Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 2 2017

 TUMU PARAU MATAMUA | UA MAURURU ANEI OE I TE Ô RAHI ROA ’‘E A TE ATUA?

O te ô rahi roa ’‘e a te Atua te mea faufaa mau

O te ô rahi roa ’‘e a te Atua te mea faufaa mau

O te ô rahi roa ’‘e a te Atua te mea faufaa mau Eaha te tumu e riro ai te hoê ô ei mea faufaa no oe? E feruri paha oe i na mana‘o e maha: Na vai i horoa ’tu i te ô, na te aha i turai ia ’na ia horoa, eaha tei titauhia ia ’na ia rave e e hinaaro mau anei oe i te reira. Mea maitai atoa ia feruri i te reira ia mauruuru mau tatou i te hoo, te ô rahi roa ’‘e no ǒ mai i te Atua.

NA VAI I HOROA ’TU I TE Ô?

Mea faufaa paha no tatou te ô a te tahi taata tiaraa teitei aore ra faaturahia e tatou. Hoê â huru mai te peu na te tahi mero utuafare here aore ra hoa piri i horoa mai, noa ’tu e ere te reira i te mea moni roa. Tera tei itehia no te ô ta Russell i horoa na Jordan, faahitihia i roto i te tuhaa na mua ’tu. E nafea te reira e tano atoa ’i no te hoo?

A tahi, te parau ra te Bibilia “o te Atua [te]i tono mai i ta ’na Tamaiti fanau tahi i te ao nei, ia ora tatou ia ’na.” (Ioane 1, 4:9) Te vai ra anei o tei teitei a‘e i te Atua? Teie ta te tahi papai Salamo i pahono: “Ia ite te taata atoa e, o Iehova to oe i‘oa, e o oe ana‘e tei Teitei i te fenua atoa nei.” (Salamo 83:18) E ô faufaa roa ïa tera, e ere anei?

Te piti, e “metua” te Atua no tatou. (Isaia 63:16) Eaha te tumu? No te mea na ’na i horoa mai i te ora. Mai te metua tane i nia i ta ’na tamarii, aita atoa te Atua i faaea i te aupuru ia tatou. Teie ta ’na i ani i te tahi mau taata o to ’na nunaa i tahito ra ta ’na i pii Epheraima: “O tau tamaiti here anei Epheraima? e tamaiti hinaaro-rahi-hia anei oia? . . . ua horuhoru tau aau ia ’na: e aroha ’tu â vau ia ’na.” (Ieremia 31:20) Mai tera atoa te huru o te Atua i nia i ta ’na mau tavini i teie mahana. E ere oia i te Atua poiete ana‘e, e Metua e e Hoa atoa râ no tatou. E ere anei te ô no ǒ mai ia ’na i te mea faufaa roa?

 NA TE AHA I TURAI IA HOROA I TE Ô?

Mea faufaa roa atoa te tahi ô no te mea e horoahia te reira ma te aau tae, e ere râ mea faahepohia. Na te here ana‘e i turai i te taata ia na reira, eita oia e titau ia faaho‘ihia aore ra ia horoa-atoa-hia te tahi ô na ’na.

No to ’na here i horoa ’i te Atua i ta ’na Tamaiti no tatou. Te na ô ra te Bibilia: “Ua itea to te Atua aroha [aore ra here] ia tatou nei, o te Atua i tono mai i ta ’na Tamaiti fanau tahi.” Eaha te tumu? “Ia ora tatou ia ’na.” (Ioane 1, 4:9) Mea faahepohia anei te Atua ia na reira? Aita roa ’tu! Ua riro te hoo o tei aufauhia na roto ia Iesu Mesia ei faaiteraa o te hamani maitai rahi o te Atua.Ephesia 1:7.

No te aha tatou e parau ai mai tera? Te faataa ra te Bibilia: “Ua faarahi râ te Atua i to ’na aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:8) Na te here i turai i te Atua ia tauturu i te taata hara, paruparu e te ravea ore. Eita e au ia tatou te here o te Atua e eita atoa hoi ta tatou e nehenehe e faaho‘i atu ia au i ta ’na i horoa mai. Ta ’na ïa ô te haapapuraa rahi roa ’‘e o te here.

