Eaha to roto?

Tapura tumu parau

 TUMU PARAU HAAPIIRAA 30

A poro i te feia aita ta ratou e haapaoraa

A poro i te feia aita ta ratou e haapaoraa

“Ua rave au i te mau mea atoa no te tauturu i te mau huru taata atoa ia ora mai vetahi o ratou.”—KOR. 1, 9:22.

HIMENE 82 ‘Ia anaana to outou maramarama’

HAAPOTORAA *

1. Eaha te tauiraa i itehia i te mau matahiti mairi a‘enei?

NA MUA ’‘E, e haapaoraa ta te rahiraa taata na te ao nei. Ua taui râ te tupuraa i te mau matahiti mairi a‘enei. Te rahi roa ’tu ra hoi te feia o te parau aita ta ratou e haapaoraa. *Mat. 24:12.

2. Eaha te tahi mau tumu i rahi ai te feia aita ta ratou e haapaoraa?

2 No te aha i rahi ai te feia aita ta ratou e haapaoraa? No te mea ua tiatonu vetahi i nia i te mau mea navenave e te mau haapeapearaa o te oraraa nei. * (Luka 8:14) Aita vetahi e tiaturi te vai ra te hoê Atua. Area te tahi atu, te mana‘o ra ïa ua hope te tau o te mau haapaoraa, mea faufaa ore aore ra eita te reira e tuati i te mau maimiraa a te mau aivanaa. Ua faaroo paha teie feia i te mau hoa, orometua haapii aore ra taata tuiroo e parau ra mea tupu noa mai te mau mea atoa, aita râ i fana‘o i te mau faataaraa papu no nia i te vai-mau-raa o te Atua. Vetahi, ua taahoa roa i te mau tia haapaoraa no ta ratou mau titauraa moni e faaohipa-hape-raa i to ratou tiaraa. Ua haamau atoa te faatereraa o te tahi mau fenua i te mau ture o te opani i te taata ia haamori i te Atua ma te tiamâ.

3. No te aha teie tumu parau haapiiraa i faaineinehia ’i?

3 Ua faaue mai Iesu ia “faariro i te taata o te mau nunaa  atoa ei pǐpǐ” na ’na. (Mat. 28:19) E nafea tatou ia tauturu i te feia aita ta ratou e haapaoraa ia here i te Atua e ia riro ei pǐpǐ na te Mesia? Mea faufaa ia ite mea taa ê te huru fariiraa a te taata i ta tatou poroi ia au i te fenua i paari ai ratou. Mea taa ê te huru fariiraa a te hoê taata no Europa i ta te tahi no Asia mai. Eaha te tumu? I Europa, e rave rahi tei faarooroo no nia i te Bibilia e te haapiiraa na te Atua i poiete i te mau mea atoa. Area i Asia, aita roa ïa. Ua faaineinehia ïa teie tumu parau haapiiraa no te tauturu ia tatou ia poro i te feia atoa ta tatou e farerei noa ’tu no teihea fenua ratou.

A TAPEA I TE HOÊ FERURIRAA MAITAI

4. No te aha mea faufaa ia tapea i te hoê feruriraa maitai?

4 A tapea i te hoê feruriraa maitai. I te mau matahiti atoa, mea rahi te feia aita e haapaoraa na mua ’‘e tei riro mai ei Ite no Iehova. I rotopu ia ratou, te vai ra e oraraa maitai ê na to ratou, ua inoino râ i te huru haavarevare o te mau tia haapaoraa. Te vai atoa ra tei rave na i te peu ino e ua rave i te mau tauiraa. Maoti ta Iehova tauturu, e tia ia tatou ia imi i “te taata aau farii i te ora mure ore.”—Ohi. 13:48; Tim. 1, 2:3, 4.

A faatano i te huru paraparau ia poro oe i te feia o te ore e tiaturi i te Bibilia (A hi‘o i te paratarafa 5-6) *

5. I te tahi taime, eaha te tumu vetahi e farii ai i ta tatou poroi?

5 A hamani maitai e a tamiti i te parau. I te tahi taime, e farii te taata i ta tatou poroi eiaha no ta tatou i parau, no ta tatou râ huru paraparau. E au te taata ia hamani maitai atu tatou, ia tano ta tatou huru paraparau e ia tâu‘ahia ratou. Eita tatou e onoono atu ia farii i to tatou mana‘o. E tutava râ tatou i te taa te tumu eita ratou e hinaaro e paraparau no nia i te haapaoraa. Peneia‘e no te mea aita ratou i matau ia tatou. Aore ra no ratou, e ere i te peu maitai ia ani i te mana‘o o vetahi ê no nia i te Atua. Mea haama atoa no vetahi ia ite atu te taata ia ratou ia taio i te Bibilia, na muri iho â râ i te hoê Ite no Iehova. Mea titauhia ïa ia tâu‘a i te mana‘o e te huru o te feia ta tatou e poro atu.—Tim. 2, 2:24.

