Maoti te aratairaa a te varua mo‘a, ua papai te arii Solomona: “E tau . . . to te mau mea atoa.” E taime to te tanu, to te patu, to te oto, to te ata, to te ori e te vai ra ’tu â. (Koh. 3:1-8) E tuhaa faufaa roa te ohipa e te faafaaearaa i roto i te oraraa. E mana‘o tano to Iesu no nia i te taime no te rave i te ohipa e no te faafaaea. I te hoê mahana, ua ho‘i mai te mau aposetolo na te pororaa, mea rahi te ohipa ta ratou i rave, “aita ’tura e taime to ratou no te tamaa.” Parau a‘era Iesu ia ratou: “Mai haere ana‘e i te hoê vahi mo‘emo‘e e faafaaea rii.” (A taio i te Mareko 6:30-34.) Noa ’tu aita ratou i na reira i te mau taime atoa, ua ite Iesu e titauhia ia faaherehere i te taime no te faafaaea.

7. No te aha tatou e faufaahia ’i ia hi‘opoa i te ture o te Sabati?

7 Papu, e hinaaro tatou i te taime no te faafaaea. No reira tatou e hi‘opoa ’i i te hoê faanahoraa faufaa ta te Atua i titau i to ’na nunaa i tahito, oia hoi te ture o te Sabati. Parau mau, aita tatou i raro a‘e i te ture a Mose, e faufaahia râ tatou i te hi‘opoa i ta te Bibilia e faaite ra no nia i te Sabati. E tauturu atoa mai te reira ia hi‘opoa ua tuati anei to tatou mana‘o no nia i te ohipa e te faafaaearaa i to te Atua.

E TAIME TE SABATI NO TE FAAFAAEA E NO TE HAAMORI I TE ATUA

8. Ia au i te Exodo 31:12-15, ua faataahia te Sabati no te aha?

8 Te faaite ra te Bibilia e ono “mahana” to te Atua poieteraa i te mau mea atoa. I muri mai i te reira, ua faafaaea oia i te hamani i te mau mea i nia i te fenua. (Gen. 2:2) Tera râ, mea au roa na Iehova e rave i te ohipa i parauhia ’i, “te ohipa noa nei â” o ’na. (Ioa. 5:17) Te tuati ra te ture o te Sabati i te taime i faafaaea ’i Iehova i te hamani i te mau mea. Ua parau Iehova ua riro te Sabati ei tapao i rotopu ia ’na e ia Iseraela. Te Sabati, ua riro ei “mahana mo‘a ïa no Iehova.” (A taio i te Exodo 31:12-15.) No te mau taata atoa te faaueraa ia faaea i te rave i te ohipa, oia atoa no te mau tamarii, te mau tavini e te mau animara. (Exo. 20:10) E taime tera e nehenehe ai te nunaa e haapii atu â no nia i te Atua.

9. I te tau o Iesu, eaha te mana‘o hape o vetahi no nia i te Sabati?

9 E faanahoraa maitai te Sabati no te nunaa o te Atua. I to Iesu râ tau, e rave rahi tia haapaoraa tei faatupu i te mana‘o etaeta no nia i te Sabati. No ratou, eita e tia ia  hutihuti maa huero sitona aore ra ia faaora i te ma‘i i tera mahana. (Mar. 2:23-27; 3:2-5) Ua haapapu maitai Iesu aita roa to ratou mana‘o i tuati i to te Atua.

E haafaufaa na te utuafare o Iesu i te Sabati no te haapii atu â no nia i te Atua (A hi‘o i te paratarafa 10) *

10. Ia au i te Mataio 12:9-12, eaha to Iesu mana‘o no nia i te Sabati?

10 Ei ati Iuda, ua haapao Iesu e ta ’na mau pǐpǐ i te ture a Mose, i te Sabati atoa ïa. * E ere râ to ’na mana‘o i te mea etaeta mai to vetahi. No reira oia i haaferuri ai i te taata: “Mea tano anei ia au i te ture ia faaora i te ma‘i i te Sabati?” Na roto i ta ’na mau parau e ohipa, ua haapapu Iesu e ere i te mea ino ia hamani maitai e ia rave i te ohipa maitatai i te Sabati. (A taio i te Mataio 12:9-12.) Ia faaea te nunaa o te Atua i te rave i te ohipa i te Sabati, e nehenehe ratou e faataa i tera taime no te haapii atu â no nia i te Atua. Ua paari Iesu i roto i te hoê utuafare o tei haafaufaa i te Sabati no te haamori i te Atua. Tera mau ta Iesu i rave a ora ’i i Nazareta, te parauhia ra hoi: “Tomo ihora [Iesu] i roto i te sunago mai ta ’na i matau i te mahana Sabati, e tia a‘era no te taio.”—Luka 4:15-19.

