Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 5 2017

 TUMU PARAU MATAMUA | TE MAU MELAHI, MEA MAU ANEI RATOU? MEA FAUFAA ANEI IA ITE?

E nehenehe anei te mau melahi e tauturu atu?

E nehenehe anei te mau melahi e tauturu atu?

Te ora ra Kenneth e o Filomena i Curaçao. I te hoê Tapati, ua haere raua e farerei i te tahi na hoa faaipoipo e haapii ra i te Bibilia na muri ia raua.

Te faatia ra Kenneth: “I to mâua taeraa ’tu, ua opanihia te fare e aita e pereoo. Hoê râ mea tei turai ia ’u ia niuniu i te vahine.”

Ua pahono atu te vahine e ua faataa oia tei te ohipa ta ’na tane. I to ’na râ taaraa tei to ’na fare o Kenneth raua Filomena, oioi atura o ’na i te haere atu e farii ia raua.

Ua taa oioi ia raua ua ta‘i te vahine. A pure ai Kenneth no te haamata i te haapiiraa Bibilia, ta‘i faahou atura te vahine. Ma te mǎrû, ani atura Kenneth raua Filomena eaha tei tupu.

Faataa a‘era te vahine ua opua o ’na e haapohe ia ’na iho i tera taperaa mahana. I te taime a ta‘i ai te niuniu, te papai ra oia i te hoê rata na ta ’na tane. Ua faaite te vahine te faaruru ra oia i te hepohepo rahi, horoa ihora Kenneth e o Filomena i te tahi mau mana‘o tamahanahana no roto mai i te Bibilia. Ua faufaa-mau-hia te vahine i tera mau faaitoitoraa!

Te na ô ra Kenneth: “Ua haamauruuru mâua ia Iehova i te faaohiparaa ia mâua no te tauturu i tera vahine o tei hepohepo roa ino. I to ’na iho â râ turairaa mai maoti te tahi melahi aore ra to ’na varua mo‘a ia niuniu atu!” *

E nehenehe anei e parau ua tupu te reira mai tera noa? Ua tano anei o Kenneth raua Filomena i te tiaturi o te Atua tei haa maoti te tahi melahi aore ra to ’na varua mo‘a?

Te mea papu, ua ite tatou te faaohipa ra te Atua i ta ’na mau melahi no te tauturu i te taata ia ite i te parau mau no nia ia ’na. Te haapapu ra te tahi hi‘oraa Bibilia i te reira. Ua hinaaro te hoê taata tiaraa teitei no Etiopia i te tauturu i te pae varua, faaohipa a‘era te Atua i te tahi melahi no te aratai i te Kerisetiano ra o Philipa i tera taata.—Ohipa 8:26-31.

E rave rau haapaoraa o te haapii mea puai roa te mau melahi, te parau ra ratou ua maitihia vetahi no te faatupu i te hinaaro o te Atua aore ra no te riro ei tiai no te taata. E rave rahi atoa o te tiaturi ra e nehenehe te mau melahi e ohipa i nia i te oraraa o te taata. Tera râ, te vai ra vetahi o te ore roa ’tu e tiaturi e mea mau te mau melahi.

Mea mau iho â anei te mau melahi? Mai te peu e e, na vai i poiete ia ratou? Eaha te nehenehe e haapii no nia i te mau melahi? E nehenehe anei ratou e ohipa i nia i to tatou oraraa? E hi‘opoa ana‘e i te reira.

^ par. 8 O Iehova te i‘oa o te Atua i roto i te Bibilia.—Salamo 83:18.