Eaha to roto?

Tapura tumu parau

AAMU

Ruperupe maoti te faufaa Kerisetiano i tufahia mai

Ruperupe maoti te faufaa Kerisetiano i tufahia mai

I ROTO i te poiri, te tahe noa ra te tahora puai o Niger i mua ia matou, mea tahe puai e ua piri i te 1,6 km to ˈna aano. Te uˈana noa ˈtu ra te tamaˈi tivira i Nigéria, mea atâta ïa ia haere i te tahi atu pae o te tahora Niger. Ua titauhia râ ia haere matou, hau atu i te hoê noa taime. Mea nafea vau i te taeraa i reira? E faatia ˈtu vau eaha tei tupu hou vau a fanauhia mai ai.

I 1913, ua bapetizohia to ˈu metua tane, John Mills, i te oire o New York i te 25 o to ˈna matahiti. Na taeae Russell i vauvau i te oreroraa parau o te bapetizoraa. I muri iti aˈe, reva ˈtura papa i Trinité, i reira oia i te faaipoiporaa ia Constance Farmer, hoê o na Feia haapii Bibilia itoito mau. I tauturu na papa i to ˈna hoa ra o William Brown no te faaite i te “Hohoˈa-Darama o te Poieteraa.” Ua na reira raua e reva noa ˈtu te utuafare Brown i roto i ta raua tuhaa taviniraa apî i Afirika tooa o te râ i 1923. Ua faaea papa e o mama, o tei fanaˈo i te tiaturiraa e haere i te raˈi, i Trinité.

E METUA HERE

E iva tamarii ta to ˈu na metua i fanau mai, ua topa raua i te tamarii matahiapo i te iˈoa Rutherford, mai te peretiteni o te Watch Tower Bible and Tract Society i taua tau ra. I te fanauraahia vau i te 30 no Titema 1922, topahia ˈtura vau i to Clayton Woodworth iˈoa, te taata faaineine i te mau tumu parau o Te tau auro (Beretane) (A ara mai na! i teie nei). E haapiiraa au noa ta matou paatoa i fanaˈo i to matou na metua ra, o te mau fa pae varua iho â râ ta raua i haafaufaa. Mea aravihi roa mama no te haaferuri i nia i te mau Papai. Mea au roa na papa e faatia mai i te mau aamu Bibilia, ma te faaohipa i to ˈna tino taatoa no te faaoraora i te aamu.

Ua manuïa ta raua mau tutavaraa. E toru matou i roto i na tamaroa e pae tei apiti i te Haapiiraa no Gileada. Ua rave e toru o to matou nau tuahine i te taviniraa pionie e rave rahi matahiti i Trinité e Tobago. Na roto i ta raua haapiiraa e to raua hiˈoraa maitai, ua tanu to matou na metua ia matou “i roto i te fare o Iehova.” Ua tauturu ta raua mau faaitoitoraa ia matou ia faaea i reira e ia ruperupe “i roto i te mau hezere [aore ra aua] o to tatou Atua.”—Sal. 92:13.

Ua faaohipahia to matou fare ei vahi putuputuraa no te pororaa. I putuputu na te mau pionie i reira e mea pinepine ratou i te tauaparau no nia ia taeae George Young, te hoê mitionare no Kanada tei ratere i Trinité. I paraparau na to ˈu na metua no nia i to raua na hoa tavini, te utuafare Brown, tei Afirika tooa o te râ i taua tau ra. Ua turai tera mau mea atoa ia ˈu ia haamata i te poro i te ahuru o to ˈu matahiti.

TA ˈU TUHAA MATAMUA

E au ta matou mau vea i te auahi i taua mau mahana ra, i faahapa na te reira i te haapaoraa hape, te tapihooraa nounou e te poritita piˈo. No reira, i 1936, turai atura te pǔpǔ ekalesiatiko i te tavana rahi o Trinité ia opani i te mau papai atoa a te Watch Tower. Tahuna ihora matou i te mau papai. Ua faaohipa noa râ matou i te reira e pau roa ˈtu ai. I faatupu na matou i te taahiraa no te faaara i te taata, e te tahi mau tere na nia i te pereoo taataahi, ma te faaohipa i te api parau e te iri papai. Na muri i te pǔpǔ pororaa e te pereoo haapurororaa no te oire o Tunapuna, ua tae roa matou i te poro na te mau vahi moˈemoˈe roa ˈˈe o Trinité. Mea faahiahia roa! Ua turai teie mau ohipa pae varua atoa ia ˈu ia bapetizo i te 16 o to ˈu matahiti.

