Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 5 2016

 A PEE I TO RATOU FAAROO | DAVIDA

“Na Iehova hoi teie nei tama‘i”

“Na Iehova hoi teie nei tama‘i”

TE TIA ra Davida a horo tia mai ai te mau faehau na pihai iho ia ’na. Te itehia ra te riaria i nia i to ratou hoho‘a. Eaha hoi tei tupu? Ua faaroo Davida ia ratou ia faahiti, te tahi i muri mai te tahi, i te i‘oa o te hoê taata. I te vahi papu o te peho, te tia ra tera taata teoteo, o ’na paha te taata roa roa ’‘e ta Davida i ite a‘enei.

O Golia! Te ite atura Davida no te aha te mau faehau i riaria ’i, e tiapai hoi taata! To ’na noa kilo, ua hau atu i to e piti taata. I tera râ taime, tei nia ia ’na to ’na haana tama‘i, mea puai oia e ua mataro i te haere i te aroraa. Tutuô maira Golia, a feruri na i to ’na reo puai o te faaroohia i na pae mou‘a e piti. Te faaooo ra oia i te nuu e te arii o Iseraela ia Saula. Ma te teoteo, te ani ra oia ia haere atu te tahi taata e aro ia ’na. E ere atura e piti nuu te aro, e piti taata râ!—Samuela 1, 17:4-10.

Aita te mau Iseraela e te arii Saula e taa faahou eaha te rave. Ua faaitehia ’tu ia Davida, e ere no teie nei tera tupuraa, ua haamata hoi a hau atu hoê ava‘e atura! Tei mua te nuu Philiseti i to Iseraela, i tera e tera mahana, ua faaooo noa ’tu Golia e aita hoê o ratou i hauti noa ’‘e. Ua peapea roa Davida, ua faahaamahia te arii o Iseraela e ta ’na mau faehau. Tei rotopu atoa to ’na na taeae paari e toru e ua horo ratou pauroa no te riaria! No Davida, aita noa Golia, te hoê Philiseti, i faahaama i te nuu Iseraela, ua aa atoa râ i to ratou Atua o Iehova! Eaha râ ta Davida e rave, e taurearea noa hoi o ’na! E eaha ta tatou e haapii mai i to ’na faaroo?—Samuela 1, 17:11-14.

“A FAATAVAI IA ’NA, OIA HOI TENA”

E ho‘i ana‘e tau ava‘e na mua ’tu. Ua ahiahi a paoti noa ’i Davida i te mau mamoe a to ’na metua tane i te tahi vahi na te pae mou‘a fatata ’tu ia Betelehema. E taurearea haviti roa Davida e te rouru uteute, te au ia hi‘ohia ’tu e te mata nehenehe. I te mau taime o ’na ana‘e, e hauti oia i te kinura. Mea faahiahia roa na ’na te nehenehe o te mau mea ta te Atua i poiete e ua aravihi noa ’tu â oia i te hauti i te upaupa maoti e rave rahi hora haapiipiiraa. I tera râ ahiahi, ua anihia mai Davida ia haere oioi e hi‘o i to ’na papa.—Samuela 1, 16:12.

Tae atura oia, te paraparau ra to ’na metua tane o Iese e te tahi ruhiruhia, te peropheta taiva ore o Samuela. Ua tono o Iehova ia ’na no te faatavai i te hoê i rotopu i te mau tamaiti a Iese ei arii apî no Iseraela! Ua ite a‘ena Samuela na hitu taeae paari o Davida, ua parau maitai atu râ o Iehova aita oia i maiti hoê noa ’‘e i roto ia ratou. I te taeraa ’tu râ o Davida, ua na ô o Iehova ia Samuela: “A faatavai ia ’na, oia hoi tena.” I mua i te mau taeae paari atoa o Davida, ua rave ihora Samuela i te tahi farii o tei faaîhia i te mono‘i taa ê e ua ninii atura maa vahi iti i nia i te upoo o Davida. Ua taui roa te oraraa o Davida mai tera taime. Te parau ra te Bibilia: “Mai taua mahana maira te Varua o Iehova i te taeraa mai i nia ia Davida.”—Samuela 1, 16:1, 5-11, 13.

