Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 2 2017

 TUMU PARAU MATAMUA | UA MAURURU ANEI OE I TE Ô RAHI ROA ’‘E A TE ATUA?

Eaha ïa ta oe e rave?

Eaha ïa ta oe e rave?

Eaha ïa ta oe e rave? “Te riro nei hoi matou i te aroha o te Mesia ra, . . . i pohe hoi oia no te taata atoa, ia ore te feia e ora ra ia haapao faahou ia ratou iho i te oraraa nei, ia haapao râ ia ’na, tei pohe . . . no ratou.”—Korinetia 2, 5:14, 15.

E TIA ia faaite i te mauruuru ia horoahia mai te tahi ô faahiahia mau. Ta Iesu ïa i hinaaro e haapii i muri a‘e oia a faaora ’i ahuru taata o tei roohia i te hoê ma‘i haaparuparu, aore e ravea rapaauraa. I rotopu ia ratou, hoê ana‘e tei “ho‘i maira ma te pii hua i te haamaitairaa i te Atua.” Ua ani atura Iesu: “E ere anei tino ahuru atoa i tamâhia nei? teihea iho nei râ e tooiva?” (Luka 17:12-17) Eaha te haapiiraa e huti mai? E mo‘e oioi ia tatou ta vetahi ê i rave no tatou!

E ere te hoo mai te tahi atu mau ô. Tera hoi te ô rahi roa ’‘e o tei horoahia. Eaha ïa te tia ia rave no ta te Atua i horoa no tatou?

  • A haapii no nia i tei horoa i te ô. Eita e navai ia horoa i te hoo ia fana‘o te taata atoa i te ora mure ore. Ua faaite Iesu i roto i ta ’na pure i te Atua eaha te tia ia rave: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Ia parauhia ’tu ua faaora te tahi taata ia oe i te tamariiraa, eita anei oe e hinaaro e ite atu â no nia ia ’na e te tumu o ’na i faaora ’i ia oe? O te Atua ra o Iehova tei horoa i te ô o te faaora i te taata. Te hinaaro ra oia ia haapii oe o vai o ’na e ia riro oe ei hoa no ’na. No reira te Bibilia e faaitoito ai ia “haafatata ’tu i te Atua, e na ’na e haafatata mai.”—Iakobo 4:8.

  •  A faatupu i te faaroo i te hoo. Te na ô ra te Bibilia i roto i te Ioane 3:36: “O tei faaroo i te Tamaiti ra e ora mure ore to ’na.” Na te aha e faaite e faaroo to te tahi taata i te hoo? Na ta ’na mau ohipa. (Iakobo 2:17) No te fana‘o i te ô i faaineinehia na oe, e navai anei ia hi‘o aore ra ia ite noa oe i te reira? Eita, e titauhia ia rave mai aore ra ia farii i te reira. Eita atoa e navai ia ite ua pohe Iesu no te hoo mai ia tatou, e titau-atoa-hia râ ia mauruuru i te reira. Eaha ïa te tia ia oe ia rave? A haapii eaha ta te Atua e titau ra e i muri iho, a haa ia au i te reira. * A pure i te Atua ia faaore i ta oe mau hara ia faaea oe i te faahapa ia oe. A haafatata i te Atua ma te tiaturi papu e fana‘o te feia atoa o te faatupu i te faaroo i te hoo i te mau haamaitairaa mure ore: Te hoê oraraa hau, peapea ore e te oaoa a muri a‘e!—Hebera 11:1.

  • A haere i te Oroa haamana‘oraa i te pohe o Iesu. Tera te oroa tamatahiti ta Iesu i haamau ia haamana‘o tatou i te hoo i horoahia. Ua na ô oia: “E na reira outou ei mana‘oraa ia ’u.” (Luka 22:19) E faatupu te mau Ite no Iehova i tera haamana‘oraa i te pohe o Iesu i te Mahana piti 11 no Eperera 2017 i muri a‘e i te toparaa mahana. E faataa te oreroraa parau eaha te faufaaraa o te pohe o Iesu e eaha te mau maitai ta tatou e fana‘o i teie nei e a muri a‘e. I te matahiti i mairi, fatata 20 mirioni taata na te ao tei tae i tera Oroa haamana‘oraa. Te titau manihini atu nei matou ia oe ia amui mai e o matou no te faaite i te mauruuru i te ô rahi roa ’‘e no ǒ mai i te Atua.

^ par. 7 Aita ’tu ravea maitai roa ’‘e no te ite o vai te Atua e no te riro ei hoa no ’na maori râ te haapiiraa i ta ’na Parau, te Bibilia. No te fana‘o i te reira, a ani i te tahi Ite no Iehova aore ra a haere i nia i ta matou reni Internet jw.org/ty.