Eaha to roto?

Tapura tumu parau

 TUMU PARAU HAAPIIRAA 32

“Ia rahi noa ’tu â to outou here”

“Ia rahi noa ’tu â to outou here”

“Teie ta ’u e ani noa nei na roto i te pure, ia rahi noa ’tu â to outou here.”—PHIL. 1:9.

HIMENE 106 E here ana‘e ia vetahi ê

HAAPOTORAA *

1. O vai ma tei haa no te haamau i te amuiraa i Philipi?

I TE taeraa ’tu Paulo, Sila, Luka e Timoteo i Philipi, e rave rahi taata o tera tuhaa fenua Roma tei anaanatae i te poroi o te Faatereraa arii. Ua haa na taeae e maha ma te itoito no te haamau i te hoê amuiraa e putuputu a‘era tera mau Kerisetiano apî i te fare o te tahi vahine farii maitai o Ludia te i‘oa.—Ohi. 16:40.

2. Eaha te fifi ta te amuiraa no Philipi i faaruru?

2 Ua faaruru râ tera amuiraa apî i te riri o Satani, ua turai hoi oia i te mau enemi o te parau mau ia patoi u‘ana i te pororaa a teie mau Kerisetiano taiva ore. Ua haruhia Paulo e Sila, ua tairihia i te raau e hurihia ’tura i roto i te fare tapearaa. I te matararaa mai raua i rapae, ua farerei e ua faaitoito raua i te mau pǐpǐ apî a te Mesia. I muri iho, faarue a‘era Paulo, Sila e Timoteo i te oire. E au ra e o Luka tei faaea noa i ǒ. Eaha te huru o te amuiraa apî no Philipi? Maoti te varua mo‘a o Iehova, ua tutava ’tu â tera mau taeae e tuahine i roto i te taviniraa. (Phil. 2:12) Eita e ore ua haapeu roa Paulo ia ratou!

3. Ia au i te Philipi 1:9-11, eaha ta Paulo i ani i roto i ta ’na mau pure?

3 Hau atu i te ahuru matahiti i muri a‘e, ua papai Paulo i te hoê rata i te amuiraa no Philipi. E taa-maitai-hia to Paulo here i te mau taeae e tuahine no ǒ. Ua parau hoi oia: “Te hinaaro roa nei au e ite ia outou paatoa no to ’u here rahi ia outou mai to te Mesia ra o Iesu.”  (Phil. 1:8) Na roto i te pure, ua ani Paulo ia Iehova ia rahi noa ’tu â to te amuiraa here e ia taa maitai ia ratou eaha te mea faufaa roa ’‘e. Ua pure atoa ia riro ratou ei feia viivii ore e te faaturori ore ia vetahi ê e ia tamau ratou i te rave i ta te parau-tia e faatupu. (A taio i te Philipi 1:9-11.) I roto i teie haapiiraa, e hi‘opoa tatou i te mau a‘oraa ta Paulo i horoa i to Philipi e e nafea atoa tatou ia haapao i te reira i teie mahana.

IA RAHI NOA ’TU Â TO OUTOU HERE

4. (a) Ia au i te Ioane 1, 4:9, 10, mea nafea Iehova i te haapapuraa i to ’na here ia tatou? (b) E nafea tatou ia here i te Atua?

4 Ua faaite Iehova i to ’na here rahi ia tatou ma te tono mai i ta ’na Tamaiti i nia i te fenua no ta tatou mau hara. (A taio i te Ioane 1, 4:9, 10.) Auê tatou i te mauruuru ia Iehova! (Roma 5:8) No reira, e hinaaro tatou e rave mai ta Iesu i pahono i te hoê Pharisea: “Ia here oe ia Iehova to Atua ma to aau atoa e ma to ora atoa e ma to mana‘o atoa.” (Mat. 22:36, 37) Ia taatoa ïa to tatou aau no te Atua e tia ’i! E hinaaro râ tatou ia rahi noa ’tu â to tatou here ia ’na i tera e tera mahana. No reira Paulo i parau ai i to Philipi ia “rahi noa ’tu â” to ratou here. E nafea tatou ia haapao i tera a‘oraa?

5. E nafea ia rahi noa ’tu â to tatou here?

5 Te na ô ra te Bibilia: “Tei ore e here ra, aita ïa i ite o vai te Atua, no te mea e here te Atua.” (Ioa. 1, 4:8) E titauhia ia ite o vai te Atua no te here ia ’na. Ua faaite te aposetolo Paulo e rahi noa ’tu â to tatou here i te Atua ia noaa ia tatou “te ite mau e te haro‘aro‘a” no nia ia ’Na. (Phil. 1:9) A haapii ai tatou i te Bibilia, ua haamata tatou i te here i te Atua no to ’na mau huru maitatai. A rahi noa ’i to tatou ite no nia ia ’Na, ua here atu â tatou ia Iehova. Ua riro ïa te haapiiraa e te feruri-maite-raa i te Bibilia hoê o te mau mea faufaa roa ’‘e.—Phil. 2:16.

