“I te bapetizoraa . . . e ora atoa ’i outou i teie nei.”—PET. 1, 3:21.

HIMENE: 52, 41

1, 2. (a) Eaha te huru o te tahi mau metua ia hinaaro ta ratou tamarii e bapetizo? (b) Eaha te tumu e anihia ’i i te feia e bapetizohia ua oti anei ratou i te pûpû i to ratou ora ia Iehova? (A hi‘o i te hoho‘a matamua.)

TE HI‘O ra na metua a tia ’i ta raua tamahine o Maria i pihai iho i te feia e bapetizohia. Ua pahono Maria ma te reo puai e te papu i na uiraa e piti a te taeae orero. I muri iho, bapetizohia ’tura o ’na.

2 Papu, ua haapeu roa to Maria na metua i te pûpûraa o ’na i to ’na ora ia Iehova e bapetizohia ’tura. Na mua ’‘e râ i te reira, ua haapeapea rii te metua vahine o Maria. Ua feruri oia, ‘Mea apî roa anei Maria no te bapetizoraa? Ua taa maitai anei ia Maria e ere i te ohipa hauti ia pûpû ia ’na ia Iehova? E ere anei mea maitai a‘e ia tiai â?’ Tera iho â te mau uiraa e hiti mai i roto i te feruriraa o te tahi mau metua o te here ra i ta ratou tamarii. (Koh. 5:5) Eaha te tumu? No te mea ia pûpû te taata i to ’na ora ia Iehova a bapetizohia  ’tu ai, o te faaotiraa faufaa roa ’‘e ïa!—A hi‘o i te tumu parau tarenihia “ Ua pûpû anei outou ia outou ia Iehova?

3, 4. (a) Mea nafea to te aposetolo Petero faaiteraa i te faufaaraa o te bapetizoraa? (b) No te aha Petero i faahoho‘a ’i i te bapetizoraa i te hamaniraa o Noa i te araka?

3 Ua faahoho‘a te aposetolo Petero i te bapetizoraa i te hamaniraa o Noa i te araka. Ua na ô oia: “I te bapetizoraa o te faahoho‘a ra i te reira [te araka ïa] e ora atoa ’i outou i teie nei.” (A taio i te Petero 1, 3:20, 21.) Ua faaite te araka i te taata ua faaoti papu Noa i te rave i te hinaaro o te Atua. Ua rave maite Noa i ta Iehova ohipa mai ta ’na i ani atu. No te faaroo o Noa, ua faaora o Iehova ia ’na e to ’na utuafare i te diluvi. Eaha te haapiiraa ta Petero e horoa mai ra?

4 Ma te ite i te araka, ua papu i te taata ua faatupu Noa i te faaroo i te Atua. Ia ite te taata i te hoê o te bapetizohia, ua papu ia ratou ua oti oia i te pûpû ia ’na i te Atua no to ’na faaroo i te Mesia. Mai ia Noa, e auraro te feia o te bapetizohia i te Atua e e rave atoa i te ohipa ta ’na i ani mai. E mai ia Iehova i faaora ia Noa i te diluvi, e faaora atoa oia i ta ’na mau tavini bapetizohia o te tapea i te taiva ore ia haamouhia teie ao ino. (Mar. 13:10; Apo. 7:9, 10) Mea faufaa roa ïa ia pûpû ia tatou ia Iehova e ia bapetizohia. Ma te haamaoro, e nehenehe tatou e ere i te ora mure ore.

5. Eaha ta tatou e hi‘o mai i roto i teie haapiiraa?

5 E ere iho â te bapetizoraa i te ohipa hauti. I teie nei râ, e hi‘o ana‘e i te pahonoraa o teie na uiraa e toru: Eaha ta te Bibilia e parau ra no nia i te bapetizo raa? Eaha ta te taata e tia ia rave na mua ’‘e te bapetizoraa? No te aha e tia ia haamana‘o noa i te faufaaraa o te bapetizoraa ia haapii tatou i ta tatou tamarii aore ra piahi?

TA TE BIBILIA E PARAU RA NO NIA I TE BAPETIZORAA

6, 7. (a) Eaha te auraa o te bapetizoraa a Ioane? (b) To vai bapetizoraa tei taa ê roa e eaha te tumu?

