Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 1 2018

3 Te tauturu no te faaoromai i te mau fifi

3 Te tauturu no te faaoromai i te mau fifi

Te vai ra te tahi mau fifi eita e nehenehe e ape e e faaafaro i teie nei. Ei hi‘oraa, mai te peu ua pohe tei herehia aore ra te faaruru ra outou i te hoê ma‘i tamau, aita ’tu â ravea maori râ te faaoromairaa i te mauiui. E nehenehe anei te Bibilia e tauturu mai i mua i tera mau fifi ino mau?

TE MA‘I TAMAU

Te parau ra o Rose: “Ua roohia vau i te hoê ma‘i fetii e mea mauiui mau te reira. Ua ino roa to ’u oraraa.” Hoê o te mau fifi rahi roa ’‘e ta ’na i faaruru, oia hoi i te tahi taime, aita oia i nehenehe e tiatonu i nia i ta ’na haapiiraa Bibilia e te mau ohipa haamoriraa. Ua tauturu mai râ te mau parau a Iesu i roto i te Mataio 19:26 o te na ô ra: “I te Atua râ, e tia ïa te mau mea atoa.” Ua taa ia Rose e e rave rau huru haapiiraa. No to ’na mauiui, aita o ’na e nehenehe e taio maoro. E haamata ïa oia i te faaroo i te taioraa Bibilia haruharuhia e te mau papai Bibilia. * Te na ô ra oia: “Aita ana‘e tera mau ravea, aita vau e ite e nafea ia vai puai to ’u faaroo.”

E oto mai o Rose no te mea aita o ’na e nehenehe faahou e rave i te tahi ohipa ta ’na i matau i te rave. E tamahanahanahia oia maoti te mau parau i roto i te Korinetia 2, 8:12: “Ia anaanatae hoi te tahi taata i te horoa, e fariihia ïa ia au i te mea e vai ra ia ’na, eiaha râ i te mea aita e vai ra ia ’na.” Maoti teie irava, e haamana‘o o Rose e mea oaoa na te Atua i ta ’na e rave ra no te mea te rave ra o Rose i ta ’na e nehenehe noa ’tu to ’na mau taotiaraa.

TE MAUIUI

Te haamana‘o ra o Delphine, tei faahitihia na mua ’tu: “Ua pohe ta ’u tamahine i te 18raa o to ’na matahiti. No to ’u mauiui rahi, ua oti roa vau. No ’u, eita to ’u  oraraa e maitai mai.” Ua tamahanahanahia râ oia maoti te Salamo 94:19. Te na ô ra te papai Salamo i te Atua: “I rotopu i to ’u nei mana‘o tapitapi i roto ia ’u nei, na to haamahanahana e faaoaoa mai.” Ua parau o Delphine: “Ua pure au ia Iehova ia tauturu mai ia rave au i te ohipa o te tamahanahana ia ’u.”

Ua haa oia ei rima tauturu. I te tahi taime, te faaau ra oia ia ’na mai te hoê penitara. Noa ’tu ua fati, e nehenehe e faaohipa i te reira no te peni i te tahi hoho‘a. Hoê â huru no ’na. Noa ’tu te mauiui ra oia, ua taa ia ’na e nehenehe â oia e tauturu ia vetahi ê. Te haamana‘o ra oia: “E faaohipa vau i te mau aratairaa e huru feruriraa o te Bibilia no te tamahanahana i te feia e haapii ra i te Bibilia e o vau. Vitiviti au i te taa e o Iehova te tamǎrû e tamahanahana mai ia ’u.” Ua papai oia i te i‘oa o te mau taata Bibilia tei faaruru i te hoê taime mauiui mau i roto i to ratou oraraa. Te parau ra oia: “Noa ’tu te tupuraa, ua pure tamau pauroa o ratou ia Iehova.” Ua haapii atoa oia e “eita e noaa mai te pahonoraa eita ana‘e tatou e taio i te Bibilia.”

Maoti te haapiiraa Bibilia, ua taa ia Delphine i te tahi atu mana‘o faufaa: ia haapao noa oia i te a muri a‘e, eiaha râ i tei tupu i na mua ’tu. Ua tamahanahanahia o Delphine maoti teie tiaturiraa i roto i te Ohipa 24:15: “E tia-faahou-raa to te feia parau-tia e to te feia parau-tia ore.” Ua papu anei ia Delphine e e faatia faahou iho â mai Iehova i ta ’na tamahine? A hi‘o na i ta Delphine i pahono: “Ia feruri au i to ’u a muri a‘e, te ite nei au i ta ’u tamahine. Tei roto maua i te aua. Mea papu ia ’u e e tupu iho â te reira i te taime faataahia e to ’u Metua o Iehova. Te ite nei au ia ’na mai i te taime i ite ai e i here ai au ia ’na i to ’na fanauraa.”

^ par. 4 Te vai ra tera mau pehe haruharuhia i nia i te jw.org.

Maoti te Bibilia, e noaa ia tatou te tamahanahanaraa noa ’tu te mau tupuraa fifi roa ’‘e