Te pǔpǔ pororaa e te pereoo haapurororaa no Tunapuna

Na roto i teie mau tupuraa atoa na mua ˈtu e ta to ˈu utuafare i rave i roto i te taviniraa, hinaaro roa ˈtura vau e riro ei mitionare. Ua vai noa tera hinaaro to ˈu a haere ai au i Aruba i 1944 e apiti atu ia taeae Edmund Cummings. Ua faahiahia roa mâua i te haaputuputuraa mai hoê ahuru taata no te Oroa haamanaˈoraa i 1945. I te matahiti i muri iho, haamauhia ˈtura te amuiraa matamua o taua motu ra.

I pihai iho ia Oris, ruperupe faahou atura to ˈu oraraa

Aita i maoro roa, poro atura vau ma te faanaho ore i to ˈu hoa ohipa o Oris Williams. Ua taora mai Oris i te tahi mau parau patoi no te turu i te mau haapiiraa tei haapiihia ˈtu ia ˈna. Na roto râ i te hoê haapiiraa Bibilia, taa ihora ia ˈna eaha ta te Parau a te Atua e haapii mau ra e bapetizohia ˈtura oia i te 5 no Tenuare 1947. I muri iho, ua here roa mâua ia mâua e ua faaipoipo mâua. Rave atura oia i te taviniraa pionie i Novema 1950. I pihai iho ia Oris, ruperupe faahou atura to ˈu oraraa.

MEA RAHI TE OHIPA I NIGÉRIA

I 1955, ua titau-manihini-hia mâua ia apiti i te Haapiiraa no Gileada. No tera haamaitairaa, ua faarue mâua Oris i ta mâua ohipa, ua hoo i to mâua fare e te tahi mau faufaa, e faarue atura mâua ia Aruba. I te 29 no Tiurai 1956, ua faatuitehia mâua i te 27raa o te piha haapiiraa no Gileada e ua tonohia mâua i Nigéria.

E te utuafare o te Betela i Lagos, Nigéria i 1957

A feruri ai Oris i na matahiti i mairi, ua parau oia: “E nehenehe ta te varua o Iehova e tauturu i te hoê taata ia faaau noa i te mau taime maitai e te mau taime fifi o te hoê oraraa mitionare. Taa ê atu i ta ˈu tane, aita roa ˈtu vau i hinaaro e riro ei mitionare. Fanau i te tamarii e e ora i roto i to ˈu iho fare, tera ta ˈu i hinaaro. Ua taui râ vau i to ˈu huru feruriraa i te taaraa ia ˈu e e taime ru teie, e tia ia poro i te parau apî oaoa. I te taime a faatuitehia ˈi mâua i te Haapiiraa no Gileada, ua ineine mau â vau no te haere e faaite i te parau apî oaoa ei mitionare. A pauma ˈi mâua i nia i te pahi Queen Mary, na ô maira Worth Thornton, no te piha ohipa a taeae Knorr: ‘Ia maitai to orua tere!’ Ua parau mai oia e e tavini mâua i te Betela. Autâ ihora ïa vau: ‘Auê hoi e!’ Ua taui oioi râ vau i to ˈu feruriraa e ua au roa ˈtura vau i te Betela. Mea rahi te ohipa ta ˈu i rave i reira. O te ohipa farii taata ta ˈu i au roa ˈˈe. Mea au na ˈu te taata, e i tera ohipa, mea rahi te taeae no Nigéria ta ˈu i farerei. Mea rahi o tei tae mai i ǒ nei ua î i te repo, ua rohirohi, ua poihâ e ua poia. Ua au roa vau i te haapaoraa ˈtu ia ratou a horoa ˈtu ai i te tahi mea e amuamu e e inu. E tuhaa o te taviniraa moˈa a Iehova tera mau ohipa atoa, e na tera i faaoaoa ia ˈu.” Maoti te mau tuhaa taviniraa atoa i ruperupe ai mâua.

