Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 4 2016

Ua papai maite te mau Massorètes i te mau buka Bibilia Hebera

 TUMU PARAU MATAMUA | TE BIBILIA: UA TAE ROA MAI IA TATOU

Noa ’tu ua tamatahia i te taui ta ’na poroi

Noa ’tu ua tamatahia i te taui ta ’na poroi

TE FIFI: Noa ’tu ua pê te mau otaro matamua e noa ’tu te patoiraa, ua vai noa te Bibilia. Ua hinaaro râ vetahi feia papai e taata huri e taui i te poroi o te Bibilia. I te tahi taime, ua tamata ratou i te faatano i te mau irava Bibilia i ta ratou mau haapiiraa. A hi‘o na te tahi mau hi‘oraa:

  • Te vahi haamoriraa: Mai 301 e tae atu 101 hou te Mesia, ua taui te feia papai o na buka Bibilia matamua e pae, faaohipahia e te haapaoraa a te mau Samaritains, i te Exodo 20:17. Ua tuu atu ratou i te mau parau, “i te mou‘a Gerezima. E i reira, e hamani oe i te hoê fata.” Ua hinaaro ratou e faatano i tera irava no te turu i te paturaa o te tahi hiero i te mou‘a Gerezima.

  • Te haapiiraa o te Toru tahi: Fatata 300 matahiti i muri a‘e i te otiraa te papairaa o te Bibilia, ua tuu te tahi taata papai o tei tiaturi na i te Toru tahi i to ’na mana‘o i roto i te Ioane 1, 5:7. Teie ta ’na i papai: “Tootoru hoi e faaite i nia i te ra‘i, o te Metua, o te Logo, e o te Varua Maitai; e o taua tootoru ra hoi hoê â ïa.” Aita râ te reira e itehia ra i roto i te mau otaro Bibilia tahito. Te na ô ra te aivanaa hi‘opoa Bibilia o Bruce Metzger: “Mai 600, ua ite-pinepine-hia te reira i roto i te mau papai reo Latino tahito e te [huriraa Bibilia Latino] Vulgate.”

  • Te i‘oa o te Atua: Ma te faahiti i te tahi tiaturiraa ati Iuda, e rave rahi feia huri Bibilia tei tatara i te i‘oa o te Atua i roto i te mau Papai. Ua mono atu i te tiaraa “Atua” aore ra “Fatu.” Tera râ i roto i te Bibilia, e ere noa no te Atua poiete tera tiaraa! E faaohipa-atoa-hia no te taata, no te mau tao‘a a te haapaoraa hape e no te Diabolo atoa.—Ioane 10:34, 35; Korinetia 1, 8:5, 6; Korinetia 2, 4:4. *

UA TAE ROA MAI IA TATOU: Noa ’tu mea haapao ore e ua hape vetahi, e rave rahi taata papai o tei faaite i te aravihi rahi e te haapao maitai. Na te mau Massorètes i papai i te mau buka Bibilia Hebera i te matahiti  600 e tae atu 1000. Ua piihia ta ratou ohipa i muri a‘e, te mau papai a te mau Massorètes. Ua taio roa ratou i te mau parau e leta no te ite aita anei te tahi hape i ravehia. I te mau vahi te mana‘o ra ratou ua tauihia te parau, e tapao ratou i te reira i te hiti o te api. Aita te mau Massorètes i hinaaro ia tauihia te mau parau i roto i te Bibilia. Ua papai te aivanaa Moshe Goshen-Gottstein, “e hara ino roa no ratou ia rave i te tahi noa ’‘e tauiraa i roto.”

