Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Mati 2018

Ta te mau metua tuhaa ia naea i te tamarii te fa o te bapetizoraa

Ta te mau metua tuhaa ia naea i te tamarii te fa o te bapetizoraa

“Eaha ïa ta oe e tiai nei? A tia i nia, ia bapetizohia oe.”—OHI. 22:16.

HIMENE: 51, 135

1. Eaha ta te mau metua e hinaaro ia papu hou a bapetizohia ’i ta ratou tamarii?

TEIE ta tuahine Blossom Brandt i faatia no nia i te taime i faaoti ai oia e bapetizo ia ’na: “E rave rahi ava‘e to ’u parau-noa-raa ia papa e ia mama te hinaaro ra vau e bapetizo ia ’u, mea pinepine raua i te paraparau mai no nia i te reira. Ua hinaaro raua ia papu ua taa mau anei ia ’u te faufaaraa o ta ’u faaotiraa. I te 31 no Titema 1934, ua tae maira te mahana faufaa roa o to ’u oraraa.” I teie mahana, e hinaaro atoa te mau metua e tauturu i ta ratou tamarii ia rave i te faaotiraa maitai. Ia parau atu hoi ratou ia tiai â no te bapetizo ia ’na e aita e tumu papu, e haafifi te reira i te auhoaraa o ta ratou tamarii e o Iehova. (Iak. 4:17) Hou a bapetizohia ’i ta ratou tamarii, e hinaaro te mau metua feruriraa paari ia papu ua ineine anei oia i te riro ei pǐpǐ na te Mesia.

2. (a) Eaha te fifi ta te tahi mau tiaau haaati i tapao? (b) Eaha ta tatou e hi‘opoa mai i roto i teie haapiiraa?

 2 Ua tapao te tahi mau tiaau haaati e rave rahi taurearea e tae noa ’tu i tei hau atu i te 20 matahiti o tei ore i bapetizohia noa ’tu ua paari ratou i roto i te parau mau. E haere ratou i te putuputuraa, te pororaa e e parau atoa e Ite no Iehova ratou. Aita râ teie mau taurearea i pûpû ia ratou ia Iehova e i bapetizohia. I te tahi taime, aita vetahi i na reira no te mea ua mana‘o te mau metua aita ratou i ineine. I roto i teie haapiiraa, e hi‘opoa mai tatou e maha otoheraa eita ’i te tahi mau metua e faaitoito i ta ratou tamarii ia bapetizohia.

MEA APÎ ROA O ’NA!

3. Ua haapeapea te mau metua o Blossom no nia i te aha?

3 Ua haapeapea te mau metua o Blossom tei faahitihia i te omuaraa. Ua feruri paha raua, ‘Ia au i to ’na faito matahiti, ua taa maitai anei ia Blossom i te auraa o te bapetizoraa e e ere i te ohipa hauti?’ Eaha te tauturu i te mau metua ia ite ua ineine ta ratou tamarii no te pûpû ia ’na ia Iehova?

4. E nafea te faaueraa a Iesu i roto i te Mataio 28:19, 20 e tauturu ai i te mau metua i teie mahana?

4 A taio i te Mataio 28:19, 20. Aita te Bibilia e horoa ra i te hoê faito matahiti taa maitai no te bapetizo. Mea maitai râ ia feruri maite te mau metua i te auraa mau ia faariro i te taata ei pǐpǐ. E haapiiraa faufaa te huti mai i te auraa o te ta‘o Heleni i faaohipahia no te parau “e faariro i te taata . . . ei pǐpǐ” i roto i te Mataio 28:19. To ’na auraa, e haapii i te taata ma te haamana‘o i te fa, e tauturu ia ’na ia riro ei pǐpǐ. E pǐpǐ na te Mesia te taata o te ite e te taa i ta Iesu i haapii e ua hinaaro e auraro ia ’na. Mai te aiûraa mai â, e tia i te mau metua ia haapii i te tamarii e nafea ia naea i te fa ia pûpû i to ’na ora ia Iehova e ia riro ei pǐpǐ na te Mesia. Papu, eita te hoê aiû e faaî i te mau titauraa no te bapetizoraa. Te faaite ra râ te Bibilia e nehenehe te tamarii apî e taa e e haafaufaa i ta te Bibilia e haapii ra.

5, 6. (a) Eaha ta te Bibilia e faaite mai ra no nia i te bapetizoraa o Timoteo? (b) Eaha te ravea maitai a‘e no te mau metua no te tauturu i ta ratou tamarii?

