Eaha to roto?

Tapura tumu parau

Ite no Iehova

Maiti te reo Tahiti

Te Bibilia e to outou a muri a‘e

Te Bibilia e to outou a muri a‘e

A FERURI NA te ori haere ra outou na te hoê e‘a pouri. Ua topa te mahana. Noa ’tu râ, aita outou e riaria ra inaha te vai ra ta outou te hoê mori pata mea puai te maramarama. Ia pata outou i te mori i raro, e ite maitai outou eaha to mua mai. E ia pata outou i te mori i mua, e ite atea outou i te e‘a no te puai o te maramarama.

E nehenehe e faaau i teie mori pata i te Bibilia. Mai ta tatou i ite i to na mua ’tu mau tumu parau, e nehenehe te Parau a te Atua e tauturu mai i mua i te mau fifi o te mau mahana atoa, ta tatou e faaruru nei i roto i teie ao papu ore. Hau atu, te horoa mai ra te Bibilia i te maramarama no nia i te a muri a‘e. E nehenehe ïa tatou e ite e e haere na nia i te hoê e‘a o te aratai ra i te oaoa mure ore e i te mauruuru no te mau mea e vai ra. (Salamo 119:105) E nafea ïa?

E hi‘opoa ana‘e e piti tumu no te aha te Bibilia e horoa ’i i te hoê tiaturiraa papu no a muri a‘e: 1 Te tauturu mai ra te Bibilia ia ite i te oaoa mau i roto i te oraraa, e 2 te haapii mai ra te reira e nafea ia haamau i te hoê auhoaraa mure ore e to tatou Atua poiete.

1 TE OAOA MAU I ROTO I TE ORARAA

Te horoa mai ra te Bibilia i te a‘oraa papu no te faaruru i te mau fifi. E ere noa râ te Bibilia i te hoê buka o te tauturu i te taata. Eita te Bibilia e faaitoito ra ia tiatonu noa tatou i nia i to tatou mau fifi, mai te mea ra e te hi‘o noa ra tatou i te hoê tuhaa o te tahi hoho‘a. Te haapii mai ra râ ia hi‘o i te hoho‘a taatoa, oia hoi ia ite e te vai ra te mau ohipa faufaa a‘e i to tatou mau fifi. I reira e itehia ’i te auraa mau o te oraraa.

Ei hi‘oraa, teie te tahi aratairaa Bibilia: “E rahi a‘e te oaoa ia horoa ’tu i te horoahia mai.” (Ohipa 20:35) A feruri na i te taime i tauturu ai outou i te tahi atu i te pae moni. Aore ra i te taime i faaroo maite ai outou i te hoê hoa tei haamahora i to ’na mau huru aau. Aita anei outou i oaoa a tauturu ai i te tahi atu?

E oaoa rahi roa ’‘e ta tatou e fana‘o a horoa ’i ma te ore e hinaaro ia faaho‘ihia mai. Ua tapao te hoê papai buka: “Mai te peu e horoa tatou ma te ore  e hinaaro ia faaho‘ihia mai, papu maitai e fana‘o tatou hau atu â i tei horoahia.” Ia horoa tatou i te feia iho â râ o te ore e nehenehe e faaho‘i mai, papu maitai e fana‘o tatou i te haamaitairaa. E hi‘o ïa tatou i te hoho‘a taatoa. Oia mau, te ohipa ra tatou e te Atua poiete. Te faariro nei te Atua i te ohipa maitai tataitahi ravehia i nia ia vetahi ê ei tarahu na ’na. (Maseli 19:17) Te haafaufaa rahi nei oia i ta tatou e rave ra no te feia riirii. Te fafau ra oia e faaho‘i oia i te reira maoti te ora mure ore i nia i te fenua faarirohia ei paradaiso. E a muri a‘e faahiahia mau, e ere anei?—Salamo 37:29; Luka 14:12-14. *