EAHA TO OUTOU MANA‘O NO NIA I TE OHIPA?

11. O vai atoa tei faaite ia Iesu i te mana‘o tano no nia i te ohipa?

11 Papu, ua tuati atoa to Iosepha mana‘o no nia i te ohipa i to te Atua. Ua itehia  te reira a haapii ai oia i ta ’na tamaiti faaamu ia riro ei tamuta. (Mat. 13:55, 56) Ua ite roa ’tu Iesu ia Iosepha ia rohi ma te itoito no te aupuru i te taatoaraa o to ’na utuafare. Eita e ore no reira Iesu i parau ai i ta ’na mau pǐpǐ i muri a‘e: “Mea tano hoi ia aufauhia te rave ohipa no ta ’na i rave.” (Luka 10:7) Oia, i te fenua nei, ua haapii-atoa-hia Iesu ia riro ei taata itoito i te rave i te ohipa.

12. Ia au i te Bibilia, eaha te mana‘o tano no nia i te ohipa?

12 Mea itoito atoa te aposetolo Paulo i te rave i te ohipa. Ua haafaufaa oia i ta ’na taviniraa ma te faaite haere i te poroi no nia ia Iesu e ta ’na mau haapiiraa. Tera râ, ua rave atoa Paulo i te ohipa no te aufau i ta ’na mau haamâu‘araa. A papai ai i to Tesalonia, te mana‘o ra paha Paulo i ta ’na ohipa hamani fare ie. Te faataa ra oia “ma te rohi e te tautoo,” ua ohipa o ’na i “te po e te ao” no te ore e faateimaha i te hoê noa ’‘e taata. (Tes. 2, 3:8; Ohi. 20:34, 35) I Korinetia, ua faaea oia i te fare o Akuila raua Perisila e “hamani atura i te fare ie e o raua.” A parauhia ’i ua rohi Paulo i “te po e te ao,” te auraa anei ua rave o ’na i te ohipa ma te ore e faafaaea? Aita, ua faataa oia i te mau Sabati atoa no te poro i te mau ati Iuda tei faafaaea atoa i tera mahana.—Ohi. 13:14-16, 42-44; 16:13; 18:1-4.

13. Eaha te hi‘oraa maitai ta Paulo i vaiiho mai?

13 E hi‘oraa maitai ta te aposetolo Paulo i vaiiho mai. E hamani fare ie ta ’na ohipa, ua apiti tamau râ o ’na i te “ohipa mo‘a e poro i te parau apî oaoa a te Atua.” (Roma 15:16; Kor. 2, 11:23) Ua faaitoito atoa oia i te mau Kerisetiano ia na reira. E hoa ohipa Akuila raua Perisila no te hamani i te fare ie, te mea faufaa roa ’tu râ, e hoa ohipa raua i “te Mesia ra o Iesu.” (Roma 12:11; 16:3) Ua faaitoito Paulo i to Korinetia: “Ia rahi noa ta outou ohipa i roto i te Fatu.” (Kor. 1, 15:58; Kor. 2, 9:8) Ua aratai atoa Iehova ia Paulo ia papai: “Ia ore te tahi ia hinaaro e rave i te ohipa, eiaha atoa ïa e tamaa.”—Tes. 2, 3:10.

14. Eaha te auraa o ta Iesu mau parau i roto i te Ioane 14:12?

14 Eaha te ohipa faufaa roa ’‘e i teie mau mahana hopea? O te pororaa ïa e te faariroraa i te taata ei pǐpǐ na te Mesia. Ua tohu Iesu e ohipa rahi a‘e ta ta ’na mau pǐpǐ e rave i ta ’na! (A taio i te Ioane 14:12.) Parau mau, eita tatou e faatupu i te semeio mai ia ’na, e poro e e haapii râ tatou e rave rahi atu â taata i roto i te tuhaa fenua rahi a‘e no te hoê tau maoro atu â! 

