E rave rahi mirioni taata na te ao o te tiaturi e faahanahana te Noela i te mahana fanauraa o Iesu. No oe, ua faatupu anei te mau hoa piri o Iesu mai ta ˈna mau aposetolo e pǐpǐ i te Noela? Ua ite anei oe eaha ta te Bibilia e parau ra no nia i te mau oroa fanauraa? E tauturu te pahonoraa o tera mau uiraa ia ite e oroa anei te Noela na te mau Kerisetiano.

Na mua roa, aita te Bibilia e faaite ra ua faatupu Iesu aore ra hoê o te mau tavini haapao maitai a te Atua i te oroa fanauraa. E piti anaˈe taata ta te mau Papai e faahiti ra o tei faahanahana i to raua mahana fanauraa. E ere raua i te tavini na Iehova, te Atua o te Bibilia. Hau atu â, e ohipa ino mau tei tupu i tera na oroa fanauraa e piti. (Genese 40:20; Mareko 6:21) Ia au i te tahi buka, ua patoi te mau Kerisetiano matamua i te “peu a te mau nunaa ěê no nia i te mau oroa fanauraa.”—Encyclopædia Britannica.

Aita te Bibilia e faaite papu ra eaha te mahana fanauraa o Iesu. Ua papai John McClintock e James Strong i te tahi buka faaturahia. Te faaitehia ra i roto, “eita e itehia te haapapuraa o te mahana fanauraa o te Kirito i roto i te Faufaa api e na reira atoa i roto i te tahi atu papai.” (Cyclopedia of Biblical, Theological, and Ecclesiastical Literature) Ahani Iesu i hinaaro ia faatupu ta ˈna mau pǐpǐ i to ˈna oroa fanauraa, eita anei oia e faaite papu i to ˈna mahana fanauraa?

A piti, aita te Bibilia e faaite ra ua faatupu Iesu aore ra hoê o ta ˈna mau pǐpǐ i te Noela. Ia au i te tahi buka, ua haamata te parau o te Noela i te faahitihia “i roto i te Tarena a Philocalus, e tarena Roma o te faahiti i tei itehia i roto i te tahi atu tarena no te matahiti 336 [i muri aˈe i te Kirito].” No muri aˈe roa mai ïa te reira i te otiraa te Bibilia i te papaihia, e tau senekele i muri aˈe Iesu a ora ˈi i nia i te fenua. Te haapapu ra McClintock e Strong, “e ere na te Atua i faaue ia faatupu i te Noela, e ere atoa no roto mai i te Faufaa api.” a

Ei Orometua Rahi, ua horoa Iesu i te mau faaueraa papu no te faaite i ta ˈna e hinaaro ia rave ta ˈna mau pǐpǐ. Ua papaihia te reira i roto i te Bibilia, e aita roa o ˈna i faaue ia faatupu i te oroa Noela. Mai te orometua haapii o te ore e hinaaro ia na nia ˈtu te mau piahi i ta ˈna mau faaueraa, ua titau Iesu i ta ˈna mau pǐpǐ “eiaha ia na nia ˈtu i tei papaihia” i roto i te Parau a te Atua.—Korinetia 1, 4:6.

Hoê râ oroa faufaa mau ta te mau Kerisetiano matamua i matau maitai, o te Oroa haamanaˈoraa i te pohe o Iesu. Na Iesu iho i parau i ta ˈna mau pǐpǐ afea e nafea ia faatupu i tera oroa. E itehia ta ˈna mau faaueraa papu e te taio mahana o to ˈna poheraa i roto i te Bibilia.—Luka 22:7, 19; Korinetia 1, 11:25.

Mai ta tatou i ite mai nei, e oroa fanauraa te Noela e aita te mau Kerisetiano matamua i rave i tera peu no ǒ mai i te mau nunaa ěê. Hau atu â, aita te Bibilia e faaite ra ua faatupu Iesu aore ra te tahi atu taata i te Noela. Ia au ïa i teie mau haamaramaramaraa, e mirioni taata na te ao o tei taa maitai e ere te Noela i te oroa na te mau Kerisetiano.