Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 6 2016

 AAMU

Fariiraa i te parau mau Bibilia noa ’tu aita to ’u na rima

Fariiraa i te parau mau Bibilia noa ’tu aita to ’u na rima

Mea au na te taata e tapea i te tahi ohipa a haapeapea ’i. Aita râ ta ’u e nehenehe, aita hoi ta ’u e rima. E hitu matahiti to ’u i te tâpûraahia to ’u na rima ia ora mai au.

Ua fanauhia vau i 1960, 17 matahiti noa to to ’u mama. Ua faarue to ’u papa ia mâua hou to ’u fanauraa. I ora na mâua e to ’u na papa e mama ruau i Burg, te hoê oire iti i Heremani hitia o te râ. No te taata e rave rahi, aita e Atua e hoê â mana‘o to to ’u utuafare.

Ua aupuru to ’u papa ruau ia ’u. Ua tia atoa ia ’u ia tauturu ia ’na i roto i te ohipa e rave rahi mai te haereraa i nia i te mau tumu raau no te tâpû i te mau raau. Ei tamarii, ua au mau vau i te reira. E oraraa oaoa to ’u e aita e haapeapearaa.

TE HOÊ ATI TEI TAUI I TO ’U ORARAA

E ohipa riaria mau tei tupu i te hituraa o to ’u matahiti. No haamata noa ’tura vau i te pitiraa o te matahiti haapiiraa. A ho‘i ai i te fare, ua paiuma vau i nia i te hoê pou uira. Taeraa vau i te 8 metera, ua haruhia vau i te uira. I to ’u araraa mai i te fare ma‘i, e au ra e aita ta ’u e rima faahou. Ua paapaa e ua pêpê mau iho â to ’u na rima, mea riaria ia hi‘o atu. I titauhia ïa ia tâpû ia ore to ’u toto ia taero. Ua oti roa to ’u mama, papa ruau e mama ruau. Ei tamarii râ, aita vau i taa maitai e e taui roa te reira i to ’u oraraa.

I to ’u matararaa mai i te fare ma‘i, ua ho‘i au i te fare haapiiraa. Ua faaooo noa mai te mau tamarii ia ’u, ua turai mai e ua taora mai i te tahi mau mea no te mea aita ta ’u e nehenehe e paruru ia ’u. Ua mauiui roa vau i ta ratou mau parau faaino e faahaama. I muri iho, ua afaihia vau i te hoê fare haapiiraa taa ê i Birkenwerder no te mau tamarii huma. No te atea râ, aita to ’u utuafare i nehenehe e haere mai e hi‘o ia ’u. E ite noa vau ia ratou i te taime faafaaearaa haapiiraa. I na ahuru matahiti i muri iho, ua paari ïa vau o vau ana‘e.

UA PAARI MAI AITA E RIMA

Ua haapii au i te rave i te ohipa e rave rahi maoti to ’u avae. A feruri na mai te aha te huru ia tamaa e te hoê punu taipu ma te faaohipa i to avae! Ua tae ia ’u. Ua haapii atoa vau ia purumu i to ’u niho e ia pahere i to ’u rouru maoti to ’u avae. E ia faaohipa atoa i te avae a paraparau ai. Ua riro iho â to ’u avae ei rima no ’u.

 A taurearea ’i, mea au na ’u te mau buka no nia i te mau tao‘a feruri-noa-hia. I te tahi taime, i feruri na vau e fana‘o i te rima matini no te rave i te mau mea atoa. I te 14raa o to ’u matahiti, ua haamata vau i te puhipuhi i te avaava. No ’u, e horoa mai te reira i te tahi tiaturi ia ’u iho. E ere ïa vau i te hoê taata taa ê i te tahi atu. Mai te huru ra e e parau vau: ‘E tae atoa ia ’u ia na reira. E taata paari te feia puhipuhi avaava, e rima to ratou aore ra aita.’

