Eaha to roto?

Tapura tumu parau

Ioane Bapetizo: E hi‘oraa o te haapii mai e nafea ia oaoa noa

Ioane Bapetizo: E hi‘oraa o te haapii mai e nafea ia oaoa noa

TE HINAARO ra anei outou ia horoahia ’tu te hoê hopoia i roto i te amuiraa? Peneia‘e, e hopoia o te amohia ra e te tahi atu hoa Kerisetiano. Aore ra i fana‘o na paha outou i te hoê taviniraa taa ê, ua titauhia râ ia vaiiho i te reira no te matahiti rahi, te ma‘i, te fifi i te pae faufaa aore ra te hoê hopoia ru i roto i te utuafare. Aita ana‘e, ua na reira paha outou no te mau tauiraa i ravehia e te faanahonahoraa. Noa ’tu râ, te hinaaro mau ra outou e rave atu â i roto i ta Iehova taviniraa. E tupu mai iho â te mana‘o tatarahapa i te tahi taime. E nafea râ ia ore e toaruaru aore ra e inoino? E nafea ia tamau i te oaoa noa ’tu to outou tupuraa?

E haapii mai te hi‘oraa o Ioane Bapetizo e nafea ia tamau i te oaoa. Ua haafaufaa mau Ioane i te mau hopoia taa ê tei horoahia ia ’na. Eita e ore ua faaoti oia i te poihere i te reira i te roaraa o to ’na oraraa! Aita râ i tupu mai ta ’na i mana‘o, mea maoro a‘e o ’na i roto i te fare tapearaa. Noa ’tu râ, ua oaoa noa Ioane e tae noa ’tu i to ’na poheraa. Eaha tei tauturu ia ’na? E nafea tatou ia tamau i te oaoa ia ore to tatou oraraa e tupu mai ta tatou i mana‘o?

TE HOÊ TAVINIRAA OAOA

I te ava‘e Eperera o te matahiti 29, ua haamata Ioane i ta ’na taviniraa no te faaineine i te e‘a o te Mesia ma te poro: “A tatarahapa, ua fatata mai hoi te Faatereraa arii o te ra‘i.” (Mat. 3:2; Luka 1:12-17) E rave rahi tei farii i ta ’na poroi, e nahoa rahi tei haere mai na te vahi atea roa no te faaroo ia ’na, ua tatarahapa e bapetizohia ’tura. Ma te taiâ ore, ua faaara atoa Ioane i te mau tia haapaoraa haavarevare eaha ta ratou faautuaraa ia ore ratou e taui. (Mat. 3:5-12) I te ava‘e Atopa o te matahiti 29, ua ite Ioane i te tapao ua fatata ta ’na taviniraa i te hope a bapetizo ai oia ia Iesu. Mai reira mai, ua faaitoito Ioane i te taata ia pee ia Iesu, te Mesia fafauhia.—Ioa. 1:32-37.

No te hopoia taa ê i horoahia ia Ioane, teie ta Iesu i parau: “I rotopu i tei fanauhia mai e te vahine, aita hoê i rahi a‘e ia Ioane Bapetizo.” (Mat. 11:11) Papu, ua oaoa mau  Ioane i te mau haamaitairaa ta ’na i fana‘o. E rave rahi atoa i teie mahana o tei fana‘o i te haamaitairaa rahi. O taeae Terry hoê o ratou. Ua hau atu i te 50 matahiti oia e ta ’na vahine o Sandra i roto i te taviniraa taime taatoa. Te na ô ra Terry: “E rave rahi hopoia faahiahia mau ta ’u i fana‘o. I tavini na vau ei pionie, ei mero o te utuafare o te Betela, ei pionie taa ê, ei tiaau haaati, ei tiaau mataeinaa e ei pionie taa ê faahou i teie nei!” E noaa mai iho â te oaoa ia horoahia mai te hopoia taa ê i roto i te faanahonahoraa a Iehova. Tera râ, mai ta te hi‘oraa o Ioane Bapetizo e haapii mai ra, e titauhia ia tutava no te tamau i te oaoa, ia taui iho â râ to tatou tupuraa.