6 I roto i te Bibilia, o Ioane Bapetizo te taata matamua tei bapetizo i te taata. (Mat. 3:1-6) Eaha te tumu e haere ai te taata ia ’na ra no te bapetizo? No te faaite ua tatarahapa roa ratou i ta ratou hara, te oreraa ïa e haapao i te ture a Mose. Hoê râ bapetizoraa ta Ioane i rave o tei taa ê roa. Ua fana‘o roa Ioane i te bapetizoraa ia Iesu, te Tamaiti tia roa a te Atua. (Mat. 13-17) Aita roa e hara ta Iesu, aita ïa i titauhia ia tatarahapa oia. (Pet. 1, 2:22) Eaha ïa te tumu i bapetizohia ’i Iesu? No te faaite ua farii oia i te pûpû ia ’na no te rave i te hinaaro o te Atua.—Heb. 10:7.

7 Ua haamata Iesu i te poro, e bapetizo ihora ta ’na mau pǐpǐ i te taata. (Ioa. 3:22; 4:1, 2) Ua bapetizo-atoa-hia tera mau taata no te faaite ua tatarahapa ratou i te ofatiraa i te ture a Mose. I muri iho râ i to Iesu poheraa e tia-faahou-raa, no te tahi atu tumu e bapetizohia ’i te feia e hinaaro e riro ei pǐpǐ na Iesu.

8. (a) I muri a‘e i to ’na tia-faahou-raa, eaha ta Iesu i faaue ia rave? (b) No te aha e tia ia bapetizohia te feia e pee ra ia Iesu Mesia?

8 I muri iho noa i to ’na tia-faahou-raa i te matahiti 33, ua paraparau Iesu i mua hau atu i te 500 taata. I rotopu ia ratou, te vai ra te tane, te vahine e te tamarii atoa paha. Eita e ore i tera taime Iesu i na ô ai: “A haere ïa e faariro i te taata o te mau nunaa atoa ei pǐpǐ na ’u ma te bapetizo ia ratou i te i‘oa o te Metua e o te Tamaiti e o te varua mo‘a, ma te haapii ia ratou ia haapao i te mau mea atoa ta ’u i faaue ia outou.” (Mat. 28:19, 20; Kor. 1, 15:6) Ua faaue Iesu i te feia e pee ra ia ’na ia faariro i te taata ei pǐpǐ. E ua parau atoa oia ia hinaaro te tahi e riro ei pǐpǐ na ’na, aore ra e rave i ta ’na “zugo,” ia bapetizohia ïa o ’na. (Mat. 11:29, 30) Ia mauruuru te Atua i te taviniraa a te tahi, e tia i tera taata ia farii te faaohipa ra te Atua ia Iesu no te faatupu i to ’na hinaaro. I muri noa mai te reira e bapetizohia ’i o ’na. Tera ana‘e te bapetizoraa ta te Atua e farii. Te vai ra te tahi atu mau haapapuraa i roto i te Bibilia o te faaite ra ua ite te mau pǐpǐ matamua a Iesu mea faufaa ia bapetizohia ratou. Aita roa ’tu ratou i mana‘o e tia ia tiai no te bapetizoraa.—Ohi. 2:41; 9:18; 16:14, 15, 32, 33.

EIAHA E TIAI NO TE BAPETIZORAA!

9, 10. Eaha ta tatou e haapii mai i te bapetizoraa o te taata Etiopia e to Saulo?

9 A taio i te Ohipa 8:35, 36. Ua farii te tahi taata Etiopia i te haapaoraa ati Iuda. Ua haere oia i te hiero i Ierusalema no te haamori i te Atua e ho‘i ihora i to ’na fare. Ua tono te melahi a Iehova ia Philipa no te poro atu i “te parau apî oaoa no Iesu.” Eaha te huru o te taata Etiopia? I to ’na taaraa mea faufaa ia farii i te Fatu ra o Iesu, ua hinaaro oia e rave i ta Iehova i titau i te mau Kerisetiano atoa. Ma  te ore e haamarirau, faaoti ihora ia bapetizohia o ’na.

