Eaha to roto?

Tapura tumu parau

 AAMU

Ua hau a‘e ta Iehova mau haamaitairaa i ta ’u i mana‘o

Ua hau a‘e ta Iehova mau haamaitairaa i ta ’u i mana‘o

UA ITE au mea maitai te taviniraa pionie, hoê râ uiraa tei vai noa i roto i to ’u feruriraa, ‘Eita anei au e haumani i muri a‘e?’ Ua riro vau ei taata hoo tao‘a o te hapono atu i te reira na te mau vahi e rave rau i Afirika mai i Dar es Salaam, Elisabethville e Asmara. Mea au roa na ’u ta ’u ohipa! Aita râ vau i ite i te hoê mahana, e tavini au ia Iehova ma te taime taatoa i tera e i te tahi atu mau fenua na Afirika!

I te pae hopea, ua faaea vau i te taiâ e rave atura i te taviniraa pionie! E uputa rahi tei matara, hau a‘e i ta ’u i mana‘o! (Eph. 3:20) E faatia ’tu vau mea nafea te reira i te tupuraa.

Ua fanauhia vau i Berlin, Heremani i 1939, tau ava‘e i muri a‘e i te haamataraa o te Piti o te tama‘i rahi. I 1945 a hope ai te tama‘i, ua haere mai te mau manureva e topita ia Berlin. I tera mahana, ua topitahia to matou aroâ e ua horo to matou utuafare i roto i te hoê puhapa. I muri mai, ua titauhia ia horo i Erfurt, te oire tumu o to ’u metua vahine.

To ’u nau metua e to ’u tuahine i Heremani, area matahiti 1950

I imi na mama i te parau mau, ua taio oia i te mau buka a te mau philosopho e ua fafa atoa i roto e rave rau haapaoraa. I 1948, ua haere mai e piti Ite no Iehova i to matou fare. Farii ihora mama ia raua e ui a‘era e rave rahi uiraa. Aita i mairi hoê hora i muri a‘e, ua na ô mai mama ia ’u e to ’u tuahine apî: “Teie te parau mau!” I muri mai, haamata ’tura matou e toru i te apiti i te mau putuputuraa i Erfurt.

I 1950, ua ho‘i matou i Berlin e tavini atura i roto i te amuiraa Berlin-Kreuzberg. I te taui-faahou-raa to matou faaearaa, apiti atura matou i te amuiraa Berlin-Tempelhof. I muri a‘e, ua bapetizohia mama, area vau, ua taiâ noa â.

UA FAAEA I TE TAIÂ

No to ’u mamahu, aita vau i haere oioi i mua. Ua mairi e piti matahiti, aita vau i paraparau noa ’‘e i roto i te pororaa. Ua tauturu mai râ te amuimuiraa i te mau taeae e tuahine itoito e te taiva ore. Ua tapeahia vetahi i te mau aua haavîraa Nazi e te tahi atu i te mau fare tapearaa i te pae hitia o te râ o Heremani. Ua afai huna vetahi i te mau papai i tera tuhaa fenua. Ua putapû roa to ’u aau i to ratou hi‘oraa faahiahia  mau. Feruri a‘era vau, ‘Ua ineine teie mau Kerisetiano i te pohe no Iehova e no to ratou mau taeae, e roaa atoa ia ’u i te faaea i te taiâ!’

Ua faaea vau i te riro ei taata mamahu i to ’u apitiraa i te hoê pororaa taa ê i 1955. Na roto i te hoê rata i piahia i roto i te papai Faaara, * ua faaite taeae Nathan Knorr a tahi ra te faanahonahoraa e faatupu ai i te pororaa mai tera te huru. Ua parau oia e ia hoê te feia poro atoa, “e riro ïa ei ava‘e pororaa faahiahia mau tei ore i itehia a‘enei i nia i te fenua!” E parau mau roa iho â! I muri mai, ua pûpû vau i to ’u ora ia Iehova e bapetizohia ’tura i 1956, i te hoê â taime e o papa e to ’u tuahine. Aita râ i maoro, ua titauhia ia rave au i te tahi atu faaotiraa faufaa mau.

