Eaha to roto?

Tapura tumu parau

Ite no Iehova

Maiti te reo Tahiti

“E faaroo mai i te a‘o ia paari”

“E faaroo mai i te a‘o ia paari”

“E te mau tamarii e . . . e faaroo mai i te a‘o ia paari.”—MAS. 8:32, 33.

HIMENE: 56, 89

1. E nafea ia noaa ia tatou te paari e e tauturu mai te reira ia aha?

O IEHOVA te tumu o te paari e e horoa noa oia i te reira i te taata. Te na ô ra te Iakobo 1:5: “Ia ere noa ’tu hoê o outou i te paari, ia tamau noa ïa oia i te ani atu i te Atua, e horoa noa mai hoi oia i te taata atoa ma te ore e faahapa.” Te tahi ravea ia noaa mai te paari, o te fariiraa i te a‘o a Iehova. E tauturu mai hoi te reira ia ore e rave i te mea ino e ia vai piri noa ia Iehova. (Mas. 2:10-12) E noaa atoa mai ïa ia tatou te ora mure ore.—Iuda 21.

2. E nafea tatou e ite ai mea maitai te a‘o a te Atua?

2 Ia a‘ohia tatou, e ere i te mea ohie ia farii aore ra ia hi‘o i te reira ei maitai no tatou. Te tumu, no to tatou huru tia ore e peneia‘e, no te haapiiraa i horoahia mai i te tamariiraa. Ia ite râ tatou i te mau maitai o te a‘o a te Atua i roto i te oraraa, e taa ia tatou ua na reira o Iehova no to ’na here ia tatou. Te na ô ra te Maseli 3:11, 12: “Eiaha oe e inoino, e tau tamaiti, i te a‘o a Iehova.” Te parau atoa ra te irava i muri iho: “O tei herehia e Iehova ra, o ta ’na ïa e a‘o mai.” Te imi noa ra ïa o Iehova i to tatou maitai. (A taio i te Hebera 12:5-11.) O te Atua tei ite mau i to tatou huru, e horoa mai ïa o ’na i te a‘o tano i te taime e titauhia. I roto i teie haapiiraa, e hi‘opoa tatou e maha tuhaa o te a‘o: (1) Te faatitiaifaroraa ia tatou iho, (2) ta te metua a‘o i ta ratou tamarii, (3) te a‘o na roto i te  amuiraa e (4) te mauiui ino roa ’tu â ia ore te a‘o e fariihia.

E RIRO EI TAATA FERURIRAA PAARI MA TE FAATITIAIFARO IA TATOU IHO

3. E nafea te tamarii e haapii ai ia faatitiaifaro ia ’na iho? A horoa i te tahi hi‘oraa.

3 Ia faatitiaifaro tatou ia tatou iho, e haavî tatou i to tatou huru e mana‘o. E titauhia râ ia haapii i te na reira. A hi‘o na i te hoê tamarii o te haapii i te faatere i te pereoo tataahi. I te haamataraa, na te metua e faaafaro i te pereoo tataahi. I muri mai, e haapii te tamarii eaha te rave ia ore o ’na ia topa e e nehenehe te metua e vaiiho rii ia ’na maa taime. Ua papu ana‘e râ i te metua ua ite maitai te tamarii i te faatere i te pereoo tataahi, e vaiiho roa ’tu oia. Ma te haapii atu “i te a‘o e te faaararaa a Iehova,” e tauturu te mau metua i te tamarii ia faatitiaifaro ia ’na iho e ia riro ei taata feruriraa paari.—Eph. 6:4.

4, 5. (a) No te aha mea faufaa ia faatitiaifaro ia tatou iho no te ahu i “te huru taata apî”? (b) No te aha eiaha ia haaparuparu ia hape noa ’tu tatou?