10 Te vai ra atoa te hi‘oraa o te tahi ati Iuda o Saulo te i‘oa. Ua oti a‘ena te nunaa ati Iuda i te pûpûhia i te Atua, ua faarue râ o Iehova ia ratou no to ratou faaroo ore. I tiaturi na Saulo te tavini noa ra te mau ati Iuda i te Atua mai ta ’na e titau ra. No reira oia i hamani ino ai i te mau Kerisetiano. Ua faaroo atoa Saulo ua pohe o Iesu, aita râ i ite ua faatiahia mai oia. I te hoê mahana, ua paraparau mai ra o Iesu ia Saulo mai te ra‘i mai. I muri iho, ua farii oia i te tauturu a te tahi pǐpǐ a te Mesia o Anania te i‘oa. Te faaite ra te Bibilia eaha ta Saulo i rave, “tia a‘era e bapetizohia ’tura.” (Ohi. 9:17, 18; Gal. 1:14) Riro ihora oia te aposetolo Paulo. Ua tapao anei oe eaha ta ’na i rave i to ’na taaraa te faaohipa ra te Atua ia Iesu no te faatupu i to ’na hinaaro? Aita Saulo i haamaoro, ua faaoti ia bapetizohia o ’na.—A taio i te Ohipa 22:12-16.

No to ratou mauruuru i ta ratou e haapii ra i roto i te Bibilia, ua hinaaro te mau piahi ia bapetizohia ratou

11. (a) I teie mahana, eaha te tumu e faaoti ai te mau piahi ia bapetizohia ratou? (b) Eaha to tatou huru ia bapetizohia te tahi?

11 I teie atoa mahana, mea rahi te mau piahi, e feia apî aore ra paari, o te rave i te hoê â faaotiraa. No to ratou tiaturi e mauruuru i ta ratou e haapii ra i roto i te Bibilia, ua hinaaro ratou e pûpû ia ratou ia Iehova a bapetizohia ’tu ai. No reira e taime taa ê te oreroraa parau no te bapetizoraa i te mau tairururaa. E oaoa te mau Ite no Iehova ia farii te mau piahi i te parau mau a faaoti atu ai ia bapetizohia ratou. E oaoa iti rahi to te mau metua ia na reira atoa ta ratou tamarii. I te matahiti taviniraa 2017, ua hau atu i te 284 000 taata tei bapetizohia no te faaite ua pûpû ratou ia ratou ia Iehova. (Ohi. 13:48) Ua taa maitai ïa ia ratou e titauhia ia bapetizohia te mau Kerisetiano. Eaha râ te tia ia rave hou te bapetizoraa?

12. Eaha te tia i te piahi ia rave hou te bapetizoraa?

12 Hou te bapetizoraa, e tia i te piahi ia haapii i te parau mau no nia i te Atua, ta ’na opuaraa no te taata e te fenua, e eaha ta ’na i rave no te faaora i te huitaata. (Tim. 1, 2:3-6) I muri iho, e tia ia faatupu oia i te faaroo, e tauturu hoi te reira ia ’na ia haapao i te mau ture a te Atua e ia faaea i te rave i te mau mea ta ’Na e ore e au. (Ohi. 3:19) Mea faufaa roa, eita hoi o Iehova e farii i te euhe a te taata o te tamau ra i te rave i ta ’Na e ore e au. (Kor. 1, 6:9, 10) Eaha ’tu â te titauhia i te taata e hinaaro e pûpû ia ’na ia Iehova? Ia tamau oia i te tae i te mau putuputuraa, i te poro i te parau apî oaoa e te haapii ia vetahi ê. E titauraa tera no te feia atoa e hinaaro e pee i te Mesia. (Ohi. 1:8) E tia ia rave na mua te piahi i tera mau mea atoa. I muri iho, e  pûpû oia ia ’na ia Iehova na roto i te pure a bapetizohia ’tu ai.

IA RIRO TE BAPETIZORAA EI FA

A haapii ai i te taata, te tauturu ra anei tatou ia ratou ia taa mea faufaa roa te bapetizoraa? (A hi‘o i te paratarafa 13)

13. A haapii ai i te taata, no te aha e titauhia ia faaite mea faufaa ia bapetizohia no te riro ei Kerisetiano mau?

13 A tauturu ai i ta tatou tamarii e piahi ia rave i te mau mea atoa e titauhia, e haamana‘o ana‘e e tia i te feia e hinaaro mau e riro ei pǐpǐ na te Mesia ia faaoti i te bapetizohia. Eita ïa tatou e mǎta‘u i te parau atu i te taime tano mea faufaa roa ia pûpû ia ratou i te Atua e ia bapetizohia. E hinaaro tatou ia tamau ta tatou tamarii e piahi i te haere i mua i te pae varua e ia bapetizohia ratou.

