Eaha to roto?

Tapura tumu parau

E nafea ia maitai atu â to tatou oraraa?

E nafea ia maitai atu â to tatou oraraa?

MEA ê roa te huru oraraa ta te taata e ora i teie mahana i ta te Atua i hinaaro no ratou. E titauhia ia î te fenua nei i te taata o te hinaaro e na te Atua poiete e faatere ia ratou, o te faufaahia i ta ’na aratairaa e o te pee i to ’na here e te tahi atu mau huru maitatai. E titauhia ia ratou ia ohipa amui ma te oaoa a aupuru ai i to ratou utuafare, a ite ai i te mau ohipa apî e a faariro ai i te fenua taatoa ei paradaiso.

UA FAFAU TE ATUA E TAUI O ’NA I TE ORARAA I NIA I TE FENUA MAI TA ’NA I OPUA NA

  • “Ua faaore oia i te tama‘i e tae roa a‘enei i te hopea fenua!”Salamo 46:9.

  • “Ua tae mai te tau faataahia . . . no te haamou i te feia e tuino ra i te fenua.”Apokalupo 11:18.

  • “E ore hoi to reira e parau e, Ua paruparu vau i te ma‘i.”Isaia 33:24.

  • “E vai taiata te aho o to ’u ra feia i maitihia i to te mau mea ta ratou i hamani.”Isaia 65:22.

E nafea taua mau parau tohu ra e tupu ai? Ua faatoroa te Atua i ta ’na Tamaiti o Iesu ei Arii i roto i te hoê faatereraa arii tia roa o te faatere mai te ra‘i mai, i nia i te fenua. Ia au i te Bibilia, o te Faatereraa arii a te Atua ïa tei haamauhia. (Daniela 2:44) Te parau ra te Bibilia no Iesu: “E horoa te Atua ra o Iehova i te terono . . . e faatere oia ei Arii.”—Luka 1:32, 33.

I nia i te fenua, ua faatupu Iesu i e rave rahi semeio no te faaite e maitai mai te oraraa o te taata i raro a‘e i ta ’na faatereraa.

UA FAAITE IESU EAHA TE OHIPA MAITAI TA ’NA E RAVE NO TE HUITAATA

  • Ua faaora oia i te mau taata tei roohia i te mau ma‘i e rave rau, no te faaite e nafea oia e faaore roa ’i i te mau ma‘i o te huitaata.Mataio 9:35.

  • Ua tamǎrû oia i te miti no te faaite e paruru oia i te taata i te ati natura.Mareko 4:36-39.

  • Ua faatamaa oia e tausani taata no te faaite e horoa oia i te taata i te hinaaro-mau-hia no te ora.Mareko 6:41-44.

  • Ua taui oia i te pape ei uaina i te hoê mahana faaipoiporaa no te haapapu e tauturu oia i te taata ia oaoa i roto i te oraraa.Ioane 2:7-11.

E nafea oe e nehenehe ai e fana‘o i te oraraa ta te Atua e hinaaro no te taata e here ra ia ’na? Te vai ra te hoê ohipa te titauhia i te rave. Te faataa ra te Bibilia e mea tia ia oe ia imi i “te e‘a e tae atu ai i te ora, e aita i rahi te taata o te ite atu i taua e‘a ra.”—Mataio 7:14.

TE ITERAA I TE E‘A E TAE ATU AI I TE ORARAA MAITAI A‘E

Eaha te e‘a e tae atu ai i te ora? Te parau ra te Atua: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te e‘atia maitai ia haere oe ra.” (Isaia 48:17) A pee i teie faaueraa, e maitai mai ïa to oe oraraa.

 Ua parau o Iesu: “O vau te e‘a e te parau mau e te ora.” (Ioane 14:6) A rave i ta Iesu i faaue e a pee i to ’na hi‘oraa, e faafatata ’tu â tatou i te Atua e e maitai mai to tatou oraraa.

E nafea ia ite i te e‘a e tae atu ai i te ora? E rave rahi haapaoraa, ua faaara râ o Iesu: “E ere o te feia atoa e parau mai: ‘E te Fatu, e te Fatu,’ te ô i roto i te Faatereraa arii o te ra‘i, o te taata ana‘e râ o te rave i te hinaaro o to ’u Metua i te ra‘i.” (Mataio 7:21) Ua parau atoa oia: “I ta ratou mau hotu e ite maitai ai outou ia ratou.” (Mataio 7:16) E nehenehe te Bibilia e tauturu ia oe ia ite eaha te haapaoraa mau.—Ioane 17:17.

E nafea ia haere i nia i te e‘a e tae atu ai i te ora? E titauhia ia haapii mai no nia i Tei horoa i te ora i te taata atoa: O vai o ’na? O vai to ’na i‘oa? Eaha to ’na huru? Eaha ta ’na e rave ra? Eaha ta ’na e titau ra ia tatou i te rave? *

Aita Iehova e hinaaro ia rave noa tatou i te ohipa, ia tamaa, ia arearea e ia aupuru i te hoê utuafare. E nehenehe atoa tatou e haapii mai no nia i to tatou Atua poiete e ia riro ei hoa no ’na. E nehenehe tatou e faaite i to tatou here ia ’na ma te rave i to ’na hinaaro. Ua parau Iesu: “No te fana‘o i te ora mure ore, ia ite ïa ratou ia oe te Atua mau hoê roa.”—Ioane 17:3.

MAOTI TE BIBILIA, TE FAAITE RA TE ATUA IA OE “I TE MEA E MAITAI AI OE.”—ISAIA 48:17

TE TAAHIRAA MATAMUA I NIA I TERA E‘A

No te rave i te hinaaro o te Atua mau hoê roa, e titauhia ia rave i te tahi mau tauiraa. E ere paha i te mea ohie. Tera râ, e maitai a‘e mai to tatou oraraa a haamata ’i tatou i te taahi i nia i te e‘a e tae atu ai i te ora. No te tauturu ia oe ia ite i te pahonoraa o te mau uiraa no nia i te Atua, te pûpû nei te mau Ite no Iehova i te hoê haapiiraa Bibilia tamoni ore i te taime e te vahi ta oe e hinaaro. E nehenehe oe e ani atu i te reira ma te faaohipa i ta matou reni natirara www.jw.org/ty.