4 Hoê â raveraa no te hoê taata paari o te haamata i te haapii o vai o Iehova. E ite paha oia e nafea ia faatitiaifaro ia ’na iho, aita râ i noaa ’tura ia ’na te feruriraa paari o te hoê Kerisetiano. E naea râ ia ’na tera faito ia haamata oia i te ahu i “te huru taata apî” e te haa mai te Mesia. (Eph. 4:23, 24) Ma te faatitiaifaro ia tatou iho, e haapii tatou i te “haapae i te haerea ino e oia atoa te mau hinaaro o teie nei ao, e ia ora ma te mana‘o paari e te parau-tia e te haamori i te Atua ana‘e i roto i teie nei faanahoraa o te ao nei.”—Tito 2:12.

5 E taata hara râ tatou paatoa. (Koh. 7:20) Ua hape ana‘e tatou, te auraa anei aita tatou i ite i te faatitiaifaro ia tatou iho? E ere. A hi‘o na i te parauhia ra i roto i te Maseli 24:16: “E hi‘a te parau-tia e ia taihitu noa ’tu i te hi‘araa, e e tia faahou mai.” Eaha râ te tauturu ia “tia faahou mai”? E ere to tatou iho puai, to te varua mo‘a râ. (A taio i te Philipi 4:13.) Ua riro te haavîraa ia tatou iho ei tuhaa o te hotu a te varua, e tuati te reira i te faatitiaifaroraa ia tatou iho.

6. E nafea tatou e au roa ’i i te haapii i te Parau a te Atua? (A hi‘o i te hoho‘a matamua.)

6 E tauturu mai te pure, ta tatou iho haapiiraa Bibilia e te feruriruriraa ia faatitiaifaro ia tatou iho. E mai te peu e ere i te mea ohie aore ra eita outou e au ia haapii i te Bibilia? Eiaha e haaparuparu! A farii râ i ta Iehova tauturu “ia hiaai outou” i ta ’na Parau. (Pet. 1, 2:2) A ani i ta ’na tauturu no te faatitiaifaro ia outou iho a nehenehe atu ai outou e faaherehere i te taime no te haapii i te Bibilia. E haamata paha outou i te haapii tau minuti noa. Mea ohie a‘e ïa ia rave i ta outou haapiiraa e e riro te reira ei taime oaoa. E au roa atoa outou i te taime ta outou e faataa no te feruriruri i te mau mana‘o faufaa roa no ǒ mai ia Iehova ra.—Tim. 1, 4:15.

7. Ma te faatitiaifaro ia tatou iho, e nafea e naea ’i ia tatou te mau fa no te tavini atu â ia Iehova?

7 Ma te faatitiaifaro ia tatou iho e naea ’i te mau fa no te tavini atu â ia Iehova. A hi‘o na i te hi‘oraa o te tahi metua tane o tei tapao e ere oia i te mea itoito faahou i roto i te taviniraa. Haamau ihora oia i te fa e riro ei pionie tamau. Eaha tei tauturu atu ia faatitiaifaro ia ’na iho? Ua taio oia i te mau tumu parau no nia i te taviniraa  pionie i roto i ta tatou mau vea e ua ani i te tauturu na roto i te pure. Ua piri atu â to ’na auhoaraa e o Iehova. I te tahi taime, ua rave atoa oia i te taviniraa pionie tauturu. Aita oia i vaiiho i te hoê noa ’‘e mea e tapea ia ’na, ua tiatonu noa râ i nia i ta ’na fa. Aita i maoro i muri a‘e, riro mai nei to tatou taeae ei pionie tamau.

A HAAPII I TE TAMARII I TE A‘O A IEHOVA

Aita te tamarii i ite i te faataa ê i te mea maitai i te mea ino, e titauhia ïa te a‘o (A hi‘o i te paratarafa 8)

8-10. Eaha te tauturu i te mau metua ia haapii i ta ratou tamarii ia tavini ia Iehova? A horoa i te tahi hi‘oraa.

8 Ua horoa o Iehova i te mau metua i te hopoia ia haapii i ta ratou tamarii i “te a‘o e te faaararaa a Iehova.” (Eph. 6:4) E ere roa ’tu râ i te mea ohie ia na reira i roto i teie nei ao. (Tim. 2, 3:1-5) Aita te tamarii i ite i te faataa ê i te mea maitai i te mea ino, aita â to ratou mana‘o haava i haapiihia ’tura. E titauhia ïa te a‘o no te na reira. (Roma 2:14, 15) Ua faataa te tahi aivanaa Bibilia, o te tupuraa o te tamarii atoa te auraa o te ta‘o Heleni no te parau “a‘o.” Na roto i te a‘o a te metua, e haapiihia ïa te tamarii ia riro ei taata feruriraa paari i muri a‘e.