5 Mea apî noa â te pǐpǐ ra o Timoteo i to ’na faaotiraa i te tavini ia Iehova. Ua parau te aposetolo Paulo ua haamata o Timoteo i te haapii i te Parau a te Atua mai te “tamarii-rii-raa.” E ere to ’na metua tane i te tavini no Iehova, ua tauturu atu râ to ’na metua vahine e mama ruau ia haafaufaa i te Parau a te Atua. No reira Timoteo i faaite ai i te hoê faaroo puai mau. (Tim. 2, 1:5; 3:14, 15) Peneia‘e e 20 matahiti aore ra iti a‘e to Timoteo i to ’na fana‘oraa i te hopoia taa ê i roto i te amuiraa.—Ohi. 16:1-3.

6 Mea taa ê te mau tamarii atoa e eita e noaa ia ratou te feruriraa paari i te hoê â faito matahiti. E taa vetahi i te parau mau, e rave i te faaotiraa paari e e hinaaro e bapetizohia noa ’tu mea apî ratou. Area te tahi atu, ua titauhia ia paari rii mai ratou no te na reira. Eita te mau metua feruriraa paari e faahepo i te tamarii ia bapetizo. E tauturu atu râ ratou ia haere i mua i te pae varua ia au i to ’na iho huru tupuraa. E oaoa te mau metua ia haapao ta ratou tamarii i te Maseli 27:11. (A taio.) Ia haamana‘o râ ratou i te fa, o te tautururaa i ta ratou tamarii ia riro ei  pǐpǐ na te Mesia. Ma te mana‘o noa i te reira, e uiui paha ratou, ‘Ua navai anei te faito ite o ta ’u tamarii no te pûpû ia ’na i te Atua a bapetizohia ’tu ai?’

UA NAVAI ANEI TO ’NA FAITO ITE?

7. E titauhia anei ia ite i te mau tuhaa atoa o te mau haapiiraa a te Bibilia hou te bapetizoraa? A faataa.

E tia i te mau pǐpǐ atoa a te Mesia ia tamau i te haapii noa ’tu ua bapetizohia ratou

7 Ma te haapii atu, e tauturu te mau metua i ta ratou tamarii ia fana‘o i te ite papu no nia i te parau mau. Na te reira hoi e turai i te tamarii ia hinaaro e pûpû ia ’na i te Atua. Te auraa anei e titauhia ia ite i te mau tuhaa atoa o te mau haapiiraa a te Bibilia hou a pûpû ai ia ’na i te Atua e a bapetizohia ’i? E ere, e tia hoi i te mau pǐpǐ atoa a te Mesia ia tamau i te haapii noa ’tu ua bapetizohia ratou! (A taio i te Kolosa 1:9, 10.) Eaha ïa te titauhia i te taata ia ite hou te bapetizoraa?

8, 9. Eaha tei tupu no te tahi tiai fare auri i Philipi e eaha te haapiiraa e huti mai?

8 E tauturu te hi‘oraa o te tahi utuafare i tahito i te mau metua. (Ohi. 16:25-33) I te piti o to ’na tere mitionare i te matahiti 50, ua haere Paulo i Philipi. I reira, ua pari-haavare-hia raua Sila, ua tapeahia e hurihia ’tura i roto i te fare tapearaa. I taua po ra, tupu ihora te hoê aueueraa fenua e matara a‘era te mau opani atoa o te fare auri. Ua mana‘o te tiai ua horo te mau mau auri atoa, opua ihora e haapohe ia ’na. Auaa râ ua tuô Paulo i ore ai te tiai i na reira. Eaha tei tupu i muri iho? Ua haapii Paulo raua Sila i te tiai e to ’na utuafare i te parau mau no nia ia Iesu. Ua tiaturi ihora i ta ratou i haapii e ua taa i te faufaaraa ia auraro ia Iesu. I tera iho â taime, bapetizohia ’tura ratou. Eaha te haapiiraa e huti mai?

9 E faehau Roma paha te tiai na mua ’‘e. Aita oia i haapii i te Parau a te Atua. No te riro ei Kerisetiano, ua haapii oia i te pue parau mau faufaa a te Bibilia, ua taa i ta Iehova e titau i ta ’na mau tavini e ua hinaaro e rave i ta Iesu i haapii. Te mea ta ’na i haapii i roto i tera area taime poto, ua tauturu ïa ia ’na ia hinaaro ia bapetizohia. Papu, ua tamau oia i te haapii atu â i muri a‘e i to ’na bapetizoraa. Eaha te rave ia faaite atu ta outou tamarii te opua ra o ’na e bapetizo no to ’na here ia Iehova e no to ’na hinaaro e rave i ta ’na e titau ra? A vaiiho ia ’na ia paraparau e te mau matahiapo. Na ratou e faaoti ua faaî anei oia i te mau titauraa no te bapetizoraa. * Mai te mau Kerisetiano bapetizohia atoa, e tamau o ’na i te haapii atu â no nia ia Iehova, e peneia‘e e a muri noa ’tu.—Roma 11:33, 34.

