Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 5 2016

 TUMU PARAU MATAMUA | NA VAI E TAMAHANAHANA ’TU?

Te tamahanahanaraa i roto i te fifi

Te tamahanahanaraa i roto i te fifi

Ua rau te mau ati ta te taata e faaruru. Eita iho â e nehenehe e hi‘opoa i te taatoaraa, e hi‘o ana‘e râ na maha tupuraa i faahitihia i te tuhaa matamua o teie tumu parau. E tapao ana‘e mea nafea tera mau taata o tei faaruru i te fifi rahi i fana‘o ai i te tamahanahanaraa no ǒ mai i te Atua.

IA ERE OE I TE OHIPA

“Aita vau i maiti faahou i te ohipa e ua faaea atoa mâua i te hue i te moni.”—Jonathan

Ma te haamana‘o i to raua tupuraa, te na ô ra Seth *: “Ua ere mâua ta ’u vahine i te ohipa i te hoê â taime. E piti matahiti te maoro, ua ora noa mâua na roto i te tauturu a te fetii e te tahi mau ohipa rii. I te hopearaa, ua hepohepo roa Priscilla, ua mana‘o atoa e ere o ’na i te mea faufaa.

Ua tia râ ia mâua ia faaoromai. Ua haamana‘o tamau Priscilla i te mau parau i roto i te Mataio 6:34. Ua parau Iesu eiaha e tapitapi i to ananahi ra, na ananahi hoi e tapitapi i ta ’na iho. Ua tauturu ta ’na mau pure haavare ore ia ’na ia faaoromai. No ’u, o te Salamo 55:22 tei tamahanahana mai. Mai te taata papai Salamo, ua huri au i to ’u mau fifi i nia ia Iehova e ua ite au na ’na i tauturu mai ia ’u. Noa ’tu, ua noaa ta ’u ohipa i teie nei, te haapao ra mâua i ta Iesu a‘oraa i roto i te Mataio 6:20-22 ma te tapea i te hoê oraraa haapae. Hau roa ’tu â, ua piri atu â mâua i te Atua, oia atoa te tahi i te tahi.”

Te faatia ra Jonathan: “Ua haapeapea vau i te topatariraa ta mâua taiete. No te fifi i te pae faanavairaa faufaa, ua mâu‘a 20 matahiti tautooraa. Ua haamata mâua ta ’u vahine i te tatama‘i no te moni. Aita atoa mâua i faaohipa i te tareta moni, a‘unei hoi te fare moni e ore e faatia i te aufau.

Ua tauturu mai râ te Parau a te Atua e to ’na varua mo‘a ia rave i te faaotiraa maitai. Aita vau i maiti faahou i te ohipa e ua faaea atoa mâua i te hue i te moni. Ei Ite no Iehova, ua fana‘o atoa mâua i te tauturu a te mau hoa Kerisetiano. Ua  haapapu mai ratou e ere mâua i te mea faufaa ore e ua turu mai i te taime fifi roa.”

IA FAARUE TO HOA FAAIPOIPO IA OE

Te faatia ra Raquel: “I te faarueraa mai ta ’u tane ia ’u, ua oto vau e ua riri atoa. Ua mauiui roa ino. Ua haafatata râ vau i te Atua e ua tamahanahana oia ia ’u. Ua paruru te hau no ǒ mai i te Atua i to ’u aau a pure ai au ia ’na i te mau mahana atoa. No ’u, e au te rapaau ra te Atua i te pepe o to ’u aau!

Maoti ta ’Na Parau, te Bibilia, ua faaea vau i te riri e te inoino. Ua putapû roa hoi i te mau parau a te aposetolo Paulo i roto i te Roma 12:21, ‘Eiaha oe ia pohe i te ino, ia pohe râ te ino ia oe i te maitai.’

“‘E taime to te riroraa [aore ra vaiihoraa].’ . . . I teie nei, e fa apî ta ’u i roto i to ’u oraraa!”—Raquel

Ua tauturu mai te hoê hoa ia taa mea faufaa ia haere i mua. Ua faaite mai oia i te Koheleta 3:6 e ua parau mǎrû noa mai ‘e taime to te riroraa [aore ra vaiihoraa].’ E ere i te mea ohie ia farii i tera a‘oraa, tera râ te titauhia ia ’u ia rave. I teie nei, e fa apî ta ’u i roto i to ’u oraraa!”

Te parau ra Elizabeth: “Ia faaruehia oe e to hoa faaipoipo, e hinaaro oe te tauturu. Tera ta te hoê hoa i rave no ’u i tera e tera mahana. Ua ta‘i o ’na na muri ia ’u, ua tamahanahana mai e ua haapapu atoa mai e mea herehia vau. Ua papu ia ’u, ua faaohipa o Iehova ia ’na no te tamǎrû i to ’u aau.”