I te hoê rururaa fetii i Trinité i 1961, ua faatia mai taeae Brown i te tahi o ta ˈna mau aamu faahiahia roa i Afirika. Faaite atura vau i te maraaraa i Nigéria. Tauahi maira taeae Brown ia ˈu e na ô atura ia papa: “Johnny, aita oe i tae aˈenei i Afirika, ua tae râ o Woodworth!” Pahono maira ïa papa: “A tamau â Worth, a tamau â!” Na roto i teie mau parau faaitoito a teie mau tane paari i te pae varua, ua puai atu â to ˈu hinaaro e rave maite â i ta ˈu taviniraa.

Ua faaitoito rahi mai William Brown “Bibilia” e ta ˈna vahine o Antonia ia mâua

I 1962, ua fanaˈo faahou vau i te hoê faaineineraa i te 37raa o te piha haapiiraa no Gileada hoê ahuru avaˈe te maoro. Ua apiti taeae Wilfred Gooch, te tiaau o te amaa i Nigéria i taua tau ra, i te 38raa o te piha haapiiraa e tonohia ˈtura oia i Beretane. Mea na reira te hopoia e tiaau i te amaa no Nigéria i te tuuraahia mai ia ˈu ra. Mai ia taeae Brown, mea rahi te tere ta ˈu i haere, ua farerei au i te mau taeae no Nigéria e ua here roa vau ia ratou. Noa ˈtu te ere ra ratou i te mau mea ta te mau fenua navai e fanaˈo ra, te haapapu ra to ratou huru oaoa e mauruuru e e ere na te moni aore ra te faufaa e faaoaoa mau i te taata. Noa ˈtu to ratou oraraa haihai, mea faahiahia roa ia ite ia ratou mea mâ, mea nehenehe maitai e mea tura i te mau putuputuraa. Ia haere ratou i te mau tairururaa, mea rahi o te na nia mai i te pereoo pani e te bolekaja * (e pereoo rarahi faauta taata hamanihia e ratou). Mea pinepine i te itehia i nia i taua mau pereoo ra i te tahi mau papai. Hoê hiˈoraa teie: “E riro te mau topata pape ei moana puai.”

E parau mau iho â tera parau! Mea faufaa te mau tutavaraa atoa, e ua tuu atoa ˈtu mâua i ta mâua. I 1974, o Nigéria te fenua matamua tei naea te faito 100 000 feia poro taa ê atu i te Hau Amui no Marite. Ua ruperupe roa te ohipa!

I ropu i tera maraaraa, tupu ihora te tamaˈi tivira i Nigéria mai 1967 e tae atu i 1970. E rave rahi avaˈe aita e parau apî i rotopu i te mau taeae i Biafra i te tahi atu pae o te tahora Niger e te piha ohipa a te amaa. Ua titau-noa-hia ia faatae atu matou i te maa pae varua na ratou. Mai tei faahitihia i te omuaraa, na roto i te pure e te tiaturi ia Iehova, ua haere matou i te tahi atu pae o te tahora e rave rahi taime.

Te haamanaˈo maitai ra vau i tera mau tere atâta i te tahi atu pae o te Niger, mai pohe matou i te mau faehau e pupuhi haere noa ra, i te maˈi e te tahi atu mau ati. Mea atâta ia topa i roto i te rima o te mau faehau a te hau, mea atâta ˈtu â râ ia tomo na te mau otia o Biafra, o tei opanihia. I te hoê taime, haere atura vau i te tahi atu pae o te tahora puai o Niger i te po, na nia i te hoê huru vaa, mai Asaba e tae atu i Onitsha, e haere atura vau e faaitoito i te mau tiaau i Enugu. Ua haapuai te hoê tere ê atu i te mau matahiapo a faahepohia ˈi ia tupohehia te mau mori i Aba. I Port Harcourt, ua faaoti oioi noa ta matou putuputuraa na roto i te pure, a tomo ai te mau faehau a te hau na te mau aua paruru a to Biafra i rapae mai i te oire.