6. Mea nafea te aposetolo Paulo i te faatanoraa i ta ’na huru paraparau e e nafea tatou ia pee i ta ’na raveraa?

6 E nafea râ ia huru ê te tahi i te paraparau no nia i te Bibilia, te haapiiraa mea poietehia te mau mea atoa, te Atua aore ra te haapaoraa? E pee ana‘e i te raveraa a te aposetolo Paulo. I te mau ati Iuda, ua faaohipa oia i te mau Papai. Area i te mau philosopho Heleni, aita Paulo i na reira. (Ohi. 17:2, 3, 22-31) Ia farerei atoa tatou i te hoê taata o te ore e tiaturi i te Bibilia, mea au a‘e paha ia ore e taio atu i te irava Bibilia. Ia haama oia i te tapea i te Bibilia i mua i te taata, mea maitai a‘e paha ia faataio ia ’na maoti te matini afaifai.

7. Ia au i te Korinetia 1, 9:20-23, e nafea tatou ia pee i te hi‘oraa o te aposetolo Paulo?

7 A faaroo e a tamata i te taa i to ratou mana‘o. E titauhia ia feruri no te aha e mana‘o ê to te taata no nia i tera e tera ohipa. (Mas. 20:5) A feruri na ia Paulo. Ua paari oia i rotopu i te ati Iuda. Ua titauhia ïa ia faatano oia i ta ’na huru pororaa, i te feia iho â râ o te mau nunaa ěê tei ore i haapii no nia ia Iehova e te mau Papai. No te taa i te mana‘o o te feia o ta tatou tuhaa fenua, e rave ana‘e i te maimiraa aore ra e uiui ana‘e i te mau taeae e tuahine aravihi i te poro.—A taio i te Korinetia 1, 9:20-23.

8. Eaha te tahi ravea no te haamata i te hoê aparauraa?

 8 No te ite i te feia aau farii, e titauhia ia ani i te mana‘o o te taata e ia faaroo maite ia ratou. (Mat. 10:11) I Beretane, e ani te hoê taeae i te taata e nafea ia oaoa i roto i te faaipoiporaa, ia haapii i te tamarii aore ra ia faaoromai i mua i te ohipa ino. E faaroo maite oia ia ratou a na ô atu ai: “A faaite mai na i to oe mana‘o i teie a‘oraa horoahia a 2 000 matahiti i teie nei.” I muri iho, e faaite oia i te tahi mau parau i nia i ta ’na vini, eita ïa te taata e ite e irava Bibilia te reira.

A PORO I TE MAU HURU TAATA ATOA

9. E nafea ia poro i te feia o te ore e farii i te paraparau no nia i te Atua?

9 Noa ’tu eita tatou e faahiti i te Atua, e nehenehe tatou e poro i te taata ma te paraparau no nia i te hoê mea ta ratou e au roa. E rave rahi te faahiahia nei i te mau mea i poietehia. E nehenehe ïa tatou e na ô atu: “Ua ite paha oe mea rahi te mau mea ta te mau aivanaa i hamani o tei ite-a‘ena-hia i roto i te natura. Ua hi‘opoa te feia hamani tao‘a haapuai reo i te tari‘a o te taata, area te feia hamani pata hoho‘a, i te mata ïa. No oe, ua fa mai anei te mau mea atoa maoti . . . te hoê puai ite-ore-hia? Te hoê taata? Te tahi atu ravea?” A faaroo maite e a parau atu: “Ua ui au ia ’u iho, ‘Ia hi‘opoa te aivanaa i te faanahoraa o te tari‘a e to te mata, te haapii atoa ra ratou no nia ia vai?’ Ua feruri au i te mau parau a te hoê rohipehe tahito tei na ô: ‘E ore anei tei hamani i te tari‘a nei e faaroo? e ore anei tei hamani i te mata nei e hi‘o? . . . o tei haapii i te taata nei i te aravihi, e ore anei e ite?’ Ua farii te tahi mau aivanaa mea poietehia te mau mea atoa!” (Sal. 94:9, 10) Ia oti, a pata i te hoê video i nia i te JW Haapurororaa teata o te faaite ra i te mana‘o o te tahi aivanaa. (A pata i nia TAPURA VIDEO > UIUIRAA MANA‘O E FAATIARAA > MANA‘O NO NIA I TE TUMU O TE ORA.) E nehenehe atoa e pûpû atu i te buka rairai La vie a-t-elle été créée? aore ra Cinq questions à se poser sur l’origine de la vie.