9 Ia a‘o te metua ma te here, te paruru ra oia i ta ’na tamarii. Eaha tatou e parau  ai mai tera? E haapii hoi te tamarii, e tiamâraa to ’na, te vai ra râ te otia. E tauturu atoa te reira ia ’na ia taa, e ooti iho â o ’na i ta ’na e ueue. Ia au i te vahi ratou e ora ’i, e taui hanoa te mana‘o o te taata no nia i te huru haapiiraa e horoa i te tamarii. Area te mau metua o te faaroo i te Atua, eita ratou e haapii ma te turui i nia i te mana‘o taata aore ra e ui eaha te tia ia rave.

10 E nehenehe tatou e haapii mai i te hi‘oraa o Noa. I to Iehova parauraa ’tu ia hamani i te araka, aita roa o Noa i ite e nafea ia rave i te reira. Ua titauhia ia turui o ’na i nia ia Iehova e ia rave noa mai ta Iehova i faaue atu. Ua na reira anei o Noa? E, te na ôhia ra: “Ta ’na ïa i rave maite.” (Gen. 6:22) Maoti te reira i ora ’i o Noa e to ’na utuafare! Hou i te diluvi, e ere atoa i te mea ohie no te mau metua ia haapii i ta ratou tamarii. Noa ’tu râ, ua riro o Noa ei metua tane maitai. Eaha te tumu? Ua vaiiho o ’na i te paari o te Atua ia aratai ia ’na no te a‘o i ta ’na mau tamarii e no te faaite i te hi‘oraa maitai.—Gen. 6:5.

11. No te aha ia tutava maite te mau metua i te haapii i ta ratou tamarii?

11 E te mau metua, e nafea ia “rave maite” i ta outou hopoia? A faaroo ia Iehova e a farii i ta ’na aratairaa no te haapii i ta outou tamarii. A faaohipa i te mau a‘oraa i roto i ta ’na Parau e no ǒ mai i ta ’na faanahonahoraa. Eita e ore e haamauruuru atu ta outou tamarii i muri a‘e! Teie ta te tahi taeae i papai: “E mauruuru rahi to ’u ia papa e mama no te haapiiraa ta raua i horoa mai. Ua tutava noa raua i te haaputapû i to ’u aau.” Ua parau tera taeae na to ’na mau metua i tauturu ia ’na ia riro ei hoa piri no Iehova. Noa ’tu e rave maite te mau metua i ta ratou hopoia, e nehenehe te tamarii e faaoti i te faarue ia Iehova. Ua rave ana‘e râ te metua i ta ratou tuhaa, eita te mana‘o haava e faahapa ’tu. Hau atu â, e tamau ratou i te tiaturi e ho‘i mai te tamarii ia Iehova i te hoê mahana.

12, 13. (a) Ia tiavaruhia ta ratou tamarii, e nafea te mau metua ia faaite o te Atua ta ratou e faaroo? (b) Eaha te mau maitai ta te tahi utuafare i fana‘o a faaroo ai na metua ia Iehova?

12 E tupuraa fifi no te tahi mau metua ia tiavaruhia ta ratou tamarii e e tamata te reira i to ratou faaroo. Ua tiavaruhia e ua faarue te tamahine a te tahi tuahine i te fare. Te faatia ra tera tuahine: “Ua imi au i roto i ta tatou mau papai i te mau parau ei otoheraa no te farerei i ta ’u tamahine e ta ’u mootua.” Tera râ, ua tauturu atu ta ’na tane ma te mǎrû ia farii ua amo raua i ta raua hopoia e e titauhia i teie nei ia faaite eita raua e taiva ia Iehova.

