Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 6 2016

Heside

Haapiiraa no ǒ mai i te mau manu

Haapiiraa no ǒ mai i te mau manu

“A ui na râ i . . . te mau manu o te reva nei, e na te reira e faaite mai ia oe; o vai te ore i ite i taua mau mea ra e na te rima o te Atua teie i rave?”—Ioba 12:7, 9.

HAU atu i te 3 000 matahiti a‘enei, ua taa i te patereareha Ioba e mea rahi ta te mau manu o te reva e haapii mai ra no nia i ta te Atua e rave nei. Ua tano maitai atoa râ to ratou huru taa ê no te mau faahoho‘araa. I roto i te Bibilia, ua faahitihia te manu e rave rahi taime. E haapiiraa faufaa mau te huti mai no nia i te oraraa e to tatou auhoaraa e te Atua. Teie te tahi mau hi‘oraa.

TE VAHI OFAARAA A TE ZEPHURA

Zephura

Ua matau te feia no Ierusalema i te mau zephura o te faanaho pinepine i ta ratou ofaaraa i raro noa mai i te mau tafare. Ua na reira vetahi i te hiero a Solomona. E haere paha teie mau manu e ofaa i ǒ i te mau matahiti atoa no te mea e vahi hau teie no te haapao i ta ratou fanau‘a.

Ua papai te hoê tamaiti a Kora i te Salamo 84. A tavini ai i te hiero hoê hebedoma i te mau ono ava‘e atoa, ua ite oia i teie mau ofaaraa i te hiero. Ua hinaaro o ’na e riro mai te zephura o te noho tamau ra i te fare o Iehova i parau o ’na: “E mea popou rahi to oe ra mau tiahapa, e Iehova sabaota. Te hinaaro nei tau aau, te nounou nei, i te mau hezere o Iehova. . . . Ua noaa hoi i te zephura te fare no ’na, e i te opea te ofaaraa no ’na iho, ei fanauraa i to ’na ra pinia, ta oe ra mau fata, e Iehova sabaota, e tau arii, e tau Atua hoi.” (Salamo 84:1-3) Te hinaaro e te mauruuru atoa ra anei tatou e ta tatou tamarii i te putuputu tamau e te nunaa o te Atua?—Salamo 26:8, 12.

UA ITE TE HESIDE I TO ’NA TAU

Ua papai te peropheta Ieremia: “Ua ite hoi te heside o te ra‘i ra i to ’na mau tau.” Ua matau maitai Ieremia i te taime e tae mai ai te mau heside i te Fenua tǎpǔhia. I te tau uaaraa tiare, ua taiohia hau atu i te 300 000 heside uouo ia rere mai Afirika mai no te haere i Europa ma te na nia ’tu i te peho o Ioridana. Ua ite iho â teie mau manu e ua tae te taime no te ho‘i i te vahi veavea. Mai te tahi atu mau manu, ua ite iho â ratou i te taime o “to ratou haerea mai.”—Ieremia 8:7.

“Ua ite iho â te mau manu afea e taui ai i te fenua, tera te mea faahiahia,” o ta te hoê buka no nia i te mau manu ïa i parau. (Collins Atlas of Bird Migration) Ua horoa te Atua ra o Iehova i te paari i te mau manu no te ite i te tau e taui ai i te fenua. Ua horoa râ o ’na i te taata i te aravihi no te haroaroa i te mau tau. (Luka 12:54-56) Taa ê atu i te heside, e titauhia te ite i te Atua ia taa i te taata te auraa o te mau tupuraa i to tatou tau. Aita te mau Iseraela i te tau o Ieremia i tâu‘a i taua mau tapao ra. E ua faataa te Atua eaha mau  te fifi: “Ua faarue ratou i te parau a Iehova, e te paari ra, eaha to roto ia ratou?”—Ieremia 8:9.

I teie mahana, mea rahi te haapapuraa e te ora nei tatou i ta te Bibilia e parau ra te “anotau hopea.” (Timoteo 2, 3:1-5) E pee anei oe i te hi‘oraa o te heside ma te haapao i ‘te tau’?

