Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 6 2017

E nehenehe e fana‘o i te ora mure maoti te hoo ta te Atua i horoa, tera te ô faufaa roa ’‘e

 TUMU PARAU MATAMUA | EAHA TE Ô FAUFAA ROA ’‘E?

Eaha te ô faufaa roa ’‘e?

Eaha te ô faufaa roa ’‘e?

“Te mau ô maitatai atoa e te mau mea tia roa i hohia mai, no nia mai ïa, no ǒ mai i te Metua o te mau tiarama o te ra‘i.” (Iakobo 1:17) Te faaite ra tera irava e Atua horoa noa to tatou Metua i te ra‘i ra o Iehova. I roto râ i te mau ô atoa ta te Atua i horoa na te taata, hoê tei hau ê roa. Eaha tera ô? Ua matauhia teie mau parau a Iesu o tei papaihia i roto i te Ioane 3:16: “No to ’na here rahi i to te ao i horoa mai ai te Atua i ta ’na Tamaiti otahi ia ore ia mou te taata o te faatupu i te faaroo ia ’na, ia roaa râ te ora mure ore.”

Te ora o ta te Atua Tamaiti otahi, aita ’tu ô faufaa roa ’‘e i horoahia no tatou. Maoti hoi te reira e tiamâ ’i te taata i te hara. Eita ’tura tatou e ruhiruhia faahou e e pohe. (Salamo 51:5; Ioane 8:34) Noa ’tu eaha ta tatou e rave, eita roa tatou e nehenehe e ape i tera utua. No te here rahi râ o te Atua, ua horoa oia i tei titauhia ia tiamâ mai tatou. Ma te pûpû i ta ’na Tamaiti otahi ra o Iesu Mesia ei hoo, ua nehenehe o Iehova e horoa i te feia auraro i te tiaturiraa ia ora e a muri noa ’tu. Eaha mau na râ te hoo? No te aha tatou i hinaaro ai i te reira? E nafea tatou ia faufaahia i te hoo?

Te hoê hoo, o te aufauraa ia faaho‘ihia mai te tahi mea i erehia aore ra ia noaa te faatiamâraa. Te faataa ra te Bibilia, ua poietehia to tatou na metua matamua o Adamu raua Eva e te tiaturiraa ia ora e a muri noa ’tu i roto i te paradaiso i nia i te fenua na muri i ta raua huaai tamarii. Mea tia roa raua, aore roa e hara. (Genese 1:26-28) Ma te peapea râ, ua ere raua i te taatoaraa o tera mau mea i to raua maitiraa i te faaroo ore i te Atua, riro atura toopiti atoa ei taata hara. Eaha tei tupu i muri a‘e? Te pahono ra te Bibilia: “No reira, mai te hara i ô mai i te ao nei na roto i te taata hoê ra e te pohe na roto i te hara, e ua raea roa ïa te mau taata atoa i te pohe no te mea ua hara ratou paatoa.” (Roma 5:12) E ere te ora tia roa ta Adamu i tutuu i ta ’na huaai tamarii, o te hara râ e te pohe.

No te aufau i te hoo, e tia ia faito te horoahia i tei erehia. Ua faaoti Adamu i te ore e auraro i te Atua, ua hara e ua ere atura i to ’na ora tia roa. Ia au i te Bibilia, mea na reira ta ’na huaai tamarii i riro ai ei tîtî na te hara e te pohe. Te auraa, e titauhia ia horoa i te ora tia roa o te tahi atu taata ei tusia ia tiamâ mai te huitaata. O te ora ïa o Iesu tei horoahia. (Roma 5:19; Ephesia 1:7) Maoti noa te hoo ta te Atua i aufau na roto i to ’na here i tia ’i i te huitaata ia tiaturi e fana‘o i ta Adamu raua Eva i ere, te ora mure ore i roto i te paradaiso i nia i te fenua.—Apokalupo 21:3-5.