15. Eaha te mau uiraa e titauhia ia uiui tatou e no te aha mea faufaa ia na reira?

15 Mai te peu e rave ohipa outou, a uiui na: ‘I te raveraa ohipa, ua matauhia anei au ei taata itoito? Te rave faahope ra anei au i ta ’u ohipa?’ Ia pahono outou e, e riro ïa outou ei rave ohipa tiaturihia e to outou paoti. E no to outou hi‘oraa maitai, e farii ohie a‘e vetahi ê ia faaite atu outou i te poroi o te Faatereraa arii. I te pae o te pororaa e te haapiiraa i te taata, a uiui na: ‘Ua matauhia anei au ei taata poro itoito? Te faaineine maitai ra anei au i ta ’u mau omuaraa parau? Te ho‘i oioi ra anei au e farerei i te feia o tei anaanatae i te poroi? Te apiti tamau ra anei au i te mau tuhaa e rave rau o te taviniraa?’ Ia pahono outou e, e taata poro aravihi ïa outou e te oaoa i roto i ta outou taviniraa.

 EAHA TO OUTOU MANA‘O NO NIA I TE TAIME FAAFAAEARAA?

16. Eaha to Iesu e to te mau aposetolo mana‘o no nia i te faafaaearaa e eaha te taa-ê-raa e to te rahiraa i teie mahana?

16 Ua ite Iesu e titauhia te tahi taime no te faafaaea. I to ’na râ tau e i teie atoa mahana, e rave rahi tei au i te taata apî tao‘a rahi i roto i ta Iesu faahoho‘araa. Ua parau tera taata ia ’na iho: “E faafaaea ïa vau, e tamaa, e inu, a oaoa ’i.” (Luka 12:19; Tim. 2, 3:4) Ua haafaufaa a‘e teie taata apî i te taime faafaaearaa e te mau mea navenave. Mea taa ê râ te mana‘o o Iesu, oia atoa to te mau aposetolo.

Ua tano ana‘e to tatou mana‘o no nia i te ohipa e te taime faafaaearaa, e rave tatou i te mau mea o te faaoaoa ia tatou (A hi‘o i te paratarafa 17) *

17. E nafea tatou ia faaohipa maitai i te taime faafaaearaa?

17 I teie mahana, e tutava ana‘e i te pee i te taahiraa o Iesu ma te faaohipa maitai i te taime faafaaearaa, eiaha noa no te haamâha i to tatou rohirohi, no te poro atoa râ e no te apiti i te mau putuputuraa Kerisetiano. E nafea tatou ia haafaufaa i te ohipa faariroraa i te taata ei pǐpǐ na te Mesia, oia atoa i te mau putuputuraa? Ma te imi ïa i te mau ravea atoa no te apiti i tera nau taviniraa mo‘a! (Heb. 10:24, 25) Noa ’tu e reva tatou i te vahi ê, eiaha e faarue i ta tatou mau putuputuraa e e tamau ana‘e i te faaite i te poroi Bibilia i te feia atoa ta tatou e farerei.—Tim. 2, 4:2.

18. Eaha ta to tatou Arii ra o Iesu Mesia e titau mai ra ia rave?

18 Auê tatou i te mauruuru i to tatou Arii ra o Iesu Mesia! E titau noa mai hoi oia i te maraa ia tatou a tauturu atoa mai ai ia faatupu i te mana‘o tano no nia i te ohipa e te taime faafaaearaa. (Heb. 4:15) Ua ite oia e titauhia te taime no te faafaaea, no te rave i te ohipa ma te itoito e no te apiti i te ohipa oaoa mau ia faariro i te taata ei pǐpǐ na ’na. I roto i to mua ’tu haapiiraa, e hi‘opoa tatou i ta Iesu i rave no te faaora ia tatou i te hoê huru faatîtîraa ino mau.

HIMENE 38 E puai roa oe ia Iehova

^ par. 5 Te haapii mai ra te mau Papai e nafea ia faatupu i te mana‘o tano no nia i te ohipa e te taime faafaaearaa. Na roto i te ture o te Sabati i horoahia i te mau Iseraela, e tauturuhia tatou ia hi‘opoa i to tatou mana‘o i roto i tera nau tuhaa.

^ par. 10 Ua haapao maite te mau pǐpǐ i te ture o te Sabati. No reira ratou i tiai ai ia hope roa te Sabati no te faaoti i te mau faaineineraa no te hunaraa o Iesu.—Luka 23:55, 56

^ par. 55 FAATAARAA O TE HOHO‘A: E afai na Iosepha i to ’na utuafare i te sunago i te Sabati

^ par. 57 FAATAARAA O TE HOHO‘A: Te rave ra te hoê metua tane i te ohipa no te aupuru i to ’na utuafare. E haafaufaa râ oia i ta ’na mau mahana faafaaearaa ohipa no te apiti i te taviniraa i te Atua, oia atoa i to ratou tere-ori-haere-raa.