I ROTO I TE MA‘I AORE RA I TE RUHIRUHIARAA

“Oti ana‘e ta ’u pure, e taa ia ’u te horoa mai ra te Atua i te puai maoti to ’na varua mo‘a.”—Luis

E ma‘i mafatu rahi to Luis, tei faahitihia i te tuhaa matamua o teie tumu parau. Ua fatata oia i te pohe e piti taime. I teie nei, e titauhia ia faaohipa oia i te matini o te tauturu ia huti maitai i te aho 16 hora i te mahana. Te na ô ra oia: “E pure tamau vau ia Iehova. Oti ana‘e ta ’u pure, e taa ia ’u te horoa mai ra te Atua i te puai maoti to ’na varua mo‘a. E tauturu mai te pure ia faaitoito no te mea te tiaturi ra vau ia ’na e ua ite atoa te tâu‘a ra o ’na ia ’u.”

Te faataa ra Petra, e 80 matahiti: “Mea rahi te ohipa ta ’u e hinaaro e rave, aita râ e haere faahou. E ere i te mea ohie ia ite i to oe puai ia iti noa ’tu. Ua rohirohi roa vau e e titauhia ia rave noa i te raau. E pinepine au i te mana‘o mai ia Iesu i to ’na aniraa i to ’na Metua ia hopoi ê atu i te tahi ati. Ua horoa râ o Iehova ia Iesu i te puai e ua na reira atoa  oia no ’u. O te pure ta ’u rapaauraa i te mau mahana atoa. E maitai rii a‘e au ia paraparau vau i te Atua.”—Mataio 26:39.

Hoê â mana‘o to Julian o te faaoromai ra i te tahi ma‘i o te mau uaua uira e te mootuaio a 30 matahiti i teie nei. Te na ô ra oia: “Ua vaiiho vau i to ’u parahiraa faatere no te hoê parahiraa turairai. E ere râ to ’u oraraa i te mea faufaa ore no te mea te faaohipa ra vau i te reira no te tavini ia vetahi ê. E mâmâ rii mai te mauiui i te horoa ’tu e e faaitoito mai iho â o Iehova, e tapea noa hoi o ’na i ta ’na parau. Mai te aposetolo Paulo, e nehenehe mau vau e parau: ‘E tia ia ’u te mau mea atoa nei i . . . tei tauturu mai ia ’u.’”—Philipi 4:13.

IA POHE TEI HEREHIA

Te faatia ra Antonio: “I te poheraa to ’u papa i roto i te hoê ati purumu, aita vau i tiaturi oioi. Ua na ô vau, ‘Aita e tano, aita o ’na i rave i te hoê ohipa ino, na tera pereoo i faaû ia ’na!’ Aita râ ta ’u e ravea. Ua moe to ’na hiroa e pae mahana te maoro e pohe atura. Ua tamata vau i te ore e faaite i to ’u oto i mua i to ’u mama, o vau ana‘e râ, e ta‘i noa ïa. E uiui noa vau, ‘No te aha pai o ’na?’

I tera mau taime fifi, ua ani noa vau ia Iehova i te tauturu no te vai hau noa. E ua tamahanahana mǎrû noa mai oia ia ’u. Ua haamana‘o vau te faaite ra te Bibilia e nehenehe tatou paatoa e farerei i te hoê tupuraa mana‘o-ore-hia. Ua papu ia ’u e farerei faahou vau i to ’u papa ia tupu te tia-faahou-raa no te mea eita te Atua e haavare.”—Koheleta 9:12; Ioane 11:25; Tito 1:2.

“Noa ’tu ua pohe ta mâua tamaiti i roto i te ati manureva, te mau noa ra ia mâua i te mau taime oaoa ta matou i fana‘o.”—Robert

Hoê â atoa mana‘o to Robert, faahitihia i te tuhaa matamua o teie tumu parau. Te na ô ra oia: “Maoti ta mâua mau pure ia Iehova, ua ite mâua ta ’u vahine i te hau o te feruriraa ta te Philipi 4:6, 7 e parau ra. Ua tauturu mai tera hau ia paraparau i te mau vea no nia i to mâua tiaturiraa no te tia-faahou-raa. Noa ’tu ua pohe ta mâua tamaiti i roto i te ati manureva, te mau noa ra ia mâua i te mau taime oaoa ta matou i fana‘o. Tera noa ta mâua e tapea mai.

Ua parau mai te mau hoa Kerisetiano, ua ite ratou ia mâua i roto i te afata teata e ua vai hau noa a faataa ’i i to mâua tiaturiraa. Ua pahono atu mâua, auaa e rave rahi tei pure no mâua. Ua papu ia ’u, o Iehova tei turu mai na roto i ta ratou mau poroi tamahanahana e rave rahi.”

Mai ta te mau hi‘oraa i faaite, e nehenehe te Atua e tamahanahana i te taata o te faaruru ra e rave rau fifi e ati. E no oe? Noa ’tu eaha te fifi ta oe e farerei, e nehenehe oe e fana‘o i te tamahanahanaraa. * No te aha e ore ai e fariu ia Iehova no te ani i te tauturu? O ’na hoi “te Atua no ’na ana‘e te mahanahana.”—Korinetia 2, 1:3.

^ par. 5 Ua tauihia te tahi mau i‘oa.

^ par. 23 Ia hinaaro oe i te tauturu no te haafatata ’tu i te Atua e no te fana‘o i ta ’na tamahanahanaraa, a farii i te mau Ite no Iehova o to oe oire e aore ra a papai i te piha ohipa a te mau Ite no Iehova.