Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 2 2017

Te mau maitai ia horoa noa

Te mau maitai ia horoa noa

Tei roto Alexandra i te tahi pereoo mataeinaa o tei tapeahia i te otia fenua e faataa ê ra i te Marite apatoerau e apatoa. Faaroo ihora o ’na i te tahi ia parau: “Nehenehe te pereoo mataeinaa e tere, tera râ taata Tinito, e faaea mai ïa!” Pou a‘era Alexandra no te ite eaha te tupu ra. Te tamata ra te tahi taata Tinito i te faataa i te mutoi otia fenua i te fifi ta ’na i farerei. Aita râ oia i ite maitai i te paraparau na roto i te reo Paniora. I te mea tei roto Alexandra i te tahi amuiraa reo Tinito a te mau Ite no Iehova, ua tia ’tu oia no te tauturu i tera taata.

Ua parau tera taata Tinito aita o ’na i ofati i te ture, tera râ ua eiâhia ta ’na parau mana e ta ’na moni. I te haamataraa, aita te mutoi i tiaturi. Ua mana‘o roa atoa tei roto Alexandra i te tahi ohipa o te imi i te moni i nia i te tua o te feia no te tahi atu mau nunaa. I muri a‘e râ, ua mǎrû mai oia e ua farii i te faataaraa a te taata Tinito. Ua faautuahia râ oia ia aufau i te tahi tino moni no te mea aita ta ’na parau mana i nia ia ’na. I te mea aita atoa ta ’na e moni, ua horoa Alexandra 20 tara Marite (2 000 tiahapa F CFP). No to ’na mauruuru rahi, ua parau oia ia Alexandra e faaho‘i atu o ’na hau atu i ta ’na i horoa. Ua faataa te vahine aita oia e titau ra i te moni hau, ua oaoa oia i te tauturu ia ’na no te mea no ’na, mea tia ia na reira. Ua horoa Alexandra i te tahi mau papai na tera taata e ua faaitoito ia ’na ia haapii i te Bibilia e te mau Ite no Iehova.

E ere anei i te mea putapû mau ia hamani maitai i te taata noa ’tu aita tatou i matau ia ratou? E ere te mau Ite no Iehova ana‘e te na reira. E hamani maitai atoa hoi vetahi e haapaoraa ta ratou aore ra aita. Ua tauturu a‘ena anei oe i te taata ma te aau tae? Mea faufaa ia feruri i tera uiraa, ua parau hoi Iesu: “E mea maitai i te horoa ’tu i te rave mai.” (Ohipa 20:35) Na roto i te tahi mau maimiraa, ua itehia atoa i te mau aivanaa e ea maitai to te taata horoa noa. E hi‘opoa ana‘e eaha te tumu.

“TE TAATA HOROA NOA”

Ua haapapuhia, e oaoa te taata ia horoa noa. Ua papai te aposetolo Paulo, “o te taata horoa noa hoi ta te Atua e hinaaro.” Te mana‘o ra oia i te mau Kerisetiano o tei horoa noa i te mau ô no te tauturu i tei roto i te ati. (Korinetia 2, 8:4; 9:7) Ua hinaaro anei Paulo e parau, na te oaoa i turai ia ratou ia horoa? Aita, ua oaoa râ teie mau Kerisetiano no te mea ua horoa ratou.

Ia au atoa i te tahi hi‘opoaraa, ia horoa te taata “e faaara te reira i te mau tuhaa o te roro o te faatupu i te oaoa, te huru maitai i nia i te taata e te tiaturi. No reira [te taata] e maitai ai i muri a‘e.” Ua faaite te tahi atu hi‘opoaraa, “mea oaoa a‘e te taata o tei horoa i te moni ia vetahi ê ia haamâu‘a oia i te reira no ’na iho.”

