Eaha to roto?

Tapura tumu parau

Te mana‘o tano no nia i te mau hape

Te mana‘o tano no nia i te mau hape

Ua oaoa roa Don raua Margaret * te haereraa mai ta raua tamahine, ta ’na tane e ta raua na tamaroa e piti e farerei ia raua. Na mua ’‘e ratou a ho‘i ai, ua hinaaro ratou e tamaa amui. E toroa tunu maa to Margaret na mua ’‘e, ua faatuhaahia râ. Faaineine ihora oia i te maa ta ta ’na na mootua e au roa ’‘e, te macaroni anoihia e te pata paari faatahehia.

Ua parahi te utuafare taatoa i to Margaret afairaa ’tu i te maa e tuu ihora i ropu maitai i te airaa maa. A tatara ’i o ’na i te tapo‘i, ua maere roa o ’na i te ite e pata paari faatahehia ana‘e to roto i te farii maa. Ua mo‘e ia Margaret i te tuu atu i te macaroni!

Noa ’tu ehia matahiti to tatou e eaha to tatou toroa, e hape tatou paatoa. Na roto paha i te tahi parau feruri-ore-hia aore ra te hoê ohipa o tei ravehia i te taime tano ore. Aore ra, ua mo‘e ia tatou te tahi mea. No te aha tatou e hape ai? Eaha te tauturu mai ia tupu te reira? E nehenehe anei e ape atu? E pahonohia tera mau uiraa ia ite tatou eaha te mana‘o tano no nia i te mau hape.

TO TATOU E TO TE ATUA MANA‘O NO NIA I TE MAU HAPE

Ia rave maitai tatou i te tahi ohipa, e oaoa e e farii tatou ia haapopou mai vetahi ê. E ia hape tatou noa ’tu e ere i te mea opuahia aore ra aita vetahi ê i ite i te reira, ua ineine atoa anei tatou i te farii ua hape tatou? E titauhia ïa te haehaa, e ere anei?

Ia mana‘o tatou o tatou te mea maitai a‘e ia vetahi ê, e tamata tatou i te haafaufaa ore i te hape i ravehia, i te pari e te imi atoa paha i te otoheraa. Eita roa râ te reira e faaafaro i te fifi e e parihia tei ore i hape noa ’‘e. Eita paha tatou e ooti mai i teie mahana, i te hopearaa râ, “e haava . . . te Atua ia tatou tataitahi ia au i ta tatou mau ohipa.”—Roma 14:12.

Ua ite te Atua e hape iho â te taata. I roto i te buka Salamo, te faaitehia ra mea “aroha e te hamani maitai” te Atua. “E ore oia e tamau i te a‘o mai ia tatou, e ore hoi e vaiiho mârô i to ’na riri e a muri noa ’tu.” Ua ite oia mea tia ore te taata e te taa ra ia ’na mea paruparu tatou, “te mana‘o ra oia e, e repo tatou nei.”—Salamo 103:8, 9, 14.

Mai te hoê metua tane î i te here, e hinaaro te Atua ia faaite tatou i te hoê â mana‘o e to ’na no nia i te mau hape. (Salamo 130:3) I roto i ta ’na Parau, e itehia e rave rahi a‘oraa e aratairaa o te tauturu mai ia ite eaha te rave ia hape tatou aore ra ia hape o vetahi ê.

TE RAVE IA HAPE TATOU AORE RA VETAHI Ê

Ia hape te taata, e pinepine oia i te pari ia vetahi ê aore ra i te imi i te otoheraa no ta ’na i parau aore ra i rave. E pau te taime e e rohirohi te itehia ia na reira. A taui na râ te raveraa. Ia faahiti oe i te mau parau o te haamauiui ia vetahi ê,  no te aha e ore ai e tatarahapa noa e e faaafaro i te fifi? Eita ïa te auhoaraa e mutu. Ua hape anei oe i te raveraa i te tahi ohipa o tei haafifi e tei haamauiui ia oe aore ra ia vetahi ê? Eiaha e riri ia oe iho aore ra e pari ia vetahi ê, a rave râ i ta oe e nehenehe no te faaafaro i te reira. Ma te imi i te otoheraa, e nehenehe te peapea e tupu mai a rahi roa ’tu ai te fifi. No reira, mea maitai a‘e ia huti mai i te haapiiraa, ia faaafaro i te fifi e ia haere i mua.