Ua papu ê na ia ’u mea maitai te taviniraa pionie, aita râ vau i rave oioi i te reira! Na mua, ua faaoti au i te haapiipii i te toroa hoo tao‘a no te hoo faahou atu i te ara. I muri mai, ua opua e faarahi â to ’u ite i roto i tera toroa. I 1961, noaa mai nei te hoê ohipa i Hambourg, hoê o te mau oire rahi i Heremani. No to ’u au i ta ’u ohipa, ua faataere noa vau i te rave i te taviniraa pionie.

Auê au i te mauruuru ia Iehova i te faaohiparaa i te mau taeae î i te here no te haaferuri ia ’u! E rave rahi hoa tei haamata ê na i te taviniraa pionie e tei riro ei hi‘oraa maitai no ’u. Ua faaitoito atoa mai taeae Erich Mundt ia tiaturi ia Iehova. Ua parau oia i roto i te aua haavîraa, ua paruparu mai te mau taeae tei tiaturi noa ia ratou iho. Area tei tiaturi ia Iehova, ua tapea ïa i te taiva ore e ua riro ei tavini itoito i roto i ta ’na faanahonahoraa.

I to ’u haamataraa i te taviniraa pionie i 1963

Ua faaitoito atoa mai te taeae Martin Poetzinger tei tavini i muri a‘e i roto i te Tino aratai. Ua parau oia i te mau taeae: “O te itoito te tao‘a faufaa roa ’‘e!” Ua feruri maite au i ta ’na mau parau e i te pae hopea, vaiiho atura vau i ta ’u ohipa no te rave i te taviniraa pionie i Tiunu 1963. E faaotiraa maitai roa ta ’u i rave! E piti ava‘e i muri a‘e, aita â vau i haamata ’tu ra i te imi i te ohipa apî, ua titauhia mai au ia tavini ei pionie taa ê. Tau matahiti i muri a‘e, ua faatupu Iehova i ta ’u i ore i mana‘o noa ’‘e! Ua titauhia vau ia apiti atu i te 44raa o te Piha haapiiraa no Gileada!

TE MAU HAAPIIRAA FAUFAA ROA TA ’U I HUTI MAI I GILEADA

Hoê o te mau haapiiraa faufaa roa ’‘e ta ’u i huti mai i te taeae Nathan Knorr e Lyman Swingle, o te oreraa ïa e faarue oioi i ta tatou taviniraa aore ra hopoia. Ua faaitoito mai raua ia tapea maite i ta matou taviniraa noa ’tu te mau fifi. Teie ta taeae Knorr i parau no te haaferuri ia matou: “E tiatonu outou i nia i te aha? Te repo? Te mau manumanu? Te veve? Aore ra e tapea mai outou i te nehenehe o te mau tumu raau, te mau tiare e te mau hoho‘a mata oaoa? A haapii i te here i te taata!” I te hoê mahana, i to taeae Swingle faataaraa i te tumu vetahi taeae i faarue oioi ai i ta ratou taviniraa, ua horuhoru roa to ’na aau e ta‘i ihora. Ua titauhia ia faataime i ta ’na oreroraa parau. Ua putapû roa to ’u aau e aita roa ’tu vau i hinaaro e faaoto i te Mesia e i to ’na mau taeae haapao maitai.—Mat. 25:40.