Ma te haehaa, ua parau Davida maoti o Iehova i pohe ai ia ’na na animara taehae

Ua titau oioi anei Davida i te tiaraa arii i muri iho? Aita, ua vaiiho râ oia na te varua o Iehova e  faaite atu eaha te taime tano no te amo i te hopoia rahi a‘e. A tiai noa ’tu ai, ua tamau oia i te rave i ta ’na ohipa haihai ei tiai mamoe. Aita o ’na i faaherehere ia ’na i roto i tera ohipa e ua faaite atoa i te itoito. I te tahi mahana, ua hinaaro te tahi liona e haru i te mau mamoe a to ’na papa, e te tahi atu mahana, te hoê ïa daba tei na reira. Ua paruru oioi oia i te nǎnǎ mamoe. I tera e piti taime, ua haapohe rima noa o ’na i tera na animara taehae riaria mau!—Samuela 1, 17:34-36; Isaia 31:4.

I muri a‘e, ua ani-faahou-hia Davida. Ua tae roa to ’na roo maitai i te aro o te arii. E faehau puai noâ Saula, ua ere râ i te farii maitai a Iehova i to ’na faaroo-ore-raa i ta te Atua mau faaueraa. Ua iriti o Iehova i to ’na varua mai nia mai ia Saula, mea pinepine ïa te arii i te faaite i te huru feruriraa au ore mai te riri, te taiâ e te ino. I tera mau taime, na te upaupa ïa e tamǎrû ia ’na. Ua faaroo vetahi o to ’na mau taata i te roo maitai o Davida, ei taata faata‘i upaupa e ei faehau. Ua anihia mai ïa Davida e aita i maoro, riro atura oia ei faata‘i upaupa i te aorai o Saula e ei amo mauhaa tama‘i.—Samuela 1, 15:26-29; 16:14-23.

Mea rahi te haapiiraa ta te feia apî e nehenehe e huti mai i te faaroo o Davida. A tapao na, ua haafaufaa Davida i te taime aita ta ’na e ohipa no te haafatata ’tu ia Iehova. Ua haapii mǎrû noa atoa o ’na i te rave i tahi mea e faufaahia ’i o ’na i muri a‘e e ia noaa ta ’na ohipa. Te mea faufaa roa ’tu â râ, ua vaiiho o ’na i te varua o Iehova ia aratai ia ’na. Auê haapiiraa faahiahia mau, e ere anei?—Koheleta 12:1.

“EIAHA ROA TE AAU O TE HOÊ TAATA E TAIÂ NOA ’TU I TERA RA TAATA”

A tavini noa ’i i ǒ Saula, e pinepine Davida i te ho‘i i te fare no te tiai i te nǎnǎ mamoe. I te tahi taime, e faaea maoro oia i reira. Mea na ô hoi i te hoê mahana, ani a‘era Iese ia Davida ia haere e hi‘o i to ’na na taeae paari e toru o tei riro ei faehau i roto i te nuu a Saula. Ua na reira Davida e ua hopoi i te maa na to ’na na tuaana i te peho o Ela. I te taeraa ’tu, ua peapea roa Davida i te faaiteraahia ’tu aita te nuu Philiseti e to Iseraela i hauti noa ’‘e mai tei faahitihia i te omuaraa. Tei te tahi pae mou‘a o te peho te mau Philiseti e te tahi atu pae mou‘a to Iseraela.—Samuela 1, 17:1-3, 15-19.

No Davida, eita e nehenehe e faaea noa mai tera. E nafea te nuu o te Atua ora o Iehova e nehenehe ai e riaria i tera taata no te nunaa ê? O Iehova iho ta Golia i faaooo. Haapeepee ihora Davida i te paraparau i te mau faehau no nia i te ravea no te haapohe ia Golia. Aita i maoro, faaroo atura Eliaba, te matahiapo o Davida ma, i ta ’na mau parau. Tama‘i a‘era Eliaba ia Davida ma te parau e, ua haere noa mai o ’na e hi‘o ia taparahihia ratou. Ua pahono atu râ Davida: “Eaha noa na vau? aita anei e tumu [ia ui au]?” I muri iho, ua tamau â oia i te paraparau no nia i te ravea ia pau Golia e tae roa ’tura i roto i te tari‘a o Saula. Ua faaue ihora te arii ia arataihia mai Davida ia ’na ra.—Samuela 1, 17:23-31.