A MAURUURU NOA I TA IEHOVA I HOROA ’TU

Hoê mea faufaa tei tauturu ia Ioane bapetizo ia faaoromai tamau ma te oaoa, o to ’na ïa mauruuru i te mau hopoia i horoahia ia ’na. I muri a‘e i te bapetizoraa o Iesu, ua iti mai te mau pǐpǐ a Ioane, area ta Iesu, ua rahi mai ïa. Na ô atura ta Ioane mau pǐpǐ ia ’na: “A hi‘o na, te taata tei haere atu ia oe ra . . . te bapetizo nei ïa i te taata e te haere nei te taata atoa ia ’na ra.” (Ioa. 3:26) Pahono a‘era Ioane: “Te taata na ’na te vahine, o te tane faaipoipo ïa. Ia tia râ te hoa o te tane faaipoipo, a faaroo atu ai i to ’na reo, e oaoa roa ïa oia. Ua hope roa ïa vau i te oaoa.” (Ioa. 3:29) Aita Ioane i faaau ia ’na ia Iesu, aita atoa i mana‘o mea haihai a‘e te hopoia ta ’na i fana‘o i tei horoahia ia Iesu. Ua tamau oia i te haafaufaa i to ’na tiaraa ei “hoa o te tane faaipoipo” e ua tauturu te reira ia ’na ia oaoa noa.

Ua tauturu atoa te hoê feruriraa maitai ia Ioane ia tamau i te oaoa noa ’tu ua titauhia ia rave i te haapaeraa i roto i ta ’na taviniraa. E Nazira Ioane mai to ’na fanauraahia mai, eita e tia ia ’na ia inu i te uaina. (Luka 1:15) Ua parau Iesu: “Ua haere mai Ioane e aita i tamaa e i inu i te uaina.” Area Iesu e ta ’na mau pǐpǐ, aita i titauhia ia na reira. (Mat. 11:18, 19) Aita atoa i horoahia ia Ioane te mana no te faatupu i te semeio, area ta Iesu mau pǐpǐ, oia ïa. E i rotopu ia ratou, te vai ra o tei pee na ia Ioane na mua ’‘e. (Mat. 10:1; Ioa. 10:41) Noa ’tu râ, aita Ioane i faaau ta ’na taviniraa i ta ratou, ua amo maite râ oia ma te itoito i ta ’na iho hopoia.

E nafea ia tamau i te oaoa mai ia Ioane? E poihere ana‘e i te hopoia i horoahia mai i teie mahana i roto i ta Iehova faanahonahoraa. Te na ô faahou ra taeae Terry: “Aita vau i titau i te tahi atu hopoia, ua tiatonu noa râ vau i nia i tei horoahia mai. I roto i to ’u aau, aita e mana‘o tatarahapa, e taime oaoa ana‘e râ!”

E oaoa ’tu â tatou ia haamana‘o mea faufaa te mau hopoia atoa i roto i ta Iehova faanahonahoraa. No reira, a feruri maite i te fana‘oraa taa ê ia riro ei “hoa ohipa . . . no te Atua.” (Kor. 1, 3:9) Eita tatou e faaau ta tatou taviniraa i ta te tahi atu. Eita atoa e mana‘o mea haihai a‘e ta tatou hopoia i ta te tahi atu.—Gal. 6:4.

