Eaha to roto?

Tapura tumu parau

 TUMU PARAU HAAPIIRAA 46

A atuatu i te paruru rahi o to outou faaroo

A atuatu i te paruru rahi o to outou faaroo

“A rave i te paruru rahi o te faaroo.”—EPH. 6:16.

HIMENE 119 E faatupu ana‘e i te faaroo

HAAPOTORAA *

1-2. (a) Ia au i te Ephesia 6:16, no te aha e titauhia ia rave i “te paruru rahi o te faaroo”? (b) Eaha te mau uiraa ta tatou e pahono?

UA RAVE anei outou i “te paruru rahi o te faaroo”? (A taio i te Ephesia 6:16.) Mai te hoê paruru rahi, e nehenehe to outou faaroo e tauturu ia outou ia patoi i te peu faufau, te taparahiraa taata e te mau mea ino atoa a teie nei ao poiri.

2 Te ora nei râ tatou i “te mau mahana hopea” e e tamatahia â to tatou faaroo. (Tim. 2, 3:1) Eaha te titauhia ia rave no te hi‘opoa e faaroo puai anei to tatou? E nafea ia mau maite i to tatou paruru rahi? E pahono tatou i tera nau uiraa.

A HI‘OPOA MAITE I TO OUTOU FAAROO

I muri a‘e i te aroraa, e hi‘opoa maite e e tataî te mau faehau i to ratou paruru (A hi‘o i te paratarafa 3)

3. Eaha ta te mau faehau e rave na no te atuatu i to ratou paruru e no te aha mea faufaa?

3 I tahito, mea pinepine te mau paruru i te tapo‘ihia i te iri puaa. Ia ore te paruru ia haumi e ia tutae auri, i titauhia na ia parai te mau faehau te hinu i nia i to ratou paruru. Mai te peu ua ino rii te paruru, e tataî te faehau te reira ia ineine noa oia no te aroraa. Eaha te haapiiraa no te mau Kerisetiano?

4. No te aha e titauhia ia hi‘opoa tamau i te paruru rahi o to tatou faaroo e e nafea tatou ia na reira?

4 E titau-atoa-hia ia hi‘opoa e ia atuatu tamau i te paruru rahi o to tatou faaroo ia ineine noa tatou no te aroraa. Tei roto te mau Kerisetiano i te hoê aroraa pae varua e o te mau varua ino te enemi. (Eph. 6:10-12) Eita e tia i te  tahi atu ia atuatu i to tatou faaroo! E nafea ia ite ua ineine outou no te aroraa? Na mua, a ani i te tauturu a te Atua na roto i te pure. I muri mai, a farii i ta te Parau a te Atua e faaite atu ra no nia ia outou, oia hoi mai te aha ta te Atua hi‘oraa ia outou. (Heb. 4:12) Te parau ra te Bibilia: “E tiaturi ia Iehova ma to aau atoa ra; eiaha râ e tiaturi i to oe ihora haapao.” (Mas. 3:5, 6) A feruri na i te mau faaotiraa ta outou i rave a‘enei i roto i te tahi tupuraa. I te fifiraa outou i te pae moni, ua haamana‘o anei outou i ta Iehova parau i roto i te Hebera 13:5 “E ore roa vau e vaiiho ia oe, e e ore roa vau e faarue ia oe”? Ua faaitoito anei tera irava ia tiaturi e tauturu iho â Iehova ia outou? Mai te peu e e, e tapao faaite ïa te tamau ra outou i te atuatu i te paruru o to outou faaroo.

5. Eaha ta outou e nehenehe e ite a hi‘opoa maite ai i to outou faaroo?

5 A hi‘opoa maite ai i to outou faaroo, e maere paha outou i ta outou e ite. Peneia‘e, e haro‘aro‘a outou i te hoê paruparu ta outou i ore i haapao a‘enei. Ua tuino paha te mau haapeapearaa, te mau parau haavare e te mana‘o faatoaruaru i to outou faaroo. E nafea outou ia tataî i te paruru rahi o to outou faaroo?

