Eaha to roto?

Tapura tumu parau

Ia faaruru oe i te ma‘i ino mau

Ia faaruru oe i te ma‘i ino mau

Te na ô ra Linda, 71 matahiti to ’na: “I to ’u iteraa e mariri ai taata to ’u i te mahaha e te aau rahi, ua papu ia ’u e pohe au. A ho‘i mai râ vau na te taote, ua na ô vau: ‘E ere roa ’tu mai ta ’u i mana‘o, ua hape au. E titauhia ra ia ’u te faaoromai no te faaruru i te reira.’”

Teie ta Elise, 49 matahiti, e parau ra: “Te mauiui ra vau no te hoê ma‘i ino mau o te haafifi ra i to ’u mau uaua uira i te pae aui o to ’u hoho‘a mata. I te tahi taime, e hepohepo roa vau no tera mauiui rahi. E rave rahi taime, e au ra e o vau ana‘e e ua mana‘o roa vau i te haapohe ia ’u.”

 

MAI te peu e ma‘i ino mau to oe aore ra to te hoê taata herehia, ua ite maitai oe e mea peapea mau te reira. Hau atu i te ino o te ma‘i, e titauhia ia faaruru i te mau huru aau ino mau. E rahi roa mai te mǎta‘u e te ahoaho a farerei ai i te taote, a ite ai e mea fifi ia noaa mai aore ra ia aufau i te tahi ravea rapaauraa aore ra a ite ai e mea ino te mau faahopearaa o te mau raau. E mea teimaha roa ia faaruru i te hepohepo e te ino o te ma‘i.

Ihea e itehia ’i te tauturu? Ua ite e rave rahi i te tamahanahanaraa maitai roa ’‘e a pure ai i te Atua e a taio ai i te mau irava Bibilia mahanahana mau.  E ite-atoa-hia te tauturu na roto i te here e te turu ta te utuafare e te mau hoa e horoa ’tu.

EAHA TE NEHENEHE E TAUTURU MAI?

Te horoa ra o Robert, 58 matahiti to ’na, i teie a‘oraa: “A faaruru i te ma‘i ma te tiaturi i te Atua e e tauturu mai oia ia faaruru i tera ma‘i. A pure ia Iehova. A faaite atu i to oe mau huru aau. A ani atu i te varua mo‘a. A ani atu i te puai ia nehenehe oe e faaitoito i to oe utuafare e ia vai mǎrû noa a faaoromai ai i te ma‘i.”

“Mea mahanahana mau i reira ana‘e te utuafare no te tauturu mai. I te mau mahana atoa, e taniuniu mai hoê aore ra piti taata no te ani mai: ‘Eaha to oe huru?’ E fana‘o vau i te mau faaitoitoraa no ǒ mai i te mau hoa no e rave rau fenua. E tauturu mai te reira ia maitai atu â vau e ia ore e tuu.”

Mai te peu e haere oe e farerei i te hoê hoa tei ma‘ihia, a tapao na i ta Linda e parau ra: “E hinaaro te taata ma‘i e ora mai te hoê taata aita to ’na e ma‘i. Aita iho â ïa oia e hinaaro e paraparau noa no nia i to ’na ma‘i. A paraparau ïa no nia i te mau tumu parau ta orua i matau i te aparau atu.”

Maoti te puai no ǒ mai i te Atua e te tamahanahanaraa o te Bibilia, oia atoa te tauturu î i te here a te utuafare e te mau hoa, e mea papu ïa tatou e mea hoona roa ia ora, noa ’tu te faaruru ra tatou i te hoê ma‘i ino mau.