Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 1 2018

E tano anei te aratairaa Bibilia no teie tau?

E tano anei te aratairaa Bibilia no teie tau?

NO VETAHI, EITA. Ua faaau te hoê aivanaa i te Bibilia i te hoê buka o te mau matahiti 1920 faaohipahia no te haapii atu i te hoê piha haapiiraa ihitao‘a no teie tau. E ani paha te feia o te ore e farii ra i te Bibilia e ia hinaarohia e faaohipa i te hoê matini roro uira apî roa ’‘e, e ravehia anei te hoê buka aratai papaihia no te mau matini roro uira tahito roa. E au ra e no vetahi, e ere roa ’tu te Bibilia no teie tau.

No te aha e faaohipa ’i te taata i teie buka aratai tahito i teie tau aravihi roa i te pae o te roro uira? E rave rahi hoi reni Internet e horoa mai ra i te a‘oraa e aratairaa apî roa ’‘e. I roto i te afata teata, e itehia e rave rahi taote mana‘o aravihi, tahu‘a i te pae o te oraraa e feia papai buka. I te mau fare hooraa buka, e pue noa mai te mau buka aratai. Maoti te reira, e noaa mai i te feia tapihoo ehia moni!

I mua i teie mau haamaramaramaraa apî roa ’‘e e vai ra, no te aha ïa te taata e imi ai i te aratairaa Bibilia, tei papaihia 2 000 matahiti tiahapa na mua ’tu? Mea tano anei te feia o te ore e farii ra i te Bibilia a faaau ai i tera buka tahito i te hoê buka ihitao‘a tahito aore ra te hoê buka aratai no nia i te matini roro uira tahito? E ere, mea hape tera mana‘o. Vitiviti te ihi e te ravea apî i te taui, ua taui râ anei te huru o te taata? Te imi noa â ra te taata i te auraa o te oraraa, te oaoa e te paruru, te maitai i rotopu i te mero utuafare e te auhoaraa maitai.

Noa ’tu mea tahito te Bibilia, te horoa ra tera buka i te aratairaa hinaarohia e hau atu â. Te parauhia ra e ua papaihia te Bibilia i raro a‘e i te aratairaa a to tatou Atua poiete. Te horoa mai ra teie buka i te aratairaa i roto i te mau tuhaa atoa o te oraraa, ia ineine roa tatou i te faaruru i te mau fifi atoa. (Timoteo 2, 3:16, 17) Hau atu, te parauhia ra e te horoa mai ra te Bibilia i te a‘oraa o te ore roa ’tu e tahito mai! Te na ô ra te Bibilia: “E mea ora hoi te parau a te Atua.”—Hebera 4:12.

Mea mau anei tera mau parau no nia i te Bibilia? Eita anei te Bibilia e tano no teie tau aore ra tera te buka tano roa ’‘e no tatou? E “mea ora” anei iho â te Bibilia? Ua neneihia teie vea o Te Pare Tiairaa no te tauturu mai ia ite i te pahonoraa o taua mau uiraa ra. Teie te tumu parau matamua o te hoê anairaa taa ê o Te Pare Tiairaa.