E TIATONU ANA‘E I NIA I TE MEA FAUFAA NO IEHOVA

Ua ite Ioane ua fatata ta ’na taviniraa i te hope, aita râ oia i mana‘o e tupu taue noa te reira. (Ioa. 3:30) I te matahiti 30, ono ava‘e i muri a‘e i te bapetizoraa o Iesu, ua hurihia Ioane i roto i te fare taperaa na nia i te faaueraa a Heroda. Ua rave râ Ioane i tei maraa ia ’na no te haapii ia vetahi ê i te mea maitai. (Mar. 6:17-20) Eaha tei tauturu ia ’na ia tamau i te oaoa noa ’tu tera mau tauiraa? Ua feruri noa oia eaha te mea faufaa i te aro o te Atua.

Ua papu ia Ioane o Iesu te Mesia, ua uiui râ paha oia e nafea Iesu e faatupu ai i te mau mea atoa ta te mau Papai i tohu no nia i te Mesia. I te mea e riro te Mesia ei Arii, fatata anei Iesu i te faatere? Na te reira anei e faatiamâ ia Ioane i te fare tapearaa? Ua faarooroo Ioane no nia i te mau ohipa ta  Iesu i rave. (Mat. 11:2; Luka 7:18) No te papu roa ’tu râ i te hopoia i horoahia ia Iesu, ua tono Ioane e piti o ta ’na mau pǐpǐ no te ani: “O oe anei ta matou i tiai noa na, aore ra e taata ê te tae mai?” (Luka 7:19) I te ho‘iraa mai na pǐpǐ e piti, eita e ore ua faaroo maite Ioane a faatia ’i raua i ta Iesu mau faaoraraa ma‘i. Ua faaue atoa Iesu ia raua: “A haere e faatia ia Ioane i ta orua i ite e i faaroo: Te ite faahou nei te matapo, te haere nei te piri‘o‘i, ua ora te lepera, te faaroo nei te tari‘a turi, ua tia faahou mai te feia pohe e te faaitehia nei te parau apî oaoa i te feia veve.”—Luka 7:20-22.

Eita e ore ua itoito-roa-hia Ioane i te faatiaraa a ta ’na nau pǐpǐ. Ua haapapu mau hoi te reira te faatupu ra Iesu i te mau parau tohu no nia i te Mesia. Aita Ioane i tiamâ mai i te fare tapearaa na roto ia Iesu, ua ite râ Ioane e ere ta ’na taviniraa i te mea faufaa ore. Noa ’tu to ’na tupuraa, ua tamau Ioane i te oaoa.

E oaoa noa tatou ma te ite i ta te mau taeae e tuahine e rave nei no te poro

Mai ia Ioane, e tiatonu ana‘e i nia i te taviniraa a Iehova no te faaruru maite na roto i te faaoromai e te oaoa. (Kol. 1:9-11) E nafea tatou ia na reira? E taio ana‘e i te Bibilia a feruri maite atu ai. E haamana‘o ana‘e e ere ta tatou i rave no te tavini ia Iehova i te mea faufaa ore. (Kor. 1, 15:58) Te na ô ra Sandra: “Ma te taio hoê pene i roto i te Bibilia i te mau mahana atoa, ua piri atu â vau ia Iehova. E tiatonu noa vau i nia ia ’na, eiaha râ i nia ia ’u!” E feruri ana‘e i ta te mau taeae e tuahine e rave ra no te tavini ia Iehova. E tauturu mai te reira ia ore e haapao noa ia tatou iho, ia tiatonu râ i ta Iehova e rave nei. Te parau faahou ra Sandra: “Maoti te JW Haapurororaa teata, e hoê atu â tatou e te faanahonahoraa a oaoa ’tu ai i roto i ta tatou taviniraa.”

Ua fana‘o Ioane i “te itoito e te mana mai to Elia” no te rave i ta ’na taviniraa. E mai ia Elia, e taata atoa Ioane “mai ia tatou te huru.” (Luka 1:17; Iak. 5:17) E pee ana‘e i te hi‘oraa o Ioane Bapetizo. E tamau ana‘e i te mauruuru a tiatonu noa ’i i nia i ta tatou taviniraa ia Iehova, e oaoa noa ïa tatou noa ’tu eaha te tupuraa.