EAHA TE HAAPAERAA O TEI RAVEHIA?

Mea faufaa roa atoa te ô a te taata o tei rave i te haapaeraa rahi. Ia farii te tahi i te vaiiho i te hoê faufaa rahi e te horoa mai i te reira na tatou, eita anei tera ô e riro ei mea faufaa roa no tatou?

Ua horoa te Atua i “ta ’na Tamaiti fanau tahi.” (Ioane 3:16) O ’na ta te Atua i here roa ’‘e! Ua poietehia o Iesu na mua ’‘e te mau mea atoa. I vai na oia e te Atua ehia miria matahiti te maoro, mea piri roa ïa raua i te tahi e te tahi. Te parau ra te Bibilia o Iesu “ta ’na Tamaiti here ra” e “o te huru [aore ra hoho‘a] mau oia o te Atua hi‘o-ore-hia.”—Kolosa 1:13-15.

Aita ïa te Atua i “faaherehere i ta ’na iho Tamaiti.” (Roma 8:32) Ua horoa mai o Iehova i tei riro ei mea faufaa roa ’‘e no ’na. Tera te haapaeraa rahi roa ’‘e o tei ravehia a‘enei!

AITA A TATOU E RAVEA!

Mea faufaa roa atoa te ô mai te peu ua hinaaro mau tatou i te reira e no te mea atoa tera ana‘e te ravea. A feruri na e ua ma‘ihia oe e e hinaaro oe i te tahi rapaauraa taa maitai o te ore e pee ia oe ia aufau. Eita ana‘e oe e fana‘o i te reira, e pohe oe. Eaha to oe huru ia haere mai te tahi taata e aufau i tera rapaauraa? Eaha râ paha oe i te mauruuru ia ’na, e riro ta ’na ô ei mea faufaa mau no oe!

“Mai te taata i hope i te pohe ia Adamu, e hope atoa [te taata atoa] i te faaorahia i te Mesia.” (Korinetia 1, 15:22) Ei huaai na Adamu, te “pohe” nei tatou paatoa. Aita a tatou hororaa i mua i te ma‘i e te pohe, eita atoa e tia ia tatou ia faahau e o te Atua e ia riro ei taata hapa ore i to ’na aro. Ei taata tia ore e te haihai, eita e tia ia tatou ia faaora ia tatou iho aore ra i te tahi atu taata. Te faaite maitai ra te Bibilia: “E ore roa e tia i te taata ia faaora i tana taeae, e aita a ’na hoo ia hopoi i te Atua e noaa mai ai oia ra . . . e ore roa ’tu ïa e taea.” (Salamo 49:7, 8) Aita a tatou e ravea! E hinaaro mau tatou i te tauturu, eita hoi e pee ia tatou ia aufau i te hoo no te faatiamâ ia tatou.

No to ’na here rahi, ua farii o Iehova i te aufau i te hoo ta te taata i hinaaro mau no te faatiamâ ia ratou. Mea na roto ia Iesu te taata atoa e faaorahia ’i. Eaha te mau maitai ta tatou e ite maoti te hoo? E “mâ . . . ta tatou mau hara atoa i te toto o ta ’na  Tamaiti, o Iesu.” Ma te faatupu i te faaroo i te tusia o Iesu, e nehenehe ta tatou mau hara e faaorehia e e fana‘o tatou i te ora mure ore. (Ioane 1, 1:7; 5:13) E faufaahia anei te feia pohe i te hoo? E, “mai te pohe hoi i noaa i te taata [hoê] ra, no te taata atoa [o Iesu] e noaa ’i te tia faahou i te feia i pohe.”—Korinetia 1, 15:21. *

No to ’na here rahi, o tei teitei roa ’‘e tei horoa mai i te ô, te ora o Iesu tei pûpûhia ei tusia. O te Atua ra o Iehova tei rave i te haapaeraa rahi roa ’‘e no te horoa i tera ô. Hau atu â, ua hinaaro-mau-hia tera tusia no te faatiamâ ia tatou i te hara e te pohe. Aita ’tu ô o tei faito i te hoo ta te Atua i horoa mai!

 

^ par. 19 No te ite atu â eaha ta te Atua e rave no te faatia mai i te feia pohe, a hi‘o i te pene 7 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.