Mea rahi te ohipa ta ’u i rave. Ua apiti au i te hoê taatiraa no te feia apî Heremani tiamâ tei turuhia e te faatereraa. O vau ïa te papai parau, e tiaraa fana‘o te reira i roto i te taatiraa. Ua apiti atoa vau i te hoê pǔpǔ himene, te rururaa no te mau pehepehe e te mau ohipa tuaro no te mau huma. I muri iho i te haapiiraa i te hoê toroa, ua haamata vau i te ohipa i roto i to ’u oire. A paari mai ai, ua tuu pinepine a‘e au i to ’u rima haavare no to ’u hinaaro e riro mai te tahi atu mau taata.

TE FARIIRAA I TE PARAU MAU

I te hoê mahana a tiai ai i te pereoo auahi no te haere i te ohipa, ua piri mai te hoê taata. Ua ani mai o ’na ia feruri e fana‘o faahou i to ’u na rima maoti te Atua. Ua huru ê au. Ua hinaaro iho â vau i to ’u na rima, eita râ e haere, e moemoeâ noa tera! Ua papu hoi ia ’u e aita e Atua. Mai tera taime, ua ape au i tera taata.

Tau taime i muri iho, ua titau manihini mai te hoê hoa ohipa ia haere i roto i to ’na utuafare. A inu ai i te taofe, paraparau mai nei to ’na na metua no nia i te Atua, Iehova. A tahi ra vau e faaroo ai e e i‘oa to te Atua. (Salamo 83:18) Ua mana‘o noa râ vau, ‘Aita e Atua, noa ’tu o vai to ’na i‘oa. E faaite au i tera mau taata e ua hape ratou.’ Ua farii ïa vau ia tauaparau no nia i te Bibilia. I to ’u maere rahi, aita ta ’u e nehenehe e haapapu e aita e Atua.

Ua taui mǎrû noa râ to ’u mana‘o no nia i te Atua a hi‘opoa ’i matou i te mau parau tohu Bibilia. Mea rahi tei tupu noa ’tu ua papaihia te reira hau atu i te hanere aore ra tausani matahiti na mua ’‘e. I roto i te hoê tauaparauraa, ua faaau matou i te mau tupuraa itehia na te ao e te mau parau tohu i roto i te Mataio pene 24, Luka pene 21 e Timoteo 2 pene 3. Mai te anairaa o te mau tapao taa ê o te tauturu i te taote ia ite i te ma‘i o te hoê taata, ua tauturu mai te anairaa o te mau tupuraa faahitihia i roto i teie mau parau tohu ia taa e te ora nei tatou i ta te Bibilia e parau ra te “anotau hopea.” * Maere roa vau. Te tupu ra teie mau parau tohu i mua noa i to ’u mata.

Ua papu ia ’u e o te parau mau ta ’u e haapii ra. Ua haamata vau i te pure i te Atua ra o Iehova. Ua faaea vau i te avaava o ta ’u i puhipuhi rahi na a hau atu ahuru matahiti i te maoro. E ua tamau noa vau i te haapii i te Bibilia hoê matahiti. Ua bapetizohia vau i te 27 no Eperera 1986 i roto i te hoê vahi hopuraa pape taa ê. Ua na reirahia ma te  huna, ua opanihia hoi te mau Ite no Iehova i tera tau i Heremani hitia o te râ.

TAUTURU IA VETAHI Ê

No te opaniraa, i putuputu na matou ei pǔpǔ nainai i roto i te mau fare e o te tahi noa mau hoa haamori ta ’u i matau. Ma te maere, ua faatia te feia mana ia ’u ia haere i Heremani tooa o te râ. Aita te mau Ite i opanihia i ǒ. No te taime matamua, ua tia ia ’u ia apiti i te mau tairururaa Bibilia e ia ite e tausani o to ’u mau taeae e tuahine. Auê ïa tupuraa taa ê mau!

