Eaha to roto?

Tapura tumu parau

Te maitai: E nafea ia faaite?

Te maitai: E nafea ia faaite?

E HINAARO tatou paatoa ia parauhia e taata maitai tatou. E ere roa ’tu râ i te mea ohie ia faaite i tera huru maitai. Eaha te tumu? A tahi, ua haaatihia tatou e te feia “e au ore i te maitai.” (Tim. 2, 3:3) E haapao noa ratou i te mea maitai i to ratou mana‘o a faariro atu ai i “te ino ra, e maitai, e te maitai ra, e ino.” (Isa. 5:20) A piti, e mea fifi atoa ia faaite i te maitai no to tatou huru oraraa tahito e huru tia ore. E tae roa paha tatou i te mana‘o mai ia Anne * tei tavini maoro ia Iehova. Te na ô ra oia: “Aita vau e mana‘o ra e taata maitai au.”

E nehenehe atoa tatou e faaite i te maitai maoti te tauturu a te varua mo‘a. E hi‘opoa ana‘e eaha mau na te maitai e e nafea tatou ia faaite maite i tera huru maitai o te Atua.

EAHA MAU NA TE MAITAI?

Aore e ino i roto i te maitai, e faufaa-atoa-hia vetahi ê i te maitai e ravehia no ratou. E imi noa te taata maitai e nafea ia tauturu e ia oaoa vetahi ê.

Ua ineine te tahi mau taata i te rave i te maitai no to ratou fetii e hoa. O ratou ana‘e râ te titauhia ia faaite tatou i te maitai? Parau mau, te na ô ra te Bibilia: “Aita mau e taata parau-tia i te fenua nei, o tei rave i te parau maitai, e aore roa e hara.” (Koh. 7:20) E ua faaite tia roa te aposetolo Paulo: “Ua ite hoi au e i roto ia ’u, i roto i to ’u nei tino, aita hoê a‘e mea maitai.” (Roma 7:18) Mea faufaa roa ïa ia fariu tatou i te Atua maitai no te ite e nafea ia rave i te maitai.

“E MAITAI TO OE, E IEHOVA”

Na Iehova i haamau i te mau ture aveia no nia i te maitai. Te parauhia ra no ’na: “E maitai to oe, e Iehova . . . e haapii mai i ta oe ra mau ture.” (Sal. 119:68) E itehia te maitai o Iehova i roto i to ’na huru e ta ’na mau ohipa atoa.

E maitai to Iehova. E itehia te maitai o Iehova i roto i to ’na mau huru maitatai atoa. Ua parau Iehova ia Mose: “E tuu vau i te maitai atoa na ’u ra na mua ia oe.” A haere ai te hanahana e te maitai o Iehova na mua ia ’na, faaroo ihora Mose i te hoê reo i te parauraa: “O Iehova, o Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ’tu te ui; e te faaore i te parau-tia ore, e te hara, e te ino; e e ore e parau i te taata ino e e taata ino ore.” (Exo. 33:19; 34:6, 7) Noa ’tu o Iesu te taata maitai roa ’‘e i nia i te fenua, ua parau oia: “Aita hoê a‘e e mea maitai, o te Atua ana‘e râ.”—Luka 18:19.

Te itehia ra to Iehova maitai i roto i te mau mea ta ’na i poiete

E ohipa maitai ta Iehova. E itehia te maitai i roto i te mau ohipa atoa a te Atua. Te parauhia ra no Iehova: “E ohipa maitai ta  ’na.” (Sal. 111:3) Mea nafea Iehova i te faaiteraa i to ’na maitai? Ma te ore e maitiiti i te taata e ma te horoa ’tu i te ora e te mau mea atoa no te oaoa. (Ohi. 14:17) E faaore atoa Iehova i ta tatou mau hara. Ua na ô te papai Salamo: “Te maitai ra hoi oe, e te Fatu, e ua tia ia oe te faaore mai i te hara nei.” (Sal. 86:5) Te haapapu ra te reira aore roa e maitai ta Iehova e tapea i te feia taiva ore.—Sal. 84:11.

A ‘HAAPII I TE MAITAI’

I te mea ua hamanihia tatou ia au i te huru o te Atua, e nehenehe iho â tatou e riro ei taata maitai e e rave i te maitai. (Gen. 1:27) Te faaitoito ra râ te Atua i ta ’na mau tavini ia ‘haapii i te maitai.’ (Isa. 1:17) Teie e toru ravea o te tauturu mai ia haapii i te maitai.

A tahi, e ani ana‘e i te varua mo‘a no te faaite i te maitai ma te haavare ore. (Gal. 5:22) Na taua puai ohipa ra o te Atua e tauturu mai ia hinaaro i te maitai e ia faufau atu i te ino. (Roma 12:9) Te faaite ra te Bibilia e tauturu mai Iehova ia tatou “ia parau e ia rave noa i te mea maitai.”—Tes. 2, 2:16, 17.

A piti, e taio ana‘e i te Parau a te Atua. I roto hoi Iehova e haapii mai ai i “te mau e‘a maitatai atoa” e e faaineine mai ai “no te mau ohipa maitatai atoa.” (Mas. 2:9; Tim. 2, 3:17) Ma te taio e te feruri maite i te Bibilia, e haapue tatou i te mau poe maitatai no nia i te Atua e to ’na hinaaro i roto i to tatou aau a faufaahia ’tu ai tatou i muri a‘e.—Luka 6:45; Eph. 5:9.