Ua riro tera mau putuputuraa ei ravea no te haapapu i to tatou mau taeae i to Iehova here ia ratou e no te horoa atoa ˈtu i te tahi mau aˈoraa hinaaro-mau-hia no nia i te tiaraa amui ore e te auhoêraa. Ua matara mai to tatou mau taeae no Nigéria i rapae i tera tamaˈi riaria mau ma te manuïa. Ua faatupu ratou i te here puai aˈe i te hae e vai ra i rotopu i te mau nunaa taata, e ua tapea ratou i to ratou auhoêraa Kerisetiano. Auê haamaitairaa no ˈu i te apitiraa ˈtu ia ratou i roto i tera taime ati mau!

I 1969, o taeae Milton Henschel te peretiteni o te tairururaa nunaa rau “Hau i nia i te fenua” i te Yankee Stadium i New York, e ei mono no ˈna, mea rahi ta ˈu i haapii ia ˈna ra. Ua tano maitai te reira no te mea i 1970, ua faatupu matou i te tairururaa nunaa rau “Te taata ta te Atua e farii” i Lagos i Nigéria. No oti noa iho nei te tamaˈi tivira. Mea papu e maoti te haamaitairaa a Iehova i manuïa ˈi teie tairururaa. Ua naea roa te faito 17 reo i taua tairururaa ra, e e 121 128 taata tei putuputu mai. Ua mataitai taeae Knorr, taeae Henschel e te tahi atu mau ratere no Marite e Beretane o tei na nia mai i te manureva faataahia, hoê o na bapetizoraa Kerisetiano rahi roa ˈˈe mai te tau o te Penetekose: 3 775 pǐpǐ apî! O te faaineineraa o teie tairururaa paha te taime ohipa roa ˈˈe o to ˈu oraraa. Ua maraa roa ino te numera feia poro!

E 121 128 taata tei apiti mai i te tairururaa nunaa rau “Te taata ta te Atua e farii” na roto e 17 reo, oia atoa te reo Igbo

I te roaraa o na 30 matahiti i Nigéria, ua au roa vau i te taviniraa i te tahi mau taime ei tiaau ratere e ei tiaau ratere amaa i Afirika tooa o te râ. Ua mauruuru te mau mitionare i te haapao maitai e te faaitoitoraa ta ratou tataitahi i fanaˈo. Mea au mau ia haere e tamahanahana ia ratou ma te parau atu e aita ratou e haamoˈehia ra! Ua haapii mai teie ohipa ia ˈu e ia faaite tatou i te haapao maitai ia vetahi ê, e tauturu te reira ia ratou ia ruperupe e ia tapea i te puai e te auhoêraa o ta Iehova faanahonahoraa.

Maoti noa ta Iehova tauturu i nehenehe ai matou e faaruru i te mau ati ta te tamaˈi tivira e te maˈi i faatupu. Ua ite mau â matou i te haamaitairaa a Iehova. Teie ta Oris i parau:

“E rave rahi taime mâua i te rooraahia i te maˈi malaria. I te hoê taime, ua afaihia Worth i te fare maˈi i Lagos, ua moˈe to ˈna hiroa. Ua parauhia mai ia ˈu e eita oia e ora mai. Ua ora mai râ! I te maitairaa mai oia, paraparau atura oia no nia i te Faatereraa arii a te Atua i te tuati maˈi o tei haapao ia ˈna. I muri aˈe, haere aˈera mâua Worth e farerei ia Nwambiwe te tuati, no te tauaparau faahou no nia i te Bibilia. Ua farii oia i te parau mau e riro maira oia i muri aˈe ei matahiapo i Aba. Ua manuïa atoa ta ˈu mau tutavaraa no te tauturu i te taata e rave rahi, oia atoa te mau Mahometa papu, ia riro ei tavini taiva ore na Iehova. Ua oaoa roa mâua i te farereiraa i te feia no Nigéria. Ua here roa mâua ia ratou, ua au roa atoa mâua i to ratou taˈere, ta ratou mau peu tumu e to ratou reo.”