Ia hape râ vetahi ê, mea ohie roa ia faaite i te mauruuru ore. Mea maitai a‘e râ ia pee i te a‘oraa a Iesu Mesia o tei na ô: “Te mau mea atoa ïa ta outou e hinaaro ia rave te taata no outou, a rave atoa ïa no ratou.” (Mataio 7:12) Ia rave oe i te hape noa ’tu mea haihai roa, papu e hinaaro oe ia hamani maitai atu vetahi ê aore ra ia faaore roa ratou i ta oe hapa. No te aha ïa e ore ai e na reira atoa i nia ia vetahi ê?—Ephesia 4:32.

ARATAIRAA O TE TAUTURU IA ORE IA HAPE HANOA

Te faataahia ra i roto i te tahi titionare, e ravehia te hoê hape “ia hamanihia te mana‘o, ia ore ia itehia te taatoaraa o te tupuraa aore ra no te haapao ore.” I teie aore ra i te tahi atu mahana, e hape tatou paatoa no hoê a‘e o na tumu e toru i faahitihia. Ma te haapao râ i te tahi mau aratairaa faufaa a te Bibilia, e tauturu mai te reira ia ore ia hape hanoa.

Teie te tahi aratairaa i roto i te Maseli 18:13: “O tei parau vave mai aitâ i faaitehia ’tu, ua faaite oia e maamaa to ’na, e au ia ’na te vahavaha.” No reira, a tiai rii ia faaitehia ’tu te taatoaraa o te tupuraa e i muri iho oe e feruri atu ai eaha te rave. E tauturu te reira ia ore ia faahiti i te parau feruri-ore-hia aore ra ia riri taue. Mea faufaa ia faaroo maite no te ite i te tupuraa mau ia ore oe ia hamani i te mana‘o a hape atu ai.

Te na ô ra te tahi atu aratairaa Bibilia: “A tutava i te rave i te mea e tia ia outou tataitahi no te parahi hau noa e te taata atoa.” (Roma 12:18) Ia riro noa oe ei taata o te parahi hau noa e te ohipa amui e o vetahi ê. A tâua e a faatura i te taata, a feruri e nafea ia haapopou e ia faaitoito atu. Mai tera ana‘e to oe huru, ohie noa te taata i te faaore i ta oe hapa ia hape oe na roto i te parau e te ohipa. Mai te peu e fifi rahi a‘e tei tupu, e farii ïa ratou i te faaafaro i te reira ma te hau.

A huti mai i te haapiiraa ia hape oe. Eiaha e imi i te otoheraa no ta oe i parau aore ra i rave. Ia tauturu râ te reira ia taa eaha te mau huru maitatai e tia ia oe ia faaite. Peneia‘e, e titauhia ia rahi atu â to oe faaoromai e hamani maitai, aore ra ia haavî atu â oe ia oe iho. E tia paha ia faatupu atu â oe i te mǎrû, te hau e te here. (Galatia 5:22, 23) Mea na reira oe e ite ai eaha te haamaitai mai no te ore e tapiti i te hape. Na roto atoa i te ataraa, e nehenehe te peapea e ore. E ere te auraa te haafaufaa ore ra oe i te hape ta oe i rave, mea ohie a‘e râ no vetahi ê ia faaore i ta oe hape e ere ana‘e oe i te taata o te inoino hanoa.

TE FAUFAARAA IA FAAITE I TE MANA‘O TANO

E faufaahia tatou ia faaite i te mana‘o tano no nia i te mau hape. Eita tatou e riri ia tatou iho e e vai hau noa tatou e o vetahi ê. Ma te tutava i te huti mai i te haapiiraa, e riro tatou ei taata feruriraa paari a‘e e te au-a‘e-hia e vetahi ê. Eita tatou e haaparuparu aore ra e inoino ia tatou iho. E haafaufaa tatou i te tutavaraa a vetahi ê no te ore e hapa hanoa a oaoa ’tu ai i te tahoê e o ratou. Te mea faufaa roa ’tu â, e pee tatou i te hi‘oraa o te Atua ma te faaite i te here e ma te faaore noa i te hapa a vetahi ê.—Kolosa 3:13.

Ua ino roa anei te tamaaraa a te utuafare i te hape a Margaret i faahitihia i te omuaraa? Aita roa ’tu! Ua ata ratou paatoa, o Margaret iho â râ, e ua tamaa noa ’tu aita te macaroni! E rave rahi matahiti i muri a‘e, ua faatia na mootua i tei tupu i tera mahana i ta raua iho mau tamarii. E ere roa ’tu te hape i ravehia ta raua i tapea mai, ua haamana‘o râ raua i te taime oaoa ta ratou i fana‘o na muri i to raua papa e mama ruau.

^ par. 2 Ua tauihia te i‘oa.