Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 6 2016

 TUMU PARAU MATAMUA | ORAMA O TE FAATAA RA I TE RA‘I

Uiraa no nia i te ra‘i

Uiraa no nia i te ra‘i

Ua uiui a‘ena anei oe no nia i te ra‘i e no nia i tei ora ra i reira? Mai te peu e e, e ere o oe ana‘e. Ua rau te mana‘o. No vetahi, o te tupuna te tia ia faaturahia te ora ra i te ra‘i. No te tahi pae, e vahi hau mau teie î i te melahi e te taata maitai tei pohe. E no te tahi atu, e hanere mirioni atua te parahi ra i reira.

E rave rahi te aimârô ra eita e nehenehe e ite atu â no nia i te ra‘i, aita hoi hoê a‘e taata no te ra‘i mai o te nehenehe e faaite mai. Ua hape râ tera mana‘o. Ua ora Iesu Mesia i te ra‘i hou a pou mai ai i te fenua. Ua parau tia roa ’tu oia i te mau tia haapaoraa i to ’na ra tau: “I pou mai nei hoi au mai te ra‘i mai e haapao i to tei tono mai ia ’u nei hinaaro, eiaha to ’u iho hinaaro.” Ua faaite Iesu i te hoê haamaramaramaraa a parau ai i ta ’na mau aposetolo: “E rave rahi te parahiraa mau i te fare o tau Metua ra.”—Ioane 6:38; 14:2.

O vai to Iesu Metua? O te Atua, o Iehova to ’na i‘oa e tei te ra‘i to ’na parahiraa. (Salamo 83:18) No reira, o te Atua Iehova e o Iesu Mesia te nehenehe e faataa maitai a‘e i te ao itea ore. O ta raua ïa i rave maoti te mau orama faahiahia mau ta raua i horoa i te feia taiva ore.

I to muri nei tumu parau, e ite oe i te tahi mau irava Bibilia o te faataa i ta te taata i ite i roto i te mau orama. A hi‘opoa ’i i te reira, a haamana‘o e ere te ra‘i mai te ao taata nei hamanihia e te mau mea o ta tatou e ite e e tapea. Ua faaohipa te Atua i te mau orama ia taa ia tatou mai te aha te ra‘i. Ahani aita o ’na i na reira, eita tatou e taa. E tauturu ïa te mau orama ia oe ia taa i tei parahi ra i te ra‘i.