O vau, Claude e Heinrich ei mitionare i 1967 i Lubumbashi, Congo

Ua ani mai te tahi mau mero o te Betela ihea matou e tonohia ’i. E parau maitai ana‘e ta ratou i faahiti no tera e tera fenua. I to ’u râ parauraa Congo (Kinshasa), faaea noa ’tura ratou e na ô maira: “Congo? Auê hoi e, a ani i ta Iehova tauturu!” I tera ra tau, e parau peapea ana‘e no nia i tera fenua, oia hoi te tama‘i, te faehau iino e te taparahiraa taata. Ua haamana‘o noa râ vau i te mau haapiiraa ta ’u i huti mai. I Tetepa 1967, tau taime i muri a‘e i te opereraa parau tuite, ua reva Heinrich Dehnbostel, Claude Lindsay e o vau i Kinshasa, te oire pu o Congo.

 HAAPIIRAA MAITAI ROA NO TE MAU MITIONARE

I te taeraa i Kinshasa, ua haapii matou i te reo Farani e toru ava‘e te maoro. I muri iho, ua haere matou i Elisabethville, Lubumbashi i teie nei, piri atu i te pae apatoa o Congo e te otia fenua o Zambie. Noho atura matou i te fare mitionare i roto i te oire.

Aita Lubumbashi i porohia a‘enei, ua oaoa roa ïa matou i te faaite i te pue parau mau i te feia no ǒ. Aita i maoro, e rave rahi roa haapiiraa ta matou i haamata. Ua poro atoa matou i te mau tia faatere e mutoi oire. E rave rahi tei haafaufaa i te Parau a te Atua e i ta matou ohipa pororaa. Ua haapii atoa mâua Claude i te reo Swahili no te mea tera reo ta te rahiraa e paraparau. Tau taime i muri a‘e, ua anihia mâua ia turu i te amuiraa reo Swahili.

E fifi atoa râ ta matou i farerei. Pinepine matou i te farerei i te faehau tei taero i te ava a faaohipa ’i i ta ratou pupuhi aore ra i te mutoi o te faahuehue mai. I te hoê mahana, ua tomo roa mai te hoê pǔpǔ mutoi e ta ratou pupuhi a putuputu ai matou i roto i te fare mitionare. Afaihia ’tura matou i te piha a te mau mutoi e ua mau matou i reira e tae noa ’tu i te hora ahuru i te po.

I 1969, ua haamata vau i te tavini ei tiaau haaati. Ua haere au na roto i te ururaau i Afirika, te aihere teitei e te purumu varivari. I te hoê oire iti, ua ofaa te hoê maiaa moa e ta ’na mau fanau‘a i raro a‘e i to ’u ro‘i. Eita roa e mo‘e ia ’u ia ara taue mai au  i te aahiata a totereo ai tera maiaa. E taime oaoa mau te mau po e paraparau ai matou te mau taeae no nia i te pue parau mau Bibilia i mua i te hoê auahi.

Hoê o te mau fifi rahi ta ’u i farerei, o te mau faahua Kerisetiano tei turu i te pǔpǔ poritita Kitawala. * Ua ô mai vetahi o ratou i roto i te mau amuiraa e ua amo atoa i te hopoia rahi. E rave rahi “to‘a ite-ore-hia” tei tamata i te haafifi i te mau taeae e tuahine haapao maitai. (Iuda 12) Ua tamâ râ Iehova i te mau amuiraa e e maitai rahi tei itehia i muri a‘e!

I 1971, ua riro mai au ei mero o te tomite amaa i Kinshasa. Ua ohipa vau i roto e rave rau tuhaa, te papairaa rata, te mau aniraa papai a te mau amuiraa e te tahi atu mau ohipa i roto i te tuhaa taviniraa. I te Betela, ua haapii au i te faanaho i te ohipa i roto i te hoê fenua rahi ma te ravea rii. I te tahi taime, tau ava‘e te mairi hou te mau rata a tae ai i te mau amuiraa! Na te hoê manureva e afai atu i ta matou mau rata i nia i te mau poti, e vai noa râ te reira i roto i ta ratou vehî hamanihia i te aeho tau hebedoma. Maoti râ te tauturu a te mau taeae no Congo, ua haere noa te ohipa i mua noa ’tu tera e te tahi atu mau fifi!