6. Ia au i te Ioane 1, 4:11, 20, 21, na te aha atoa e tauturu mai ia rahi noa ’tu â to tatou here?

6 E turai mai to te Atua here ia tatou ia here atoa i to tatou mau taeae e tuahine. (A taio i te Ioane 1, 4:11, 20, 21.) E mana‘o paha tatou mea ohie ia na reira no te mea te haamori ra ratou ia Iehova e te tutava atoa ra i te faaite i to ’na mau huru maitatai. Mai ia Iesu, ua ineine paha tatou i te horoa i to tatou ora no ratou. I te tahi râ taime, mea fifi ia here te tahi i te tahi. E hi‘o mai tatou i te tahi tupuraa i roto i te amuiraa no Philipi.

7. Eaha te haapiiraa e huti mai i ta Paulo a‘oraa ia Euodia raua Sunetuhe?

7 Ua rohi amui Euodia e Sunetuhe e te aposetolo Paulo. Ua tupu râ te tahi peapea i roto ia raua. I roto i ta ’na rata i te amuiraa no Philipi, ua faahiti roa ’tu Paulo i te i‘oa o na tuahine a a‘o ai ia raua ia faatupu i te “mana‘o hoê.” (Phil. 4:2, 3) Ua titau-atoa-hia ia faaue Paulo i te amuiraa atoa ia “rave i te mau mea atoa ma te amuamu ore e te aimârô ore.” (Phil. 2:14) Eita e ore ua tauturu ta ’na mau a‘oraa i na tuahine taiva ore, oia atoa râ i te toea o te amuiraa, ia here atu â i te tahi e te tahi.

No te aha e titauhia ia tapea i te hoê feruriraa maitai no nia i to tatou mau taeae? (A hi‘o i te paratarafa 8) *

8. Eaha te faaiti i to tatou here i te mau taeae e tuahine e eaha te tauturu mai?

8 Mai ia Euodia raua Sunetuhe, e  nehenehe to tatou here i te tahi e te tahi e iti mai ia haapao noa tatou i te mau hapa a to tatou mau taeae e tuahine. E hape tatou paatoa i te mau mahana atoa. Ia faaea noa tatou i nia i te mau hapa a vetahi ê, mea fifi ia here ia ratou. A hi‘o na, e riri paha tatou ia ore te tahi taeae e tauturu mai ia tamâ i te Piha a te Basileia. Ia feruri tatou i te mau hapa atoa ta ’na i rave, e ere te here te rahi mai, o te riri râ! Eaha ïa te titauhia ia rave i tera mau taime? A haamana‘o te ite ra Iehova i te mau hapa a tera taeae, oia atoa râ i ta tatou. Noa ’tu râ, te here noa ra Iehova ia ’na e ia tatou atoa. No reira, e here ana‘e ia vetahi ê mai ta Iehova e rave ra e e tapea ana‘e i te hoê feruriraa maitai no nia i to tatou mau taeae. E tutava ana‘e i te here te tahi i te tahi no te tahoê maite atu â!—Phil. 2:1, 2.

“TE MEA FAUFAA ROA ’‘E”

9. A papai ai i to Philipi, eaha te tahi o te mau “mea faufaa roa ’‘e” ta Paulo i mana‘o?

9 Ua aratai te varua mo‘a ia Paulo ia faaue i to Philipi e i te mau Kerisetiano atoa râ, ia “taa maitai . . . eaha te mea faufaa roa ’‘e.” (Phil. 1:10) Eaha te tahi o te mau mea faufaa roa ’‘e? O te haamo‘araa i te i‘oa o Iehova, te faatupuraa i ta ’na mau opuaraa, te hau e te auhoêraa o te amuiraa. (Mat. 6:9, 10; Ioa. 13:35) Ia haapao tatou i te reira i te mau mahana atoa, te here mau ra ïa tatou ia Iehova.

10. Eaha te titauhia ia tatou ia rave no te riro ei feia viivii ore?

10 Ua parau atoa Paulo e titauhia i te mau Kerisetiano ia riro “ei feia viivii ore.” Eita tatou e nehenehe e riro roa mai te Atua mo‘a ra o Iehova! Ia imi râ tatou i te mau ravea atoa ia rahi atu â to tatou here e ia haapao atu â tatou i te mau mea faufaa roa ’‘e, e riro tatou ei feia viivii ore i te aro o Iehova. Te tahi ravea no te faaite i to tatou here, o te oreraa ïa e faaturori ia vetahi ê.

