E HAAMOU TE ATUA I TE MAU FAATERERAA ATOA

E haamou roa te Atua i te mau faatereraa taata i ta te Bibilia e pii ra te tamaˈi o Aramagedo. a (Apokalupo 16:16) I taua taime ra, e amui mai “te mau arii atoa o te fenua nei no te tamaˈi o te mahana rahi o te Atua Manahope.” (Apokalupo 16:14) I muri mai i Aramagedo, eita e ite-faahou-hia te tamaˈi i te fenua.

Na te Faatereraa arii a te Atua e mono i te mau faatereraa atoa. E faatere mai te reira mai te raˈi mai, e eita roa ta ˈna Faatereraa arii e haamouhia. (Daniela 2:44) Ua maiti te Atua i ta ˈna Tamaiti ra, o Iesu Mesia, ei Arii o ta ˈna Faatereraa arii. (Isaia 9:6, 7; Mataio 28:18) No nia i teie Faatereraa arii, b ua haapii Iesu i ta ˈna mau pǐpǐ ia faahiti i te reira i roto i ta ratou mau pure. (Mataio 6:9, 10) Oia mau, e tahoê te huitaata atoa i raro aˈe i te Faatereraa arii a te Atua ta Iesu e faatere ei Arii.

 Taa ê atu i te mau tia faatere i nia i te fenua, eita Iesu e faaohipa i to ˈna mana no to ˈna iho maitai. I te mea e haa o ˈna ma te parau-tia, eita atoa o ˈna e maitiiti i te taata, eita ïa te taata e haapeapea noa ˈˈe. Eita ratou e hiˈo-ino-hia no to ratou iri, taˈere aore ra te fenua i reira ratou i paari ai. (Isaia 11:3, 4) Eita faahou e titauhia i te taata ia paturu i to ratou mau tiaraa. No te aha hoi? No te mea e haapao maitai Iesu i te taata tataitahi. “E faaora hoi oia i te taata veve o te hinaaro ra i te tauturu. Oia atoa i te taata haihai e te taata aita e tauturu. . . . E faaora oia ia ratou i te haavîraa e te hamani-ino-raa.”—Salamo 72:12-14.

E faaore roa te Faatereraa arii a te Atua i te mau mauhaa tamaˈi. (Mika 4:3) E haamou atoa te reira i te feia ino o te ore e hinaaro e faaea i te aro e o te haamauiui ia vetahi ê. (Salamo 37:9, 10) E nehenehe te tane, te vahine e te tamarii e haere i te mau vahi atoa ta ratou e hinaaro, eita ratou e mǎtaˈu faahou.—Ezekiela 34:28.

E oraraa au mau e te oaoa to te taata i raro aˈe i te Faatereraa arii a te Atua. Ua  faaorehia te tumu e amahamaha ˈi ratou, mai te veve, te poia e te fifi o te nohoraa. E fanaˈo hoi te taata tataitahi i te maa au mau e te hoê nohoraa papu.—Salamo 72:​16; Isaia 65:21-23.

I raro aˈe i te Faatereraa arii a te Atua, e faaore-roa-hia te faahopearaa ino ta te tamaˈi i faatupu. Te parau anei o te mau pepe, te maˈi manava e te hepohepo rahi ta te taata tei faaruru no te tamaˈi. E faahoˈihia mai te feia pohe i te ora i te fenua. (Isaia 25:8; 26:​19; 35:5, 6) E farerei faahou te mau utuafare e e ore roa te mau ohipa ino atoa ta te tamaˈi i faatupu. Te fafau ra te Bibilia: “Ua mou hoi te mau mea tahito.”—Apokalupo 21:4.

E FAAORE TE ATUA I TE HARA

I raro aˈe i te Faatereraa arii a te Atua, e amui te mau taata atoa no te haamori ia Iehova c anaˈe, te Atua mau, “te Atua o te here e o te hau.” (Korinetia 2, 13:11) E haapii te taata e nafea ia parahi amui e ia faatupu i te hau. (Isaia 2:3, 4; 11:9) Te feia atoa o te auraro i te Atua, eita ratou e hara faahou e riro mai râ ei taata tia roa.—Roma 8:20, 21.

E HAAMOU TE ATUA IA SATANI E TE MAU DEMONI

E haamou te Faatereraa arii a te Atua ia Satani e te mau demoni. O ratou hoi te tumu e tupu ai te tamaˈi na te ao nei. (Apokalupo 20:1-3, 10) I reira ïa, “e rahi roa te hau” i te fenua nei.—Salamo 72:7.

Ia papu ia oe e tupu iho â ta te Atua parau fafau e faaore roa i te tamaˈi e te faahuehueraa. No te mea e mana to ˈna no te na reira, e tera iho â ta ˈna e hinaaro e rave.

• Tei te Atua ra te paari e te mana no te faaore roa i te tamaˈi e te ino. (Ioba 9:4) Aita hoê aˈe mea e tapea ia ˈna ia faatupu i ta ˈna i opua.—Ioba 42:2.

•   Mea au ore roa na ˈna ia ite i te taata ia mauiui. (Isaia 63:9) “Mea hae [atoa] na ˈna i tei au i te hamani-ino-raa.”​—Sala⁠mo 11:5.

• E tapea iho â te Atua i ta ˈna parau. Eita o ˈna e nehenehe e haavare.​—Isaia 55:10, 11; Tito 1:2.