Teie te mau parau faaitoito a Davida i te arii: “Eiaha roa te aau o te hoê taata e taiâ noa ’tu i  tera ra taata.” Tera hoi tei tupu i nia ia Saula e ta ’na mau faehau. Peneia‘e, ua faaau ratou ia ratou i tera taata rahi. Ua mana‘o paha, ‘Aita nei hoi te afaraa o to ’na tino aore ra tauupu e naea ia matou! Oioi roa matou i te tairi-pohe-hia e ana!’ O Davida râ, aita ïa i feruri mai tera. Mai ta tatou e ite mai, mea ê roa to ’na mana‘o, parau atura oia o ’na te haere e aro ia Golia.—Samuela 1, 17:32.

Pahono ihora Saula: “E ore e tia ia oe ia haere e ia papai i tera ra Philiseti, e tamaiti apî hoi oe; area oia ra, e taata tama‘i ïa mai to ’na apîraa mai â.” E tamaiti noa anei Davida? E ere, aita râ i tia ’tura to ’na matahiti no te faaô i roto i te nuu e mea apî roa o ’na ia hi‘ohia ’tu. Ua matau-ê-na-hia râ Davida mai te hoê taata itoito o te ore e riaria e e taurearea o ’na i tera taime.—Samuela 1, 16:18; 17:33.

Haapapu a‘era Davida ia Saula ua taparahi pohe oia i te liona e te daba. Ua faaoru anei Davida? Aita, ua ite oia na vai i tauturu ia ’na. Teie ta ’na i parau: “Na Iehova na tei faaora ia ’u i te liona e te daba, e faaora ia ’u i te rima o tera ra Philiseti.” I te pae hopea, na ô ihora Saula: “A haere, e ei pihai-atoa-iho Iehova ia oe.”—Samuela 1, 17:37.

Aita anei oe e hinaaro ia puai to faaroo mai to Davida? E niu papu to to ’na faaroo. Ua haapii hoi oia mai te aha te huru o te Atua e ua ite atoa ia ’na ia ohipa i roto i to ’na oraraa. Ua papu ia ’na e Atua paruru î i te here o Iehova e e faatupu noa iho â o ’na i ta ’na parau. Ia noaa ia oe tera huru faaroo, e titauhia ia tamau i te haapii no nia i te Atua mau maoti te Bibilia. Ma te haapao noa i te reira i te mau mahana atoa, e ite oe i te mau haamaitairaa e e puai mai to faaroo.—Hebera 11:1.

“NA IEHOVA OE E TUU MAI I TAU RIMA”

Na mua, ua tamata Saula i te faaahu i to ’na haana tama‘i ia Davida. Aita i taa ê roa i to Golia, mea hamanihia e te veo e te vai atoa ra te hoê ahu oomo auri. A hahaere ai râ Davida, mea teiaha e fifi no ’na ia hautiuti, eita roa e tano ia ’na. E ere oia i te faehau faaineinehia, aita oia i matau i te amo i te ahu tama‘i, to Saula iho â râ, o ’na hoi te taata rahi roa ’‘e o te nunaa Iseraela. (Samuela 1, 9:2) Tatara ihora Davida i te reira e ua rave noa i te ahu ta ’na i matau, ta te tiai mamoe e oomo no te paruru i ta ’na nǎnǎ.—Samuela 1, 17:38-40.

Ua hopoi atoa Davida ta te tiai mamoe e rave noa na, te pute ta ’na e tuu na nia i to ’na tapono e te hoê maa. Ia hi‘ohia, mea haihai, e mauhaa faahiahia roa râ i te aroraa. E tao‘a tera e vairaa ofai iti to te hopearaa o te tapeahia e e piti taura iri animara, tano maitai no te mau tiai mamoe. E tuu ratou i te ofai i roto i to ’na vairaa, e faaohuohu vitiviti i nia i to ratou upoo a tuu taue atu ai i te hoê o na taura. E nehenehe tera mauhaa e haapohe roa i te taata. No reira i te tahi taime, e faataa ê te mau nuu i te feia taora ofai i te tahi e te tahi.

Ua ineine Davida i teie nei e te ru ra oia i te farerei i to ’na enemi. A feruri na ia Davida ia pure u‘ana a ohi ai e pae ofai iti e te manina i roto i te anavai o te peho o tei mǎrô. I muri iho, ua horo tia ’tu i te tahua aroraa!