11. No te aha e titauhia ia haapae i te faaturori ia vetahi ê?

11 E faaararaa faufaa roa te faaueraa ia riro ei feia “faaturori ore ia vetahi ê.” E nafea tatou e faaturori ai i te tahi taata? Na roto i ta tatou faaanaanataeraa, to tatou faaahuraa e te toroa aore ra ohipa ta tatou e maiti. E ere paha te reira i te mea ino, mea faufaa roa râ ia tâu‘a eita anei to te tahi atu mana‘o haava e hauti aore ra e turori. Ua parau Iesu mea maitai a‘e ia taamuhia i nia i to tatou a‘î te hoê ofai rahi a hurihia ’tu ai i raro i te moana, i te faaturoriraa i te hoê o ta ’na mau mamoe!—Mat. 18:6.

12. Eaha ta te hi‘oraa o na pionie e haapii mai ra?

12 Ua haapao maite te tahi na pionie faaipoipohia i ta Iesu faaararaa. I roto i ta raua amuiraa, ua paari te hoê taeae e ta ’na vahine bapetizo-apî-hia i roto i te hoê utuafare etaeta roa. Ua tiaturi na hoa faaipoipo eita e tia i te mau Kerisetiano ia haere i te fare teata noa ’tu e ere te hoho‘a teata i te mea ino. Ua hitimahuta roa raua a na reira ’i na hoa faaipoipo pionie. I muri mai, ua haapae roa na pionie i te haere i te fare teata e tae roa ’tu i te taime e paari mai ai te mana‘o haava o na hoa faaipoipo bapetizo-apî-hia. (Heb. 5:14) Na roto i te  haapaeraa ta raua i rave, ua haapapu na pionie i to raua here i na taeae e tuahine apî.—Roma 14:19-21; Ioa. 1, 3:18.

13. E nafea paha tatou e nehenehe ai e turai ia vetahi ê ia hara?

13 Te tahi atu ohipa o te faaturori, o te turairaa ia vetahi ê ia hara. A feruri na e ua tutava maoro te hoê piahi i te faarue i te peu inu ava. Ua taa ia ’na e titauhia ia haapae roa oia i te reira. Rave a‘era oia i te mau tauiraa e bapetizohia ’tura. I muri mai, ua titau manihini te hoê taeae ia ’na e turaihia ’tura to tatou taeae apî ia inu i te ava na roto i teie mau parau: “E Kerisetiano oe i teie nei, e paruru te varua mo‘a ia oe! Hoê tuhaa o te hotu o te varua, o te haavîraa ia oe iho. Ia haavî oe ia oe, e inu tano noa ïa oe!” A feruri na i te nehenehe e tupu ia faaroo to tatou taeae apî i tera huru paraparau!

14. E nafea te mau putuputuraa e tauturu mai ai ia haapao i te mau faaueraa atoa i roto i te Philipi 1:10?

14 E tauturu mai ta tatou mau putuputuraa ia haapao i te mau faaueraa atoa i roto i te Philipi 1:10. Na mua, te haamana‘o mai ra te maa pae varua i te mau putuputuraa eaha te mea faufaa roa ’‘e no Iehova. A piti, e faataahia mai e nafea ia faaohipa i ta tatou i haapii ia riro noa tatou ei feia viivii ore. A toru, e turaihia tatou “ia faaite i te here e ia rave i te mau ohipa maitai roa.”  (Heb. 10:24, 25) Rahi atu â tatou i te faaitoitohia e to tatou mau taeae, rahi atu â tatou i te here ia Iehova e ia ratou. Ia tupu maite na here e piti i roto i to tatou aau, eita roa tatou e faaturori i to tatou mau hoa Kerisetiano!

A TAMAU I TE RAVE I “TA TE PARAU-TIA E FAATUPU”

15. Eaha te auraa ia rave atu â i “ta te parau-tia e faatupu”?

15 Ua pure Paulo ia rave atu â to Philipi i te mau ohipa “ta te parau-tia e faatupu.” Oia hoi, te hereraa ia Iehova e i ta ’na mau tavini atoa e te faaiteraa ia vetahi ê i to ratou faaroo ia Iesu e to ratou tiaturiraa no a muri a‘e. (Phil. 1:11) I roto i te Philipi 2:15, te parau-atoa-hia ra e anaana te mau Kerisetiano “ei tiarama i roto i teie nei ao.” Mea tano roa tera faahoho‘araa, ua parau hoi Iesu o ta ’na mau pǐpǐ “te maramarama o teie nei ao.” (Mat. 5:14-16) Ua faaue atoa oia ia ratou ia “faariro i te taata” ei pǐpǐ na ’na e ia riro ei ite no ’na e “tae noa ’tu i te hopea o te fenua.” (Mat. 28:18-20; Ohi. 1:8) E rave tatou i “ta te parau-tia e faatupu” ma te apiti tamau i tera ohipa faufaa roa!