‘Eita ta ’u e nehenehe e horoa no to ’u tupuraa.’ Ua feruri ê na anei oe mai tera? Mea hape tera mana‘o, e nehenehe hoi tatou paatoa e riro ei “taata horoa noa” a oaoa ’tu ai. Noa ’tu e tino moni haihai, o te aau tae te mea  faufaa, na te reira i turai ia horoa. Ua hapono te tahi Ite no Iehova i te hoê ô i te feia pia o teie vea e teie poroi: “I matau na vau i te horoa i te ô i te Piha a te Basileia noa ’tu e tino moni haihai. Mea rahi a‘e râ ta Iehova i horoa mai i ta ’u i tuu atu. . . . Mauruuru i te vaiihoraa mai ia ’u ia horoa i ta ’u ô, oaoa roa to ’u aau.”

E ere te moni ana‘e ta tatou e nehenehe e horoa, te vai ra te tahi atu mau ravea.

E MAITAIHIA TO OE EA IA HOROA NOA

Ma te horoa noa, o oe e o vetahi ê atoa te oaoa

Te na ô ra te Bibilia: “O tei hamani maitai i to ’na varua [aore ra tino], e taata hamani maitai ïa; o tei rave ino ra i to ’na iho tino ua hamani ino oia.” (Maseli 11:17) Mea horoa noa te feia maitatai, ua ineine hoi i te horoa i to ratou taime, puai, here e te vai ra ’tu â. E rave rau maitai ta ratou e fana‘o ia faaite i te aau horoa noa mai tera. Te tahi hi‘oraa, e haamaitai te reira i to ratou ea.

Ua ravehia te tahi maimiraa i rotopu i te feia o te horoa noa ia ratou no te tauturu ia vetahi ê. Ua itehia mea varavara a‘e ratou i te ma‘ihia, i te mauiui i nia i te tino e te hepohepo. E ea maitai a‘e to ratou. E haamaitai atoa te hoê aau horoa noa i te ea o te feia e ma‘i tamau to ratou. Mai te ma‘i o te haafifi i te mau uaua uira e te mootuaio, oia atoa tei ma‘ihia no te tirotiro o te haaparuparu i te ravea parururaa o te tino o te taata. Ua ite-atoa-hia e iti mai te hepohepo o tei riro na ei feia inu ava na mua ’‘e ia hamani maitai ratou i te taata. E tauturu te reira ia ratou ia ore ia topa faahou i roto i te peu inu ava.

No te aha mai tera ’i? Te mana‘ohia ra “e iti mai te mau mana‘o iino ia aroha tatou i te taata, ia horoa i te rima tauturu e ia hamani maitai.” Ma te horoa noa, e iti atoa mai te ahoaho e e mǎrû mai te ne‘iraa toto. No te feia ua pohe te hoa faaipoipo, eita ratou e vai noa i roto i te hepohepo ia tauturu ratou ia vetahi ê.

Mea papu ïa teie parau, e maitaihia oe ia horoa noa.

IA HOROA OE, E NA REIRA ATOA VETAHI Ê

Teie ta Iesu i faaitoito i ta ’na mau pǐpǐ: “E horoa, e e noaa hoi ta outou; e î te faito, e neneihia, e ueuehia, e manii noa ’tu, na te taata e ninii i roto i to outou ahu. O taua faito hoi ta outou e faito ra, o te faito-faahou-hia mai ïa ta outou.” (Luka 6:38) Ia horoa oe, e mauruuru vetahi ê e e turai te reira ia ratou ia na reira atoa. E hinaaro atoa ratou ia ohipa e oe e e faahoa ’tu.

Ma te horoa noa, e hinaaro vetahi ê ia ohipa e oe e e faahoa ’tu

Ua hi‘opoa te mau aivanaa i te huru o te taata e ua tapao ratou “ia tamau te tahi i te hamani maitai, e turai te reira i te tahi atu ia na reira atoa. Ma te taio noa i te aamu o te faaite ra i tei ravehia ma te hamani maitai, e hinaaro vetahi ê e horoa noa.” Ia au i te tahi atu maimiraa, “i nia i te Internet, e nehenehe hoê e turai ahuru tiahapa aore ra hanere atu ia na reira atoa noa ’tu aita o ’na i matau aore ra i farerei a‘enei i tera mau taata.” Te auraa, e nehenehe hoê ohipa ta te taata  horoa noa i rave e haaputapû e rave rahi taata. Eita anei oe e hinaaro e ora i te vahi e na reira te tahi e te tahi? Oia ïa, e maitai rahi hoi te itehia ia tamau e rave rahi i te horoa noa.