MEA MAITAI A‘E IA HAERE O ’NA I TE HAAPIIRAA TEITEI!

10, 11. (a) Eaha ta te tahi mau metua e mana‘o ra? (b) Eaha mau na te parururaa papu no te tamarii?

10 Te mana‘o ra te tahi mau metua mea maitai a‘e ia haere na mua i te haapiiraa  teitei e ia noaa te ohipa papu hou ta ratou tamarii a bapetizohia ’i. E mana‘o maitai paha to ratou, e tia râ ia uiui te mau metua, ‘E maitai mau anei ta ’u tamarii ia na reirahia? Te tuati ra anei i ta te Bibilia e haapii ra? E nafea ia faaohipa i to tatou oraraa mai ta Iehova e ani mai ra?’—A taio i te Koheleta 12:1.

11 Mea faufaa roa ia haamana‘o te patoi ra teie nei ao e te mau mea atoa i roto, i te hinaaro e te mana‘o o Iehova. (Iak. 4:7, 8; Ioa. 1, 2:15-17; 5:19) O te auhoaraa e o Iehova te parururaa maitai roa ’‘e i mua i te enemi ra o Satani, ta ’na ao e te feruriraa ino o teie nei ao. Eaha te tupu ia haafaufaa na mua te mau metua i te haapiiraa e te ohipa? E mana‘o ta ratou tamarii mea faufaa a‘e te mau mea a teie nei ao i te auhoaraa piri e o Iehova. Mea atâta roa ïa ia na reira! E te mau metua î i te here e, e hinaaro mau anei outou na teie ao e haapii i ta outou tamarii eaha te faaoaoa mau ia ’na? O te tuuraa ia Iehova i te parahiraa matamua te ravea hoê roa ia maitai e ia oaoa mau ta outou tamarii!—A taio i te Salamo 1:2, 3.

E IA HARA NOA ’TU O ’NA?

12. Eaha te tumu te tahi mau metua e mana‘o ai mea maitai a‘e ia tiai ta ratou tamarii no te bapetizo?

12 Ua faataa te tahi metua vahine i te tumu aita o ’na i hinaaro ia bapetizohia ta ’na tamahine. Te na ô ra o ’na: “Mea haama ia parau, te tumu mau râ aita vau i hinaaro, o te tiavaruraa ïa.” Mai ia ’na, te mana‘o atoa ra te tahi mau metua mea maitai ia tiai ia paari a‘e ta ratou tamarii, a‘unei oia e rave ai i te hara. (Gen. 8:21; Mas. 22:15) No tera mau metua, e mana‘o paha ratou ia ore ta ratou tamarii ia bapetizohia, eita ïa ratou e tiavaruhia. Eaha râ te vahi ino i roto i tera huru feruriraa?—Iak. 1:22.

13. Aita ana‘e te tahi i bapetizohia, te auraa anei eita oia e amo i ta ’na hopoia i mua ia Iehova? A faataa.

13 Eiaha iho â te mau metua e turai i te  tamarii ia bapetizo aita ana‘e oia i ineine i te pûpû ia ’na ia Iehova. Mea hape râ ia mana‘o eita te tamarii e amo i ta ’na hopoia i mua ia Iehova no te mea aita o ’na i bapetizohia. I te taime hoi i ite ai o ’na eaha te mea maitai e te mea ino i te aro o te Atua, e titau o Iehova ia ’na ia au i ta ’na e rave. (A taio i te Iakobo 4:17.) Eita te mau metua feruriraa paari e imi i te otoheraa ia ore ta ratou tamarii ia bapetizohia. Mai ia ratou e hinaaro i te mea maitai i te aro o Iehova e e hae i ta ’na e ore e au, e haapii atoa te mau metua i te reira i te tamarii i te nainairaa iho â. (Luka 6:40) Ua here ana‘e te tamarii ia Iehova, eita oia e rave i te hara rahi, e hinaaro râ e rave i te mea maitai.—Isa. 35:8.