E maere noa na vau a faanaho ai te mau taeae i te mau tairururaa rahi ma te ravea rii. E hamani ratou i te tahua i nia i te mau ofaaraa manumanu, e faatiatia i te aihere teitei ei paruru e e oviriviri atoa i te reira ei parahiraa. E faaohipa ratou i te ofe no te hamani i te tino o te tamaru e te peue aeho no te tapo‘i i te tafare aore ra te airaa maa. I te mea aita ta ratou e naero, e faaohipa ïa ratou i te paa o te mau tumu raau. I tera mau taime, e mataitai noa vau ia ratou a faahiahia noa ’i i te itoito e te aravihi o teie mau taeae e tuahine! Mea here roa na ’u ia ratou, mo‘emo‘e roa vau i te faarueraa ia ratou no te hoê hopoia apî!

TE TAVINIRAA I KENYA

I 1974, ua tonohia vau i te amaa i Nairobi, Kenya. Mea rahi atu â te ohipa i ǒ, na tera hoi amaa e haapao ahuru fenua rahi ua opanihia ta tatou ohipa. Pinepine au i te tonohia i tera mau tuhaa fenua, i Etiopia iho â râ. I tera tau, ua tupu te hamani-ino-raa i ǒ e e rave rahi ati ta te mau taeae e tuahine i faaruru. E rave rahi tei rave-ino-hia, tei tapeahia e tei haapohehia. No to ratou râ here ia Iehova e i te tahi e te tahi, ua tapea to tatou mau taeae e tuahine i to ratou haapao maitai.

I 1980, ua oaoa roa vau i te faaipoipo ia Gail Matheson. No Kanada mai oia e hoê â ta mâua Piha haapiiraa no Gileada. Ua haamatau mâua na roto i te papairaa rata. Ua tonohia oia ei mitionare i Bolivia. Ahuru ma piti matahiti i muri a‘e, farerei faahou ihora mâua i New York e faaipoipohia ’tura i Kenya. E mauruuru noa vau ia Gail no to ’na huru feruriraa pae varua e te haapae. E turu papu e e hoa here noa â oia no ’u!

I 1986, ua haa atoa mâua Gail i roto i te tuhaa haaati a tavini noa ’i i te amaa. Ua ratere mâua na te mau fenua rahi i raro a‘e i te tiaauraa a te amaa o Kenya.

Oreroraa parau i te hoê tairururaa i Asmara i 1992

Haamana‘o noa ra vau i te mau faaineineraa i ravehia no te hoê tairururaa i Asmara, Érythrée i teie nei, i 1992. Ua opanihia ta tatou ohipa i tera tuhaa fenua. Hoê ana‘e fare raau mea reporepo i rapae e i roto ta matou i fana‘o. I te mahana o te tairururaa, ua maere roa vau i ta te mau taeae i rave no te faanehenehe i roto mai ia riro ei vahi tura no te haamori ia Iehova. E rave rahi utuafare tei afai mai i te mau tapo‘i nehenehe mau. Ua oaoa roa matou i tera tairururaa e 1 279 taata tei tae mai i tera mahana!

 I roto i te tuhaa haaati, mea rahi te tauiraa ta mâua i ite! I te tahi taime, e taoto mâua i roto i te hoê fare rahi haviti mau i te pae tatahi. I te tahi atu râ taime, i roto ïa i te hoê puhapa no te feia rave ohipa e 100 metera te atea te vahi haumitiraa. Noa ’tu râ te vahi ta mâua i haere, e taime oaoa mau te pororaa na muri i te mau pionie e feia poro. No te hopoia apî i horoahia mai, ua titauhia ia vaiiho mâua i teie mau hoa here, ua mo‘emo‘e roa mâua i muri mai!