13 Tau matahiti i muri a‘e, ua faaho‘ihia mai ta raua tamahine i roto i te amuiraa. Te na ô ra te tuahine: “I teie nei, fatata pauroa te mahana, e niuniu aore ra e hapono mai oia i te poroi vini! Mea faatura roa na ’na ia mâua to ’na papa no te mea ua ite o ’na o te Atua ta mâua e faaroo. I teie nei, mea piri roa matou i te tahi e te tahi.” Ia tiavaruhia ta outou tamarii, e haapao anei outou i te a‘oraa ia “tiaturi ia Iehova ma to aau atoa”? E faaite anei outou ia Iehova eita outou e tiaturi i to outou iho mana‘o? (Mas. 3:5, 6) Eiaha e haamo‘e, e faaite mai te a‘o a Iehova, o ’na te mea paari a‘e e mea here na ’na ia tatou. A feruri na, ua horoa roa o Iehova  i ta ’na Tamaiti no te taata atoa, no ta outou atoa ïa tamarii! E hinaaro te Atua ia noaa te ora mure ore i te taata atoa. (A taio i te Petero 2, 3:9.) No reira e te mau metua, a tamau i te tiaturi o te a‘o a Iehova e ta ’na ana‘e aratairaa te mea maitai. Noa ’tu e ere i te mea ohie ia rave i ta te Atua e ani mai ra i te tahi taime, a faaroo i ta ’na a‘o, eiaha e patoi atu.

TE A‘O I ROTO I TE AMUIRAA

14. Eaha te maitai e noaa mai i te haapiiraa a Iehova na roto mai i “te tiaau haapao maitai”?

14 Ua fafau o Iehova i te aupuru, te paruru e te haapii i te amuiraa Kerisetiano e e rave rau ravea ta ’na e faaohipa. Ua faatoroa oia i ta ’na Tamaiti no te aupuru i te amuiraa. Area Iesu, ua maiti ïa i “te tiaau haapao maitai” no te horoa mai i te maa pae varua o te tauturu ia tatou ia tapea i te taiva ore. (Luka 12:42) E horoa mai tera “tiaau” i te haapiiraa, aore ra a‘o, faufaa mau. Ua faaroo a‘ena anei outou i te hoê oreroraa parau o tei tauturu atu ia taui i to outou huru e mana‘o? Aore ra, peneia‘e mea na roto i te taioraa i te tahi tumu parau i roto i ta tatou mau vea. E nehenehe outou e haapopouhia i te raveraa i tera mau tauiraa. Ua vaiiho hoi outou ia Iehova ia a‘o atu.—Mas. 2:1-5.

15, 16. (a) E nafea tatou ia faufaahia i te ohipa a te mau matahiapo? (b) Eaha te rave ia oaoa te mau matahiapo i te amo i ta ratou hopoia?

15 Ua faatoroa atoa te Mesia i te mau matahiapo no te aupuru i te amuiraa. Te parauhia ra i roto i te Bibilia, e “ô” tera mau taeae. (Eph. 4:8, 11-13) E nafea tatou ia faufaahia i te ohipa a te mau matahiapo? Ma te pee i to ratou faaroo e hi‘oraa e ma te haapao i te mau a‘oraa Bibilia ta ratou e horoa mai. (A taio i te Hebera 13:7, 17.) Mea here na te mau matahiapo ia tatou e te hinaaro ra ratou ia piri atu â tatou ia Iehova. Eaha ïa ta ratou e rave ua mairi ana‘e tatou i te putuputuraa aore ra mea paruparu i roto i te taviniraa? Oioi roa ratou i te hopoi mai i te tauturu. Ma te here, e faaroo e e horoa mai te mau matahiapo i te faaitoitoraa e te a‘oraa paari no roto mai i te Bibilia. Te taa ra anei ia oe e te haapapu atu ra o Iehova i to ’na here na roto ia ratou?