Hau atu, te haapii mai ra te Bibilia eaha mau ra te fa o te oraraa a haamori ai tatou i te Atua mau ra o Iehova. Te faaitoito ra te Bibilia ia arue, ia faahanahana e ia faaroo ia ’na mai tei titauhia. (Koheleta 12:13; Apokalupo 4:11) A na reira ’i, te rave ra tatou i te hoê ohipa faahiahia mau: te faaoaoa ra tatou i to tatou Atua poiete. Te faaitoito hoi oia ia tatou: “Ia paari hoi oe, ia oaoa tau aau.” (Maseli 27:11) A feruri na: ia rave tatou i te faaotiraa î i te paari niuhia i nia i te mau aratairaa Bibilia, te faaoaoa nei tatou i te aau o to tatou Metua here i te ra‘i. No te aha? No te mea te haapao ra oia ia tatou e te hinaaro nei oia ia oaoa tatou ma te pee i ta ’na aratairaa. (Isaia 48:17, 18) Aita ’tu â fa oaoa roa ’‘e ta tatou e haamau maori râ te haamoriraa i te Arii hau ê e te oraraa no te faaoaoa i to ’na aau.

2 TE AUHOARAA E TO TATOU ATUA POIETE

Te haapii atoa mai ra te Bibilia ia haamau i te hoê auhoaraa e to tatou Atua poiete. Te na ô ra te Bibilia: “A faafatata ’tu i te Atua, e e faafatata mai oia ia outou.” (Iakobo 4:8) I te tahi mau taime, e ui paha tatou e nehenehe iho â anei tatou e riro ei hoa no te Atua poiete Mana hope. Te haapapu nei râ te Bibilia e “ia imi” tatou i te Atua, e ite iho â tatou ia ’na, “aita hoi oia i atea ia tatou tataitahi.” (Ohipa 17:27) Mea faufaa no to tatou a muri a‘e ia pee i te a‘oraa Bibilia ia riro ei hoa no te Atua. E nafea ïa tatou?

A feruri na: noa ’tu ta tatou e rave, aita hoê a‘e o tatou e nehenehe e ape i te enemi hopea, oia hoi te pohe. (Korinetia 1, 15:26) Tera râ, mea mure ore te Atua. Eita roa ’tu oia e pohe e te hinaaro ra oia ia ora to ’na mau hoa e a muri noa ’tu. Na roto i teie mau parau nehenehe mau itehia i roto i te Salamo 22:26, te faataa ra te Bibilia eaha ta Iehova e hinaaro ra no te feia o te imi ra ia ’na: ia oaoa ratou e a muri noa ’tu.

E nafea ia haamau i te hoê auhoaraa mure ore e te Atua? A tamau i te haapii no nia ia ’na maoti ta ’na Parau, te Bibilia. (Ioane 17:3; Timoteo 2, 3:16) A ani i ta ’na tauturu no te taa i te Bibilia. Te haapapu ra te Bibilia e ‘ia tamau tatou i te ani atu i te Atua’ i te paari, e horoa mai oia i te reira. * (Iakobo 1:5) I te pae hopea, a tutava i te faaohipa i ta outou i haapii mai. Ia riro te Parau a te Atua ei “lamepa . . . i to [outou] nei avae” e ei “tiarama no to [outou] nei mau e‘a.”—Salamo 119:105.

^ par. 8 No te ite atu â no nia i te parau fafau o te ora mure ore i roto i te paradaiso, a hi‘o na i te pene 3 o te buka Eaha ta te Bibilia e haapii mai? piahia e te mau Ite no Iehova.

^ par. 13 Te pûpû nei te mau Ite no Iehova i te hoê haapiiraa Bibilia tamoni ore o te tauturu ra ia taa maitai atu â i te Bibilia. No te ite atu â no nia i teie haapiiraa Bibilia, a mataitai na i te video Eaha te ravehia i te hoê haapiiraa Bibilia? E itehia teie video i nia jw.org. A pata i nia i te tuhaa Maimiraa e a patapata i te upoo parau o te video.

Mea mure ore te Atua e te hinaaro ra oia ia ora to ’na mau hoa e a muri noa ’tu