UA OOTI MAI I TE HAAMAITAIRAA RAHI I ETIOPIA

Mai te matahiti 1987 e tae atu 1992, ua haamanahia ta tatou ohipa i mua i te ture i te tahi mau fenua ta te amaa o Kenya i tiaau na. Ua haamauhia ïa te mau amaa e piha ohipa apî i tera mau tuhaa fenua. I 1993, ua tonohia mâua i te piha ohipa i Addis-Abeba i Etiopia. Mea maoro ta tatou ohipa i te opaniraahia i ǒ, i teie nei râ, ua haamanahia.

I roto i te taviniraa haaati i Etiopia i 1996

Ua haamaitai rahi Iehova i te taviniraa i Etiopia! E rave rahi taeae e tuahine tei riro mai ei pionie. Mai 2012 mai, hau atu i te 20 i nia i te hanere o te feia poro tei tavini ei pionie tamau i te matahiti hoê. Ua faatupuhia e rave rahi haapiiraa e faaineineraa e hau atu i te 120 Piha a te Basileia tei hamanihia. I 2004, ua faatiahia hoê Betela e hoê Piha tairururaa apî. Auê haamaitairaa e!

I te roaraa o te mau matahiti, ua riro te mau Kerisetiano i Etiopia ei hoa piri mau. Mea here roa na mâua Gail i te mau taeae e tuahine no to ratou maitai e here. Aita i maoro a‘enei, ua ma‘ihia mâua e titauhia ’tura ia tavini i teie nei i te amaa o Europa no Ropu. Mea aupuru-maitai-hia mâua i ǒ nei, e mihi râ mâua i tera mau hoa here i Etiopia.

UA TAMAU IEHOVA I TE FAATUPU

Ua ite mâua i te rima o Iehova i roto i te ohipa pororaa. (Kor. 1, 3:6, 9) I te taime matamua a poro ai au i te mau taata no Rwanda tei haere mai i Congo no te ohipa imiraa veo, aita e taata poro i Rwanda. I teie nei, ua hau atu i te 30 000 taeae e tuahine i tera fenua. I 1967, tau 6 000 taata poro i Congo (Kinshasa), i teie nei, ua hau atu i te 230 000. Hau atu i te hoê mirioni taata tei tae i te Oroa haamana‘oraa i 2018. I te mau fenua atoa i haapaohia na e te amaa o Kenya, ua taiohia 100 000 taata poro hau. Mea rahi mau te maraaraa!

A hau atu i te 50 matahiti i teie nei, ua faaohipa Iehova e rave rau taeae ia haamata vau i te taviniraa taime taatoa. Te vai noa nei to ’u huru mamahu, ua haapii râ vau i te tiaturi papu ia Iehova. Ua tauturu mai ta ’u taviniraa i Afirika ia faaite i te faaoromai e te feruriraa haapae. Te faahiahia nei mâua Gail i te mau taeae e tuahine atoa tei farii maitai mai e tei faaoromai tamau ma te tiaturi ia Iehova. Te mauruuru mau nei au i to Iehova hamani maitai rahi! Ua hau a‘e ta Iehova mau haamaitairaa i ta to ’u aau i hinaaro!—Sal. 37:4.

^ par. 11 Piihia i muri a‘e Ta tatou taviniraa i te Basileia tei monohia i teie nei i te api parau Faaineineraa no te putuputuraa Oraraa e taviniraa Kerisetiano.

^ par. 23 No roto mai te parau “Kitawala” i te hoê ta‘o Swahili o faatere te auraa. Ua titau teie pǔpǔ poritita ia faatiamâhia Congo i te fenua Beletita. Ua haru, ua haapii e ua opere te pǔpǔ Kitawala i te mau papai a te mau Ite no Iehova ma te faahuru ê i te mau haapiiraa Bibilia. Ua hinaaro hoi ratou ia turuhia ta ratou mau titauraa, ohipa tahutahu e peu taotoraa tia ore.