I te toparaa te patu o Berlin, ua faatiahia te mau Ite no Iehova. E nehenehe ïa matou e haamori ia Iehova ma te tiamâ. Ua hinaaro vau e poro atu â, ua mǎta‘u râ vau i te paraparau i te taata ta ’u i ore i matau. E mana‘o haihai roa to ’u ia ’u iho no to ’u tupuraa e no te mea ua faaea vau i to ’u tamariiraa i roto i te hoê fare no te mau huma. I 1992 râ, i te hoê ava‘e, ua tamata vau i te poro 60 hora. Ua tae ia ’u e ua oaoa mau vau. Ua faaoti ïa vau e na reira i te mau ava‘e atoa e ua tia ia ’u e toru matahiti.

Haamana‘o noa vau i te mau parau i roto i te Bibilia: “O vai tei paruparu e aore au i paruparu?” (Korinetia 2, 11:29) Aita to ’u e rima faahou, te tere maitai ra râ to ’u feruriraa e e reo atoa hoi. E faaitoito ïa vau i te tauturu ia vetahi ê noa ’tu to ’u fifi. E taa ohie ia ’u i te feia e taotiaraa to ratou. Ua ite au eaha te huru ia hinaaro oe e rave i te tahi ohipa aita râ e haere. E tutava ïa vau i te faaitoito i te feia e ite ra i tera huru aau. Oaoa vau i te tauturu ia vetahi ê mai tera.

Oaoa vau i te faaite i te parau apî maitai i te tahi atu

E TAUTURU MAI IEHOVA I TE MAU MAHANA ATOA

E taime iho â, e hepohepo vau. E hinaaro noa vau e riro mai te tahi atu. E nehenehe ta ’u e rave i ta ’u ohipa o te mau mahana atoa. Ia faaauhia râ i te tahi atu, e titauhia hau atu â taime, tutavaraa e itoito. Teie ta ’u e haamana‘o i te mahana taitahi: “E tia ia ’u te mau mea atoa nei i . . . tei tauturu mai ia ’u ra.” (Philipi 4:13) I te mau mahana atoa, e horoa mai Iehova i te puai ta ’u e hinaaro no te rave i te mau ohipa atoa. Aita Iehova i faaea noa ’‘e i te tauturu mai. Eita atoa ïa vau e hinaaro e faaea i te tavini ia ’na.

Ua haamaitai mai Iehova, e utuafare to ’u. O ta ’u iho â i mihi noa i to ’u tamariiraa e a paari mai ai. Mea maitai roa ta ’u vahine o Elke, î i te here e te aumihi. Hau atu â, e mirioni Ite no Iehova tei riro mai ei taeae e tuahine, te hoê utuafare ïa na te ao atoa nei.

E ta ’u vahine here o Elke

Te tamahanahana atoa mai ra te parau fafau a te Atua no nia i te paradaiso i reira ‘e faaapî ai o ’na i te mau mea atoa nei,’ oia atoa to ’u na rima. (Apokalupo 21:5) E taa maitai atu â ia ’u teie parau fafau a feruri maite ai i ta Iesu i rave i nia i te fenua. I reira noa, ua faaora o ’na i te taata hapepa e ua faaho‘i atoa i te tari‘a tâpûhia o te hoê taata i to ’na vairaa. (Mataio 12:13; Luka 22:50, 51) Ua haapapu mai te mau parau fafau a Iehova e te mau semeio a Iesu e fatata roa vau i te fana‘o faahou i to ’u na rima.

Te haamaitairaa rahi a‘e râ, o te iteraa ïa o vai te Atua ra o Iehova. Ua riro mai o ’na ei metua no ’u, ei hoa, ei tamahanahana e ei puai. Hoê â mana‘o to ’u i to te arii Davida o tei papai: “O Iehova tau puai . . . e ua turuhia mai au; i rahi ai te oaoa o to ’u nei aau.” (Salamo 28:7) Hinaaro vau e tapea i tera parau mau faahiahia no te toea o to ’u oraraa. Ua farii au i te reira noa ’tu aita to ’u na rima.

^ par. 17 No te ite atu â no nia i te tapao o te anotau hopea, a hi‘o i te pene 9, “Te ora ra anei tatou i te ‘anotau hopea’?” i roto i te buka Eaha ta te Bibilia e haapii mau ra? Ua piahia teie buka e te mau Ite no Iehova e te vai atoa ra i nia www.jw.org/ty.