14. No te aha eiaha e faahepo i te taata ia bapetizohia o ’na?

14 Eiaha râ e faahepo i ta tatou tamarii aore ra piahi ia bapetizo. Eita o Iehova e faahepo i te tahi noa ’‘e ia tavini ia ’na. (Ioa. 1, 4:8) A haapii ai râ i te taata, e tauturu ana‘e ia ratou ia taa mea faufaa ia faatupu i te auhoaraa piri e o Iehova. Ia mauruuru mau te piahi i ta ’na e haapii no nia i te Atua e ia hinaaro mau oia e rave i te titauhia ra i te mau Kerisetiano, e faaoti oia ma te aau tae ia bapetizohia o ’na.—Kor. 2, 5:14, 15.

15, 16. (a) Te vai ra anei te hoê faito matahiti tano no te bapetizoraa? A faataa. (b) Noa ’tu ua bapetizo-a‘ena-hia te piahi i roto i te tahi atu haapaoraa, no te aha e tia ia bapetizohia o ’na ei Ite no Iehova?

15 Te vai ra anei te hoê faito matahiti tano no te bapetizoraa? Aita, mea taa ê hoi te taata atoa e te vai ra te piahi o te haere oioi a‘e i mua i te tahi atu. Mea rahi o tei bapetizohia i to ratou apîraa e ua tapea i te taiva ore ia Iehova a paari ai. No vetahi, e taata paari a‘ena i to  ratou haapiiraa i te Bibilia e te bapetizoraahia. Te vai atoa ra ua hau atu i te 100 matahiti i te na reiraraa!

16 E matahiti paari to te tahi vahine i to ’na haapiiraa i te Bibilia e ua oti a‘ena o ’na i te bapetizohia i roto i tera e tera haapaoraa. No reira oia i ani ai i tei faatere i ta ’na haapiiraa e titauhia anei ia bapetizo-faahou-hia o ’na. Ua faaite atu te tuahine i te mau irava Bibilia o te pahono i ta ’na uiraa. I te taaraa iho â i tera vahine paari i ta te Bibilia e haapii ra, ua faaoti oioi ia bapetizohia o ’na noa ’tu fatata 80 matahiti to ’na. Eaha te haapiiraa e huti mai? E farii o Iehova i to tatou bapetizoraa mai te peu noa ua ite tatou i te parau mau no nia i to ’na hinaaro. Eaha te auraa? Noa ’tu ïa ua bapetizo-a‘ena-hia tatou i roto i te tahi atu haapaoraa, e tia ia bapetizohia tatou ei Ite no Iehova.—A taio i te Ohipa 19:3-5.

17. Eaha te tia i te taata ia feruri i te mahana e bapetizohia ’i o ’na?

17 E mahana oaoa roa te mahana e bapetizohia ’i te tahi. E taime atoa râ tera no te feruri maite i te titauhia ia rave i muri a‘e i te pûpûraa e te bapetizoraa. E ere roa ’tu i te mea ohie ia rave i te mau mea atoa e titauhia i te mau Kerisetiano mau. Te parau ra hoi te Bibilia, eiaha te mau pǐpǐ a Iesu “ia ora faahou no ratou iho, ia ora râ no ’na o tei pohe no ratou e tei faatiahia mai.”—Kor. 2, 5:15; Mat. 16:24.

18. Eaha te mau uiraa ta tatou e hi‘opoa i roto i to mua ’tu haapiiraa?

18 Mai ta tatou i hi‘opoa mai i roto i teie haapiiraa, e ere i te ohipa hauti ia faaoti i te riro ei Kerisetiano mau. No reira te metua vahine o Maria i uiui ai i te mau uiraa faahitihia i te omuaraa. E tamarii anei ta oe? Mai te peu e e, e hiti mai paha te tahi atu mau uiraa mai teie: “Ua ineine mau anei ta ’u tamarii no te bapetizoraa? Ua navai anei ta ’na i ite i teie nei no nia ia Iehova no te pûpû i to ’na ora i te Atua? E tia anei ia tiai ia oti ta ’na tau haapiiraa e ia noaa ta ’na ohipa no te bapetizo? E mai te peu e rave noa ’tu o ’na i te hara ino mau i muri a‘e i te bapetizoraa?” E hi‘opoa tatou i tera mau uiraa i roto i to mua ’tu haapiiraa. E ite atoa mai tatou e nafea te mau metua Kerisetiano e faaite ai i te feruriraa maitai no nia i te bapetizoraa.