A PATOI I TE MAU HAAPEAPEARAA, TE PARAU HAAVARE E TE MANA‘O FAATOARUARU

6. A horoa i te hi‘oraa o te haapapu e ere te mau haapeapearaa atoa i te mea ino.

6 E ere te mau haapeapearaa atoa i te mea ino. Ei hi‘oraa, mea maitai ia haapeapea te mauruuru ra anei Iehova e o Iesu ia tatou. (Kor. 1, 7:32) Ia rave tatou i te hara, mea tano ia haapeapea e nafea to tatou auhoaraa e te Atua e maitai faahou mai ai. (Sal. 38:18) E haapeapea atoa te Kerisetiano ua mauruuru anei to ’na hoa faaipoipo ia ’na, e te mau metua, i te maitai ïa o to ratou utuafare taatoa. E titau-atoa-hia ia haapeapea tatou no to tatou mau taeae e tuahine i roto i te faaroo.—Kor. 1, 7:33; Kor. 2, 11:28.

7. Ia au i te Maseli 29:25, no te aha eiaha tatou ia mǎta‘u i te taata?

7 E nehenehe râ te mau haapeapearaa e tuino i to tatou faaroo. Peneia‘e, e tapitapi noa tatou no nia i te maa e te ahu. (Mat. 6:31, 32) Eaha ïa te tupu? E imi tatou ia rahi noa ’tu â ta tatou tao‘a aore ra moni. I tera taime, e haaparuparu te reira i to tatou faaroo a mutu atu ai te auhoaraa e o Iehova! (Mar. 4:19; Tim. 1, 6:10) Aore ra, e haapeapea tatou i to vetahi ê mana‘o ia tatou. Eaha ïa te tupu? E haama aore ra e mǎta‘u tatou i te taata, eiaha faahou râ ia Iehova! Ia ore tatou ia topa i roto i tera marei, e titauhia ia taparu ia Iehova ia ho mai i te faaroo puai e te itoito.—A taio i te Maseli 29:25; Luka 17:5.

(A hi‘o i te paratarafa 8) *

8. Mai te aha to tatou huru i mua i te parau haavare e faaino e tia ’i?

8 Te faaohipa ra Satani, “te metua no te haavare,” i te feia i raro a‘e i to ’na mana no te haaparare i te parau haavare no nia ia Iehova e to tatou mau taeae e tuahine Kerisetiano. (Ioa. 8:44) E pia te feia faaino i ta ratou mau parau haavare no nia i ta Iehova faanahonahoraa i nia i te natirara, na roto te afata teata e te tahi atu mau ravea apî. E “te‘a auahi” te reira no ǒ mai ia Satani. (Eph. 6:16) Mai te aha to tatou huru i mua i te parau haavare e faaino e tia ’i? E patoi tatou i te reira! Eaha te tumu? No to tatou tiaturi ia Iehova e i to tatou mau taeae e tuahine. No reira,  a ape i te feia faaino e te haavare! Eiaha atoa e tamata i te ite aore ra i te faatitiaifaro i ta ratou mau parau!

9. Eaha te nehenehe e tupu ia hiti mai te mana‘o faatoaruaru?

9 E nehenehe te mana‘o faatoaruaru e haaparuparu i to tatou faaroo. E tupu iho â te fifi e e titauhia ia faaafaro i te reira. I te tahi râ taime, na te reira paha e faatoaruaru ra i te hoê Kerisetiano. Eiaha râ e vaiiho i to tatou mau fifi ia faaapǐapǐ i to tatou feruriraa! Ia ore tatou e ara, e mo‘e roa ia tatou te tiaturiraa faahiahia ta Iehova i fafau mai. (Apo. 21:3, 4) E nehenehe te mana‘o faatoaruaru e faaiti i to tatou puai a faaea ’tu ai tatou i te tavini ia Iehova. (Mas. 24:10) Auê te peapea ia tupu te reira i nia ia tatou!

10. Eaha te haapiiraa e huti mai i te rata ta te hoê tuahine i papai?

10 A hi‘o na eaha tei tauturu i te hoê tuahine i Marite ia haapuai i to ’na faaroo a aupuru noa ’i i ta ’na tane tei roohia i te ma‘i ino mau. Teie ta ’na i papai i ta tatou pu rahi: “E tupuraa ahoaho mau to mâua o te faatoaruaru mai i te tahi taime, auaa râ mea puai to mâua tiaturiraa no a muri a‘e. Te mauruuru mau nei au i te mau mea atoa i faaineinehia no te haapuai i te faaroo e no te tapea i te hoê feruriraa maitai. Mea hinaaro-mau-hia e mâua tera mau a‘oraa e faaitoitoraa! Na te reira e tauturu mai ra ia tamau i te tavini ia Iehova e ia mau papu noa ’tu te mau faahemaraa a Satani!” Eaha te haapiiraa e huti mai? Noa ’tu e toaruaru tatou, e nehenehe tatou paatoa e tapea i te hoê faaroo puai! E nafea? Eiaha e haamo‘e e faaohipa Satani i to tatou mau fifi no te tamata i to tatou faaroo. E haafaufaa ana‘e i te maa pae varua atoa e e haamana‘o ana‘e e tamahanahana mai Iehova ia tatou!