E HI‘O ATEA TE AETO

Aeto

Te faahiti ra te Bibilia i te aeto e rave rahi taime e ua matau te feia o te Fenua tǎpǔhia i te ite i tera manu faahiahia. Mai to ’na ofaaraa i nia a‘e i te mau mato topatarere, ‘e tiai o ’na i te maa.’ Te parau atoa ra te Bibilia e “e ite to ’na mata i te maa i te atea ê ra.” (Ioba 39:27-29) E tae roa i te aeto ia ite i te hoê rapiti hoê kilometera i te atea.

Mai te aeto o te ‘ite atea,’ e nehenehe Iehova e ite atea i te a muri a‘e. No reira te Atua ra o Iehova i parau ai: “I te faaiteraa i te hopea mai te matamua mai â, e mai mutaaiho mai â i te faaiteraa i te mau mea aitâ i tupu ra.” (Isaia 46:10) Ma te pee i ta Iehova a‘oraa, e faufaahia tatou i to ’na paari e ite.—Isaia 48:17, 18.

Te faahoho‘a atoa ra te Bibilia i te feia e tiaturi i te Atua i te aeto: “O te feia râ e tiaturi ia Iehova, e noaa ïa te etaeta apî; e pee ratou i nia mai tei nia i te pererau o te aeto.” (Isaia 40:31) E faaohipa te aeto i te mata‘i veavea no te rere. Ia itehia ia ’na te tahi, e haere o ’na i roto, e hohora i to ’na pererau a faaati noa ’tu ai i tera mata‘i ia maraa roa o ’na i nia. Aita ïa te aeto e faaohipa noa i to ’na iho puai no te rere atea. Oia atoa no te feia e tiaturi ra ia Iehova, ua papu ia ratou e e horoa mai o ’na i “te mana rahi maitai ra.”—Korinetia 2, 4:7, 8.

“MAI TE MOA E HAAPUTU I TO ’NA FANAU‘A”

Moa e ta ’na fanau‘a

Tau taime na mua ’‘e Iesu a pohe ai, ua hi‘o o ’na i te oire rahi ati Iuda e ua parau: “A tae hoi oe, e Ierusalema e, e Ierusalema! o tei taparahi i te mau peropheta, e te pehi hoi i te ofai i te feia i tonohia ’tu ia oe na e, e rave rahi to ’u haaputuraa i to tamarii, mai te moa e haaputu i to ’na fanau‘a i raro a‘e i to ’na pererau ra; aita râ i tia ia outou.”—Mataio 23:37.

Te tahi hinaaro puai e vai ra i roto i te mau manu, o te hinaaro ïa e paruru i to ratou fanau‘a. E vai ara te mau moa, tei raro hoi te ofaaraa, i te mau mea atâta atoa. Ia ite te hoê moa i te hoê nesa ia rere i nia a‘e ia ’na, e faaara o ’na i ta ’na mau fanau‘a ma te hoê ta‘i puai. E horo ïa ratou i raro a‘e i to ’na pererau. Ua riro atoa to ’na pererau no ratou ei parururaa i te mahana e te ûa puai. Oia atoa, ua hinaaro Iesu e horoa i te parururaa pae varua i te feia no Ierusalema. I teie mahana, te titau manihini mai ra Iesu ia haere ia ’na ra no te ite i te tamǎrûraa e te parururaa i te mau fifi e faateimaharaa o te oraraa.—Mataio 11:28, 29.

Mea rahi mau te haapiiraa e huti mai i teie mau manu. A mataitai ai ia ratou, a haamana‘o i te mau faahoho‘araa Bibilia no nia ia ratou. Ia tauturu te zephura ia oe ia haafaufaa i te vahi haamoriraa a Iehova. Ia tiaturi oe i te Atua o te nehenehe e horoa ia oe te puai no te rere mai te aeto. Mai te fanau‘a o te horo i raro a‘e i te pererau o te moa, ia haere oe ia Iesu ra no te fana‘o i ta ’na paruru. Ia haamana‘o te heside ia oe ia vai ara i te auraa o te mau tupuraa na te ao o te faaite i te tau ta tatou e ora nei.

No te ite atu â

PARAU APÎ OAOA A TE ATUA

E nafea ia faafatata ’tu i te Atua?

Hi‘o e e pahono anei te Atua i te mau pure atoa, e nafea ia pure, e nafea ’tu â ia faafatata i te Atua.