Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 4 2017

Elias Hutter, te faahiahia o ta ’na mau huriraa Bibilia Hebera

Elias Hutter, te faahiahia o ta ’na mau huriraa Bibilia Hebera

UA TAIO a‘ena anei oe i te Bibilia na roto i te reo Hebera? Aita paha. Peneia‘e, aita atoa oe i ite a‘enei i te reira. Tera râ, e au roa ’tu â paha oe i ta oe iho Bibilia a haapii mai ai no nia i te tahi aivanaa o Elias Hutter te i‘oa e ta ’na na huriraa Hebera e piti o te Bibilia.

Ua fanauhia Elias Hutter i 1553 i Görlitz, te tahi oire iti piri i te otia fenua e faataa ê ra ia Heremani ia Poronia e te Repupirita Tchèque. Ua haapii oia i te mau reo e paraparauhia i te hitia o te râ o Asia i te haapiiraa teitei Lutheran i Iéna. Ua riro mai oia ei orometua haapii i te reo Hebera i Leipzig i te 24raa o to ’na matahiti. No to ’na aravihi rahi, ua haamau oia i te hoê fare haapiiraa i Nuremberg o te haapii i te reo Hebera, Heleni, Latino e Heremani i roto noa e maha matahiti. Aita te reira i ravehia a‘enei i roto i te tahi atu fare haapiiraa.

“TE NEHENEHE O TEIE HURIRAA”

Api upoo parau o te huriraa Bibilia Hebera a Hutter no te matahiti 1587

I 1587, ua pia Hutter i te tahi huriraa Hebera o te tuhaa o te Bibilia tei matauhia i te parau Faufaa Tahito. Ua hutihia mai te i‘oa o tera huriraa i roto i te Isaia 35:8, Derekh ha-Kodesh, “te e‘a mo‘a” te auraa. No te nehenehe paha o te papairaa i roto i parauhia ’i, “te faaite ra te mau mea atoa i roto i te nehenehe o tera huriraa.” Te mea faahiahia ’tu â râ, ua riro tera huriraa Bibilia ei ravea maitai no te mau piahi no te haapii i te reo Hebera.

E ere roa ’tu i te mea ohie ia haapii i te taio i te Bibilia na roto i te reo Hebera. A tahi, mea taa ê te piapa Hebera e aita te taata i matau i te reira. Te piti, no te tahi ta‘o e tuuhia na mua ’tu e i muri a‘e, e ere i te mea ohie ia taa teihea te parau tumu Hebera. A hi‘o na i te parau tumu Hebera נפשׁ (nephe). I roto i te Ezekiela 18:4, ua tuuhia na mua ’tu te ta‘o ה (ha), e noaa mai ïa הנפשׁ (han·nephe), te nephe. No te hoê taata o tei ore i matau, eita o ’na e taa no roto mai te reira i te parau tumu נפשׁ (nephe). E mana‘o râ oia e parau ê roa tera. E hi‘o ana‘e mea nafea te huriraa Hebera a Hutter i tauturu ai i te mau piahi i roto i tera tuhaa.

Ua faaohipa Hutter i te tahi ravea neneiraa taa ê. Ua hamani oia i te tahi hoho‘a reta Hebera o te haameumeu i te papairaa reta e te tahi atu hoho‘a, o te faarairai i te papairaa reta. Mea aravihi mau, e ere anei? Ua haameumeu ïa oia i te papairaa o te parau tumu Hebera, area te ta‘o e tuuhia na mua ’tu e i muri a‘e i te parau tumu Hebera, ua faarairai ïa i te  papairaa. Na roto noa i tera ravea, ohie noa te mau piahi i te taa teihea te parau tumu Hebera, vitiviti atoa ïa ratou i te haapii i te reo. Ua faaohipahia hoê â faanahoraa i roto i te mau nota i raro i te api i roto i te Huriraa o te ao apî o te mau Papai Mo‘a ma te mau faahororaa (Farani). * Ua papai-meumeu-hia te parau tumu, area te ta‘o na mua ’tu e i muri a‘e i te reira, mea rairai noa ïa te papairaa. Te faaite ra te hoho‘a i nia ’tu i te faanahoraa o te papairaa i roto i ta Hutter huriraa Bibilia Hebera o te Ezekiela 18:4 e na reira atoa i roto i te nota o te Bibilia ma te faahororaa (Beretane).