Eaha te huru o Golia i te iteraa ’tu i te taurearea ra? Te taio ra tatou: “Ua vahavaha maira oia ia ’na; e taata apî hoi oia, e te mata uteute e te maitai.” Ua tuhi ihora Golia ma te na ô: “E urî anei hoi au nei, i haere mai ai oe ia ’u nei ma te raau?” Ua ite ïa oia i tei roto i te rima o Davida, eiaha râ ta ’na maa. Ua faaino atura Golia i to ’na enemi haihai roa i te i‘oa o to ratou mau atua e ua parau e amu te mau manu e te animara taehae i to ’na tino pohe.—Samuela 1, 17:41-44.

Ua riro te mau parau a Davida i tera mahana ei haapapuraa rahi o to ’na faaroo. A feruri na a parau ai te taurearea ia Golia: “Te haere maira oe ia ’u nei, ma te ‘o‘e, e te mahae, e te paruru; te haere atu nei râ vau ia oe, ma te i‘oa o te Atua sabaota ra o Iehova, te Atua no te nuu a Iseraela ra, tei vahavahahia e oe ra.” Ua taa ia Davida e ere te puai taata e te mauhaa tama‘i i te mea faufaa roa. Aita Golia i faatura i te Atua ra o Iehova e na ’Na ïa e aro atu. Mai ta Davida i parau, “na Iehova hoi teie nei tama‘i.”—Samuela 1, 17:45-47.

 E ere Davida i te matapo no te ore e ite i te roa aore ra te mauhaa tama‘i a Golia! Ua faaoti papu râ oia i te ore e riaria ia ’na, eiaha mai ia Saula e ta ’na mau faehau. Aita Davida i faaau ia Golia ia ’na, ia Iehova râ. Eaha nei te roa o Golia? E 2,90 metera. Mai te aha râ ia faaauhia i te Arii o te ao nui? E taata noa oia, mea rahi rii a‘e i te hoê manumanu, ua ineine râ o Iehova i te tairi pohe roa ia ’na!

Ua horo tia ’tura Davida i mua i to ’na enemi ma te rave i te hoê ofai i roto i ta ’na pute. Faaineine ihora i ta ’na maa, faaohuohu atura i nia i to ’na upoo a faaroo-roa-hia ’i ia hio. Haafatata maira Golia ia Davida, peneia‘e, ua faaea i muri noa mai i te faehau e amo ra i to ’na paruru. Mea atâta no Golia, mea poto a‘e tera faehau, aita to ’na upoo e paruruhia ra. E tera mau te vahi ta Davida e hi‘o ra.—Samuela 1, 17:41.

Ua ite Davida mea haihai roa Golia ia faaauhia i te Atua ra o Iehova

Pee taue ihora ta Davida ofai. A feruri na, aita e maniania faahou i tera taime. Eita e ore, ua ara o Iehova eiaha Davida ia faaohipa i te tahi atu ofai. Ua tano maitai te ofai i te vahi hinaarohia e ua mau roa i nia i te rae o Golia. Topa tipapa ’tura te aito roa ra i raro i te repo. Ua horo riaria noa te faehau i amo i te paruru. Tapiri atura Davida, ua rave i te ‘o‘e a Golia e ua tâpû i to ’na upoo.—Samuela 1, 17:48-51.

Itoitohia ’tura Saula e ta ’na mau faehau, ua auau i te mau Philiseti ma te tuô tama‘i. Ua tupu te aroraa mai ta Davida i parau ia Golia. Ua na ô hoi o ’na: “Na Iehova . . . na ’na outou e tuu mai i to matou nei rima.”—Samuela 1, 17:47, 52, 53.

I teie mahana, eita te mau tavini a te Atua e haere faahou i te aroraa. Ua hope hoi tera tau. (Mataio 26:52) E titauhia râ ia pee tatou i te faaroo o Davida. Mai ia ’na, e tiaturi ana‘e e Atua ora o Iehova, o ’na ana‘e te tia ia tavini e ia mǎta‘u. I te tahi taime, e au to tatou mau fifi i te mou‘a, mea haihai râ te reira ia faaauhia i te puai hope roa o Iehova. Ia maiti tatou ia Iehova ei Atua e ia tiaturi tatou ia ’na mai ia Davida, eita te tahi noa ’‘e tupuraa aore ra fifi e haaparuparu ia tatou. O Iehova te mea puai roa ’‘e!