A toru, e tutava ana‘e i te ‘pee i te maitai.’ (Ioa. 3, 11) E titauhia ia hi‘opoa i te mau hi‘oraa maitai i roto i te Bibilia. To Iehova e to Iesu na mua roa, oia atoa râ to te tahi atu mau taata tei rave i te maitai mai ia Tabita e Baranaba. (Ohi. 9:36; 11:22-24) E hi‘opoa maite ana‘e i ta ratou i rave no te tauturu ia vetahi ê e no te faaite i te maitai. Mea na reira tatou e taa ’i e nafea ia rave atoa i te maitai no to tatou utuafare e ta tatou amuiraa.

Te vai atoa nei te mau Kerisetiano o teie tau o te rave ra i te maitai. A feruri na i te mau matahiapo e haa ra ma te itoito i roto i te amuiraa, e feia ratou o “te au i te rave i te mau ohipa maitatai.” Na roto i te parau e te ohipa, te haapii atoa ra te mau tuahine taiva ore i “te mea maitai. “ (Tito 1:8;  2:3) Te parau ra te tuahine Roslyn: “Te vai ra hoê hoa to ’u o te tutava ra i te tauturu e te faaitoito i te mau mero o te amuiraa. E feruri o ’na i to ratou tupuraa e e pinepine oia i te horoa i te tao‘a rii aore ra i te tauturu. E tuahine maitai mau â o ’na!”

Te faaitoito ra Iehova i to ’na nunaa ia “imi i te maitai.” (Am. 5:14) E poihere ïa tatou i ta ’na mau ture aveia e e noaa atoa mai te itoito no te rave i te mea maitai.

Ei huru e ei ohipa maitai ta tatou

Eita e titauhia te ohipa rahi aore ra faahiahia roa no te rave i te maitai. Ia tanu tatou i te hoê tumu raau, eita tatou e pîpî rahi i te pape hoê noa taime. Mea maitai a‘e maa pape noa, e rave rahi râ taime. E rave atoa tatou i te maitai no vetahi ê na roto e rave rahi ohipa rii!

Te faaitoito ra te Bibilia ia “ineine” tatou i te rave i te maitai. (Tim. 2, 2:21; Tito 3:1) Ma te ite i te tupuraa o vetahi ê, e nehenehe tatou e feruri i te mau ravea ia maitai to tatou taata tupu e ia puai to ratou faaroo. (Roma 15:2) E titauhia paha ia faaohipa i ta tatou mau faufaa. (Mas. 3:27) Peneia‘e, ma te titau manihini atu no te amu i te tahi maa rii aore ra no te horoa i te faaitoitoraa. No te faaite i te maitai i tei ma‘ihia, no te aha e ore ai e papai i te tahi parau rii, e niuniu atu aore ra e farerei atu i to ratou fare? Mea rahi mau te ravea no te faaitoito ia vetahi ê, “ei parau maitai noa râ no te patu i te taime e au, a faufaahia ’tu ai te feia e faaroo ra.”—Eph. 4:29.

Mai ia Iehova, eiaha tatou ia maitiiti i te taata. E imi ana‘e râ i te ravea no te rave i te maitai no ratou. Te tahi ravea faahiahia mau, o te faaiteraa ïa i te poroi o te Faatereraa arii i te mau taata atoa. Mai ta Iesu i faaue, e titau-atoa-hia ia rave i te maitai no te feia e hae ia tatou. (Luka 6:27) “Aita e ture o te faahapa” i te hamani maitai e te maitai! (Gal. 5:22, 23) Noa ’tu te patoiraa e te ati, e nehenehe ta tatou mau ohipa maitatai e aratai i te taata i te parau mau a faahanahana ’tu ai ratou i te Atua.—Pet. 1, 3:16, 17.

E HAAMAITAIHIA TEI RAVE I TE MAITAI

E haamaitaihia “te taata maitai ra i te hopea o ta ’na ra ohipa.” (Mas. 14:14) Ma te rave i te maitai no vetahi ê, e na reira-atoa-hia mai tatou. (Mas. 14:22) E noa ’tu eita te taata e faaho‘i mai na roto i te maitai, e nehenehe ta tatou mau ohipa maitatai e tamǎrû i te aau o te taata a pee atu ai to ratou riri.—Roma 12:20, nota.

E nehenehe e rave rahi e haapapu ua faufaahia ratou i te raveraa i te maitai e i te faufauraa i te ino. O Nancy hoê o ratou. E oraraa haapaoraa ore to ’na na mua ’‘e, e vahine faatura ore e te rave atoa i te peu taotoraa tia ore. Tera râ, te faataa ra oia: “I to ’u haapiiraa e haapao-maite-raa i ta te Atua mau ture aveia no nia i te maitai, ua ite mai au i te oaoa. E nehenehe au e parau e haerea tura to ’u i teie nei e e taata maitai au!”

Te tumu faufaa roa ’‘e e hinaaro ai tatou e rave i te maitai, ia oaoa ïa te aau o Iehova. E ite hoi oia ia faatupu tatou i te mau ohipa e mana‘o maitatai! (Eph. 6:7, 8) Eaha te haamaitairaa ia na reira tatou? Ia au i te Bibilia, e “itehia mai te taata maitai e Iehova ra.” (Mas. 12:2) E tutava ana‘e ïa i te rave i te maitai! Ua fafau Iehova i te horoa i ‘te hanahana e te tura e te hau no tei rave i te mea maitai.’—Roma 2:10.

^ par. 2 Ua tauihia te tahi mau i‘oa.