A tapeahia ’i Paulo i roto i te hoê fare i Roma, ua papai oia i ta ’na rata i te amuiraa no Philipi e ua poro atoa i te mau tiai e te feia i haere atu e farerei ia ’na (A hi‘o i te paratarafa 16)

16. Mea nafea te Philipi 1:12-14 e haapapu ai e nehenehe tatou e anaana ei tiarama noa ’tu te tupuraa fifi? (A hi‘o i te hoho‘a i te api matamua.)

16 E nehenehe tatou e anaana ei tiarama noa ’tu eaha te tupuraa. I te tahi taime, e nehenehe te hoê tupuraa fifi e horoa mai i te ravea no te poro i te taata. A papai ai te aposetolo Paulo i ta ’na rata i to Philipi, ua tapeahia oia i roto i te hoê fare i Roma. Ua faaea anei râ Paulo i te anaana ei tiarama? Aita, ua poro hoi oia i te mau tiai e te feia atoa o tei haere atu e farerei ia ’na. Ua poro  noa Paulo ma te itoito e ua tauturu to ’na hi‘oraa i te mau taeae ia tiaturi e ia faaitoito i te faaite i “te parau a te Atua ma te mǎta‘u ore.”—A taio i te Philipi 1:12-14; 4:22.

E imi ana‘e i te mau ravea atoa no te poro i te taata (A hi‘o i te paratarafa 17) *

17. Mea nafea te tahi mau taeae e tuahine i te tamauraa i te poro noa ’tu te fifi? A horoa i te hi‘oraa.

17 E rave rahi taeae e tuahine te pee nei i te itoito o Paulo. I te mau fenua ua opanihia te ohipa pororaa, ua imi ratou i te tahi atu mau ravea no te faaite i te parau apî oaoa. (Mat. 10:16-20) I te hoê o tera mau fenua, ua faaitoito te tahi tiaau haaati i te feia poro ia rave faahope roa i ta ratou tuhaa fenua, oia hoi ia poro i to ratou fetii, feia tapiri, hoa haapiiraa, hoa ohipa e te mau taata ta ratou i matau. E piti matahiti i muri iho, ua maraa roa te numera o te mau amuiraa i roto i tera tuhaa haaati. E haapiiraa faufaa mau te huti mai i to ratou hi‘oraa. Noa ’tu aita te ohipa pororaa i opanihia i ǒ nei, e imi ana‘e i te mau ravea atoa no te poro i te taata. Ua papu ia tatou e horoa mai iho â Iehova i te puai e titauhia no te tamau i te poro noa ’tu te fifi!—Phil. 2:13.

18. Eaha ta outou i faaoti papu i te rave?

18 I teie nei â, e faaoti papu ana‘e i te faaohipa i te mau a‘oraa ta Paulo i horoa i te mau Kerisetiano no Philipi. E haapao ana‘e i te mau mea faufaa roa ’‘e, e riro ana‘e ei feia viivii ore e te faaturori ore ia vetahi ê e e rave ana‘e i te mau ohipa ta te parau-tia e faatupu. E rahi atu â ïa to tatou here e e faahanahana tatou i to tatou Metua î i te here ra o Iehova!

HIMENE 17 “E tia ia ’u”

^ par. 5 I teie mau mahana hopea, mea titauhia ia puai noa to tatou here i te mau taeae e tuahine. E tauturu mai ta Paulo rata i to Philipi ia ite e nafea ia na reira noa ’tu te fifi.

^ par. 54 FAATAARAA O TE HOHO‘A: I te tamâraa o te Piha a te Basileia, ua faaea rii Joe no te paraparau i te hoê taeae e ta ’na tamaiti. Ua riri râ Mike e feruri atura, ‘E ere teie te taime no te paraparau, e taime râ no te tamâ!’ I muri mai, ua ite Mike i to Joe tautururaa i te hoê tuahine paari e haamana‘o atura oia i to Joe mau huru maitatai

^ par. 58 FAATAARAA O TE HOHO‘A: I te hoê fenua ua opanihia te ohipa pororaa, ua farerei te hoê taeae i te hoê taata ta ’na i matau. Ma te ore e huti i te ara-maite-raa o vetahi ê, ua faaite atu te taeae i te poroi o te Faatereraa arii. I muri mai, ua poro atoa oia i te tahi hoa ohipa i te taime faafaaearaa.