Te atuatu ra anei outou i te paruru rahi o to outou faaroo? (A hi‘o i te paratarafa 11) *

11. Eaha te mau uiraa e tauturu mai ia hi‘opoa maite i to tatou faaroo?

11 A hi‘opoa maite ai i te paruru rahi o to outou faaroo, ua tapao anei outou i te hoê vahi e titauhia ia tataî? I te mau ava‘e i mairi, ua tia anei ia outou ia faaea i te haapeapea? Ua patoi anei outou i te  mau parau haavare ta te feia faaino i haaparare? Ua puai noa anei to outou faaroo noa ’tu te mana‘o faatoaruaru? Mai te peu e e, e tapao faaite ïa mea puai to outou faaroo! E titauhia râ ia vai ara noa, e imi hoi Satani i te tahi atu mau ravea paari no te faahema ia outou. E hi‘opoa ana‘e hoê o ta ’na mau ravea paari.

A PATOI I TE NOUNOU TAO‘A

12. Eaha te tupu ia nounou tatou i te tao‘a?

12 E nehenehe te nounou tao‘a e tuino i to tatou faaroo a iti atu ai ta tatou e rave no te tavini ia Iehova. Ua parau te aposetolo Paulo: “Aita e taata e tavini ra ei faehau e faaô i roto i te ohipa tapihooraa o te oraraa nei, ia mauruuru hoi te taata tei rave ia ’na ei faehau.” (Tim. 2, 2:4) I tahito, eita te faehau Roma e faatiahia ia faaô i roto i te ohipa tapihooraa. Eaha te tupu ia haafaufaa ore te faehau i tera titauraa?

13. No te aha eiaha te hoê faehau e faaô i roto i te ohipa tapihooraa?

13 A feruri na i to muri nei tupuraa. E haapiipii te hoê pǔpǔ faehau ia ratou ia faaohipa i ta ratou ‘o‘e, ua mairi râ hoê i tera poipoi taatoa. Ua haere oia i te oire no te hoo haere i ta ’na mau tao‘a. I te ahiahi, e rave te pǔpǔ faehau i te taime no te hi‘opoa maite i to ratou paruru e no te faaoi i ta ratou ‘o‘e. Area tei hoo haere i ta ’na mau tao‘a, te faaineine ra ïa i ta ’na e hoo faahou atu i te mahana i muri iho. I te poipoi a‘e, te haere mai nei te mau enemi. I to outou mana‘o, o vai te faehau tei ineine i te aro e te faaoaoa i to ’na fatu? O vai te faehau ta outou e vaiiho ia haere mai i pihai iho ia outou? Te faehau o tei hoo haere i ta ’na mau tao‘a aore ra tei faaineine ia ’na?

14. Ei faehau na te Mesia, eaha ta tatou e haafaufaa na mua roa?

14 Ei faehau na Iehova e na te Mesia, e imi tatou i ta raua farii maitai. Mea faufaa a‘e te reira i te mau mea atoa ta teie nei ao e pûpû mai! E faaherehere ana‘e i to tatou puai e taime no te tavini ia Iehova e no te hi‘opoa maite i te paruru rahi o to tatou faaroo e tae noa ’tu i te tahi  atu mau tuhaa o te haana tama‘i Kerisetiano!

15. Eaha te faaararaa ta Paulo i horoa mai e no te aha?

15 Ia vai ara noa tatou e tia ’i! No te aha? Te faaara mai ra te aposetolo Paulo e atea ê te feia e onoono ra i te titau i te tao‘a rahi i te faaroo e e roohia ratou i te mauiui e rave rahi. (Tim. 1, 6:9, 10) E nehenehe ïa tatou e “atea ê” ia titau tatou i te mau mea ta tatou e ore e hinaaro mau ra. E faatupu to tatou aau i “te hinaaro ino e te maamaa e rave rahi.” Mea faufaa roa ia haamana‘o e faaohipa Satani i tera mau hinaaro no te haaparuparu i to tatou faaroo.

