“Ia pure oe, eiaha e tahana i te parau.”—Mataio 6:7.

Eita Iehova e hinaaro ia faahiti noa tatou i te mau pure tamau-aau-hia aore ra ia taio tatou i te reira ma te reo puai mai roto mai i te hoê buka pure. Te hinaaro ra Iehova ia pure tatou ma to aau atoa. Eaha to oe huru ia paraparau oe e to oe hoa, e mea tahana noa râ ta ˈna mau parau pauroa te mahana? E paraparau te mau hoa mau ma te aau tae. Ia pure tatou i to tatou Metua i te raˈi ma te faaohipa i ta tatou iho mau parau, te faaite ra ïa tatou i te hohonuraa o to tatou aau, e tapao faaite e auhoaraa piri roa to tatou e te Atua.

“Ia ani outou, eita ta outou e noaa mai no te mea te ani ra outou no te tahi opuaraa ino.”—Iakobo 4:3.

Te taa ra ia tatou e eita te Atua e pahono i ta tatou mau pure ia ani tatou i te mau mea ta ˈna e ore e au. Ei hiˈoraa, e farii anei Iehova i te aniraa a te hoê taata ia manuïa oia i te hauti pere inaha ua horoa o ˈNa i te mau aˈoraa papu no nia i te nounou e te tiaturiraa i te manuïa? (Isaia 65:11; Luka 12:15) Eiaha tatou e manaˈo e pahono mai Iehova i tera mau huru pure. Ia pahono mai te Atua i ta tatou mau pure, e titauhia ia tuea ta tatou mau aniraa i ta ˈna e parau ra i roto i te Bibilia.

 “O tei fariu ê i to ˈna tariˈa eiaha ia ite i te ture, e riro ta ˈna pure ei mea faufau.”—Maseli 28:9.

I tahito ra, aita te Atua i pahono i te mau pure a te feia o tei patoi i ta ˈna mau ture tia roa. (Isaia 1:15, 16) Aita to ˈna mau manaˈo i taui. (Malaki 3:6) Mai te peu e hinaaro tatou ia pahono mai te Atua i ta tatou mau pure, e tutava ïa tatou i te ora ia au i ta ˈna mau ture. E mai te peu ua rave tatou i te ohipa tano ore na mua aˈe? Te auraa anei eita roa ˈtu o Iehova e faaroo mai? E ere! Ma te here, e faaore te Atua i ta tatou mau hara mai te peu e te tatarahapa nei tatou e te rave ra i tei maraa ia tatou no te faaoaoa ia ˈna.—Ohipa 3:19.