Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 5 2017

 TUMU PARAU MATAMUA | TE MAU MELAHI, MEA MAU ANEI RATOU? MEA FAUFAA ANEI IA ITE?

Te vai ra anei te mau melahi ino?

Te vai ra anei te mau melahi ino?

E, te vai ra. Ua poietehia anei ratou mai tera? A haamana‘o na e ua horoa te Atua i te mau melahi ta ’na i poiete i te tiamâraa ia maiti. Tau taime rii i muri a‘e i te poieteraahia na taata matamua o Adamu raua Eva, ua faaohipa hape te tahi melahi tia roa i to ’na tiamâraa ia maiti. Ua opua oia e faatupu i te orureraa hau i nia i te fenua. Ua manuïa oia no te mea ua tia ia ’na ia turai ia Adamu raua Eva ia patoi i te Atua. (Genese 3:1-7; Apokalupo 12:9) Aita te Bibilia e faaite ra i te i‘oa e te tiaraa o tera melahi i te ra‘i na mua ’‘e oia a patoi ai i te Atua. I muri a‘e râ i ta ’na orureraa hau, te faaite maitai ra te Bibilia o Satani to ’na i‘oa, o Patoi te auraa. E pii-atoa-hia o ’na te Diabolo, o Pari haavare te auraa.—Mataio 4:8-11.

Aita râ tera orureraa hau i faaea noa i ǒ. I te tau o Noa, ua vaiiho te tahi mau melahi i te utuafare o te Atua i te ra‘i e “ua faarue . . . i to ratou iho nohoraa.” Aita i faaitehia ehia rahiraa ratou o tei na reira. Ua pou mai râ tera mau melahi i nia i te fenua e ua rave i te hoê tino taata no te haamâha i to ratou mau hinaaro iino e te tia ore. Aita roa hoi ratou i hamanihia no te reira.—Iuda 6; Genese 6:1-4; Petero 1, 3:19, 20.

I to te Atua faatupuraa i te diluvi no te tamâ i te fenua taatoa, ua faarue tera mau melahi ino i to ratou tino taata e ua ho‘i i to ratou nohoraa i te ra‘i. Tera râ, aita te Atua i faatia i tera mau melahi faatura ore ia ho‘i faahou i “to ratou tiaraa matamua.” Ua faaoti râ oia ia tapeahia ratou i roto i te hoê tupuraa haihai roa, “i roto i te poiri ta‘ota‘o [i te pae varua]” piihia Taretaruso. (Iuda 6; Petero 2, 2:4) Na tera noa iho â mau melahi ino, pii-atoa-hia demoni, i maiti ia riro te Diabolo ra o Satani ei faatere no ratou. Te parauhia ra o Satani “te raatira o te mau demoni,” o ’na e “faahua noa nei ia ’na ei melahi no te maramarama.”—Mataio 12:24; Korinetia 2, 11:14.

Te haapii ra te Bibilia ua haamauhia te Basileia o te Atua i 1914, e faatereraa arii tera o te Mesia te Arii. * I muri iho, ua tiahihia Satani e ta ’na mau demoni i te ra‘i e ua hurihia mai i raro nei i te fenua. Ua rahi roa te ino e te mau peu taotoraa tia ore faufau na te ao nei. Ua riro te reira ei haapapuraa i te riri o Satani e ta ’na mau melahi, oia atoa i to ratou hinaaro e haamauiui i te taata.—Apokalupo 12:9-12.

Tera râ, te haapapu atoa ra te rahi o te ino e te mau taparahiraa taata riaria mau ua fatata roa Satani e ta ’na mau demoni i te tapeahia. I mua nei, eita ratou e nehenehe faahou e haamauiui mai. No te hoê maororaa 1 000 matahiti, e mana mai te Faatereraa arii a te Atua i nia i te fenua nei o te riro roa ei paradaiso. Ia hope te reira, e tuuhia tera mau melahi ino no te hoê taime poto, o te tamataraa hopea roa o te huitaata. I muri iho, e haamou-roa-hia Satani e ta ’na mau melahi ino e a muri noa ’tu.—Mataio 25:41; Apokalupo 20:1-3, 7-10.

^ par. 6 No te ite atu â no nia i te Basileia o te Atua, a hi‘o i te pene 8 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.

No te ite atu â

PARAU APÎ OAOA A TE ATUA

No te aha te Atua e vaiiho noa ’i i te ino e te mauiui?

Nohea mai te ino e no te aha te Atua e vaiiho noa ’i i te reira? E ore roa anei te mauiui?