Maoti te rahiraa o te mau papai tahito o tei itehia mai, e nehenehe te mau aivanaa hi‘opoa Bibilia e ite i te mau hape aore ra tauiraa i ravehia. E rave rahi senekele, i haapii na te mau aratai haapaoraa o ta ratou ana‘e mau huriraa Bibilia Latino tei faaite ma te papu i te itehia i roto i te mau otaro Bibilia. Tera râ i roto i te Ioane 1, 5:7, ua tuu ratou i te mau parau hape faahitihia na mua ’tu. Te vai atoa ra tera hape i roto i te huriraa Bibilia tuiroo Beretane, te King James Version!  * Eaha râ tei tupu i te iteraahia mai te tahi atu mau papai tahito? Ua na ô Bruce Metzger: “Aita te irava [Ioane 1, 5:7] i roto i te mau papai tahito atoa (o te mau reo tahito Aramea, to Aiphiti, Etiopia, Arabia e te reo Slave), i roto ana‘e râ i te reo Latino.” Ua tatarahia tera hape i roto i te huriraa apî o te King James Version e te tahi atu mau huriraa Bibilia.

Chester Beatty P46, otaro Bibilia hamanihia e te gima no te matahiti 200

Ua haapapu anei te mau papai tahito, aita te poroi Bibilia i tauihia? I te iteraahia mai te mau otaro o te miti Pohe i 1947, ua tia i te mau aivanaa ia faaau i te mau papai Massorètes o te mau buka Bibilia Hebera e te mau otaro Bibilia tei papaihia a hau atu tausani matahiti na mua ’tu. Ua faaite te tahi mero o te pǔpǔ o tei papai i te tahi tumu parau no nia i te mau otaro o te miti Pohe i to ’na mana‘o. Ua faataa oia, e haapapuraa tera, ua rave maite te feia papai ati Iuda i ta ratou ohipa i faaitehia mai ai te mau parau atoa o te Bibilia noa ’tu ua mairi hau atu tausani matahiti.

I te vairaa buka Chester Beatty i Irelane, e nehenehe e itehia te mau otaro hamanihia e te gima, fatata te taatoaraa o te mau Papai Heleni Kerisetiano, oia atoa te mau papai no te matahiti 200. Hanere noa ïa matahiti i muri a‘e te otiraa te Bibilia i te papaihia! Te faaite ra te tahi buka, “aita noa te mau otaro hamanihia e te gima i riro ei ravea maitai no te faaite i te huru papairaa [o tera tau], ua haapapu atoa râ i te mau faatiaraa a te Bibilia.”—The Anchor Bible Dictionary.

“Mea tano ia parau aita e buka tahito ê atu o tei horoa mai i te faatiaraa tano roa”

I TEIE MAHANA: Noa ’tu te mau hape i ravehia, ua haapapu te mau papai tahito e rave rahi, aita te poroi Bibilia i tauihia. Ua papai Frederic Kenyon, taata hi‘opoa i te mau Papai Heleni Kerisetiano, “aita ’tu â buka o tei fana‘o e rave rahi haapapuraa tahito roa. Aita hoê a‘e aivanaa o te nehenehe e parau aita te mau papai i faataehia mai ma te tia.” No te mau Papai Hebera, ua na ô te aivanaa William Henry: “Mea tano ia parau aita e buka tahito ê atu o tei horoa mai i te faatiaraa tano roa.”

^ par. 6 No te ite atu â, a hi‘o i te tuhaa hau i te api 195-197 o te buka Eaha ta te Bibilia e haapii mau ra? Te vai atoa ra i nia i ta matou reni www.jw.org/ty.

^ par. 8 O te King James Version te tahi papai o tei faaohipahia no te huri i te Bibilia reo Tahiti, Te Bibilia Mo‘a ra.

No te ite atu â

Huriraa i ‘te parau a te Atua i tuuhia mai ia ratou ra’—Roma 3:2

Ua faaohipa te mau Ite no Iehova i e rave rahi huriraa Bibilia i te roaraa o te senekele i mairi a‘enei. No te aha ratou i huri atoa ’i i te Bibilia na roto i te reo Beretane no teie nei tau?

No te aha te mau Ite no Iehova i nenei ai te Huriraa o te ao api?

No te aha e mea taa ê ai te huriraa o te Huriraa o te ao api?