16 A haamana‘o noa e ere i te mea ohie no te mau matahiapo ia a‘o ia tatou. A feruri na i te huru o te peropheta Natana. Ua titauhia ia ’na ia paraparau i te arii Davida o tei huna i ta ’na hara ino mau. (Sam. 2, 12:1-14) E te aposetolo Paulo o tei a‘o ia Petero i te hi‘o-ê-raa i te mau Kerisetiano no te nunaa ê. Ua titauhia ia Paulo i te itoito no te a‘o hoê o na 12 aposetolo a Iesu. (Gal. 2:11-14) Eaha ïa te tia ia rave ia ohie atu â no te mau matahiapo ia horoa mai i te a‘oraa? A faahaehaa, a haamauruuru atu e a farii i te a‘oraa. Na roto ia ratou, te haapapu mai ra o Iehova i to ’na here. Ma te na reira, e faufaahia tatou e e oaoa te mau matahiapo i te amo i ta ratou hopoia.

17. Mea nafea te mau matahiapo i te tautururaa i te tahi tuahine?

17 Te parau ra te tahi tuahine mea fifi no ’na ia farii mea here na Iehova ia ’na no ta ’na i faaruru na mua ’‘e. Ua hepohepo roa o ’na i muri a‘e. Te na ô ra oia: “Ua titauhia ia paraparau vau i te mau matahiapo. Aita ratou i tama‘i aore ra i faahapa mai, ua horoa mai râ i te a‘oraa e ua faaitoito mai ratou. I muri a‘e i te mau putuputuraa, e haere mai iho â hoê  e ani eaha to ’u huru noa ’tu mea ohipa roa ratou. No ’u, eita e tano ia here te Atua ia ’u no ta ’u i rave na mua ’‘e. Ehia a‘enei taime to Iehova faaohiparaa i te amuiraa e te mau matahiapo no te haapapu mai mea here na ’na ia ’u. E pure noa vau eiaha roa vau ia atea ê ia ’na.”

E MAUIUI ROA ’TU Â TATOU IA ORE E FARII I TE A‘O

18, 19. No te aha e mauiui roa ’tu â tatou ia ore e farii i te a‘o? A horoa i te hi‘oraa.

18 Mea mauiui ia a‘ohia tatou. Mea ino roa ’tu râ ia ore tatou e farii i te a‘o no ǒ mai i te Atua. (Heb. 12:11) E huti mai ana‘e i te haapiiraa i te hi‘oraa o Kaina e to te arii Zedekia. I to Iehova iteraa ua hae e ua hinaaro roa Kaina e haapohe i to ’na taeae, ua horoa ’tu oia i teie faaararaa: “Eaha oe i riri ai; e eaha hoi i tuatua ’i to mata na? Ia rave oe i te parau maitai ra, eita anei e itehia mai? e aore i maitai ra, te vai ra te taraehara i te uputa na. E auraro râ oia ia oe, e ei nia ’‘e oe ia ’na.” (Gen. 4:6, 7) Aita Kaina i farii i te a‘o a Iehova, ua haapohe atura i to ’na teina e ua amo i te utua ino roa ’tu â i te roaraa o to ’na oraraa. (Gen. 4:11, 12) Ahani Kaina i faaroo i te Atua, eita ïa oia e mauiui rahi mau.

19 E arii ino e te paruparu mau o Zedekia. E fifi rahi ta to Ierusalema i faaruru i raro a‘e i ta ’na faatereraa. Ehia taime to te peropheta Ieremia faaararaa ia Zedekia ia taui. Ua patoi râ te arii i te a‘o a Iehova e mea peapea mau tei tupu i muri a‘e. (Ier. 52:8-11) No reira, e imi noa o Iehova i to tatou maitai, eita o ’na e hinaaro ia mauiui roa ’tu â tatou.—A taio i te Isaia 48:17, 18.

20. Eaha te tupu no te feia e farii i te a‘o e no tei patoi i te reira?

20 I teie mahana, e rave rahi i roto i teie nei ao o te vahavaha e te haafaufaa ore i te a‘o a te Atua. Fatata roa râ te utua ino mau i te topa i nia i te feia o te patoi i te reira. (Mas. 1:24-31) Area tatou, eaha te tia ia tatou ia rave? Te pahono mai ra o Iehova i roto i te irava tumu o teie haapiiraa: “E faaroo mai i te a‘o ia paari.” Te na ô atoa ra te Maseli 4:13: “E tapea etaeta i te a‘o: eiaha roa e tuua; e vaiiho maite i te reira; o to oe ïa ora.”