Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 4 2017

Na reta Hebera e maha o te i‘oa mo‘a o te Atua ra o Iehova, e taio mai te atau e tae atu i te aui

Te haapiiraa faahiahia e huti mai i te reta Hebera hu‘a roa ’‘e

Te haapiiraa faahiahia e huti mai i te reta Hebera hu‘a roa ’‘e

E nehenehe mau anei e tiaturi e tupu te mau parau fafau atoa a te Atua? Ua papu ia Iesu i te reira e na roto i ta ’na haapiiraa, ua turai oia i te feia o tei faaroo atu ia tiaturi atoa. A hi‘o na i te faahi‘oraa ta ’na i horoa i roto i te A‘oraa i nia i te mou‘a. Ua papaihia te reira i roto i te Mataio 5:18 o te na ô ra: “Oia mau ta ’u e parau atu: E mou te ra‘i e te fenua, e ore râ te hoê reta hu‘a roa ’‘e o te ture a Mose aore ra te hoê tapao reta e mou e ia hope roa te mau mea atoa i papaihia i te tupu.”

Teie te reta hu‘a roa ’‘e o te piapa Hebera, י (yod). Tera atoa te reta matamua o te i‘oa mo‘a o te Atua ra o Iehova. * Taa ê atu i te mau parau e reta o te Ture a te Atua, ua faariro te mau papai parau e Pharisea i te tahi noa ’‘e “tapao reta” ei mea faufaa roa.

Ua parau Iesu e mou te ra‘i e te fenua, area te tuhaa iti roa ’‘e o te ture, e hope roa ïa i te tupu. Tera râ, te haapapu mai ra te Bibilia e vai te ra‘i e te fenua ta tatou e ite nei e a muri noa ’tu. (Salamo 78:69) Na roto i teie parau maere mau, ua hinaaro Iesu e faaite e tupu te tuhaa hu‘a roa ’‘e o te Ture a te Atua.

Mea faufaa anei no Iehova te mau tuhaa rii? Papu maitai. A hi‘o na, ua parauhia i te mau Iseraela eiaha te tahi noa ’‘e ivi o te fanau‘a mamoe o te oroa Pasa ia fati ia ratou. (Exodo 12:46) Ua taa anei ia ratou te tumu o tera faaueraa? Aita paha. Area o Iehova, oia ïa. Noa ’tu mea iti, e tuhaa faufaa roa te reira i roto i te mau parau tohu no nia i te Mesia. Te faaite ra hoi te reira eita te tahi noa ’‘e ivi o te Mesia e ofatihia i nia i te pou haamauiuiraa.—Salamo 34:20; Ioane 19:31-33, 36.

Eaha ta te mau parau a Iesu e haapii mai ra? E nehenehe atoa tatou e tiaturi e tupu te mau mea atoa ta Iehova i fafau, tae roa atoa i roto i te tuhaa iti roa ’‘e. E ere anei i te mea mahanahana mau? Auê te faahiahia te haapiiraa e huti mai i te reta Hebera hu‘a roa ’‘e!

^ par. 3 Ua tuea te reta hu‘a roa ’‘e o te piapa Heleni iota i to te reo Hebera י (yod). I te mea ua papaihia te ture a Mose e ua horoahia i te mau u‘i i muri mai na roto i te reo Hebera, o te reta Hebera ïa ta Iesu i faahiti i roto i tera irava.