A hi‘o na i tei tupu i Floride i Marite. Ua hopoi te tahi pǔpǔ Ite no Iehova i te rima tauturu i muri a‘e i te tahi mata‘i rorofai. A tiai ai ia horoahia ’tu te mau tauihaa e tia ia tataî, ua tapao ratou ua ino roa te aua o te tahi taata tapiri e ua parau atu e tataî ratou i te reira. Tau taime i muri a‘e, ua hapono te taata i tauturuhia i te tahi rata i te pu rahi a te mau Ite no Iehova. Ua papai oia: “Auê au i te mauruuru. No ’u, o tera mau taata te feia maitai roa ’‘e ta ’u i farerei a‘enei.” No to ’na mauruuru, ua hapono oia i te tahi ô horoa noa ia faaohipahia te reira no te ohipa ta ’na e pii, te ohipa faahiahia mau a te mau Ite no Iehova.

A PEE I TE HI‘ORAA MAITAI ROA ’‘E

E ohipa faahiahia ta te mau aivanaa i ite atoa. Ua parauhia i roto i ta ratou hi‘opoaraa, “e au ua hamanihia te taata e te hinaaro e tauturu ia vetahi ê. E haa hoi te tamarii no te tauturu ia vetahi ê hou o ’na a haapiihia ’i ia paraparau.” Eaha te tumu? Te horoa ra te Bibilia i te pahonoraa, ua hamanihia te taata e te mau huru maitatai o te Atua.—Genese 1:27.

E Atua horoa noa o Iehova. Na ’na i horoa mai i te ora e te mau mea atoa o te faaoaoa ra ia tatou. (Ohipa 14:17; 17:26-28) E ere râ tera ana‘e to ’na huru maitatai. E nehenehe oe e ite atu â no nia i to tatou Metua i te ra‘i e ta ’na mau opuaraa î i te here ma te haapii i te Bibilia. Te faaite atoa ra ta ’na Parau eaha ta te Atua i rave ia oaoa tatou e a muri noa ’tu. * (Ioane 1, 4:9, 10) O te Atua ra o Iehova te tumu o te mau ô horoa noa e ua hamanihia oe ia au i to ’na huru. Ia pee oe i to ’na hi‘oraa ma te horoa noa, e ere ïa i te mea maere ia oaoa e ia fana‘o oe i ta ’na farii maitai.—Hebera 13:16.

Te haamana‘o ra oe ia Alexandra tei faahitihia i te omuaraa? Ua parau te tahi i roto i te pereoo mataeinaa eita ta Alexandra moni e faaho‘ihia. Ua niuniu râ te taata ta ’na i tauturu i to ’na mau hoa o te faaea ra i te tahi oire e na reira ’tu ratou i te tere e ua faaho‘ihia tera moni. Hau atu â, mai ta Alexandra i faaitoito atu, ua haamata oia i te haapii i te Bibilia. E toru ava‘e i muri a‘e, ua oaoa roa oia i te farerei i tera taata i te tahi rururaa a te mau Ite no Iehova na roto i te reo Tinito i Peru. No te faaite i to ’na mauruuru, ua titau manihini oia ia Alexandra e tei haere na muri ia ’na i te rururaa ia tamaa i roto i ta ’na fare tamaaraa.

E oaoa te noaa mai ia horoa e ia tauturu tatou ia vetahi ê. Hau roa ’tu â ua tauturu ana‘e tatou i te taata ia haapii atu â no nia i te Tumu o te mau ô maitatai atoa, te Atua ra o Iehova! (Iakobo 1:17) Te ite ra anei oe i te mau maitai ia horoa noa?

^ par. 21 No te ite atu â, a hi‘o i te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty. A pata i nia PIAHIA > BUKA E BUKA RAIRAI.