10. E nafea ia haamata i te hoê aparauraa e te feia o te ore e hinaaro e paraparau no nia i te Atua?

10 E rave rahi taata te hinaaro i te hoê oraraa maitai no a muri a‘e. Mea rahi atoa râ te mǎta‘u nei e mou te fenua aore ra eita te taata e nehenehe e ora faahou i nia i te fenua. Ua faataa te hoê tiaau haaati  i Norevetia, e pinepine te feia o te ore e tiaturi i te Atua i te farii i te paraparau no nia i te mau mea e tupu ra na te ao nei. No te haamata i te hoê aparauraa, e aroha oia i te taata a parau atu ai: “No oe, e maitai mai anei to tatou ananahi . . . i te feia mana? I te mau aivanaa? Aore ra i te tahi atu?” E faaroo maite oia ia ratou a faataio atu ai i te hoê irava o te faaite ra i te oraraa maitai ta tatou e fana‘o a muri a‘e. Ua maere vetahi i te parau fafau Bibilia eita te fenua e mou e e parahi te feia maitai i nia i te fenua e a muri noa ’tu.—Sal. 37:29; Koh. 1:4.

11. No te aha e titauhia ia faatano i ta tatou huru paraparau? Ia au i te Roma 1:14-16, e nafea tatou ia pee i te hi‘oraa o Paulo?

11 Mea taa ê te taata atoa, e titauhia ïa ia faatano i ta tatou huru paraparau ia au i te taata ta tatou e farerei. E nehenehe te hoê taata e anaanatae i te tahi tumu parau, area te tahi atu eita ïa. E farii oioi vetahi i te paraparau no nia i te Atua aore ra te Bibilia, area te tahi atu eita ïa. Mea faufaa râ ia poro tatou i te mau huru taata atoa! (A taio i te Roma 1:14-16.) E haamana‘o ana‘e na Iehova e faatupu i te huero o te parau mau i roto i te aau o te feia e au i te parau-tia.—Kor. 1, 3:6, 7.

A PORO I TE NUNAA TAATA NO ASIA

E rave rahi feia poro te anaanatae i te mau taata o te ore e tiaturi i te Atua e te faaite atoa ’tu i te mau parau paari no roto mai i te Bibilia (A hi‘o i te paratarafa 12-13)

12. E nafea ia poro i te mau nunaa taata no Asia o tei ore i ite te vai ra te hoê Atua poiete?

12 Na te ao nei, e rave rahi taata poro te farerei nei i te mau nunaa taata no Asia, oia atoa i tei ora i te tuhaa fenua ua opani te mau faatereraa ia haamori i te Atua ma te tiamâ. E rave rahi o ratou tei paari ma te ore e ite te vai ra te hoê Atua poiete. Ua farii oioi vetahi i te haapii i te Bibilia, area te tahi atu, ua taiâ ïa i te hi‘opoa i te mau haapiiraa mea apî no ratou. E nafea ia poro ia ratou? Ua taa i te tahi mau taata poro aravihi mea maitai a‘e ia haamatau e ia anaanatae na mua i teie feia hou a faaite atu ai i te tahi faaueraa Bibilia tei haamaitai i to tatou oraraa.

13. Eaha te tauturu i te taata ia anaanatae i te Bibilia? (A hi‘o i te hoho‘a i te api matamua.)

13 E rave rahi o te nunaa taata Asia te au i te mau a‘oraa paari i roto i te Bibilia. (Koh. 7:12) I New York, te faataa ra te hoê tuahine e poro nei i te feia e paraparau ra i te reo Mandarin: “E anaanatae e e faaroo vau ia ratou. Ia ite au no faarue noa ’tu ra ratou i to ratou fenua, e ani au: ‘Mai te aha te huru to oe oraraa i teie nei? Ua noaa anei ta oe ohipa? Mea maitai anei te feia no ǒ nei i nia ia oe?’” I te tahi taime, ua pûpû roa te tuahine i te hoê buka haapiiraa. Ia au i te tupuraa, e ani atoa oia: “I to oe mana‘o, eaha te tauturu mai ia vai hau noa e o vetahi ê? E nehenehe anei au e faaite atu i te hoê parau paari no roto mai i te Bibilia? Te na ô ra: ‘E au te matamehai o te avau i te amaharaa pape ra: e faarue râ i te avau ra, a riro ei parau faaino.’ No oe, e tauturu mai anei teie parau paari ia vai hau e o vetahi ê?” (Mas. 17:14) Na roto i teie huru paraparau tatou e ite ai e farii anei te taata i te hoê farerei-faahou-raa.

