Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA No 6 2016

 TUMU PARAU MATAMUA | ORAMA O TE FAATAA RA I TE RA‘I

Orama no nia i tei ora ra i te ra‘i

Orama no nia i tei ora ra i te ra‘i

Te faataa ra te Bibilia e rave rahi orama faahiahia ia nehenehe tatou e feruri i to te ra‘i itea ore. A hi‘opoa maite na i te reira. Noa ’tu e faahoho‘araa noa vetahi tuhaa o te mau orama, e tauturu te reira ia oe ia feruri no nia i tei ora ra i te ra‘i e ia taa i ta ratou e rave ra no oe.

O IEHOVA TE ATUA TEITEI

“E terono tei faatiahia i nia i te ra‘i, e te parahi ra te hoê i nia iho i taua terono ra. E o tei parahi i nia iho i taua terono ra, mai te isephe ra, e te ofai adama ra, te huru; e i haaatihia taua terono ra i te anuanua, mai te semaradino ra te huru.”—Apokalupo 4:2, 3.

“Ua ati a‘era oia i te anaana. Mai te huru o te anuanua e vai i roto i te ata i te mahana ûa nei, o te huru ïa o te anaana e ati noa ’‘e. O te huru ra teie o te anaana o Iehova.”—Ezekiela 1:27, 28.

Ua horoahia teie na orama i te aposetolo Ioane e i te peropheta Ezekiela. Te faataa ra te reira i te hanahana o te Atua teitei ra o Iehova maoti te mau mea ta tatou i matau: te ofai maitatai anaana, te hoê anuanua e te hanahana o te hoê terono. Te auraa ïa e mea nehenehe mau e te hau to reira ana‘e Iehova.

Te tuea ra teie faataaraa o te Atua i ta te papai salamo: “E rahi hoi Iehova, e ia rahi hoi te haamaitai ia ’na; e ia rahi hoi to ’na mǎta‘uraahia i te mau atua atoa ra! Te mau atua atoa o te mau etene, idolo faufaa ore ïa: area o Iehova na ’na i hamani i te mau ra‘i ra. Te tura e te mana tei mua i tana aro. Te puai e te nehenehe tei to ’na ra ïa vahi mo‘a.”—Salamo 96:4-6.

Noa ’tu o Iehova te Atua teitei, te ani mai ra o ’na ia haafatata ’tu ia ’na na roto i te pure ma te haapapu e e faaroo mai o ’na. (Salamo 65:2) Te here e te haapao rahi mai ra te Atua. No reira te aposetolo Ioane i papai ma te tiaturi: “E aroha hoi te Atua.”—Ioane 1, 4:8.

TEI TE ATUA RA IESU

“Î a‘era [te pǐpǐ Kerisetiano ra o Setephano] i te Varua Maitai, e hi‘o tamau maite atura i nia i te ra‘i, e ite atura i te hanahana o te Atua, e ia Iesu i te tia-maite-raa i te rima atau o te Atua ra. Ua na ô a‘era oia, Inaha, te ite atura vau i te ra‘i, ua vevetehia, e te Tamaiti a te taata i te tiaraa i te rima atau o te Atua ra.”—Ohipa 7:55, 56.

Hou Setephano a ite ai i tera orama, ua haapohehia Iesu. I teie nei, te paraparau ra Setephano i te  mau aratai ati Iuda, te feia iho tei turai i te tahi atu ia haapohe ia Iesu. Ua haapapu te orama e ua faatiahia mai Iesu i te ora e ua fana‘o i te hanahana. Ua papai te aposetolo Paulo no nia i te reira: “A faatia ’i [Iehova] ia [Iesu] mai te pohe maira, e i haaparahi ihora ia ’na i to ’na iho rima atau i te basileia ra i te ao; i nia ê roa i te mau arii, e te feia mana, e te puai, e te rahi, e te mau i‘oa atoa i faahitihia nei, eiaha i teie nei ao ana‘e ra, i te ao atoa râ a muri atu.”—Ephesia 1:20, 21.

Te faataa ra te mau Papai i te tiaraa teitei o Iesu. E faaite atoa mai râ te reira e mai ia Iehova, te haapao rahi ra Iesu i te taata. I to ’na taviniraa i te fenua, ua faaora Iesu i tei ma‘ihia e i te feia hapepa e ua faatia faahou mai i te taata pohe. E ma to ’na tusia, ua faaite o ’na i to ’na here rahi no te Atua e no te taata. (Ephesia 2:4, 5) I te rima atau o te Atua, fatata Iesu i te faatere mai e i te haamaitai rahi mai i te huitaata faaroo i te mau vahi atoa.

TE MAU MELAHI O TE TAVINI RA I TE ATUA

“Te hi‘o ra vau [te peropheta Daniela], e haamauhia ihora te mau terono e ua parahi maira To te mau mahana tahito ra [Iehova], . . . e ua tausani hoi te tausaniraa i te taviniraa ia ’na ra, e ua ahuru hoi te tausaniraa i te manotini i te tiaraa i mua i tana aro.”—Daniela 7:9, 10.

I roto i teie orama o te ra‘i, ua ite Daniela e rave rahi roa melahi, eiaha noa hoê. Auê ïa orama faahiahia mau! E varua hanahana, maramarama e te puai te mau melahi. Te vai ra i roto ia ratou te seraphi e te kerubi. Te faahiti ra te Bibilia i te mau melahi hau atu i te 250 taime.