Aita ’tu ô o te nehenehe e faatiamâ ia tatou e e horoa mai i te tiaturiraa e ora e a muri noa ’tu. Papu maitai, o te hoo te ô faufaa roa ’‘e ta te Atua i horoa. E hi‘o ana‘e mea nafea te Atua i haapao ai i na tuhaa e maha i hi‘opoahia na mua ’tu no te horoa mai i tera ô “tia roa.”

Ta tatou i hinaaro mau. Ua poietehia tatou paatoa e te hinaaro ia ora noa. Eita roa ta tatou e nehenehe e ape i te utua o te pohe, aua‘e râ te hoo i horoahia ’i. Te na ô ra te Bibilia: “Ta te hara hoi e aufau mai i te taata, o te pohe ïa. Area te ô ta te  Atua e horoa mai, o te ora mure ore ïa na roto i te Mesia ra o Iesu, to tatou Fatu.”—Roma 6:23.

To tatou tupuraa. Eita roa te hoê noa ’‘e i roto ia tatou e nehenehe e horoa i te hoo. Te faataa ra te Bibilia: “E ore roa e tia i te taata ia faaora i tana taeae, e aita a ’na hoo ia hopoi i te Atua e noaa mai ai oia ra: (i te rahi hoi o te hoo ia ’na e ora ’i, e ore roa ’tu ïa e taea).” (Salamo 49:7, 8) I roto i to tatou tupuraa, ua hinaaro mau tatou i te tauturu a te Atua no te tiamâ mai i te hara e te pohe. Aua‘e râ, “na roto i te faatiamâraa maoti te hoo i aufauhia e te Mesia ra o Iesu,” ua horoa te Atua i te hinaaro-mau-hia i roto i to tatou tupuraa.—Roma 3:23, 24.

I te taime tano. Te na ô ra te Bibilia: “Ua pohe te Mesia no tatou a vai taata hara noa ’i tatou.” (Roma 5:8) I te mea ua horoahia te hoo “a vai taata hara noa ’i tatou,” ua haapapu te reira i to te Atua here rahi ia tatou noa ’tu to tatou huru taata hara. Noa ’tu e te faaoromai ra tatou i te mauiui ta te hara e faatupu, te tiai ru nei tatou i te fana‘o i te mau maitai hau a‘e i mua nei.

E mana‘o turai maitai e te î i te here. Te faaite ra te Bibilia na te aha i turai i te Atua ia pûpû i ta ’na Tamaiti ei hoo na roto i teie mau parau: “I teie i faaitehia mai ai te here o te Atua ia tatou: ua tono mai te Atua i ta ’na Tamaiti otahi i te ao nei ia noaa ia tatou te ora na roto ia ’na. Teie te here o te Atua, e ere o tatou tei here i te Atua, o ’na râ tei here mai ia tatou.”—Ioane 1, 4:9, 10.

E nafea oe ia faaite i te mauruuru no te ô faufaa roa ’‘e? A haamana‘o na i ta Iesu mau parau i roto i te Ioane 3:16. O te feia ana‘e “o te faatupu i te faaroo ia ’na” te ora ’tu. Ia au i te Bibilia, te faaroo “o te tiairaa papu ïa i te mau mea tiaturihia.” (Hebera 11:1) Ia noaa ia oe tera tiairaa, mea faufaa roa te ite papu. No reira, te faaitoito atu nei matou ia faataa i te taime no te haapii no nia i te Atua ra o Iehova, tei horoa i tera ô “tia roa.” E ite atoa ïa oe eaha te tia ia rave no te fana‘o i te ora mure na roto i te tusia o Iesu tei horoahia ei hoo.

E nehenehe oe e haapii i te reira ma te hi‘opoa i te mau haamaramaramaraa niuhia i nia i te Bibilia i nia www.jw.org/ty. E oaoa roa te mau Ite no Iehova i te tauturu ia oe. Ua papu ia matou ia haapii atu â oe no nia i tera ô faufaa roa ’‘e e te mau maitai ta oe e fana‘o, e turaihia oe ia parau: “Ia haamauruuruhia te Atua na roto ia Iesu Mesia to tatou Fatu!”—Roma 7:25.