16. I muri a‘e i te taioraa i te Mareko 10:17-22, eaha te mau uiraa e titauhia ia feruri tatou?

16 Te vai ra anei te fifi ia hoo mai e rave rahi tao‘a mai te peu e moni iho â ta tatou no te aufau? No te ite, a feruri na i to muri nei mau uiraa: Noa ’tu e pee ia ’u ia aufau i te hoê tao‘a, e taime e e puai anei râ to ’u no te faaohipa e no te atuatu i te reira? Eita anei au e haafaufaa rahi roa i tera tao‘a? Eita anei au e riro mai te taata apî tei ore i farii i te titau-manihini-raa a Iesu ia tavini atu â i te Atua? (A taio i te Mareko 10:17-22.) Mea hoona a‘e ia tapea i te hoê oraraa haapae e ia faaherehere i to tatou taime e puai no te rave i te hinaaro o te Atua!

 A MAU MAITE I TE PARURU RAHI O TO OUTOU FAAROO

17. Eaha te titauhia ia haamana‘o?

17 A haamana‘o tei roto tatou i te hoê aroraa e e titauhia ia ineine noa no te patoi i te enemi i tera e tera mahana. (Apo. 12:17) Eita to tatou mau taeae e tuahine e nehenehe e amo i te paruru rahi o te faaroo no tatou! Na te taata tataitahi e faaitoito ia mau papu to ’na iho faaroo!

18. I tahito, no te aha te mau faehau e mau maite ai i te paruru i roto i to ratou rima?

18 I tahito, e haafaufaahia te hoê faehau no to ’na itoito i te aroraa. Ia ho‘i râ oia i te fare e aita ta ’na e paruru, e haamaraa ïa no ’na! Ua papai te taata tuatapapa no Roma o Tacite te i‘oa: “E haamaraa mau ia faarue te hoê i to ’na paruru.” No reira te mau faehau atoa e mau maite ai i te paruru i roto i to ratou rima.

Te mau maite ra te hoê tuahine i te paruru rahi o to ’na faaroo ma te feruri maite na roto i te pure i ta ’na e taio ra i roto i te Bibilia, ma te apiti i te mau putuputuraa e ma te tamau i te poro (A hi‘o i te paratarafa 19)

19. E nafea ia mau maite i te paruru rahi o to tatou faaroo i roto i to tatou rima?

19 E nafea ia mau maite i te paruru rahi o to tatou faaroo i roto i to tatou rima? Ma te tamau i te apiti i te mau putuputuraa e i te faaite i te parau mau no nia i te i‘oa o Iehova e ta ’na Faatereraa arii. (Heb. 10:23-25) I tera e tera mahana, e feruri maite ana‘e i ta tatou e taio ra i roto i te Bibilia na roto i te pure e e haapao ana‘e i te mau a‘oraa e aratairaa a te Atua. (Tim. 2, 3:16, 17) Eita roa ïa ta Satani mau ravea paari e manuïa i nia ia tatou! (Isa. 54:17) E paruru mai râ te paruru rahi o to tatou faaroo! E mau papu e e ohipa amui tatou tapono e tapono e to tatou mau taeae e tuahine. Eita noa tatou e mau papu i tera e tera mahana, e fana‘o râ tatou i te haamaitairaa ia tia i te pae o Iesu a upootia roa ’i oia i nia ia Satani e to ’na mau taata!—Apo. 17:14; 20:10.

HIMENE 118 “A faarahi mai i to matou faaroo”

^ par. 5 E mauhaa faufaa roa te paruru no te hoê faehau. E titau-atoa-hia i te Kerisetiano ia atuatu maitai i te paruru rahi o to ’na faaroo. I roto i teie haapiiraa, e ite tatou e nafea ia hi‘opoa e te maitai noa ra te “paruru rahi” o to tatou faaroo.

^ par. 58 FAATAARAA O TE HOHO‘A: Ia pura mai te parau haavare no nia i te mau Ite no Iehova, e tupohe oioi te utuafare i te afata teata.

^ par. 60 FAATAARAA O TE HOHO‘A: I muri mai, i roto i ta ratou haamoriraa utuafare, e faahiti te metua tane i te hoê irava Bibilia o te haapuai i te faaroo o to ’na utuafare.