E ere te melahi i te taata tei ora na i te fenua. Ua poiete te Atua ia ratou na mua roa ’‘e i te taata. Ua ite te mau melahi a poietehia ’i te fenua e ua pii noa ratou i te oaoa.—Ioba 38:4-7.

Te tahi ravea e tavini ai ratou i te Atua maoti ïa te ohipa faufaa roa ’‘e i te fenua: te faaiteraa i te parau apî oaoa o te Faatereraa arii a te Atua. (Mataio 24:14) E ua faaitehia ta ratou tuhaa i roto i te hoê orama a te aposetolo Ioane o tei papai: “Hi‘o atura vau i te hoê melahi i te maueraa na ropu i te reva nei: ma te evanelia e tia i te vairaa ra ei pororaa ’tu i te feia e parahi i te ao nei ra, i te mau fenua  atoa, e te mau opu atoa, e te mau reo atoa, e te mau nunaa atoa.” (Apokalupo 14:6) Aita te mau melahi e paraparau i te taata mai ta ratou i rave i te tahi taime i na mua ’‘e. Te tauturu nei râ ratou ma te aratai i te feia e poro ra i te parau apî oaoa i te feia aau farii e tano.

SATANI O TE HAAVARE RA E MIRIONI TAATA

“E tama‘i tei nia i te ra‘i: O Mihaela [Iesu Mesia] e ta ’na ra mau melahi tama‘i atura i te teni; e ua tama‘i maira te teni e ta ’na ra mau melahi. Aore râ i riro te re ia ratou; e aore roa ’tura o ratou e parahiraa i nia i te ra‘i. Hurihia ’tura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ’na mau melahi atoa ua huri-atoa-hia i rapae.”—Apokalupo 12:7-9.

Aita te hau i vai noa i te ra‘i. I te omuaraa roa o te tuatapaparaa, ua orure hau te hoê melahi ia Iehova. Ua hinaaro teie melahi ia haamorihia o ’na, riro mai nei ïa oia Satani, o “Patoi” te auraa. I muri iho, ua pee atoa te tahi atu mau melahi i ta ’na orureraa hau e ua piihia ratou te mau demoni. Te patoi roa nei teie mau melahi ino ia Iehova e ua faaatea ê ratou i te rahiraa o te taata i te aratairaa î i te here a Iehova.

Mea ino mau Satani e ta ’na mau demoni. E enemi ratou no te huitaata e o ratou te tumu o te mauiui e rave rahi. A hi‘o na, ua haapohe Satani i te nǎnǎ e te mau tavini a te taata taiva ore o Ioba. Ua haapohe atoa i na ahuru tamarii a Ioba na roto i te hoê “mata‘i u‘ana” o tei vavahi i te fare to reira ratou. I muri iho, tairi atura Satani ia Ioba i te “ma‘i mai te tapua‘e avae e tae noa a‘era i te tupuai upoo.”—Ioba 1:7-19; 2:7.

Fatata roa râ aita faahou Satani. Ua hurihia mai o ’na i nia i te fenua e ua ite o ’na e “maa taime poto to ’na e toe nei.” (Apokalupo 12:12) E haamou-roa-hia Satani. Auê ïa parau apî oaoa!

TE FEIA NO TE FENUA ’TU

“Ua hoo oe [Iesu] ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa; e ua faariro oe ia matou ei hui arii, e ei tahu‘a na to matou Atua, e e riro ia matou te hau i teie nei ao.”—Apokalupo 5:9, 10.

Mai ia Iesu i faatiahia mai no te ora i te ra‘i, e na reira-atoa-hia te tahi atu. Ua parau Iesu i ta ’na mau aposetolo taiva ore: “Te haere nei au e haamaitai  i te hoê vahi no outou. E ua oti ana‘e . . . e ho‘i mai au e aratai ia outou i o ’u ra; ei reira atoa outou i te vahi e parahihia e au ra.”—Ioane 14:2, 3.

E haere ratou i te ra‘i no te apiti ia Iesu i roto i te Faatereraa arii o te faatere e te haamaitai i te huitaata. Teie te Faatereraa arii, aore ra hau, ta Iesu i parau i ta ’na mau pǐpǐ ia pure: “E to matou Metua i te ao ra, ia raa to oe i‘oa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na.”—Mataio 6:9, 10.

EAHA TE RAVEHIA I TE RA‘I?

“Ua faaroo atura vau [te aposetolo Ioane] i te hoê reo rahi no te ra‘i maira, i te na ôraa mai e, Inaha tei ǒ te taata ra te sekene o te Atua, . . . na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

Te faataa ra teie orama i te taime e ohipa ’i te Faatereraa arii a te Atua, oia hoi o Iesu e te feia hoohia mai no te fenua. E haamou te reira i te faatereraa a Satani a faariro atu ai i te fenua ei paradaiso. E ore roa te mau mea e mauiui e e oto ai te huitaata. E mou atoa te pohe.

Eaha te tupu no na miria taata tei pohe e te ore e tia faahou i te ra‘i? E ora ratou e a muri noa ’tu i roto i te paradaiso i nia i te fenua.—Luka 23:43.

Te haapapu mai ra teie mau orama e te herehia e te haapao-maitai-hia ra tatou e te Atua Iehova, ta ’na Tamaiti ra o Iesu Mesia, te mau melahi taiva ore e te feia hoohia mai no te fenua. No te ite atu â i ta ratou e rave, a tauaparau na e te mau Ite no Iehova aore ra a haere i nia i ta matou reni Internet www.jw.org/ty e a rave mai i te buka Eaha ta te Bibilia e haapii mau ra?