14. Mea nafea te hoê taeae e ora ra i Asia ia tauturu i te feia o te ore e tiaturi i te Atua?

14 E no te feia o te ore e tiaturi i te Atua, e nafea ia poro ia ratou? I Asia, mea maoro to te hoê taeae pororaa i te feia tera to ratou tiaturiraa. Te faataa ra oia: “I ǒ nei, ia parau te hoê taata eita o ’na e tiaturi i te Atua, te mana‘o ra oia i te mau atua ta te rahiraa taata e haamori nei. E pinepine ïa vau i te parau na te taata i hamani i tera mau rahiraa atua e e ere ratou i te  atua mau. Ia oti, e taio vau i te Ieremia 16:20 e na ô ra: ‘Ei taata anei te hamani i te atua? e ere [ratou iho] te atua?’ I muri mai, e ani au: ‘E nafea e tia ’i ia parau e atua mau te mau atua hamanihia i te rima taata?’ E faaroo maite au i ta ’na e pahono mai e ia oti, e taio vau i te Isaia 41:23 e na ô ra: ‘E faaite mai i te mau mea e tupu i te anotau hopea ra; e ite ai matou e, e atua outou.’ I muri iho, e faaite atu vau mea nafea te hoê parau tohu a Iehova i te tupuraa.”

15. Eaha te haapii mai i te hi‘oraa o te tahi atu taeae i Asia?

15 E raveraa ê atu ta te tahi atu taeae i Asia ia ho‘i oia e farerei i te feia ta ’na i poro. Te faataa ra oia: “E faahiti au i te tahi a‘oraa paari a te Bibilia, parau tohu Bibilia tei tupu e te mau ture e faatere ra i te ao nui. I muri mai, e faataa vau mea nafea te reira e haapapu ai te vai ra te hoê Atua poiete. Ia farii te taata i tera mana‘o, i reira vau e faaite ai i ta te Bibilia e parau ra no nia ia Iehova.”

16. Ia au i te Hebera 11:6, no te aha e titauhia ia tiaturi ta tatou piahi i te Atua e te Bibilia? E nafea tatou ia tauturu atu?

16 Ia haapii tatou i te Bibilia i te hoê taata aita ta ’na e haapaoraa, e titauhia ia tamau i te haapapu te vai mau ra te Atua. (A taio i te Hebera 11:6.) Ia tiaturi noa ratou i te Bibilia, e titauhia paha ia faahiti pinepine i te tahi pue parau mau. I te mau farereiraa atoa, a haapapu noa o te Bibilia te Parau a te Atua. Peneia‘e ma te hi‘opoa poto i te hoê parau tohu Bibilia tei tupu, te hoê haapapuraa i te pae aivanaa e te pae tuatapaparaa aore ra i te hoê a‘oraa paari no roto mai i te Bibilia.

17. Eaha te huru o te taata ia here tatou ia ratou?

17 E haapaoraa ta te hoê taata aore ra aita, na to tatou here e tauturu ia ratou ia riro ei pǐpǐ na te Mesia. (Kor. 1, 13:1) E haamana‘o ana‘e, e haapii e e faaite tatou i te taata te here mai ra te Atua e te hinaaro ra oia ia here atoa tatou ia ’Na. Pauroa te mau matahiti, tei roto atoa te feia aita ta ratou e haapaoraa na mua ’‘e i te mau tausani taata o te bapetizohia ei Ite no Iehova no to ratou here i te Atua. No reira, a tapea i te hoê feruriraa maitai e a faaite i te here i te mau huru taata atoa. A faaroo ia ratou e a tutava i te taa i to ratou mana‘o e huru. A faariro i te taata ei pǐpǐ na te Mesia na roto i to outou hi‘oraa maitai!

HIMENE 76 Oaoa oe

^ par. 5 Te rahi noa ’tu ra te feia aita e haapaoraa ta ratou e te ore e tiaturi i te Atua. E hi‘opoa tatou e nafea ia poro ia ratou e ia tauturu atu ia tiaturi i te Bibilia e ia Iehova.

^ par. 1 Ia au i te tahi titorotororaa, teie te tahi o te mau fenua mea rahi te taata e parau nei aita ta ratou e haapaoraa: Albanie, Auteralia, Auteteria, Azerbaïdjan, Beretane, Danemata, Farani, Helevetia, Heremani, Holane, Hong-Kong, Irelane, Iseraela, Kanada, Korea apatoa, Norevetia, Paniora, Repupirita Tchèque, Taina, Tapone, Tuete e Vietnam.

^ par. 2 NO TE TAA MAITAI ATU Â: I roto i teie tumu parau, ia faahitihia te parau o te feia aita ta ratou e haapaoraa, te mana‘o-atoa-hia ra i te feia o te ore e tiaturi ra i te Atua.

^ par. 54 FAATAARAA O TE HOHO‘A: Te poro ra te hoê taeae i to ’na hoa ohipa tei hi‘o i ta tatou reni natirara i muri iho.