Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA No 5 2016

 TUMU PARAU MATAMUA | NA VAI E TAMAHANAHANA ’TU?

E imi tatou paatoa i te tamahanahanaraa

E imi tatou paatoa i te tamahanahanaraa

Te haamana‘o ra anei oe i te taime a topa ’i oe i te tamariiraa? Peneia‘e, ua mutu to oe rima aore ra ua pahure te avae. Te haamana‘o ra anei oe mea nafea to oe mama ia tamahanahana ia oe? Ua tamâ i te vahi pepe e ua rapaau i te reira. Ua ta‘i oe, ua nâ râ na roto i ta ’na mau parau mǎrû e tauahiraa mahanahana mau. I tera taime, mea ohie no oe ia ite i te tamahanahanaraa!

A paari ai râ, e ere roa ’tu te oraraa i te mea ohie. E fifi rahi a‘e te tupu e mea varavara ia ite i te tamahanahanaraa. Mea peapea ia parau, eita râ te rapaauraa e te tauahi a te hoê metua vahine e navai no te faaafaro i te fifi o te feia paari. E hi‘o ana‘e i te tahi mau hi‘oraa.

  • Eaha to oe huru ia ere oe i ta oe ohipa? Te parau ra Julian, ua hepohepo roa o ’na i to ’na tihatiraahia. Ua uiui oia, ‘E nafea vau ia faatamaa i to ’u utuafare? E rave rahi matahiti to ’u ohiparaa ma te itoito, no te aha te taiete i haafaufaa ore ai ia ’u?’

  • Peneia‘e, ua faaruehia oe e to hoa faaipoipo. Te faataa ra Raquel i to ’na huru: “Ua mauiui roa vau a faarue taue mai ai ta ’u tane ia ’u a 18 ava‘e i teie nei. E au ua patiahia to ’u mafatu na ropu, ua paruparu to ’u tino e to ’u feruriraa atoa. Ua haapeapea roa vau no to ’u ananahi.”

  • E ma‘i rahi paha to oe e e au ra aita oe e maitai maira. Mai te patereareha Ioba paha to oe huru i te tahi taime o tei auê e ua na ô: “Te riaria nei au; eiaha vau ia ora roa ’tu.” (Ioba 7:16) Peneia‘e, hoê â mana‘o to oe e to Luis, e 80 matahiti, o tei parau: “I te tahi taime, e au te tiai noa ra vau i te taime o te poheraa.”

  • Aore ra, te imi ra oe i te tamahanahanaraa no te mea ua pohe tei herehia e oe. Te faataa ra Robert: “I te poheraa ta ’u tamaiti i roto i te hoê ati manureva, oioi roa vau i te mana‘o aita e Atua. I muri iho, ua oto mai ta te Bibilia e parau ra, mai te huru ua patia-pǔpû-roa-hia vau i te puta hoto.”—Luka 2:35.

Ua tamahanahanahia Robert, Luis, Raquel e Julian noa ’tu te fifi ta ratou i faaruru. Ua ite ratou i tei horoa i te tamahanahanaraa maori râ, te Atua Mana hope. E nafea o ’na ia tamahanahana? E na reira atoa anei o ’na no oe?