Teie te tahi atu haapiiraa: ia ruperupe mâua i roto i ta mâua tuhaa taviniraa i te fenua ê, ua titauhia ia haapii mâua ia here i to tatou mau taeae e tuahine aita e hiˈoraa mea taa ê to ratou taˈere i to mâua.

TUHAA TAVINIRAA APÎ

I muri aˈe i te taviniraa i te Betela o Nigéria, i 1987, ua tonohia mâua ei mitionare no te haere e poro i te motu nehenehe o Sainte-Lucie i Caraïbes. Mea au roa teie tuhaa taviniraa. Mea taa ê râ te mau fifi i reira. I Afirika, e faaipoipo te hoê tane i e rave rahi vahine. Area i ǒ nei i Sainte-Lucie, e ora noa ïa e piti hoa ma te ore e faaipoipo. Ua turai te Parau a te Atua i e rave rahi o ta mâua mau piahi Bibilia ia rave i te mau tauiraa e titauhia ra ia ratou.

Ua here mau â vau ia Oris i te roaraa o na 68 matahiti faaipoiporaa

A paruparu mǎrû ai te tino no te matahiti paari, ma te here, ua faahaere te Tino aratai ia mâua i te pu rahi i Brooklyn, New York, Marite i 2005. Te haamauruuru nei au ia Iehova no Oris i te mau mahana atoa. Ua pohe oia i 2015, e e ere mea ohie ia faaruru i tera tupuraa. Ua riro oia ei hoa maitai roa. E vahine faaipoipo here mau oia. Ua here mau â vau ia ˈna i te roaraa o na 68 matahiti i te faaearaa mâua. Ua taa ia mâua e ia oaoa noa i roto i te faaipoiporaa e te amuiraa, mea titauhia ia faatura i te upoo, ia faaore noa i te hapa, ia vai haehaa e ia faaite i te mau huru maitatai o te varua.

Ia tupu te inoino aore ra te mea e faatoaruaru ia mâua, e tiatonu mâua ia Iehova ia tauturu mai oia ia ore ta mâua mau haapaeraa ia mâuˈa. A faatano-noa-hia ˈi to mâua feruriraa, ua ite mâua i te mau mea i te haere-noa-raa i te maitairaa i te mau taime atoa, e to mua â te mea maitai roa ˈˈe!—Isa. 60:17; Kor. 2, 13:11.

I Trinité e Tobago, ua haamaitai Iehova i te ohipa a to ˈu na metua e vetahi atu, inaha ia au i te mau numera hopea, e 9 892 tei apiti mai i te haamoriraa mau. I Aruba, mea rahi tei rohi no te haapuai i te amuiraa matamua i reira vau na mua ˈˈe. E 14 amuiraa ruperupe i teie nei i tera motu. E i Nigéria, ua maraa te numera o te feia poro e ua naea i te faito 381 398. E i nia i te motu o Sainte-Lucie, e 783 ïa feia poro o te paturu ra i te Faatereraa arii a Iehova.

E 90 tiahapa matahiti to ˈu i teie nei. Te na ô ra te Salamo 92:14 no nia i tei tanuhia i roto i te fare o Iehova: “E hotu â ïa e tae noa ˈtu i te paariraa ra; e î i te tapau, e te vai ota noa.” E mauruuru rahi to ˈu no te oraraa ta ˈu i fanaˈo i roto i te taviniraa ia Iehova. Ua faaitoito mai te faufaa Kerisetiano ruperupe tei tufahia mai ia ˈu ia tavini maite ia Iehova. I roto i to ˈna here taiva ore, ua farii Iehova ia “ruperupe [au] i roto i te mau hezere [aore ra aua] o [to ˈu] Atua.”—Sal. 92:13.

^ A hiˈo i te A ara mai na! o te 8 no Tiurai 1972, api 24-26 (Farani).