TE TUHAA A TE AMUIRAA

14. E nafea te mau matahiapo e tauturu ai i te mau metua?

14 E nehenehe te mau matahiapo e tauturu i te mau metua ma te faaite i te feruriraa maitai a faahiti ai i te mau fa i roto i te taviniraa a Iehova. Te haamana‘o ra te tahi tuahine ua haere mai taeae Russell e paraparau ia ’na i te onoraa o to ’na matahiti. Te na ô ra tuahine: “Ua rave oia 15 minuti ia paraparau mâua no nia i ta ’u mau fa pae varua.” Eaha te maitai i itehia i muri a‘e? Ua riro mai te tuahine ei pionie hau atu i te 70 matahiti te maoro! E nehenehe mau te mau parau faaitoito e te maitai e taui i te oraraa o te taata. (Mas. 25:11) E nehenehe atoa te mau matahiapo e ani i te mau metua e ta ratou tamarii ia turu i te mau ohipa e ravehia i te Piha a te Basileia. E horoa ratou i te ohipa e au i te faito matahiti e puai o te tamarii.

15. E nafea ’tu â te amuiraa e tauturu ai i te mau tamarii e feia apî?

15 E nafea ’tu â te amuiraa e tauturu ai i te mau tamarii e feia apî? Ma te faaite atu mea faufaa roa ratou no te amuiraa. Ua horoa anei te tahi i te pahonoraa maitai aore ra ua rave i ta ’na tuhaa i  te putuputuraa o te hebedoma? Ua poro anei oia ia vetahi ê i te fare haapiiraa aore ra ua mau papu i mua i te faahemaraa? E mau tapao ana‘e tera o te haapapu ra te imi ra te feia apî i te auhoaraa piri e o Iehova. E te mau taeae e tuahine e, ia ite outou ia ratou ia na reira, a haapopou oioi atu! E tutava ana‘e i te faataa i te taime no te paraparau e o ratou na mua ’‘e e i muri a‘e i te putuputuraa. E taa ïa i te mau tamarii e feia apî, e parahiraa iho â to ratou i roto i “te amuiraa rahi.”—Sal. 35:18.

TE TUHAA A TE MAU METUA

16, 17. (a) No te aha mea faufaa ia bapetizohia ta outou tamarii? (b) Eaha te oaoa ta te mau metua Kerisetiano e nehenehe e fana‘o? (A hi‘o â i te hoho‘a matamua.)

16 O te haapiiraa i ta ratou tamarii ia here ia Iehova hoê o te mau haamaitairaa rahi roa ’‘e a te mau metua. (Sal. 127:3; Eph. 6:4) I roto i te nunaa Iseraela, ua pûpûhia te mau tamarii ia Iehova mai to ratou fanauraa mai â. E ere râ mai tera no ta tatou mau tamarii. E ere no te mea te here ra to ’na mau metua ia Iehova e mea au na raua te parau mau, e na reira atoa ïa ta raua tamarii. Mai to ’na fanauraa mai â, e tia ia haapii atu na metua ma te tapea noa i te fa ia riro oia ei pǐpǐ na te Mesia, ia pûpû ia ’na i te Atua a bapetizohia ’tu ai. Na roto hoi i te reira e ta ’na taviniraa taiva ore ia Iehova, e nehenehe ta outou tamarii e faaorahia ia tupu te ati rahi. Te vai ra anei te tahi atu mea faufaa a‘e i tera?—Mat. 24:13.

Te fa a te mau metua, e tauturu i ta ratou tamarii ia riro ei pǐpǐ na te Mesia (A hi‘o i te paratarafa 16, 17)

17 A haamana‘o na ia Blossom o tei faaite i to ’na mau metua te hinaaro ra o ’na e bapetizo ia ’na. I to raua papuraa ua ineine ta raua tamahine, ua turu na metua ia ’na i roto i ta ’na faaotiraa. Te faataa ra Blossom i ta to ’na papa i rave i te po na mua ’tu te mahana o to ’na bapetizoraa: “Ua ani oia ia matou paatoa ia tuturi e ua faaoti i te pure. Ua parau oia ia Iehova e oaoa iti rahi to ’na ua faaoti ta ’na tamahine here i te pûpû i to ’na ora ia ’Na.” Hau atu i te 60 matahiti i muri a‘e, ua na ô Blossom: “A mairi noa ’tu ai te tau, eita roa e mo‘e ia ’u tera po!” E te mau metua e, ia tamata atoa outou i te hoê â oaoa e mauruuru i te ite i ta outou tamarii ia pûpû ia ratou ia Iehova e ia bapetizohia ei tavini no ’na!

^ par. 9 E nehenehe te mau metua e aparau e ta ratou tamarii ma te faaohipa i te mau api 304-310 o te buka Les jeunes s’interrogent—Réponses pratiques, volume 2. A hi‘o atoa i te “Pahonoraa i ta outou mau uiraa” i te api 2 o Ta tatou taviniraa i te Basileia no Eperera 2011.