Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 4 2016

E ore anei te mau ohipa iino i te hoê mahana?

E ore anei te mau ohipa iino i te hoê mahana?

Ua hamani-ino-hia anei oe aore ra te tahi mero o to utuafare? Ua tano anei oe i te mǎta‘u ia hamani-ino-hia oe? Ua parauhia o te mau ohipa hamani-ino-raa taata “te fifi o te rahi noa ’tura na te ao nei.” A hi‘o na te tahi mau hi‘oraa.

HAMANI-INO-HIA E TE APITI: Ia au i te Nunaa Amui, “i te tahi taime o to ratou oraraa, hoê vahine i nia e toru o tei taparahihia aore ra tei haavîhia e to ratou apiti ia taoto. E au ra na te ao nei, hoê vahine i nia e pae o te maferahia aore ra o te tamatahia i te mafera.”

HAMANI-INO-RAA I ROTO I TE MAU AROÂ: Ua faaitehia, hau atu 30 000 pǔpǔ taata o te faatupu ra i te mau ohipa iino i te Hau Amui no Marite. Hoê taata i nia e toru o tei faaite ua hamani-ino-hia ratou i Marite Latino.

TAPARAHIRAA TAATA: I 2012, fatata 500 000 taata o tei taparahi-pohe-hia i tera noa matahiti. Ua rahi a‘e ïa i te feia o tei pohe i te tama‘i. Tei Afirika apatoa e Marite no ropu te numera rahi roa ’‘e o te taparahiraa taata. I ǒ noa, ua tataimaha te numera o te ao nei. I te matahiti hoê, hau atu 100 000 taata tei haapohehia i Marite Latino e i Beresilia noa, 50 000 ïa. Te vai ra anei te tahi ravea no te faaore roa i te mau ohipa iino?

E ORE ANEI TE MAU OHIPA IINO I TE HOÊ MAHANA?

No te aha te mau ohipa iino i rahi roa ’i? E rave rahi tumu, teie râ te tahi: Te mau peapea i rotopu i tera e tera nunaa taata e te taa-ê-raa rahi e vai ra i roto i te feia veve e te mea tao‘a, te haafaufaa-ore-raa i te ora o vetahi ê, te inu-hua-raa i te ava e te raau taero, te haerea ino o te feia paari o tei riro ei hi‘oraa no te tamarii e te rahi o te feia iino o tei ore i faautuahia e te ture.

Parau mau, ua topa rii mai te rahiraa o te mau ohipa iino i te tahi mau fenua. I te oire taata roa o São Paulo i Beresilia, ua topa te numera o te taparahiraa taata, fatata 80 i nia i te hanere ia faaauhia i na ahuru matahiti i mairi. Te maraa noa ra râ te mau ohipa iino huru rau i tera oire. No te taparahiraa taata, i nia 100 000 taata, 10 tei taparahi-pohe-hia. Eaha te titauhia ia ore te mau ohipa iino i te hoê mahana?

Ia ore te mau ohipa iino, e titauhia ia taui i te huru o te taata. Ia monohia ïa te teoteo, te nounou e te miimii i te here, te faatura e te tâu‘a ia vetahi ê.

Eaha te turai i te taata ia rave i tera mau tauiraa rahi? A hi‘o na i ta te Bibilia e haapii ra:

  • “Teie hoi te hinaaro [aore ra here] i te Atua, o te haapao i ta ’na ra parau.”—Ioane 1, 5:3.

  • “Mǎta‘u to ’u ia Iehova, e te riaria nei au i te ino.” *Maseli 8:13.

O te here i te Atua e te mǎta‘u i te faaoto ia ’na  te tahi tumu rahi o te nehenehe e tauturu i te taata, oia atoa te feia iino, ia taui. E ere o rapae noa te taui, te huru o roto atoa râ. E nehenehe mau anei râ?

