Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 4 2016

 TUMU PARAU MATAMUA | TE BIBILIA: UA TAE ROA MAI IA TATOU

Te aamu faufaa mau o te Bibilia

Te aamu faufaa mau o te Bibilia

I roto i te mau buka atoa faaohipahia e te mau haapaoraa, mea taa ê roa te Bibilia. Aita ’tu â buka ta te mau taata i haafaufaa i roto i ta ratou mau tiaturiraa i te roaraa o te tau. I te hoê â râ taime, o te Bibilia te buka hi‘opoa-roa ’‘e-hia e faahapa-roa ’‘e-hia.

Te feaa nei vetahi aivanaa, ua tuu-mau-hia anei te mau papai tumu i roto i te mau Bibilia o teie tau. Te na ô ra te tahi taata haapii o te hi‘opoa i te mau haapaoraa: “E ere te mea papu ua tano te papairaa o te mau parau mai tei itehia i roto i te mau papai tumu. Mea rahi te mau hape e ehia senekele te maoro te papairaahia te reira. Mea rahi atoa te mau vahi mea taa ê roa te tahi papai tahito i te tahi atu.”

Te faahapa atoa ra vetahi i te Bibilia no tei haapiihia ia ratou. No roto mai Faizal i te tahi utuafare o tei ore i tiaturi ia Iesu. Ua haapiihia ia ’na e buka mo‘a te Bibilia, ua tauihia râ te tahi mau vahi i roto. Te na ô ra oia: “Mea patoi roa vau ia hinaaro te taata e tauaparau no nia i te Bibilia. No ’u, ua tauihia te Bibilia e te taata! Aita ïa ia ratou te mau papai tumu, aore ra tahito, o te Bibilia.”

Mea faufaa anei ia ite ua tauihia te tahi mau vahi o te Bibilia? A feruri na i teie na uiraa: E tiaturi anei oe i te mau parau fafau tamahanahana a te Bibilia mai te peu eita te reira e itehia i roto i te mau papai tumu? (Roma 15:4) E haapao anei oe i te mau aratairaa Bibilia no to oe utuafare, ta oe ohipa e haamoriraa mai te peu ua hape te papairaa i roto i ta oe Bibilia?

Aita faahou te mau otaro a te feia papai Bibilia mai ia Mose ma. E nehenehe râ tatou e ite i teie mahana i te tahi mau papai Bibilia tahito roa, oia atoa e rave rahi tei papai-rima-hia. Mea nafea te reira i te vai-noa-raa noa ’tu ua pê te mau otaro matamua roa, noa ’tu te patoiraa e noa ’tu ua tamatahia i te taui i te mau parau? E nafea te reira e tauturu mai ai ia tiaturi mea papu te Bibilia o teie tau? A hi‘o na i te pahonoraa i tera na uiraa i roto i te tuhaa i muri nei.