TE HOÊ HURIRAA BIBILIA HEBERA O TE FAUFAA APÎ

Ua huri atoa Hutter i tei matauhia i te parau Faufaa Apî na roto 12 reo. Ua piahia te reira i 1599 i Nuremberg, pinepine tera Bibilia i te piihia te huriraa Nuremberg Polyglot. Ua hinaaro Hutter e faaô atu i te huriraa o te mau Papai Heleni Kerisetiano na roto i te reo Hebera. Ua parau râ oia noa ’tu “ua ineine oia i te aufau i te mau haamâu‘araa rahi” no te hoê huriraa mai tera na roto i te reo Hebera, e haafaufaa-ore-hia ta ’na mau maimiraa. * Faaoti atura ïa oia i te faaohipa i te Faufaa Apî reo Heleni no te huri i te reira na roto i te reo Hebera. Ua vaiiho oia i ta ’na mau ohipa atoa no tera opuaraa e ua oti ia Hutter i te huri i te taatoaraa o te reira i roto noa hoê matahiti!

E ere anei ta Hutter huriraa Bibilia Hebera o te mau Papai Heleni Kerisetiano i te mea faahiahia? I 1891, ua papai te tahi aivanaa no te reo Hebera o Franz Delitzsch: “Te faaite ra ta ’na huriraa Hebera i te hoê ite papu no nia i te reo e mea varavara i te itehia i rotopu i te mau Kerisetiano. Mea faufaa noa â ia hi‘o i tera huriraa. Ia faaauhia te reira i te tahi atu mau huriraa, i roto e itehia ’i te mau parau tano maitai.”

UA HAAPAO E RAVE RAHI I TA ’NA MAU HURIRAA BIBILIA

Aita Hutter i riro ei taata tao‘a no te ohipa huriraa, aita hoi te mau Bibilia ta ’na i pia i hoo-rahi-hia e te taata. Noa ’tu râ, e ohipa faufaa ta ’na i rave e ua haapao e rave rahi i te reira. A hi‘o na, ua hi‘opoa William Robertson i ta ’na huriraa Hebera o te Faufaa Apî e ua pia faahou i te reira i 1661. I muri mai, ua na reira atoa Richard Caddick i 1798. Ma te faaohipa i te reo tumu Heleni, ua huri maitai Hutter i te tiaraa Kurioso (Fatu) e te tiaraa Teoso (Atua) i te i‘oa Iehova (יהוה, JHVH) no roto mai ana‘e te faahitiraa i te mau Papai Hebera. Ua na reira atoa oia i te mau vahi ua taa ia ’na no Iehova te parau. Mea faufaa roa no te mea aita te rahiraa huriraa o te Faufaa Apî i faaohipa i te i‘oa o te Atua. Area te huriraa a Hutter, ua haapapu faahou ïa i te faufaaraa ia faaho‘i i te i‘oa o te Atua i to ’na vairaa mau i roto i te mau Papai Heleni Kerisetiano.

I teie nei, ia ite oe i te i‘oa o te Atua ra o Iehova i roto i te mau Papai Heleni Kerisetiano, a haamana‘o i te ohipa ta Elias Hutter i rave e ta ’na mau huriraa Bibilia Hebera.

^ par. 7 A hi‘o i te piti o te nota o te Ezekiela 18:4, oia atoa i te Faataaraa hau 3B i roto i te Bibilia ma te faahororaa (Farani).

^ par. 9 Te vai ra te tahi mau aivanaa o tei huri ê na i te Faufaa Apî na roto i te reo Hebera. O Simon Atoumanos hoê, e monahi oia i te mau matahiti 1360. Te tahi atu, o Oswald Schreckenfuchs, e aivanaa Heremani i te mau matahiti 1565. Aita ta raua huriraa i pia-noa ’‘e-hia e ua mo‘e te reira i teie nei.

No te ite atu â

EAHA TA TE BIBILIA E HAAPII MAU RA?

Te i‘oa o te Atua—Faaohiparaa e auraa

Ua faaorehia te i‘oa o te Atua i roto e rave rahi huriraa Bibilia. No te aha? Mea faufaa anei ia faaohipa i te i‘oa o te Atua?

ORARAA I TE BETELA

Hoê faaiteraa no nia i te Bibilia o te faahanahana ra i te i‘oa o Iehova

Ua matara mai teie faaiteraa Bibilia faahiahia mau i ta matou pu rahi i 2013. Ua horoahia e rave rahi huriraa Bibilia faufaa roa e te varavara.