A hi‘o na ia Alex * o tei tapeahia 19 matahiti i te fare tapearaa no Beresilia no te mau ohipa iino e rave rau ta ’na i rave. Ua riro mai oia ei Ite no Iehova i 2000 i muri a‘e i to ’na haapiiraa i te Bibilia e o ratou. Ua taui mau anei o ’na? E, e te tatarahapa mau ra Alex i te mau ohipa iino atoa ta ’na i rave. Te na ô ra o ’na: “Na to ’u here i te Atua i turai ia ’u ia imi i te ravea ia faaore o ’Na i ta ’u mau hara. Ua tauturu mai te mauruuru e te here ia Iehova ia taui.”

Ahuru ma pae matahiti te maoro to César no Beresilia riroraa ei taata eiâ. I te tahi taime, ua faaohipa atoa o ’na i te pupuhi. Na te aha i turai ia ’na ia taui? I roto i te fare tapearaa, ua farerei oia i te mau Ite no Iehova e ua haapii atoa i te Bibilia. Te faataa ra César: “Tera te taime matamua i ite ai au i te oaoa mau. Ua haapii au i te here i te Atua e te mǎta‘u ia ’na, te auraa, eiaha e rave faahou i te ino ia ore o Iehova ia oto. Ua hinaaro vau e faaite i to ’u mauruuru no to ’na maitai rahi. Na tera here e mǎta‘u i turai ia ’u ia taui.”

A hi‘o eaha te rave no te ora i roto i te hoê ao aore e ohipa ino faahou

Eaha ta teie mau hi‘oraa e faaite ra? E mana to te Bibilia no te taui roa i te taata, na reira atoa to ratou feruriraa. (Ephesia 4:23) Te na ô faahou ra Alex tei faahitihia i nia: “E au te mau mea ta ’u i haapii i roto i te Bibilia i te pape o tei tamâ ia ’u, ua matara mǎrû noa te viivii a tamâhia ’i to ’u feruriraa. Aita vau i mana‘o noa ’‘e e tia ia ’u ia faarue i tera mau mea i te hoê mahana.” Oia mau, ia faaî tatou i to tatou feruriraa i te poroi viivii ore o te Bibilia, e mâ aore ra e ore roa te ino. E mana to te Parau a te Atua no te tamâ. (Ephesia 5:26) I reira te feia ino roa e miimii e taui ai, e riro ai ei taata maitai e te hau maoti te haapaoraa i te mau faaueraa Bibilia.—Roma 12:18; Isaia 48:18.

Hau atu vau mirioni Ite no Iehova i 240 fenua o tei ite i te ravea no te faaore i te mau ohipa iino. E taata ratou no te mau nunaa atoa, e feia veve e tao‘a. Noa ’tu to ratou oraraa na mua ’‘e, ua haapii ratou i te here e te mǎta‘u i te Atua. I te here atoa i te tahi e te tahi e te ora ma te hau ei utuafare hoê na te ao. (Petero 1, 4:8) Te haapapu ra to ratou oraraa e nehenehe te mau ohipa iino e ore i te hoê mahana.

FATATA TE HOÊ AO AORE FAAHOU E OHIPA INO!

Te fafau ra te Bibilia fatata te Atua i te faaore i te mau ohipa iino i nia i te fenua nei. Eaha te tiai mai ra i teie nei ao ino? “Te mahana haavaraa [a te Atua,] i te poheraa o te feia paieti ore ra.” (Petero 2, 3:5-7) Aore faahou e taata ino no te haamauiui ia vetahi ê. E nafea ia papu tera ta te Atua e hinaaro ra e rave?

Te na ô ra te Bibilia: “Te rave parau ino ra, ua riri roa [to te Atua] aau ia ’na.” (Salamo 11:5) Mea au roa na te Atua poiete i te hau e te parau-tia. (Salamo 33:5; 37:28) No reira oia e haamou roa ’i i te feia iino.

E itehia ïa te hoê ao apî hau mau! (Salamo 37:11; 72:14) No te aha e ore ai e haapii atu â no te ite eaha te rave no te ora i roto i tera ao apî aore faahou e ohipa ino?

^ par. 14 Ua tauihia te mau i‘oa.

No te ite atu â

Ta te Bibilia e parau ra no nia i te haavîraa u‘ana

Eaha to te Atua mana‘o i te haavîraa u‘ana? E nehenehe anei te taata e au i te haavîraa u‘ana e taui?